१ पत्रुस 4:15 - परमेश्‍वरए ताँ तमु क्युइर

¹⁵ छतसि क्‍हेमैंए न्होंरि खाबज्यै या म्हि सैमैं, ह्‍‍योमैं आछ्याँबै के लब्मैं, आगुए केर ह्रब् प्हैंसि यो झोंल् म्हैब्मैंइ धोंले दुःख योंल् आत्हुरिगे।

१ पत्रुस 4:15 Iomraidhean Croise

प्रस्थान 22:2

“ह्‍योइ म्हुँइँसर धिंर ह्‍योरिबै तोंर स्याइ बिस्याँ चलाइ प्रिंमा च सियास्याँ, चलाइ सैवाबै छ्याब् प्रिंबै म्हिए फिर खरिब् आरे।

मत्ती 5:11

“क्हेमैं ङए लिलि प्रबइले म्‍हिमैंइ क्‍हेमैं स्यारब, ह्रुगुदिब, क्हेमैंए बिरोधर स्योलिबै ताँमैं पोंइ बिस्याँ क्हेमैंइ आशिक योंब्मुँ।

१ थेसलोनिकी 4:11

ङिइ क्हेमैंने ओंसोंन् बिब् धोंले, खाब‍ने या आप्‍होंनु, ह्रों-ह्रोंसए के लरिद्, धै ह्रोंसए के ह्रोंसजीन् लसि ह्रोंसए प्‍हलेर राबै भों लद्।

२ थेसलोनिकी 3:11

क्हेमैंए न्होंरि को-कोइ प्ल्हेउ तसि छ्ह थोरिइमुँ, धै चमैं ह्रोंसइ के आल दिलेया अरूए केर तोनतोर्न यो झोंम् बिब ङिइ थेइमुँ।

१ तिमोथी 5:13

च्हौ मत्‍त्रे आङिं चमैं धिं-धिंर स्युरसि प्ल्हेउ तम्, चमैं तब-आतबै ताँमैं पोंब, आगु स्यारब, तोनतोंर्न आगुए केर यो झोंब्मैं तम्।

२ तिमोथी 2:9

ङइ चु सैं तोंबै ताँ अरू म्हिमैंने बिमिंबै लमा ङ अप्रादिमैं धोंले सँउँलिइ फैसि दुःख नोल् त्‍हुइमुँ। दिलेया परमेश्‍वरए ताँम् खाबज्यै या फैथेंल आखाँ।

१ पत्रुस 3:14

दिलेया ठिक के लसि दुःख योंनाबिलेया क्‍हेमैंइ आशिक योंब्मुँ। म्‍हिमैंइ तोन् बिलेया चमैं म्रोंसि आङ्हिंन्, न्हुँ आलद्।

१ पत्रुस 3:17

तलेबिस्याँ आछ्याँबै के लसि दुःख योंब् भन्दा परमेश्‍वरए सैंर मैंब् धों तबै छ्याँबै केमैं लसि दुःख योंब छ्याँब ग।