एफिसी 5:5 - परमेश्‍वरए ताँ तमु क्युइर

⁵ ख्रीष्‍ट नेरो परमेश्‍वरए ग्याल्सर ब्यभिचारिमैं, लोबिमैं, आछ्याँबै के लब्मैं खैलसे होंल् आयों बिसि क्हेमैंइ छेनाले सेल् त्हुम्। [अथवा परमेश्‍वरलाइ आम्‍हाँदिसेरो चमैंइ खी ङाँइले आशिक आयों।] लोब लबै केमैं परमेश्‍वरए उँइँर कु पूजा लब् धोंन् ग।

एफिसी 5:5 Iomraidhean Croise

प्रस्थान 20:17

“ह्रोंसए ङ्‍हेब्मैंए धिं-नाँ, प्ह्रेंस्यो, केब्छैं-केब्स्योमैं, क्ल्या, गदा चए तो सै म्रोंलेया आम्रोद्।”

चेला चिब्मैंए केमैं 20:32

“तारे ङइ क्‍हेमैंलाइ परमेश्‍वरए जिम्‍मार सुम्‍पिदिइमुँ। खीए दयाम्हाँयाए बारेर्बै ताँइ क्‍हेमैंए सैं भोंब् लमिंल् खाँम्, झाइले खीए म्‍हिमैंए फिर पूरा आशिक पिंब्‍मुँ।

चेला चिब्मैंए केमैं 8:21

परमेश्‍वरए उँइँरि क्हिए सैं छ्याँब आरेना। छतसि चु के क्हिइ कति लल् आयों!

गलाती 5:19

ह्रोंसए सैंउँइँले खबै आछ्याँबै केमैं छेनाले म्रोंल् खाँम्। च केमैं चुमैंन् ग: ब्यभिचार लब, आछ्याँबै सैं मैंब, फापिन् तबै केमैं लब,

गलाती 5:21

आगुए सैमैं म्रोंसि ह्रिस लब, प्हा ल्‍हें थुँब, सयल लप्रब, छाबै केमैं ताँन् आछ्याँबै सैंउँइँले खबै केमैं ग। ङइ क्‍हेमैंलाइ ओंसोंन् लोदा सैंदा लब् धोंले तोगो या बिम्: छाबै केमैं लप्रब्मैं, परमेश्‍वरए ग्याल्सर्बै हगवाला तरिब् आरे।

एफिसी 5:3

क्‍हेमैं परमेश्‍वरए म्‍हिमैं तबइले तारेपिरु खाबज्यै या ब्यभिचार आलद्, आछ्याँबै ताँ पोंब नेरो लोब लबउँइँले स्‍यो तद्। परमेश्‍वरए प्हसेमैंइ छाबै ताँमैं लब आङ्‍हें।

कलस्सी 1:13

खीजी ङ्योलाइ शैतानए मिछु खैबै ग्याल्सउँइँले फ्रेपखसि खीए खोबै च्‍ह येशू ख्रीष्‍टए ग्याल्सर पखइमुँ।

कलस्सी 3:5

छतसि क्‍हेमैं ह्‍युलर्बै सैजरे सैं आह्‍याद्: फ्रें क्ल्योंब नेरो रण्डिबाजी लसि फोहोरी के आलद्, छाडा आतद्, दुष्‍ट सैं आप्ह्‍याब नेरो लोब आलद्। लोब लबम् कु पूजा लब् धों तब् ग।

१ तिमोथी 6:10

तलेबिस्याँ ताँन् आछ्याँबै सैमैंए जरन् मारा-मुइए म्हाँया लब् ग। मारा-मुइए लोबइ लमा को-कोइ परमेश्‍वरए फिर बिश्‍वास लबन् पिवासि आछ्याँबै घ्याँउँइँ प्रयाइमुँ, धै चमैंए फिर सैदिलै आखाँन् तबै दुःख तइमुँ।

१ तिमोथी 6:17

चु ह्‍युलर्बै प्लबै म्हिमैंने थेब् आप्हैंन् बिद्, चमैं प्लब् आप्‍हैंरिगे, आटिक्‍दिबै सै न्होरर आशा आथेंरिगे, बरु चमैंए आशा ङ्योलाइ चैदिबै सैमैं तोन्दोंरि योल्‍ले ख्युल्‍ले पिंबै परमेश्‍वरए फिर थेंरिगे।

हिब्रू 13:4

ताँन् म्हिमैंए उँइँर ब्ह्‍या इजेत मुँल्‍ले तल् त्हुम्। ब्ह्‍या लल् खाँबै लिउँइँ मुँयुँमैं खाबज्यै या छमिं न्हल् आत, छलेन च्हमिरिमैंज्यै या फ्रें क्ल्योंल् आत, तलेबिस्याँ छाबै के लब्मैंए फिर परमेश्‍वरजी थेबै दण्ड पिंम्।

दर्शन 21:8

दिलेया ङ्हिंब्मैं, येशूए फिर बिश्‍वास लबर फा पिब्‍मैं, छेरन् तबै के लब्मैं, म्हि सैमैं, ब्यभिचार लब्मैं, फाफुइ लब्मैं, कु पूजा लब्मैं नेरो स्योर्गुमैं ताँन् प्ल्हइ दु:ख योंबै क्ल्ह्‍योर ह्‍याल् त्हुब्मुँ। चर बारुद नेरो लुँरिबै मिए होंल्दों मुँ। चु प्ल्हइ दु:ख योंबै क्ल्ह्‍यो ग।”

दर्शन 22:15

दिलेया सहरए बैरु बिस्याँ आछ्याँबै सैं प्ह्‍याब्मैं: फाफुइ लब्मैं, ब्यभिचार लब्मैं, म्हि सैब्मैं, कु फ्योब्‍मैं, स्‍योलिबै ताँ पोंब्‍मैं नेरो स्‍योलिबै के लब्मैं तम्।