तीतस 3:8 - परमेश्‍वरए ताँ तमु क्युइर

⁸ च ताँनइ क्वेंल् त्हुबै ताँ ग। चु ताँ क्‍हिइ छेनाले लोमिंरिगे बिब ङए सैं मुँ। परमेश्‍वरए फिर बिश्‍वास लब्मैंइ छ्याँबै केमैं खोंयोंन् बिलै लबर न्ह क्रों मि क्रों तल् त्हुम्, बिद्, तलेबिस्याँ चु ताँमैं म्‍हिमैंए ल्हागिर बेल्‍ले केर फेब् मुँ।

तीतस 3:8 Iomraidhean Croise

भजनमैं 78:22

तलेबिस्याँ चमैंइ परमेश्‍वरए फिर बिश्‍वास आलल, खीजी जोगेमिंम् बिबै ताँर चमैंइ भर आथेंल।

हितोपदेश 21:28

स्योलिबै ग्वाइ खाबज्यै या आक्वें, दिलेया च्हैंसि मैंसि पोंब्मैंए ताँ ताँनइ क्वेंम्।

मत्ती 20:4

छतसि चइ चमैंने बिइ, ‘क्‍हेमैं या ङए म्रोंर के लबर ह्‍याद्। क्‍हेमैंइ योंल् त्हुबै नों सै ङइ पिंस्‍यो।’

यूहन्‍ना 12:44

येशूजी थेबै कैले बिइ, “ङए फिर बिश्‍वास लब्‍मैंइ ङए फिर मत्‍त्रे आङिं, ङ कुल्मिंबै आबाए फिरै या बिश्‍वास लमुँ।

यूहन्‍ना 5:24

“क्ह्रोंसेंन ङ क्हेमैंने बिमुँ, खाबइ ङए ताँ थेसि ङ कुल्मिंबै आबाए फिर बिश्‍वास लमुँ, चइ खोंयोंइ आनुबै छ्ह योंम्। चए निसाफ आत, चइ सजैं योंल् आत्हु, बरु च म्हि सिबउँइँले धबै सोसि खोंयोंइ आखाँबै छ्ह योंइमुँ।

चेला चिब्मैंए केमैं 12:15

छबिमा चमैंइ चने “क्‍हि सोबल तइमुँ वा!” बिइ। दिलेया चइ ढिपि लसि बिइ, “क्ह्रोंसेंन पत्रुसन् ग।” छतमा चमैंइ “च पत्रुसए स्वर्गदूत मुँलै,” बिइ।

रोमी 4:5

धर्म-कर्म आलन बिलेया ठिक ठर्दिमिंबै परमेश्‍वरए फिर बिश्‍वास लस्याँ, चइ बिश्‍वास लबइले परमेश्‍वरजी चलाइ छ्याब् आरेबन् ठर्दिमिंम्।

२ कोरिन्थी 4:13

भजनसंग्रहर बिब् धोंले, “ङइ परमेश्‍वरए फिर बिश्‍वास लइ, छतसि ङइ खीए ताँ पोंइ।” छ बिब् धोंलेन् ङिज्यै या खीए फिर बिश्‍वास लइ, छतसि ङि खीए ताँ पोंम्।

एफिसी 4:28

ह्‍योब्मैंइ तारेपिरु आह्‍योरिगे, बरु चमैंइ ह्रोंसए योइ बेल्‍ले दुःखले के लरिगे धै खाँचो तब्मैंलाइ पिंल् खाँरिगे।

१ तिमोथी 1:15

चु ताँ क्ह्रोंसेंन्बै मुँ, छतसि चु ताँ ताँन् म्हिमैंइ क्वेंल् त्‍हुम्: ङ्योए प्रभु पापिमैं जोगेबर ह्‍युलर युब् ग। पापिमैं न्होंरि ताँन् भन्दा ल्हें पाप लबै म्हि ङन् ग।

१ तिमोथी 2:8

छतसि ताँन् क्ल्ह्‍योजरे मुँयुँमैंइ ह्रिस आखल्‍ले, तोइ गनगन आलल्‍ले आछ्याँबै के आलबै यो क्वेसि प्राथना लरिगे बिब ङए सैं मुँ।

१ तिमोथी 5:10

छाबै म्हरेस्योमैं छ्याँबै के लसि छ्याँबै मिं चल्‍दिब धै ह्रोंसए च्‍ह-चमिमैं छेनाले फारब, प्ह्रेंमैंलाज्यै या चब् थुँबर मान लब, थेब् आप्हैंनले बिश्‍वासीमैंए सेवा लब, दुःख तब्‍मैंलाइ ल्होब, छाबै छ्याँबै केमैंर सैं पिंब्मैं तल् त्‍हुम्।

२ तिमोथी 1:12

छतसि तोगो ङइ चु दुःखमैं नोरिइमुँ, दिलेया ङ फापिसि सैं च्योंब् आल। तलेबिस्याँ ङइ खाबै फिर बिश्‍वास लइमुँ बिब ङइ सेइमुँ, ङलाइ ढुक्‍का मुँ तो सैमैं ङइ खीने थेंल् पिंइमुँ, च सैमैं खीजी छेनाले थेंमिंम्।

तीतस 1:9

चलाइ लोमिंबै क्ह्रोंसेंन्बै ताँर च भोंसि तल् त्हुम्, धै चइ क्ह्रोंसेंन्बै ताँ छेनाले लोमिंल् खाँरिगे, खाबज्यै खिइ लोमिंबै ताँ थोसि खेंमैंए स्योलिबै ताँमैं लोमिंल् म्हैस्याँ चइ “क्हेमैंए ताँ स्योर ग” बिसि बिल् खाँरिगे।

तीतस 2:14

येशू ख्रीष्‍टजी ङ्योइ लबै ताँन् पापउँइँले जोगेमिंबर सै फोसि खामिंइ। छ्याँबै के लबै ह्रोंसए चोखो म्हिमैं तरिगे बिसि ह्रोंसन् ङ्योए ल्हागिरि सिमिंइ।

तीतस 2:7

क्हिइ तो सैरै या स्योर आतेद्, ह्रोंसइ लबै ताँन् केमैंर छ्याँबै नमुना उँइँल् त्‍हुम्। छतमा क्हिइ बिबै ताँमैं या अरूइ क्वेंरिगे।

तीतस 3:1

“सरकार नेरो अधिकार मुँबै म्हिमैंए न्होंर टिद्, चमैंइ बिबै ताँ ङिंन्, झाइले छ्याँबै के लबर खोंयोंइ बिलै तयार तद्,” बिसि क्‍हिने मुँबै येशूए फिर बिश्‍वास लबै म्‍हिमैंलाइ चु ताँमैं मैंमिंन्।

तीतस 3:14

ङ्योए म्‍हिमैंइ छ्याँबै केमैं लब लोरिगे, धै खाँचो तखबै त्हेर चमैंइ अरूमैं ल्होमिंल् खाँरिगे, छले चमैंए छ्ह छेनाले थोरिगे।

फिलेमोन 1:11

ओंसों क्हिए ल्हागिर च केर आफेब् मुँल, दिलेया तोगो क्‍हि नेरो ङए ल्हागिर च केर फेब् तइमुँ।

हिब्रू 10:24

घ्रिइ घ्रिलाइ म्हाँया लदै छ्याँबै के लरिबै ल्हागिर ङ्योइ खैले चमैंए सैं भोंन् लमिंब च ताँ सैंर मैंले।

१ पत्रुस 1:21

क्‍हेमैंइ ख्रीष्‍टउँइँले परमेश्‍वरए फिर बिश्‍वास लइ। परमेश्‍वरजी ख्रीष्‍टलाइ सिबउँइँले धबै सोगों लमिंसि बेल्‍ले थेबै मान पिंइ, छतसि क्‍हेमैंइ परमेश्‍वरए फिर बिश्‍वास नेरो आशा थेंल् खाँइ।