Jɛremaya 2:8 - EBƆRƐ BE KAWƆL

⁸ Bɔrɛmatapoana na malɛ maŋ tiŋ m bishi: ‘Nnɛ nɛ Enyɛnpe Ebɔrɛ na wɔ?’ Ŋ gbagba be bɔrɛmatapoana nɛ baa ŋini ma mbraana maŋ nyi ma. Bejuŋkparpoana na kini ma nseŋ lar ma kaman; nɛ anebiana na malɛ bɔla Baal be kegbir be ketre so m malga nseŋ shuŋ agbirana nɛ e maŋ kɔ tɔnɔ n sa bumo.

Jɛremaya 2:8 Iomraidhean Croise

1 Bewura 18:22

Ndoŋ nna nɛ anebi Elaija naŋ kaŋɛ le: “Ma nawule e la Enyɛnpe Ebɔrɛ be anebi nɛ e ka, ama Baal be agbirwuraana bre wɔ alfa ana nɛ adunu.

1 Bewura 18:29

B daa cha awɔr nna nsaa malga kawuliso be mmalga hale n ya fo kaaseso ama amo nɛ amo kikɛ b daa maŋ nu shɛŋ.

1 Bewura 18:40

Nɛ Elaija ponte ŋ kaŋɛ le: “Men pɛ Baal be agbirwuraana na. Men sa maŋ shin nɛ bumo be ekama e shile!” Nɛ basa na pɛ bumo kikɛ n yɔ Kishɔn be lɔr na to nɛ anebi Elaija shin nɛ b mɔ bumo kikɛ ndoŋ.

Job be kawɔl 35:10

Ama Ebɔrɛ nɛ e to bumo na baŋ chɛ bumo to jemanɛ nɛ asheŋ ki kpakpa na be kaman baa teŋ mo so nna.

Aizaaya 28:7

Anebiana nɛ bɔrɛmatapoana gba boo nna a jante. B nuu yabra nɛ nsa booso ga nna hale nɛ bumo be nfɛra mel to. Anebiana na kaa bee boo ga so, b maŋ naa pin ebɔrɛdare nɛ Ebɔrɛ sa bumo na to. Bɔrɛmatapoana na malɛ gba kaa bee boo ga so, b maŋ naa tiŋ a ji asheŋ nɛ basa bee ta a ba bumo kutɔ nɛnɛ.

Aizaaya 29:10

Enyɛnpe Ebɔrɛ na e shin nɛ menyi be anishi bee biri menyi nɛ edi bee la menyi na. Menyi anebiana na e daga fanɛ b baa wu asheŋ a kaŋɛ basa na, ama Ebɔrɛ buu menyi be anishi so nna nɛ men maŋ naa wu asheŋ a pin to.

Aizaaya 30:5

ama Ijiptebi na maaŋ tiŋ ŋ kuŋ bumo. Keyirda loŋ be efuli na la jiga nna nsaa la kawulisheŋ n ti so.”

Jɛremaya 10:21

Ndoŋ nna nɛ ŋ kaŋɛ bumo le: “Anyi be bejuŋkparpoana na maŋ kɔ nfɛra nna; b maa kule Ebɔrɛ a fin ekpa a bɔla so a wora asheŋ. Amoso nɛ b maaŋ tiŋ nɛ b chɛ anyi to nɛ anyi be basa maaŋ chɛr nseŋ pesaŋ to fanɛ mbolpɔ na.

Jɛremaya 12:10

Juda du fanɛ ma ndibi sɔrso be kudɔ nna. Bewura damta nɛ b shi efuli pɔtɛana so e ba mur ma ndibi sɔrso be kudɔ. B chichi ma adɔsawule so nna n jija ma asɔduuso, nseŋ shin nɛ ma kasawule nɛ k walɛ a par ma na ki keshishɛrsawule a dese fuloŋ.

Jɛremaya 16:19

Enyɛnpe Ebɔrɛ, kewora fanɛ fo ka ta ma nna n wɔtɔ kakpa lempo a kuŋ ma nsaa sa ma eleŋ, a chɛ ma to ashi tɔrɔ be jemanɛ. Efuli pɔtɛana be basa beeŋ shi durnya to be mboŋ wɔfɔ m ba fo kutɔ m ba kaŋɛ le: “An nananyɛnana daŋ lɔŋɛ agbirana nɛ e maa ji kashenteŋ nsaa maa kɔ tɔnɔ kikɛ n sa bumo na nna.”

Jɛremaya 18:18

Ndoŋ nna nɛ basa na kaŋɛ abar le: “Men shin nɛ an to jina a laŋɛ kananɛ anyeeŋ nya Jɛremaya m mɔ be kaplɛa so. Bɔrɛmatapoana beeŋ baa wɔtɔ jemanɛ kikɛ a ŋini anyi asheŋ, nɛ benyiashempo e baa ji anyi asoe to nɛ anebiana malɛ e baa bɔ Ebɔrɛ be kubɔya na a sa anyi. Men shin nɛ an nya kulubi ko ŋ ku n deŋi mo. Saŋɛ na so anyeeŋ tiŋ a kini kebaanu kusɔ kama nɛ e bee kaŋɛ.”

Jɛremaya 2:11

Efuli kikɛ so be basa maŋ naŋ chɛrga bumo be agbirana. Bumo be agbirana na maŋ la Ebɔrɛ kashenteŋto gba. Ama ma ere be basa ta ma, Enyɛnpe Ebɔrɛ nɛ m bar bumo kemaŋkura na n chɛr agbirana nɛ a maaŋ tiŋ n wora shɛŋ n sa bumo.

Jɛremaya 2:6

Ŋ ka daŋ mɔlga bumo ashi Ijipt be efuli so nseŋ juŋkpar bumo m bɔla kasawule fuloŋ nɛ k la eshishɛr nɛ e biti abar so nawule nseŋ naa la kasawule wɔlso nɛ k kɔ kufu nɛ esa kikɛ maŋ wɔ kumo so ŋko a sha kenite kumo so na be kaman, men nananyɛnana be shɛŋ daa maŋ wɔ ma to.

Jɛremaya 4:22

Ndoŋ nna nɛ Enyɛnpe Ebɔrɛ na kaŋɛ le: “Ma basa maŋ kɔ nfɛra, bumo alɛ maŋ naa nyi ma. B du fanɛ mbia wulpo nɛ b maa pin asheŋ to nna. Asheŋ lubi be kebaawora nɛ b nyi ga, ama asheŋ lela bre b maŋ nyi amo be kewora.”

Jɛremaya 5:31

Kumo e la fanɛ anebiana na kikɛ be mmalga la efɛ nna. Kusɔ nɛ b kaŋɛ malɛ nɛ bɔrɛmatapoana na kɔ a shuŋ nɛ ma basa malɛ bee sha kumo be loŋ. To, jɛrbi be jemanɛ kaŋ fo nɛ asheŋ ere kikɛ fo ekar, nnɛ nɛ menyeeŋ yɔ n ya nya kechɛto?”

Jɛremaya 7:8

Ama men kini nseŋ ta menyi be yirda n wɔtɔ kafule be mmalga nɛ e maŋ kɔ tɔnɔ to.

Jɛremaya 9:14

Ama b wora bumo be ŋgbene kpakpa nna nseŋ daŋ shuŋ agbirana nɛ baa tre Baal na fanɛ kananɛ bumo nanaana ŋini bumo na.

Ezikɛl 22:26

Israɛl be bɔrɛmatapoana bee gal ma mbraana nna a nase nsaa keni ma asɔ cheembi jiga. B maa barga asɔ nɛ a du cheembi nɛ amo nɛ a maŋ du cheembi to. Bumo alɛ maa ŋini basa kananɛ asɔ nɛ a walɛ so nɛ amo nɛ a maŋ walɛ so kɔr abar to. Ade kikɛ be kaman, b maa bɛ ma kewushiachɛ na so. Israɛl be basa maa sa ma bunyaŋ.

Ezikɛl 34:2

“Dimɛdi pibi, Ezikɛl, Israɛl be bejuŋkparpoana na du fanɛ mbolpɔkpapo nɛ baa keni ma basa nɛ b du fanɛ mbolpɔ so nna. Ama mee sha fanɛ fo kaŋɛ Israɛl be bejuŋkparpo na fanɛ b maŋ wora n nyalɛ nɛ ekama e nu. Kaŋɛ bumo kusɔ nɛ ma Enyɛnpetale Ebɔrɛ na kaŋɛ fanɛ: Asheŋ maaŋ nyalɛ n sa menyi, Israɛl be mbolpɔkpapo ere! Menyi be amu nɛ menyee keni so nseŋ kplaŋ ma mbolpɔ so.

Hoziya 4:6

Ma basa bee mur nna ŋkpal b ka kini ma so. Menyi bɔrɛmatapoana gba kini ma nseŋ kini ma keŋini gba n ti so. Ŋkpal loŋ so nɛ ma alɛ gba kini menyi na. M maaŋ naŋ wu menyi be mbinyɛnsobi gba fanɛ b la bɔrɛmatapoana.

Habakuk 2:18

Kegbir maŋ kɔ tɔnɔ kikɛ. Dimɛdi e pɔr ŋko n shɛl kumo. Efɛsheŋ nawule nɛ k bee ŋini. Nɛ manɛ so nɛ menyee yirda kusɔ nɛ b ta kebɛlso ŋko kedibi n lɔŋɛ nɛ k maa malga?

Matiu 16:26

Nɛ fanɛ durnya kikɛ ki esa peya nɛ e paŋ mbe ŋkpa, manɛ be tɔnɔ nɛ e nya ŋko manɛ nɛ esa beeŋ tiŋ n ta n chɛr mbe ŋkpa?

Luuk 11:52

Mbraŋinipoana, asheŋ maaŋ nyalɛ n sa menyi, ŋkpal manɛ so, men ta kashenteŋ be kepin na be ekpa ŋ ŋana basa so, menyi alɛ gbagba maŋ bɛ loŋ be ekpa na so nseŋ naa kuŋ basa nɛ b daa sha kebɛ kumo so na ekpa.”

Baru lela nɛ Jɔn kute na 16:3

Bumo alɛ beeŋ wora loŋ nna ŋkpal b ka maŋ nyi Etuto ŋko ma so.

Baru lela nɛ Jɔn kute na 8:55

Men maŋ nyi mo, ama ma ere nyi mo. Nɛ ŋ kaŋɛ fanɛ m maŋ nyi mo, meeŋ baa la efɛpo fanɛ menyi, ma ere nyi mo nsaa ta mbe mmalga a wɔtɔ ma kagbene to.

2 Kɔrintebi 4:2

Naniere, an yige wulo to be asheŋ nɛ anishinyɔr be ekpaana. Anyi maa ta kafule a wora asheŋ, anyi alɛ maa chɛrga Ebɔrɛ be kamalga na. Ama kashenteŋ nɛ an lara n dii efuli. Loŋ malɛ, ekama be nfɛra fɛso beeŋ ŋini mo fanɛ an walɛ nna ashi Ebɔrɛ be anishito.

Ditɛronɔmi 33:10

Bumo e naaŋ ŋini fo basa fo mbra nɛ b bɛ amo so. Bumo alɛ e naaŋ baa lara esarga fo bɔrɛsure so.

1 Samuɛl 12:21

Men sa maa shuŋ agbir, ŋkpal manɛ so, a maaŋ tiŋ n chɛ menyi to ŋko m mɔlga menyi. Agbir la asɔ fuloŋ nna.

1 Samuɛl 2:12

Eli be mbinyɛnsobi na daa la basa lubi nna nsaa maa nu a sa Ebɔrɛ,