२ तिमोथी 1:3 - परमेश्‍वरए ताँ तमु क्युइर

³ ङए खेमैं-मामैंइ परमेश्‍वरए केमैं छ्याँबै सैंइ लब् धोंले, ङज्यै या छ्याँबै सैंउँइँले परमेश्‍वरए के लम्, छले ताँनइ छ्याँबै सैंउँइँले मान लल् त्हुबै परमेश्‍वरए सेवा लबै म्हि क्हि तबइले ङए प्राथनार खोंयोंइन् बिलै ङइ क्हिए ल्हागिर परमेश्‍वरलाइ धन्‍यबाद पिंम्।

२ तिमोथी 1:3 Iomraidhean Croise

लूका 2:37

च प्रेच्‍युसे प्‍लिदिं बर्ष तयाल। दिलेया च बर्त टिसि प्राथना लसि त्‍हिंयाँ म्‍हुँइँसा परमेश्‍वर सैंर मैंसि मन्दिरर्न टिरिमल।

चेला चिब्मैंए केमैं 22:3

“ङ किलिकिया ह्‍युलर्बै टार्ससथें यहूदी ग, दिलेया ङ चु यरूशलेमर गमलिएल बिबै ङए गुरुए योउँइँले फारब् ग। धै ङ्योए खेमैंइ म्हाँदिबै रोसमैं ङइ छेनाले लोइमुँ। तिंयाँ क्‍हेमैंइ परमेश्‍वरलाइ सैं न्होंउँइँले म्‍हाँदिब् धोंले ङज्‍यै या खीलाइ म्‍हाँदिदा ङ्हाँइँमुँ।

चेला चिब्मैंए केमैं 23:1

पावलइ थेबै म्हि च्हों ङाँइ ङ्ह्‍योसि बिइ, “ओ आघें-अलिमैं, तिंयाँबै त्हिंइ समा परमेश्‍वरए उँइँरि ङइ छ्याँबै छ्ह थोइमुँ बिसि ङए सैंइ बिम्।”

चेला चिब्मैंए केमैं 24:14

ङ क्हिए उँइँर चु ताँ बिमुँ: चु मुक्‍ति पिंबै घ्याँने चुमैंइ स्योर्गु घ्याँ बिम्, दिलेया ङ च घ्याँर प्रसि ङए खेमैंए परमेश्‍वरए मिं क्वेम्। धै मोशाइ पिंबै ठिमर मुँबै ताँ नेरो स्योंम्बै अगमबक्‍तामैंइ प्ह्रिबै कितबमैंर बिबै ताँन् ताँ ङइ क्वेंम्।

चेला चिब्मैंए केमैं 24:16

छतसि परमेश्‍वर नेरो म्हिमैंए उँइँर खोंयोंन् बिले ङए सैंइ लद् बिब् धोंले ठिक के मत्‍त्रे ङइ लबै भों लरिमुँ।

चेला चिब्मैंए केमैं 26:4

“ङए ह्‍युलर नेरो यरूशलेमर ङ फ्रेंसि तब् ओंनोंन् ङइ खैले छ्ह थोइ, तो-तो लइ, बिबै ताँमैं ताँन् यहूदीमैंइ सेइमुँ।

चेला चिब्मैंए केमैं 27:23

तलेबिस्याँ ङ परमेश्‍वरए म्हि ग, ङ खीए सेवा लमुँ, धै खीए स्वर्गदूत घ्रि तिंयाँ म्हुँइँसर ङ ङाँर रायुइ।

रोमी 9:1

तोगो ङइ बिबै ताँ क्ह्रोंसेंन्बै ग। ङ ख्रीष्‍टल् ग, ङ स्‍योर आते। धै पबित्र प्ल्हए न्होंर मुँबै ङए सैंज्‍यै या स्‍योर आते बिसि ङए सैंइ साक्षि पिंम्।

२ कोरिन्थी 1:12

चु ताँ बिल् योंमा ङि ङ्‍हो च्हौ प्ल्ह्‍याब् धों ङ्हाँइमुँ, ङिए सैंज्यै या छान् बिम्। ङिइ चु ह्‍युलर छ्ह थोमा छ्याँबै केमैं लसि छेनाले प्रब्-टिब लइ, क्‍हेमैंने मुँमै या ङि छेनाले प्रब्-टिब पोंब लसि परमेश्‍वरए क्‍ह्रोंसेंन्बै घ्याँर प्रल। ङिइ छाबै केमैं म्‍हिए ज्ञान बुद्धिउँइँले लब आङिं, चु केमैं ङिइ परमेश्‍वरए दयाम्हाँयाउँइँले लल् खाँब् ग।

गलाती 1:14

ङए खेमैंइ म्हाँदिरिबै छ्यामैं ङइ बेल्‍ले छेन्ले म्हाँदिमल। यहूदी धर्म म्हाँदिबर ङए ह्रेंर्बै थुमैं न्होंर्बै ङ चिब मुँल।

एफिसी 1:16

चु ताँ थेसि ङइ परमेश्‍वरलाइ धन्‍यबाद पिंब आपिइमुँ। ङइ खोंयोंन् बिलै क्‍हेमैंए ल्हागिर प्राथना लरिम्।

१ थेसलोनिकी 3:10

क्हेमैंने त्होसि क्हेमैंए बिश्‍वास झन भोंसि लमिंबै सैं मैंसि ङि त्‍हिंयाँ म्‍हुँइँस सैं न्होंउँइँलेन् बेल्‍ले प्राथना लम्।

१ तिमोथी 1:19

खोंयोंन् बिलै छ्याँबै सैंउँइँले बिश्‍वासर भोंब् तद्। तलेबिस्याँ को-कोइ म्हिमैंए सैं आछ्याँब तबइले चमैं बिश्‍वासउँइँले ह्रेंगो तयाइमुँ।

१ तिमोथी 1:5

चर्बै ताँन् प्रभुए फिर बिश्‍वास लब्मैंइ क्ह्रोंसेंन्बै बिश्‍वासउँइँले, छ्याँबै खों प्ह्‍यासि छ्याँबै सैंउँइँले, ताँनने म्हाँया लरिगे बिसि ङइ चु ताँ बिइ।

१ तिमोथी 5:5

दिलेया खाबै आरेबै म्हरेस्योमैंइ परमेश्‍वरर मत्‍त्रे आशा थेंम्, धै खीलाइ ल्होमिंन् बिसि त्‍हिंयाँ म्‍हुँइँस परमेश्‍वरने प्राथना लरिम्।

२ तिमोथी 1:5

छल कपट तोइ आरेबै क्हिए क्ह्रोंसेंन्बै बिश्‍वास ङइ मैंमुँ। चु बिश्‍वास ओंसों क्‍हिए बुज्‍यू लोइस नेरो क्‍हिए आमा युनिसने या मुँल। चमैंइ लब् धों तबै बिश्‍वास तोगो क्‍हिज्यै या लइमुँ बिब ङइ सेइमुँ।

२ तिमोथी 3:15

क्‍हिइ कोलो ओनोंन् परमेश्‍वरए छ्वेर्बै ताँ सेइमुँ। च छ्वेर्बै ताँमैंइ ख्रीष्‍ट येशूए फिर बिश्‍वास लब्मैंइ खोंयोंइ आखाँबै छ्ह खैले योंम् बिबै ताँ लोल् खाँम्।

हिब्रू 13:8

येशू ख्रीष्‍ट खोंयोंन् बिलै ङ्‍हरि-कुरि आत! खी तेला, तिंयाँ, खोंयोंइ बिलेन् घ्रिन् तरिम्।