१ तिमोथी 6:12 - परमेश्‍वरए ताँ तमु क्युइर

¹² खोंयोंइ आखाँबै छ्ह योंबै ल्हागिर बिश्‍वासर भोंब् तद्। चुए ल्हागिर्न परमेश्‍वरजी क्हिलाइ त्‍हाँब् ग, चु ताँए बारेर्न क्हिइ लबै बिश्‍वासए ग्वाइ क्हिइ ल्‍हें म्‍हिमैंए उँइँर पिंल।

१ तिमोथी 6:12 Iomraidhean Croise

भजनमैं 63:8

ङए सो क्हिए कुगु न्होंर टिरिम्; क्हिए क्योलो योजी ङ ख्वेसि जोगेमिंम्।

हितोपदेश 3:18

बुद्धि ख्वेब्मैंए ल्हागिर च छ्ह योंबै सिंधुँ ग; च क्हाब्मैंइ आशिक योंम्।

२ कोरिन्थी 6:7

क्ह्रोंसेंन्बै ताँ बिदै, परमेश्‍वरउँइँले भों योंसि खीए फिर थेबै बिश्‍वास लदै खीए बचनर बिब् धोंलेन् ङिइ ठिक के लइमुँ।

२ कोरिन्थी 9:13

ख्रीष्‍टउँइँले खबै सैं तोंबै ताँर बिब् धोंले क्‍हेमैं प्रसि यहूदीमैं नेरो अरू म्हिमैंए ल्हागिर क्हेमैंइ सैं प्ल्हसि पिंबै भेटिउँइँले परमेश्‍वरए मिं थेब् तब्मुँ।

फिलिप्पी 1:30

ङइ ओंसों दुःख योंब क्‍हेमैंइ म्रोंइमुँ, अझै छाबन् दुःख योंरिइमुँ बिब क्हेमैंइ थेइमुँ। छले ङइ योंब् धों तबै दुःखरै या क्‍हेमैं ङने बालु प्रइन मुँ।

कलस्सी 3:15

क्‍हेमैंए सैंर ख्रीष्‍टजी पिंबै शान्तिइ प्लिंरिगे। क्हेमैं ताँन् ज्यु घ्रिर्न क्ह्रिसि शान्ति योंरिगे बिसि परमेश्‍वरजी क्‍हेमैं त्‍हाँब् ग। धै धन्‍यबाद पिंब्‍मैं तद्।

१ थेसलोनिकी 2:12

परमेश्‍वरजी खोबै छ्ह क्हेमैंइ थोरिगे बिसि ङिज्यै या क्‍हेमैंलाइ लोदा सैंदा लसि भों पिंइ बिसि क्हेमैंइ सेइमुँ। तलेबिस्याँ खीए मिं थेब् लबर परमेश्‍वरजी क्हेमैंलाइ खीए ग्याल्सर हुइब् ग।

२ थेसलोनिकी 2:14

ङिइ क्हेमैंने बिबै सैं तोंबै ताँउँइँले ङ्योए प्रभु येशू ख्रीष्‍टए मान क्हेमैंज्यै या योंरिगे बिसि परमेश्‍वरजी क्हेमैं हुइब् ग।

१ तिमोथी 1:18

ओ ङए च्ह तिमोथी, ङइ क्‍हिने बिमुँ, अगमबक्‍तामैंइ ओंसों क्‍हिए बारेर बिबै तामैंउँइँले भों योंसि बिश्‍वासर छ्याँबै सैं लसि छेनाले के लल् खाँब् तद्।

१ तिमोथी 1:19

खोंयोंन् बिलै छ्याँबै सैंउँइँले बिश्‍वासर भोंब् तद्। तलेबिस्याँ को-कोइ म्हिमैंए सैं आछ्याँब तबइले चमैं बिश्‍वासउँइँले ह्रेंगो तयाइमुँ।

१ तिमोथी 4:14

अगमबक्‍तामैंइ पोंब् धोंले चजर्बै एल्डरमैंइ क्हिए क्रर यो थेंसि प्राथना लमा परमेश्‍वरउँइँले क्हिइ योंबै बरदानए हेल आलद्।

१ तिमोथी 6:13

ताँन् सैमैंए छ्ह पिंबै परमेश्‍वर नेरो पन्‍तियस पिलातसए ओंसों छ्याँबै ग्वाइ पिंबै प्रभु येशू ख्रीष्‍टए उँइँर ङ क्हिने चु ताँ बिमुँ:

१ तिमोथी 6:19

छले ह्रोंसए ल्हागिर चमैंइ लिउँइँबै जग भोंब् लरिगे, धै खोंयोंइ आखाँबै छ्ह योंल् खाँरिगे।

२ तिमोथी 1:9

परमेश्‍वरजी ङ्यो जोगेमिंसि खीए म्‍हिमैं लबै ल्हागिर त्‍हाँइ। ङ्योइ छ्याँबै केमैं लमा आङिं, ङ्योए फिर मुँबै खीए दयाम्हाँयाउँइँले परमेश्‍वरजी ङ्यो त्हाँबै सैं खइ। तलेबिस्याँ ह्‍युल बनेब् भन्दा ओंसों ओंनोंन् ख्रीष्‍ट येशूउँइँले खीजी च दयाम्हाँया ङ्योलाइ पिंल।

२ तिमोथी 2:2

क्हिइ ल्‍हें म्‍हिए उँइँर ङउँइँले तो ताँमैं थेल, च ताँमैं अरू म्हिमैंलाज्यै या लोमिंल् खाँबै म्हिमैंलाइ लोमिंन्।

२ तिमोथी 4:7

ङए छ्हर खैतबै दुःख तलेया ङइ सैदिइ। धै ङइ लल् त्हुबै के छेनाले लइ। छले ङए फिर खैतबै दुःख तलेया ङइ बिश्‍वास लब आपि।

हिब्रू 13:23

ङ क्‍हेमैंने चु ताँ या बिम्: ङ्योए अलि तिमोथी झेलउँइँले त्‍होंल् खाँइमुँ। च युनन् ङ ङाँर खइ बिस्‍याँ च बालुन् ङ क्‍हेमैंने त्‍होबर खब्‍मुँ।

हिब्रू 3:14

ङ्योइ ओंसों लब् धोंबै बिश्‍वास लिउँइँ समन् लरिस्याँ, ङ्योइ ख्रीष्‍टने बालुन् परमेश्‍वरजी पिंबै हग योंब्‍मुँ।

हिब्रू 6:18

खीजी फैबै बाछा नेरो खीजी चबै कसम ङ्हिंना ङ्हिंन् खोंयोंइ प्लिंल् आखाँ, तलेबिस्याँ खीजी खोंयोंइ स्‍योर आते। छतसि खीए फिर भर थेंब्‍मैंइ ङ्योलाइ पिंम् बिबै सै योंबर ङ्योइ थेबै भों योंइमुँ।

१ पत्रुस 3:9

अरूइ क्हेमैंए न्होह्रों ललेया क्हेमैंइ चमैंए न्होह्रों आलद्, अरूइ क्‍हेमैंए फिर गाल् केलेया क्हेमैंइ गाल् आकेद्। बरु आशिक पिंन्, तलेबिस्याँ क्‍हेमैंइ आशिक योंरिगे बिसि परमेश्‍वरजी क्‍हेमैंलाइ हुइब् ग।

१ पत्रुस 5:10

दयाम्हाँया मुँबै परमेश्‍वरजी क्हेमैंलाइ येशू ख्रीष्‍टने घ्रिन् लमिंइमुँ, धै खीजी योंब् धों तबै खोंयोंइ आनुबै मान ङ्योज्यै या योंरिगे बिसि खीजी ङ्योलाइ त्‍हाँइमुँ। क्‍हेमैंइ तिस्याँदे दुःख योंबै लिउँइँ खीजीन् क्हेमैंलाइ धबै छारा लमिंसि, भोंसि लमिंब्मुँ धै बेल्‍ले शक्‍ति मुँब लमिंब्‍मुँ।

१ यूहन्‍ना 2:25

धै ख्रीष्‍टजी ङ्योने बाछा फैसि पिंम् बिबै सै खोंयोंइ आखाँबै छ्ह ग!

यहूदाइ प्‍ह्रिबै प्ह्रिछ्या 1:3

ओ ङए खोबै थुमैं, ङ्यो ताँनइ योंबै मुक्‍तिए बारेर्बै ताँमैं प्‍ह्रिबै सैं ङल मुँल। दिलेया तोगो ङ्योइ बिश्‍वास लल् त्हुबै ताँए बारेर प्‍ह्रिल् त्‍हुइमुँ। खोंयोंन् बिलै तरिबै ल्हागिर परमेश्‍वरजी तिखेर्न खीए म्‍हिमैंलाइ च ताँ लोमिंल् खाँइ। च ताँ जोगेसि थेंन् बिबै ल्हागिर ङइ चु प्ह्रिछ्या प्ह्रिल् त्हुदा ङ्हाँइ।

दर्शन 3:3

छतसि क्‍हेमैंइ तो लोइ, तो थेइ, च ताँ मैंन्। च ताँइ बिब् धोंले के लसि पाप लबउँइँले सैं एद्। क्‍हि न्ह क्रों मि क्रों आतइबिस्याँ ह्‍यो खब् धोंले क्‍हेमैंइ था आसेल्‍ले ङ युब्‍मुँ।