रूथ 3:10 - परमेश्‍वरए ताँ तमु क्युइर

¹⁰ बोहजइ बिइ, “याहवेहजी क्हिए फिर आशिक पिंरिगे। क्हि ढुक्‍का तद्, क्हिइ स्युमिलाइ लबै म्हाँया भन्दा चु ताँ थेब् मुँ, तलेबिस्याँ प्लब, ङ्हाँब फ्रेंसिमैं खाबने या क्हि आल्हैदि।

रूथ 3:10 Iomraidhean Croise

उत्पत्ति 24:31

छले ह्‍यामा क्यु खादुए रेर च म्हि रारिब् म्रोंसि लाबानइ बिइ, “ओ याहवेहए आशिक योंबै म्हि, धिं न्होंर खो। तले बैरु रारिल? ङइ क्हिए टिबै क्ल्ह्‍यो नेरो सलुमैंए क्ल्ह्‍यो लथेंइमुँ।”

रूथ 1:8

झाइले घ्याँर प्ररिमा नाओमीइ ह्रोंसए चोंमैंने बिइ, “क्हेमैं ह्रों-ह्रोंसए माइत धिंर एह्‍याद्, धै ह्रोंसए आमाने टिद्! सियाबै ङए च्हमैं नेरो ङए फिर क्हेमैंइ म्हाँया लब् धोंलेन् क्हेमैंए फिरै या याहवेहजी म्हाँया लरिगे।

रूथ 2:11

बोअजइ बिइ, “ह्रोंसए प्युँ सियासे या स्युमिलाइ म्हाँया लसि ह्रोंसए ह्‍युल, ह्रोंसए आबा‍-आमा वाथेंसि खाबै ङो आसेबै आगुए ह्‍युलर स्युमिने प्रे खब् ग बिबै ताँ ङइ थेइ।

रूथ 2:20

च ताँ थेसि नाओमीइ ह्रोंसए चोंने बिइ, “याहवेहजी च म्हिलाइ आशिक पिंरिगे! याहवेहजी सोगोंमैं नेरो सियाब्मैंए फिर ल्हयो खमिंइ!” धबै नाओमीइ चने बिइ, “च ङ्योए नातो न्होंर्बै म्हिन् ग। ङ्योए फिर दु:ख तमा ङ्योलाइ ल्होल् त्हुबै म्हिमैं न्होंर च घ्रि ग।”

रूथ 2:4

च्हमा बोअजै या बेथलेहेम सहरउँइँले म्रोंर फेनेइ। बोअजइ जौ खैंब्मैंने “याहवेह क्हेमैंने प्रे तरिगे!” बिमा चमैंज्यै या बिइ, “याहवेहजी क्हिए फिर आशिक पिंरिगे!”

रूथ 3:9

“क्हि खाब जा?” बिसि बोअजइ ङ्योएमा रूथइ बिइ, “ङ क्हिए केब्स्यो रूथ ग। क्हिए नेंबै क्वे ह्रोंसए केब्स्योए फिर नेंमिंन्, तलेबिस्याँ ङए दु:ख सुखर ल्होमिंल् त्हुबै म्हि क्हिन् ग।”