ፍልጵስዩሳ 4:8 - ጌሻ ማፃፋ

⁸ ዉርሰን፥ ታ እሻቶ፥ ህንተ ዎዛናን ሎኦባነ ጋላትስያባ ቆፕተ። ቱማ ግድያባ ኡባ፥ ቦንቾባ ኡባ፥ ቆሆ ግዶናባ ኡባ፥ ጌሻባ ኡባ፥ ሲቆባ ኡባነ ኡፋይስያባ ኡባ ቆፕተ።

Gofa New Testament

⁸ Wurssethan, ta ishato, hintte wozanan lo77obaanne galatisiyabaa qoppite. Tuma gidiyabaa ubbaa, bonchchoba ubbaa, qoho gidonnaba ubbaa, geeshshaba ubbaa, siiqobaa ubbaanne ufayssiyaba ubbaa qoppite.

Geeshsha Maxaafa

⁸ Wursethan, ta ishato, hinte wozanan lo77obaanne galatisiyaba qopite. Tuma gidiyaba ubbaa, bonchoba ubbaa, qoho gidonnaba ubbaa, geeshshaba ubbaa, siiqoba ubbaanne ufaysiyaba ubbaa qopite.

Ooratha Caaquwa Goofatho

⁸ Wurssethan, ta ishato, hintte wozanan lo77obaanne galatisiyabaa qoppite. Tuma gidiyabaa ubbaa, bonchchoba ubbaa, qoho gidonnaba ubbaa, geeshshaba ubbaa, siiqobaa ubbaanne ufayssiyaba ubbaa qoppite.

ኦራ ጫቁዋ ጎፋ

⁸ ዉርሴን፥ ታ ኢሻቶ፥ ሂንቴ ዎዛናን ሎዖባኔ ጋላቲሲያባ ቆፒቴ። ቱማ ጊዲያባ ኡባ፥ ቦንቾባ ኡባ፥ ቆሆ ጊዶናባ ኡባ፥ ጌሻባ ኡባ፥ ሲቆባ ኡባኔ ኡፋይሲያባ ኡባ ቆፒቴ።

ፍልጵስዩሳ 4:8 Iomraidhean Croise

Medhetethi 18:19

ፅሎተነ ሱረ ፕርዳ ኦድ ጎዳ ኦግያ ናጋና መላ ባ ናይታነ እያፐ ጉየራ ያ ባ ሶ አሳ ዞራና መላ ታኒ እያ ዶራስ። ሄስካ፥ ፆሳይ አብራሃመስ እማና ግዳ ኡፋይሳ ፖላናሳ” ያግስ።

2 Sameela 1:23

ሳኦልነ ዮናታን ዶሰተይሳታ፤ ሀይቆንነ ፓፃን ሻከትቦኮና። ኤንቲ አርጋንፈ አድ ኤሶ፤ ጋሞፈ አድ ምኖ።

2 Sameela 23:3

እስራኤለ ፆሳይ ታዉ ኦድስ፤ እስራኤለ ዛላይ ሀይሳዳ ያግስ። ‘ፅሎተን ሃርያ ካዎይ፥ ፆሳ ያሻን አይስያ ካዎይ፥

Mazmure 82:2

“ህንተ አዉደ ጋካናዉ ዎበ ፕርዳኔ? አዉደ ጋካናዉ ኢታታ ባጋ ግዳኔ?” ሳላሀ

Leemiso 11:1

ጎዳይ ዎርዶ ምዛነ እፄስ፤ ሽን ልከ ምዛነን ኡፋይቴስ።

Leemiso 12:4

ዎዛናማ ማችያ ባ አዝናስ ካላቻ መላ፤ ሽን ባ አዝና ካዉሽያ ማችያ መቀ ምያ አጃጀ መላ።

Leemiso 16:11

ግና ምዛነትነ ማካ ሚሸት ጎዳባ፤ ባይዝያባ ኡባን ገነይ ዶና መላ ጎዳይ ኮዬስ።

Leemiso 20:7

ፅሎ አስ ቦረይ ባይና ደኦ ደኤስ፤ እያ ካልያ እያ ናይት አንጀትዳይሳታ።

Leemiso 31:10

“ዎዛናማ ማቾ ኦን ደማናዉ ዳንዳኢ? እ ጋተይ ዞኦ አልኦ ሹቻፈ አስ።

Leemiso 31:29

ሎኦባ ኦያ ዳሮ ማጫሳት ደኦሶና፤ ሽን ነ ኤንታ ኡባፈ አሳ” ያጌስ።

Leemiso 31:31

እያ ኦዳባ ኡባስ እዮ ዎይትተ፤ እ ኦሶ ኡባይ ዳባባን እዮ ጋላትሶ።

Solomone 5:16

እያ ዶናይ ኤሳዳ ማልኤስ፤ እያ ኩመ አሳተይ ሎኤስ። ህንተኖ የሩሳላመ ጌላኦቶ፥ ታ ሲቆይነ ታ ላገይ ሀይሳ ዳነስ።

Isayaasa 26:7

ፅሎታ ኦገይ ሱረ፤ አቤት ፅሉዋዉ፥ ኔኒ ፅሎታ ኦግያ ጊግሳሳ።

Maatosa 22:16

ባንታ ታማረታነ ሄሮዲሳ ባጋታፐ እሶታ እሶታ ኪትዶሶና። ኤንትካ፥ “አስታማርያዉ፥ ነ ቱማ ኦደይሳ ኑ ኤሮስ። ኔኒ አሳፐ አሰ ሻካካ፥ አሳ ዎይጋንደስ ጋዳ አይኮካ ኦካ፥ ፆሳ ኦገ ቱማተን ታማርሳሳ።

Marqoosa 6:20

ዮሃንስ ፅሎነ ጌሻ አስ ግድዳይሳ ሄሮዲስ ኤርዳ ግሾ፥ እያዉ ባብድ ሎይ ናግሴስ። ሄሮዲስ ዮሃንስ ግያባ ስአናዉ ዶስኮካ እ ግያባ ስእያ ዎደ ዳሮ ዳጋሜስ።

Luqaasa 16:15

እ፥ “ህንተ፥ ህንተና አሳ ስንን ፅልሴታ፥ ሽን ፆሳይ ህንተ ዎዛና ኤሬስ። አሳ ስንን ቦንቸትዳይስ ፆሳ ስንን ቦረትዳይሳ።

Luqaasa 2:25

ሄ ዎደ ጌሽነ አማኖራ ምኖ ግድዳ ስሞና ጌተትያ አስ የሩሳላመን ደኤስ። እ እስራኤለታ አቶተ ናግሸ ደኤስ። ጌሻ አያናይካ እያ ቦላ ደኤስ።

Luqaasa 23:50

አይሁደ ሻንጎታፐ እሶይ፥ ዮሰፋ ጌተትያ ኡራይ ደኤስ። እ አርማተ ጌተትያ ይሁዳ ካታማፐ ይስ። እ ሎኦነ ፅሎ አስ ግድያ ግሾ ፆሳ ካዎተ ዩሳ ናጌስ። ሻንጎታፐ እሱዋ ግድሸ ኤንታ ዞረተንነ ኦሱዋን ዴና።

Yohaanisa 7:18

ባባ ኦድያ ኦንካ ባ ሁጰ ቦንቾ ኮዬስ። ሽን ባና ኪትዳይሳ ቦንቹዋ ኮይያ ኦንካ እ ቱማንቾ፤ እያን ዎርዶይ ባዋ።

ሃዋሬታ ኦሱዋ 10:22

ኤንቲ ዛሪድ፥ “ኑና ማቶ ሀላቃይ ቆርነልዮስ ኪትስ። እ ፅሎ፥ ፆሳ ጎይንያ አስነ አይሁደ አሳ ኡባን ዳሮ ቦንቸትዳ አስ። ቆርነልዮስ፥ ነና ባ ሶ ኤህስድ ቃላ ኔፐ ስአና መላ ጌሻ ኪታንቾይ እያዉ ኦድስ” ያግዶሶና።

ሃዋሬታ ኦሱዋ 22:12

“ዳማስቆን ደእያ አይሁደ ኡባይ ዳሮ ቦንችያ እስ ሀናንያ ጌተትያ አደይ፥ ኑ ህግያ ቦንቸይስነ ፆሳ ምን ዎሰይስ ደኤስ።

ሃዋሬታ ኦሱዋ 6:3

ህዛ፥ እሻቶ፥ ሎኦ አሳታ፥ ጌሻ አያናንነ ጭንጫተን ኩምዳ ላፑን አሳታ ህንተ ግዶፈ ዶርተ፤ ኑኒ ኤንታ ሀ ኦሱዋስ ሹማና።

Roome 13:13

አነ ጋላስ ፖኦን ደእያ አሳዳ ማራን ደኦስ። ማንነ ላይማተራ ጋሄትያ ዱማ ዱማ ቱና ኦሶታን፥ ፓላማንነ ቃናተን ግዶፖ።

Roome 13:3

አይሰይሳት ኢታ ኦይሳታፐ አትሽን፥ ሎኦ ኦይሳታ ያሾኮና። አይሰይሳታስ ያዮና አጋናዉ ኮያይ? ያኮ ሎኦ ኦ፤ ኤንቲ ነና ጋላታና።

Roome 14:18

ሄሳዳ ክርስቶሳስ ኦያ አስ ፆሳ ኡፋይሴስ፤ አሳንካ አንጀቴስ።

Roome 2:29

ሽን ቱማ አይሁደተ ጋ ባጋን አይሁደ ግደይሳ። ቱማ ቃፃረተ ፆሳ አያናን ኦሰትያ ዎዛና ቃፃረተፈ አትሽን፥ ፃፈትዳ ህግያን ኦሰትያ አሳተ ቃፃሮ ግደና። ሄ ኡራይ ጋላታ ፆሳፈ ኤኬስፐ አትሽን፥ አሳፐ ግደና።

1 ቆሮንቶሳ 4:5

ሄሳ ግሾ፥ ዎደይ ጋኮና፥ ጎዳይ ዮና ኦደ ቦላካ ፕርዶፍተ። እ ማን ጌምዳባ ፖኦን ከሰና፤ አሳ ዎዛናን ቆሰትዳ ቆፋ ቆንጭሳና። ሄ ዎደ፥ እሶይ እሶይ ፆሳፈ ጋላታ ኤካና።

2 ቆሮንቶሳ 13:7

ህንተ ኢታባ ኦና መላ ኑኒ ፆሳ ዎሶስ። ኑኒ ምኖ ግደይሳ አሳይ በአና መላ ግዶናሽን፥ ኑኒ ምኖ ግዶና እፅኮካ፥ ህንተ ሎኦ ኦና መላ ኑኒ ዎሶስ።

2 ቆሮንቶሳ 6:8

ኑኒ ቦንቸትዳነ ቶሸትዳ፤ ጫየትዳነ ጋላተትዳ። ቱማ ሃሳዮስ፥ ሽን አሳይ ኑና ዎርዳንቾ ግዶሶና።

2 ቆሮንቶሳ 8:18

ዎንገላ ማርካተን ዎሳ ኬ ኡባን ዳሮ ኤረትዳ እሻ፥ ኑኒ ትቶራ እስፈ ኪቶስ።

2 ቆሮንቶሳ 8:21

ኑኒ ጎዳ ስንን ፃላላ ግዶናሽን፥ አሳ ስንንካ ሎኦ ግድዳባ ኦስ።

Galatiya 5:22

ሽን አያና አይፈይ፥ ሲቆ፥ ኡፋይስ፥ ሳሮተ፥ ዳንዳአ፥ ኬሀተ፥ ሎኦተ፥ አማኖ፥

Efesoona 4:25

ህዛ፥ ዎርዶ ኦደቶፍተ። ኑኒ ኡባይ ክርስቶሳ አሳተ ብልተታ ግድያ ግሾ አሳ ኡባራ ቱማ ኦደትተ።

Efesoona 5:9

ፖኦይ ሎኦተ፥ ፅሎተነ ቱማተ አይፌስ።

Efesoona 6:14

ቱማ ፄሳን ዳንጮዳ ዳንጭድ፥ ፅሎተ ፁሩረዳ ትራን ዎድ፥ ሳሮተ ዎንገላ ህንተ ቶሁዋን ጫማዳ አድ ምንድ ኤቅተ።

Zaaretho 16:20

ነ ደኦን ዳና ማላነ ጎዳይ ነ ፆሳይ ነዉ እምያ ቢታ ነ ላታና መላ ፅሎ ፕርዳ።

ፍልጵስዩሳ 3:1

ዉርሰን፥ ታ እሻቶ፥ ህንተ ጎዳባ ግድያ ግሾ፥ ኡፋይትተ። ታኒ ካሰ ፃፍዳይሳ ዛራዳ ፃፋናይስ ታና ዋይሰና፥ ሽን ህንተና ባላፐ ናጋና።

Qolaasiyasa 4:5

እንጀትያ ዎደ ኡባ ጎኤትሸ አማኖና አሳ ማታን ጭንጫተን ደእተ።

1 ተሰሎንቀ 4:12

ሄሳዳ ሀንኮ፥ አማኖናይሳታ ማታን ህንተ ቦንቸታና፤ ቃስ ህንተና ኮሽያባስ ኦናካ አዳሸከታ።

1 ፅሞትዮሳ 2:2

ኑኒ ቱማ አያና ደኦንነ ጌሻተን ፆሳ ጎይንሸ ሳሮተንነ ዎፑ ግዳ ደኦን ዳና መላ ካዎታስነ ሹማታ ኡባስ ዎስተ።

1 ፅሞትዮሳ 3:11

ሄሳዳካ፥ ኤንታ ማጫሳት ቦንቸትዳይሳታ፥ ዝግሮናይሳታ፥ ማራን ደኤይሳታ፥ ኡባባን አማነተይሳታ ግዳናዉ በሴስ።

1 ፅሞትዮሳ 3:4

እያ ናይት እያዉ ኪተተይሳነ ቦንቸይሳ፥ ባ ኬ አይሳናዉ ዳንዳኤይሳ ግዳናዉ በሴስ።

1 ፅሞትዮሳ 4:12

ኔኒ ያላጋ ግድያ ግሾ፥ ነና ኦንካ ካፖ። ሽን አማነይሳታስ ኔኒ ኦዳን፥ ኦሶን፥ ሲቆን፥ አማኖንነ ጌሻተን ሌምሶ ግዳ።

1 ፅሞትዮሳ 5:10

ናይታ ድሾን፥ እማ ሞኮን፥ ጌሻታ ቶሁዋ ሜቻን፥ መቶትያ አሳ ማደን፥ ሎኦ ኦሶ ኡባስ ባና አ እምዳሮነ ሎኦ ኦሶን ኤረትዳሮ ግዳናዉ በሴስ።

1 ፅሞትዮሳ 5:2

ጭማ ማጫሳታ ነ አይዳ፥ ያላጋ ማጫሳታ ነ ምችዳ፥ ፖሎ ጌሻተን ኦይካ።

Tito 1:8

ሽን እማ ሞከይሳ፥ ሎኦባ ኡባ ዶሰይሳ፥ አኬካንቾ፥ ፅሎ፥ ጌሽነ ባና ሃረይሳ ግዳናዉ በሴስ።

Tito 2:14

ኢታ ኦሶ ኡባፈ ኑና ዎዛናዉነ ሎኦባ ኦናዉ አሞትያ ባ ጌሻ አስ ከሳናዉ ኑ ግሾ ባና አድ እሚስ።

Tito 2:2

ጭማ አደት ባንታና ሃረይሳታ፥ ዎፑ ግዳይሳታ፥ ቦንቸትዳይሳታ፥ አማኖን፥ ሲቆንነ ዳንዳአን፥ ምኖ ግዳና መላ ዞራ።

Tito 2:7

ኔኒ ነ ሁጰን ሎኦ ኦሶ ኡባን ኤንታዉ ሌምሶ ግዳ። ኔኒ ነ ትምርትያን ኤቅዳይሳነ አማነትዳይሳ ግዳ።

Tito 3:14

ኑ አሳይካ ፓና አስ ግድድ አቶና መላ ባንታዉ ኮሽያባ ደማና መላ ሎኦ ኦሶ ኦናዉ ምንድ ታማሮ።

Ibraawe 11:2

በን አዋት አማኖን ፆሳፈ ማርካተ ኤክዶሶና።

Ibraawe 13:18

ኑስ ፆሳ ዎስተ። ኑ ካሀይ ጌሽ፤ ኑ ኡባ ዎደ ሎኦባ ኦናዉ ኮዮስ።

Yayqooba 1:27

ፆሳ አዋ ስንን ቦረይ ባይና ጌሻ አማኖይ ሀይሳ፦ አይያ አዉ ባይና ናይታነ አምኤታ ማዶነ አላምያ ቱናፐ ባና ናጎ።

Yayqooba 3:17

ሽን ቦላፈ ያ ጭንጫተይ ኡባፈ ስን ጌሽ። ቃስ ሳሮተ፥ አዳተ፥ ስእድ ኤከይሳ፥ ቃተይሳ፥ ሎኦ አይፈይ ኩምዳይሳ፥ አሰ ሻኮናይሳነ ጩቦተ ባይናይሳ።

1 ጰፅሮሳ 1:22

ህንተ ቱማተስ ኪተትድ ህንተናተ ጌሽደታ። ህንተ እሶይ እሱዋ ዎዛናፐ ሲቀታ፥ ሽን ሀእካ ቱማ ዎዛናፐ ምንድ ሲቅተ።

1 ጰፅሮሳ 2:12

አማኖና አሳይ ህንተና ኢታ ኦያ አሳዳ ዝግርያ ዎደ ፆሳይ ኑና በአናዉ ያ ጋላስ፥ ኤንቲ ህንተ ሎኦ ኦሱዋ በእድ ፆሳ ጋላታና መላ ህንተዉ ሎኦ ደኦይ ደኦ።

1 ጰፅሮሳ 4:8

ሲቆይ ዳሮ ናጋራ ካምያ ግሾ፥ ኡባፈ አድ እሶይ እሱዋራ ዎዛናፐ ሲቀትተ።

2 ጰፅሮሳ 3:1

ታ ሲቆ እሻቶ፥ ሀይስ ታ ህንተዉ ፃፍዳ ዳብዳበይ ናምአን። ታኒ ሀ ናምኡ ዳብዳበታካ ህንተዉ ፃፍዳይ፥ ህንተ ሱረ ቆፋ ቆፓናዳ ህንተና ደንናሳ።

1 ዮሃንሳ 3:18

ታ ናይቶ፥ ኑኒ ኦሶንነ ቱማተን ኑ ሲቁዋ ቆንጭሳናዉ በሴስፐ አትሽን፥ ጮ ኦዳ ፃላላን ዎይኮ ዶና ፃላላን ሲቀታናዉ በሰና።

1 ዮሃንሳ 3:3

ክርስቶሳ በአና ግድ ኡፋይሳን ናግያ ኦንካ፥ ክርስቶስ ጌሽ ግድዳይሳዳ ባና ጌሼስ።

1 ዮሃንሳ 4:1

ታ ሲቆ እሻቶ፥ አያናታ ኡባ አማኖፕተ፥ ሽን ኤንቲ ፆሳፈ ይዳኮ ፓጭድ በእተ። አይስ ጊኮ፥ ዳሮ ዎርዶ ናበት አላመን ደንድዶሶና።

Uruuto 3:11

ሀእ ታ ናተ ባቦፋ። ኔኒ ኦይችዳባ ኡባ ነዉ ታኒ ኦና። ታ ካታማን ደእያ አሳ ኡባይ ኔኒ ሎኦ ማጫስ ግደይሳ ኤሬስ።