Hoziya 9:4 - EBƆRƐ BE KAWƆL

⁴ Men maaŋ naŋ nya nsa belbelso n lara sarga n sa Enyɛnpe Ebɔrɛ na. Men be esarga kikɛ maaŋ bɔlɔ mo kenishi. Ŋkpal manɛ so a beeŋ baa du nna fanɛ keelibuna be ajibi na. Akoŋ so nɛ menyeeŋ kpal n ji amo, ama men maaŋ ta ajibi na be kekama n ya lara sarga ashi Enyɛnpe Ebɔrɛ be lambu to.

Hoziya 9:4 Iomraidhean Croise

Ɛksodɔs 29:40

Men ta ɔlif be ŋku lela fanɛ lita koŋwule m baga bodobodo be nyifu lela fanɛ kilo koŋwule nseŋ ta wain fanɛ lita koŋwule nɛ a baa la asɔnuuso be sarga n ti sososo be kpakpafɔlbi na so n lara sarga na.

Ɛksodɔs 40:23

Kumo alɛ be kaman nɛ b ta bodobodo na m ba deŋi teebɔl na so n lara sarga n sa Enyɛnpe Ebɔrɛ na fanɛ kananɛ e kaŋɛ Mosis na.

Aizaaya 57:6

Kumo be kaman menyee ta elɔr be epun to be ajembu mɔlmɔlbi nna a ki agbir, nsaa ta nsa nɛ ajibi a lara esarga a sa amo. Menyee tama fanɛ kumo be loŋ bee par ma nna a?

Aizaaya 66:3

Basa kikɛ bee wora bumo be aparsheŋ nna nsaa wɔtɔ a wora mbushusheŋ kananɛ baa sha. Ŋkpal loŋ so, esa kama nɛ e ta gbolu n lara sarga n sa ma nɛ esa nɛ e mɔ esa kikɛ la kukoŋwule nna; nɛ emo nɛ e ta kpakpafɔlbi n lara sarga malɛ nɛ esa nɛ e kii jɔnɔ be kubɔ to m mɔ gba la kukoŋwule nna. Bekama malɛ nɛ baa ta ayu a lara esarga a sa ma nɛ basa nɛ baa ta epreku be ŋklaŋ a lara esarga kikɛ la kukoŋwule nna ashi ma anishito. Esa nɛ e bee chɔɔ duwu a lara sarga a sa ma nɛ emo nɛ e bee shuŋ agbir kikɛ la kukoŋwule nna.

Jɛremaya 16:7

Esa kikɛ malɛ maaŋ lolo mo barkasa nseŋ tu mo n ji ŋkpal mbe eshapo ko ka wu so. Hale esa mo nio ŋko mo tuto wu gba, ekama maaŋ tu mo n shu keeli.

Jɛremaya 6:20

Ma shɛŋ maŋ wɔ eduwu nɛ baa ta a shi Shɛba be efuli so, ŋko asɔ nɛ e bee shin nɛ ajibi bee wora ebel nɛ baa ta a shi efuli wɔfɔ a bar ma na to. Bumo be esarga nɛ baa lara a sa ma na maa par ma, amoso m maaŋ sɔ amo.

Ezikɛl 24:17

Fo alɛ e sa maŋ shin nɛ esa e nu fo ka bee shuto gba. Sa maŋ kaŋ shɛŋi fo neemu fo kumu so ŋko n lara fo asɛbta nsaa na aya fuloŋ a ŋini fanɛ fee shu keeli nna. Fo alɛ e sa maŋ buu fo anishiakpa so ŋko n ji daŋkare be ajibi nɛ basa nɛ baa shu nli bee ji na.”

Ezikɛl 24:22

Saŋɛ na so nɛ menyi alɛ gba e wora kananɛ n wora ere. Menyi maaŋ ta asɔ m buu menyi be anishiakpaana so ŋko n ji daŋkare jibi nɛ basa nɛ baa shu nli bee ji na.

Danɛl 1:8

Danɛl malɛ daŋ yili kumo mbe nfɛra to nna fanɛ, e maaŋ ji ewurkpa be ajibi na ŋko n nuu ndoŋ be nsa na n da bumo be daŋkare be ekishi so, amoso e daŋ kule Ashpenaaz nna fanɛ e chɛ mo to nɛ e sa maŋ da daŋkare be ekishi so.

Hoziya 3:4

Loŋ koŋwule na nɛ k beeŋ chɛr ga pɔɛŋ nɛ Israɛl be basa e nya ewura ŋko basa nɛ baaŋ ba juŋkpar bumo. K beeŋ chɛr pɔɛŋ nɛ b naaŋ bɔla esarga ŋko ajembu cheembi ŋko kabɔrɛmata be piŋi ŋko agbir so n fin Ebɔrɛ be nɛfa.

Hoziya 7:16

B shile ma, Enyɛnpetale Ebɔrɛ na kutɔ nna n ya buu kegbir nɛ k maŋ kɔ eleŋ kikɛ na. B du fanɛ keta nɛ esa maaŋ tiŋ n ta mbe yirda n deŋi so na nna. Ŋkpal bumo be bejuŋkparpo ka bee malga ŋkpensheŋ so so, baaŋ wu luwu nyaŋnyaŋso nɛ Ijiptebi e mushe bumo.”

Hoziya 8:13

Men gbagba e naa we esarga nɛ menyeeŋ lara a sa ma na be eblaŋ. Ma Enyɛnpe Ebɔrɛ na be kagbene maŋ fuli menyi so ŋkpal loŋ so. Amoso meeŋ gberge menyi kusoe ŋkpal men be alubi so nseŋ naŋ bɛta menyi n yɔ Ijipt be kasawule so.

Jowɛl 1:13

O, menyi bɔrɛmatapoana, men ta kagbenejijaso be asɔbuuso n buu a shu. Menyi bumo nɛ men wɔ bɔrɛsure na be anishito a shuŋ na, e boŋ to a shu. Menyi bumo nɛ menyee shuŋ Ebɔrɛ be anishito ashi bɔrɛlambu to na e buu kagbenejijaso be asɔbuuso ŋklade, ŋkpal kuyu baŋɛ to nɛ kusɔ nuuso nɛ menyeeŋ ta n lara sarga ka maŋ naa wɔtɔ so so.

Jowɛl 1:9

Kebɔltofinfin pɛ bɔrɛmatapoana nɛ b wɔ Enyɛnpe Ebɔrɛ be bɔrɛlambu to a shuŋ na gba ŋkpal kuyu baŋɛto nɛ kusɔ nuuso kikɛ ka maŋ naa wɔtɔ nɛ b ta n lara sarga n sa Enyɛnpe Ebɔrɛ na so.

Jowɛl 2:14

Nɛ men lar men be alubi to ashere Enyɛnpe, men be Ebɔrɛ na beeŋ chɛrga mbe nfɛra nseŋ nɛfa menyi nɛ men be adɔjibi e wora nɛnɛ ga. Loŋ nɛ menyeeŋ tiŋ n nya adɔjibi nɛ asɔ nuuso n lara sarga n sa mo.

Levitikɔs 17:11

Kusɔ keniso kikɛ be ŋkpa wɔ kumo be ŋklaŋ to nna, amoso nɛ Enyɛnpe Ebɔrɛ na kaŋɛ fanɛ b baa chulgi asɔbɔya be ŋklaŋ kikɛ a wurge bɔrɛsure na so nɛ a baa kpra basa na be alubi. Ŋklaŋ nɛ a la ŋkpa na a naa kpra alubi.

Levitikɔs 21:17

e kaŋɛ Ɛɛrɔn le: “Baŋ yili kenana ko n ya fo kenana ko, fo kaman to ebi to be esa kikɛ nɛ e dulgi, maaŋ daga fanɛ e lara ayu be sargajibi n sa ma kikɛ.

Levitikɔs 21:21

Bɔrɛmatapo Ɛɛrɔn be kanaŋ to be esa kama nɛ e dulgi maaŋ tiŋ n lara ayu be sargajibi n sa ma kikɛ. Ŋkpal mbe ndulgi na so, e maŋ daga fanɛ e ki bɔrɛmatapo a lara sarga a sa ma.

Levitikɔs 21:6

A daga fanɛ e baa du cheembi nna nsaa maa ŋaba ma ketre. Ŋkpal e ka la esa nɛ e bee ta ayu be sargajibi m ba kaa sa ma, Enyɛnpe Ebɔrɛ na so, a daga fanɛ e baa du cheembi.

Levitikɔs 21:8

A daga basa na ka wu bɔrɛmatapo na fanɛ esa cheembi, ŋkpal e kaa bee ta ayu be sargajibi m ba kaa sa ma so. Ma e la Enyɛnpe Ebɔrɛ na. N du cheembi nna, ma alɛ bee sha fanɛ ma basa e baa du cheembi nna.

Eemɔs 5:22

Hale nɛ men lara esarga chɔɔso nɛ ayu be esarga gba m ba sa ma, maaŋ sɔ amo. Men be asɔbɔya danso duliduli lela gba be asheŋ maaŋ bɔlɔ ma kenishi.

Malakai 2:13

Kusɔ nɛ men naŋ wora e la fanɛ, menyee shu a gbiti Enyɛnpe Ebɔrɛ be bɔrɛsure na nna. Menyee boŋ to nna a shu ŋkpal e ka maŋ naa sɔ menyi be ŋkɛ nɛ menyee ta a bar mo na so.

Nɔmbɛs 19:11

Esa kama nɛ e beta ebuni maaŋ baa walɛ so daŋkare be ekpa so nchɛnshunu.

Nɔmbɛs 28:2

fanɛ e kaŋɛ Israɛlebi na kenishipereso nɛ b baa ta bumo be ajibi be esarga nɛ amo be efɛa bee wora Enyɛnpe Ebɔrɛ ebel ga na m ba ka sa Ebɔrɛ saŋɛ nɛ k daga.

Nɔmbɛs 4:7

Kede be kaman nɛ Ɛɛrɔn nɛ mbe mbinyɛnsobi na e naŋ ta wajɛ nɛ k la buru m parga m buu Enyɛnpe Ebɔrɛ be teebɔl nɛ baa ta bodobodo cheembi nɛ duwu be ntishaŋ, nɛ ntishaŋ nɛ baa ta sarga be asɔ a wɔtɔ na, nɛ ekɔlba nɛ baa ta sarga be yabra belbelso a wɔtɔ a bɛ so na so. A daga fanɛ bodobodo e baa wɔ loŋ be teebɔl na so saŋkikɛ.

Baru lela nɛ Jɔn kute na 6:51

Ma e la bodobodo nɛ k bee sa ŋkpa n shi ebɔrɛso na. Esa kama nɛ e we le be bodobodo ere beeŋ baa wɔtɔ mbaanaayɔ. Bodobodo mo nɛ meeŋ ta n sa basa na e la ma eyur ere nɛ ŋ kɔ a sa durnya nɛ k nya ŋkpa na.”

Ditɛronɔmi 26:14

M maŋ ta amo be kekama n ji jemanɛ nɛ n daa wora keeli, ma alɛ daa maŋ lara amo be kekama kowu jemanɛ nɛ n daa maŋ walɛ so daŋkare be ekpa so gba na. Ade be kaman, m maŋ ta amo be kekama n nyina ebuni kikɛ. Ama kusɔ nɛ fo, Enyɛnpe Ebɔrɛ na kaŋɛ na gbagba nɛ n ta kudu kudusopo na n wora.