फिलिप्पी 2:3 - परमेश्‍वरए ताँ तमु क्युइर

³ ह्रोंसए फायदाए ल्हागिर मत्‍त्रे तोइ आलद्। तोन् तोर्न थेब प्हैंदै तोइ आलद्, बरु ह्रोंसन् च्‍योंने तसि घ्रिइ घ्रिलाइ ह्रोंस भन्दा थेब् मैंन्।

फिलिप्पी 2:3 Iomraidhean Croise

हितोपदेश 13:10

थेब् प्हैंस्याँ प्होंगि मत्‍त्रे तम्, दिलेया सल्‍ला किंस्याँ ह्रब्-सेब् तम्।

लूका 18:14

“ङ क्हेमैंने बिमुँ, च फरिसी भन्दा बालि रेबै म्‍हि परमेश्‍वरए उँइँर ठिक ठर्दिसि धिंर एह्‍याइ। तलेबिस्याँ तोगो च्योंने तसि कुरब्मैंलाइ परमेश्‍वरजी थेब लमिंब्मुँ। तोगो ङम् ङन् ग बिसि थेब् प्हैंब्मैं परमेश्‍वरजी कुरवाब्‍मुँ।”

रोमी 12:10

ह्रोंसए तेमैंने धोंले घ्रिइ घ्रिने क्‍ह्रोंसेंन्‍बै म्हाँया लदु। अरूलाइ सैं न्होंउँइँले ओंनों मान लद्।

रोमी 13:13

त्हिंर्बै ह्‍वेर टिब्‍मैं धोंले छ्याँबै छ्ह थोले। सयल लप्रब, प्हा को तब, ब्यभिचार लब, तो लदा ङ्हाँमुँ चन् लब, प्होंगि मिब नेरो ह्रिस लब छाबै केमैं ताँन् पिवाद्।

रोमी 2:8

दिलेया प्होंगि कैगि लब्मैं, क्ह्रोंसेंन्बै ताँ आङिंब्मैं नेरो आछ्याँबै के लब्मैंए फिर बिस्याँ परमेश्‍वर ह्रिस खसि सजैं पिंब्‍मुँ।

१ कोरिन्थी 15:9

तलेबिस्याँ कुल्मिंबै चेला चिब्मैं न्‍होंरि ङ धाँसे केर आफेब् ग। ङ कुल्मिंबै चेला चिब बिबै लायकर्बै आरे, तलेबिस्याँ ङइ ओंसों परमेश्‍वरए म्‍हिमैंलाइ बेल्‍ले दुःख पिंल।

१ कोरिन्थी 3:3

क्‍हेमैं अझै परमेश्‍वरए फिर बिश्‍वास आलब्मैं धोंबन् मुँ। तलेबिस्याँ क्‍हेमैं ह्रों-ह्रोंसए न्होंर्न ह्रिस लब, प्होंगि कैगि लब तसेरो क्हेमैं परमेश्‍वरए फिर बिश्‍वास आलब्मैं धोंन् तइ, आङिं वा?

२ कोरिन्थी 12:20

क्‍हेमैंए बानि छ्याँब तरिगे बिब ङए सैं मुँ। दिलेया क्‍हेमैं ङाँर ङ खमा ङए सैंर मैंब् धों तब क्‍हेमैं आत उ, छलेन क्‍हेमैंए सैंर मैंब् धों तब ङै या आत उ बिसि ङ ङ्हिंइमुँ। तलेबिस्याँ क्‍हेमैं न्होंरि प्होंगि कैगि लब, ख्रे लब, ह्रिस लब, ह्रोंसए फायदा मत्‍त्रे म्‍हैब, अरूलाइ प्ह्रब, फ्रम् ताँ क्‍योंम् ताँ लब, थेब् प्हैंब, बिब् आङिंब तलै खाँम्।

गलाती 5:15

तलेबिस्याँ क्‍हेमैंए न्होंर्न क्ह्‍योंर्बै खेदोमैं नेब् धोंले घ्रिइ घ्रिलाइ दुःख पिंइ बिस्याँ क्‍हेमैंइ घ्रिइ घ्रिलाइ नास लवाब्‍मुँ। छतसि न्ह क्रों मि क्रों तद्।

गलाती 5:26

ङ्यो तिफुँइ थेब् आप्‍हैंले, अरूलाइ ह्रिस खल् आलले, झाइले अरूमैंए फिर ह्रिस आलले।

एफिसी 4:2

थेब् आप्‍हैंन्, च्योंब् तसि ह्रिस आखल्‍ले घ्रिइ घ्रिलाइ सैदिसि म्हाँया लद्।

एफिसी 5:21

ख्रीष्‍टलाइ म्हाँदिबइले क्‍हेमैं ताँन् घ्रि घ्रिए न्होंर टिल् त्‍हुम्।

फिलिप्पी 2:14

तो के ललेया कचकच आलल्‍ले आप्‍होंनले लल् त्हुबै के लदै ह्‍याद्।

कलस्सी 3:12

क्हेमैं परमेश्‍वरजी खोबै त्हाँबै पबित्र म्हिमैं ग। छतसि खीए म्हिमैं तबइले क्‍हेमैंइ आगुए फिर ल्‍हयो खसि छ्याँबै के लब, थेब् आप्‍हैंब, ह्रिस आखब, धै सैदिल् खाँब तद्।

कलस्सी 3:8

दिलेया तारे क्‍हेमैंज्यै चु ताँन् सै पिवाद्: ह्रिस खब ने आगुए फिर ह्रिस लब, आगु स्यारब, ह्रोंसए सुँउँइँले आछ्याँबै ताँ पोंब पिवाल् त्‍हुम्।

१ तिमोथी 6:4

च म्‍हि फाक्‍कर्न ह्रब सेब प्‍हैंम्, चइ तोइ आह्र, तोइ आसे। छाबै म्‍हिमैंइ स्योलिबै ताँ घ्रि लाछेंसि प्‍होंगि मिम्, छाबै ताँमैंउँइँलेन् ह्रिस लब, प्होंगि मिब, आब्रु वाब नेरो आछ्याँबै सैं मैंल् लम्।

१ पत्रुस 3:8

आखिरि ताँ चु मुँ: क्‍हेमैं ताँनए सैं घ्रि तद्। अरूए फिर दुःख तमा ल्‍हयो खद्। घ्रिइ घ्रिलाइ ह्रोंसए अलि-अङाँमैंने धोंले म्हाँया लद्। आगुए फिर ल्हयो खद्, सैं सारो आलद्।

१ पत्रुस 5:5

छलेन ओ फ्रेंसि छमिमैं, क्हेमैंए चिब्मैंइ बिब् ङिंन्। क्‍हेमैं ताँन् ह्रोंस ह्रोंसए न्होंर थेब् आप्हैंन्ले घ्रिइ घ्रिए सेवा लद्, तलेबिस्याँ परमेश्‍वरए छ्वेर छले प्ह्रिइमुँ: “परमेश्‍वरजी थेब् प्हैंब्मैंए बिरोध लम्, दिलेया थेब् आप्हैंब्मैंए फिर आशिक पिंम्।”