१ थेसलोनिकी 4:16 - परमेश्‍वरए ताँ तमु क्युइर

¹⁶ तलेबिस्याँ च त्हिंइर परमेश्‍वरजी हुकुम पिंब्‍मुँ, खीए चिब स्‍वर्गदूतइ कै तेब्‍मुँ, परमेश्‍वरए थुतुरु ह्रासि प्रभु येशू खीन् स्वर्गउँइँले युब्‍मुँ, धै खीए फिर बिश्‍वास लसि सियाब्मैं धबै ओंसोंन् सोगों तब्‍मुँ।

१ थेसलोनिकी 4:16 Iomraidhean Croise

भजनमैं 47:1

ओ ताँन् ह्रेंमैं, योप्ल्ह ह्राद्! सैं तोंदै थेबै कै तेसि परमेश्‍वरए जय-जय लद्!

भजनमैं 47:5

परमेश्‍वर कैंडो ह्‍यारिमा म्हिमैंइ बेल्‍ले सैं तोंदै खीए मिं क्वेइमुँ, छले याहवेह कैंडो ह्‍यामा चमैंइ थुतुरु या ह्राइ।

प्रस्थान 19:16

नोगिम्धों न्हाँग तमा कोंर गड्‌याङगुडुङ तइ, धै काम्‍लि तिम्‍लि रासि कोंर रुँदो न्हाँमस्यो राइ, धै बेल्‍ले ङ्‍हेबै थुतुरिए कै थेइ। छतमा ब्यारेकर मुँबै ताँन् म्हिमैं ङ्हिंसि थरथर त्हारइ।

प्रस्थान 20:18

च त्हेर काम्‍लि तिम्‍लि रासि मु ङ्‍हेब नेरो थुतुरिए कै थेइ धै कोंउँइँले मिखु खब म्रोंसि चमैं थरथरले त्हारसि ह्रेंगोन् रारिइ।

मत्ती 16:27

तलेबिस्याँ म्हिए च्ह खीए आबाए मान योंसि स्‍वर्गदूतमैंने युमा म्‍हिमैंइ खैबै के लइमुँ छाबन् नों खीजी पिंब्‍मुँ।

मत्ती 16:28

क्ह्रोंसेंन ङ क्हेमैंने बिमुँ, चुर मुँब्मैं न्होंरि कति म्हिइ म्हिए च्ह खीए ग्याल्सर युरिब आम्रोंन् समा सिरिब् आरे।”

मत्ती 25:31

“म्हिए च्ह म्रुँ तसि खीए थेबै मानर ल्हें स्‍वर्गदूतमैंने बालुन युब्मुँ, धै ह्रोंसए पबित्र राजगद्दिर टिब्‍मुँ,

मत्ती 26:64

येशूजी चने बिइ, “ङ चन् ग बिसि क्‍हिइन बिइमुँ दि। ङ क्हेमैंने बिमुँ, तारे म्हिए च्ह ताँनइ म्हाँदिल् त्हुबै परमेश्‍वरए क्‍योलोउँइँ क्हुँरिब नरो मुर्बै न्‍हाँम्‍स्योर युरिब क्‍हेमैंइ म्रोंब्‍मुँ।”

चेला चिब्मैंए केमैं 1:11

“ओ गालीलथेंमैं, क्हेमैं तले मुउँइँ ङ्‍ह्‍योसि रारिल? चुन् येशू, क्हेमैंउँइँले परमेश्‍वरजी स्वर्गर बोयाइ। तोगो खी खैले स्वर्गर ह्‍यारिब क्हेमैंइ म्रोंइ छलेन खी धबै युब्मुँ।”

१ कोरिन्थी 15:18

छ बिस्याँम् येशू ख्रीष्‍टए फिर बिश्‍वास लसि सियाब्मैं या नास तयाइमुँ।

१ कोरिन्थी 15:20

दिलेया छ बिब आत! ख्रीष्‍ट सिबउँइँले धबै सोगों तब क्‍ह्रोसेंन् ग। सियाब्‍मैं न्‍होंरि ताँन् भन्दा ओंसों येशू सिबउँइँले सोगों तइ। छतसि सिसि न्‍हरु च्‍हुइरिब्‍मैं धबै सोगों तब्मुँ बिबै प्रमाण येशू ख्रीष्‍टन् ग।

१ कोरिन्थी 15:23

दिलेया ताँन् खें-खेंमैंए पलोर सोगों तम्। ख्रीष्‍ट बिस्याँ धाँसे ओंसों सोगों तइ, धै खी एयुबै त्हेर खीए फिर बिश्‍वास लब्मैं सोगों तब्‍मुँ।

१ थेसलोनिकी 1:10

झाइले स्वर्गउँइँले युबै परमेश्‍वरए च्‍ह खोंयों युब् ङ्‍हे बिसि क्हेमैं ह्रेरिइमुँ बिबै ताँ चमैंइ ङिने बिरिमुँ। खीजी ह्रोंसए च्ह येशू सिबइले धबै सोगों लमिंइ, धै येशूजी तारे खबि छेबै दण्डउँइँले ङ्योलाइ जोगेमिंब्मुँ।

१ थेसलोनिकी 3:11

तारे ङ्योए परमेश्‍वर आबा नेरो ङ्योए प्रभु येशूजी ङि क्‍हेमैं ङाँर खबै घ्याँ थोंमिंरिगे,

२ थेसलोनिकी 1:7

झाइले क्‍हेमैं दुःख योंब्‍मैं नेरो ङि या परमेश्‍वरजी सुख पिंब्‍मुँ। प्रभु येशू ह्रोंसए शक्‍ति मुँबै स्‍वर्गदूतमैंने लुँरिबै मिने स्‍वर्गउँइँले युबै त्हेर परमेश्‍वरजी ङ्योलाइ च सुख पिंब्मुँ।

२ थेसलोनिकी 2:1

ओ अलि-अङाँमैं, अर्को ताँ, ङ्योए प्रभु येशू ख्रीष्‍ट धबै युबै ताँ नेरो ङ्यो खागु तसि खीने त्होबै ताँए बारेर ङिइ क्‍हेमैंने चु यो छ्युँ लम्:

२ पत्रुस 3:10

दिलेया खाबज्यै आसेल्‍ले ह्‍यो खब् धोंले प्रभु खैलसे युब्‍मुँ। च त्हिंइर मु थेबै कैले म्हयाब्मुँ, मुर्बै ताँन् सैमैं मिइ ख्रोंसि नास तयाब्मुँ, धै चु ह्‍युल नेरो ह्‍युलर्बै सैमैं ताँन् म्हयाब्‍मुँ।

यहूदाइ प्‍ह्रिबै प्ह्रिछ्या 1:9

दिलेया स्वर्गदूतमैं न्होंर्बै चिब मिखाएलज्यै या मोशाए सिनुए बारेर दुष्‍ट‍ने ताँ लमा गाल् आके, छ्याब् ल्हैदिबै आँटै या आलल, बरु “क्‍हिलाइ याहवेहजीन् हौदिरिगे,” बिल।

दर्शन 1:10

प्रभुए त्हिंइर पबित्र प्ल्हजी ङलाइ प्लिंइ। च्हमा ङए लिउँइँ थुतुरुल् धों तबै कैइ,

दर्शन 1:7

ङ्ह्‍योत्ति, येशू न्‍हाँम्‍स्योर युइन मुँ। खीलाइ सैब्मैं नेरो अरू ताँन् म्हिमैंज्यै या खी म्रोंब्‍मुँ। छले खि युरिब् म्रोंमा ह्‍युलर्बै ताँन् म्हिमैं न्हुँ लसि क्रोब्‍मुँ। आमेन, छान् तरिगे।

दर्शन 14:13

च लिउँइँ “चु ताँ प्‍ह्रिद्: प्रभुए फिर बिश्‍वास लबइले तारे पिरु दु:ख योंसि सिब्‍मैंइ आशिक योंब्मुँ,” बिसि स्‍वर्गउँइँले युबै कै ङइ थेइ। झाइले पबित्र प्ल्हजी बिइ, “चु ताँ क्‍ह्रोंसेंन् ग। चमैंइ दु:खले लबै केमैंए नों योंसि छिं ङ्हाँल् योंब्‍मुँ।”

दर्शन 8:13

च लिउँइँ ङइ धबै ङ्ह्‍योमा “तारेबै स्‍वर्गदूत सोंइ ह्राबै थुतुरुए कै थेबै लिउँइँ पृथ्‍बीर्बै म्‍हिमैंए फिर बेल्‍ले थेबै दुःख तब्मुँ,” बिसि प्‍हुररिबै क्व्रे घ्रिइ बिरिब ङइ थेइ।

दर्शन 8:2

च लिउँइँ परमेश्‍वरए उँइँर रारिबै स्‍वर्गदूत ङि ङइ म्रोंइ। च स्‍वर्गदूतमैंए योरि खीजी थुतुरु ङि पिंइ।