Jɛremaya 49:19 - EBƆRƐ BE KAWƆL

¹⁹ Kananɛ buluŋ bee lar kupo nɛ k dese Jɔɔdan be Lɔrgboŋ na ase a ba asɔbɔya be ejikpa nɛ asɔbɔya na e baa shile na, nɛ ma, Enyɛnpe Ebɔrɛ na beeŋ ba nɛ Edɔmebi e shile epul to n lar bumo be kadegboŋ na to. Kumo be kaman nɛ ejuŋkparpo nɛ meeŋ lara na e ba chena n ji kuwura efuli na so. Wanɛ e naŋ tiŋ n ta mbe kumu m ber ma ŋko n to ma emaŋ? Ewurjipo kikɛ maŋ wɔtɔ nɛ e beeŋ tiŋ n tu ma ŋ kɔ.

Jɛremaya 49:19 Iomraidhean Croise

1 Kronikɛls 12:15

Bumo e daŋ dii Jɔɔdan be lɔr na saŋɛ nɛ k bɔlɔ n lar apla kafɛ be kufɔl juŋkparso to na n ju basa nɛ b wɔ kumo be epeŋilarkpa nɛ epeŋitɔrkpa be kaba so be kepla so na nɛ b pesaŋ to.

2 Kronikɛls 20:6

nseŋ kule Ebɔrɛ le: “O Enyɛnpe nɛ fo la an nananyɛnana be Ebɔrɛ. Fo e naa ji ebɔrɛso nɛ durnya ere be efuli kikɛ so kuwura. Fo alɛ kɔ eleŋ ga nɛ esa kikɛ maŋ wɔtɔ nɛ e beeŋ tiŋ m pɔɔ fo so.

Job be kawɔl 41:10

Nɛ esa kikɛ maŋ kɔ eleŋ nɛnɛ nɛ e tiŋ n tu kumo ŋ kɔ, kumo ere wanɛ e naŋ tiŋ n tu ma ŋ kɔ?

Job be kawɔl 9:19

Nɛ kela fanɛ eleŋ nna, Ebɔrɛ kɔ eleŋ a chɔ ma! Nɛ kela asheŋ be keji malɛ gba nna, wanɛ e naŋ tiŋ n tre Ebɔrɛ demujikpa?

Job be kawɔl 9:21

Hale esa kikɛ maŋ wu kulubi ma so gba, ama kusɔ kama nɛ k beeŋ wora ma be asheŋ maŋ naa tir ma.

Nshɛ 143:2

Sa maŋ ji ma, fo kayɛrbi demu; ŋkpal manɛ so, esa kikɛ be kebaawɔtɔ maŋ niŋi ashi fo anishito.

Nshɛ 76:7

Fo Enyɛnpe Ebɔrɛ na e daga fanɛ ekama e baa ŋana fo. Fo baŋ nya agbo, esa kikɛ maaŋ tiŋ n yili fo anishito.

Nshɛ 76:8

Ebɔrɛso nɛ fo wɔ nseŋ bɔ fo demuji be kubɔya; nɛ kufu tɔr durnya so, nɛ kakpa kikɛ wora shruum.

Nshɛ 89:6

Ekama maŋ du fanɛ fo, Enyɛnpe Ebɔrɛ na ashi ebɔrɛso; Ekama malɛ maaŋ tiŋ n ta mbe kumu m ber fo ashi ndoŋ.

Nshɛ 89:8

Fo e la Enyɛnpetale Ebɔrɛ na. Ekama maŋ naa kɔ kasha nsaa ji kashenteŋ fanɛ fo.

Ɛksodɔs 15:11

O Enyɛnpe Ebɔrɛ, wanɛ e du fanɛ fo ashi ebɔrɛana kikɛ to? Fo kecheembiya bee mɔ kɔnɔ nna nɛ fo kemaŋkura shi. Wanɛ e du fanɛ fo? Wanɛ e naaŋ tiŋ n wora emamachisheŋ nɛ ashuŋgboŋ nɛ a baa du fanɛ feya ere?

Aizaaya 40:25

Wanɛ bre nɛ esa beeŋ tiŋ n ta m ber Ebɔrɛ cheembi na? Esa mo e wɔtɔ a du fanɛ mo?

Aizaaya 46:9

Men baa nyiŋi kusɔ nɛ k wora dra na, nseŋ pin to fanɛ n nawule e la Ebɔrɛ. Ekama maŋ du fanɛ ma.

Jɛremaya 12:5

Ndoŋ nna nɛ Enyɛnpe Ebɔrɛ na kaŋɛ le: “Jɛremaya, fo ketu edimɛdi n shile ka bee nu fo ere, feeŋ tiŋ n tu egbaŋɛ n shile nna ere a? Fo ka bee shile kakpa lela nsaa fiti a tɔr ere, feeŋ tiŋ n shile kupuŋ nɛ k dese m mata Jɔɔdan be lɔrgboŋ na to nna ere a?

Jɛremaya 25:9

meeŋ shuŋi n tre efuliana nɛ e wɔ kelargato be esoso be kaba so na be basa kikɛ nɛ ewura Nebukadneeza nɛ e la Babilɔn be efuli so be ewura nɛ ma kenya na, nɛ b ba kɔ Juda nɛ efuliana nɛ e kulti ndoŋ na kikɛ kena m mur. Ndoŋ beeŋ mur a dese loŋ mbaanaayɔ nɛ k chinchiŋ ekama nɛ e beeŋ wu amo, ama b kraa beeŋ baa wora menyi eyurto. Ma, Enyɛnpe Ebɔrɛ e kaŋɛ na.

Jɛremaya 30:21

Ma basa be ejuŋkparpo beeŋ shi bumo be efuli so nna, nɛ bumo be ewura e shi bumo gbagba be basa to. Nɛ m baŋ teŋi enɔ n tre mo e beeŋ ba ma kutɔ, ŋkpal manɛ so, esa kikɛ maŋ tiŋ m ba ma kutɔ nɛ m maŋ tre mo. Baaŋ baa la ma basa, nɛ ma alɛ e baa la bumo be Ebɔrɛ. Ma, Enyɛnpe Ebɔrɛ e kaŋɛ na.”

Jɛremaya 4:7

Kananɛ buluŋ bee shi kumo be eŋanakpa a lar na nɛ bekɔpo nɛ baa mur efuliana na lar a ba. Baa ba nɛ b ba mur Juda nna nɛ kumo be ndegboŋ e ki alambure nɛ esa kikɛ maaŋ naa wɔ amo to.

Danɛl 7:4

Kumo nɛ k daŋ juŋkpar n lar na daa du fanɛ buluŋ nna nsaa kɔ atɛ fanɛ kajɔnɔkoso. Ŋ ka bee keni kumo na, nɛ n wu kumo be atɛ ka tia. Nɛ b maŋ kumo so n yili kumo be aya so fanɛ dimɛdi nseŋ ta dimɛdi be nfɛra n wɔtɔ kumo to.

Nahum 1:6

E baŋ nya agbo, esa kikɛ maaŋ pete. Esa kikɛ maaŋ tiŋ ŋ gelge mbe agbogboŋ na. Mbe agbo du fanɛ edɛ nna a pante afalta nɛ a bee bure to a ki eshishɛr.

Zakareya 11:3

Men nu mbolpɔkpapoana ka bee shu awɔrso; ŋkpal bumo be mbolpɔ be ejikpa lela na ka mur so! Men nu ebuluŋ ka bee munto; ŋkpal Jɔɔdan be lɔrkar be kupogboŋ lela na ka mur so!

Nɔmbɛs 16:5

Kumo be kaman nɛ e kaŋɛ Koora nɛ mo braana na le: “Echefo kachipurso Enyɛnpe Ebɔrɛ beeŋ ŋini anyi esa nɛ mo gbagba lara fanɛ e ki bɔrɛmatapo. Amodoŋwura malɛ beeŋ shuŋ mo kashenteŋto.

Joshuwa 3:15

Kasɔteŋi be jemanɛ e daa la nɛ Jɔɔdan be lɔr na bɔlɔ n to chuful. Ama bɔrɛmatapoana nɛ b sulɔ ŋkre be deka na be aya ka baŋ chichi nchu na to,

Kelaraŋŋini 6:17

Ŋkpal manɛ so, kachɛgboŋ nɛ k la bumo be agbo be kachɛ na fo nɛ wanɛ malɛ e naaŋ tiŋ n yili bumo be anishito?”