۱پطرس 3:15 - Gilaki New Testament

¹⁵ بلکی شیمی خأطر جم بٚبه و خودتأنَ مسیحٚ خوداوندَ بیسپأرید و اگه اینفر شیمی جَا عیلّت اَ اومید و ایمأنَ وأوٚرسِه، حأضیر بیبید کی اَدب و ایحترأمٚ کأمیلٚ اَمرأ اونی جوأبَ بدید.

کیتاب مقدّس به گیلکی (رشتی)

¹⁵ وأستی شیمی دیلٚ دورون مسیحَ به عنوانٚ خوداوند، موقدّس بدأنید. همیشه آماده بیبید هر کی شیمی جأ وأورسه چره اومیدوار ایسیدی، اونٚ جوابَ بدید ولی مولایمت و خوداترسی اَمرأ.

کتاب مقدس به زبان گیلکی - گویش شرقی

¹⁵ بلکی شیمئه دیل مئن خداوند مسیحه قدوس به حیساب بأرین و اونه احترؤم بنین و همیشک حاضیر ببین تا هرکی او امید علته کی شیمئه مئن دره وأپورسه، اونه آؤجا بدین، البته نرمی و احترؤم همرأ.

کتاب مقدس به زبان گیلکی - گویش رشت و غرب گیلان

¹⁵ بلکی شیمی دیل درون خداونْد مسیحَ، قدوس بشمارید و اونَ احترام بَنید و همیشک آماده بیبید تا هرکی اُ اُمیدِ علتَ کی شیمی درون نَئه واورسه، اونَ جواب بدید، البت احترام و نرمی امرا.

۱پطرس 3:15 Iomraidhean Croise

اعمالٚ رسولأن 21:39

پولس جوأب بٚدأ: «نه، من یوهودیم، قیلیقیه طرسوسٚ شینم، او شهر کی معروف ایسه. خأهیش کونم وئألی کی چنتأ کلمه گب اَ مردومٚ اَمرأ بٚزٚنم.»

اعمالٚ رسولأن 24:25

ولی وختی جٚه عیدألت و صبر و آینده قیضأوت گب بٚزِه، فِلیکس زهله بوکود و پولسَ بوگفته: «اَسه وٚسته! هر وخت مونأسب تشخیص بٚدأم، تی دونبأل اوسه کونم.»

کولسیان 1:23

ولی اَن بٚشرطی به کی دائیم اَ حِئقتٚ میأن قأیمٚ ایمأن بٚدأرید و اونٚ میأن پأ برجأ بئیسید و ولأنید او اومید کی اینجیلٚ پیغأمٚ دورون جوخوفته، سوستٚ بٚه. اَن هو اینجیل ایسه کی شیمی گوش فأرٚسِه و اَسأیٚم آسمأنٚ جیر همٚتأنٚ رِه وأگویا به و من پولس، اونٚ غولأم بوبوستم.

کولسیان 1:27

چون خودا تصمیم بیگیفت کی اَشأن بفأمٚد کی مسیحٚ پور جلالٚ ثروٚت، شومأن غیرٚیوهودیأنٚ شینم ایسه و او رأز اَنه کی:«مسیح شیمی وجودٚ دورون شیمی پورشوکو اومیده!»

کولسیان 1:5

شیمی اَ ایمأن و محبت، اَنٚ وأسی ایسه کی جٚه هو اوّل کی اینجیلٚ رأس‌رأسِی پیغأمَ بشتأوستید، آسمأنی خوشیأنَ دیل دٚوٚستید.

کولسیان 4:6

شیمی گبأن همیشٚک فیضٚ جَا پور و دیلچسب بٚبه و اَندر نمک بٚدأره کی بدأنید هرکی‌یَ چوطو جوأب بدید.

تیتوس 1:2

اَ حِئقت اَشأنَ ایطمینأن دِهه کی همیشٚکی زٚندیگی‌یَ دأرٚده، او زٚندیگی‌ کی او خودا کی دورُغ نیگه، جٚه اَزل اونی وعده‌یَ بدأبو

عبرأنیأن 3:6

ولی مسیح «پٚسرٚ» موقأمٚ میأن ایسأ کی تومأمٚ خودا خأنه‌ ایختیأرَ دأره. و اَ «خأنه» اَمأن ایمأندأرأن ایسیم، اَ شرطٚ اَمرأ کی اَمی جورأتَ بٚدأریم و او اومیدٚ دورون کی در مسیح دأریم، پأبرجأ و قأیم بیئسیم.

عبرأنیأن 6:1

پس، بأیید جٚه اوّلی آموجه‌یأن دروأره‌یٚ مسیح دٚوأریم، و روحأنی کأرأنٚ فأمٚستٚن و درک کودنٚ میأن، پیلّه بوستنٚ ور پیش دٚکفیم. گومأن کونم ایحتیأج نییٚه ایوأردِه، دروأره‌یٚ موهیم بوستنٚ توبه‌یٚ کأمیل، جٚه کأرأنی کی مرگٚ ور بٚرٚده، و خودایَ ایمأن دأشتٚنٚ رِه، گب بٚزنیم.

۱پطرس 1:17

شیمی خأطر بمأنه کی شیمی آسمأنی پئر خودا، کی دوعأ اَمرأ شیمی دٚسَ اونی ور درأزٚ کونیدی، دأوری روجأنٚ وخت هیکسٚ جأنبدأری نأیِه بلکی عأدیلأنه هر کی کردکأرأنَ قیضأوت کونه. پس تأ او زمأتی کی اَ دونیأ دورونی ایسأیید خودا جَا حیسأب بردنٚ اَمرأ زٚندیگی بوکونید.

۱پطرس 3:2

چونکی ایتأ زنأی خوروم کردکأر کی ایحترأم اَمرأ بٚبه، بِیتر اونی مردأکٚ دیل دورونی نیشینه تأ او گبأنی کی دروأره‌یٚ مسیح بٚبه.

۱پطرس 3:4

بلکی وئألید شیمی بأطین و خُلق و خو زیبا بٚبه. خودتأنٚ بأطینٚ ایتأ ثأبیت زیبأیی اَمرأ ینی خُلق و خویٚ آرأم و مهرٚوأن اَمرأ کی خودا دوس دأره، بزک دوزک بوکونید.