१ पत्रुस 3:11 - परमेश्‍वरए ताँ तमु क्युइर

¹¹ चइ पाप लब पिसि छ्याँबै के लरिगे, धै ताँनने क्ह्रिसि आक्ह्रिब्मैंलाइ क्ह्रिमिंबै के लरिगे।

१ पत्रुस 3:11 Iomraidhean Croise

भजनमैं 125:4

ओ याहवेह, छ्याँब लब्मैंलाइ छ्याँबन् लमिंन्, छलेन छ्याँबै खों प्ह्‍याब्मैंलाज्यै या छ्याँबन् लमिंन्

भजनमैं 34:14

आछ्याँबै के लबउँइँले एखो धै छ्याँबै के लद्; आक्ह्रिबै म्हिमैं क्ह्रिमिंन्, खोंयोंन् बिलै छाबन् के लरिद्।

भजनमैं 37:27

आछ्याँबै केमैं लब् पिसि छ्याँबै केमैं लप्रद्; छलस्याँ खोंयोंन् बिलै क्हिइ ह्‍युलर क्ल्हे लल् योंब्मुँ।

हितोपदेश 16:17

सोजो म्हिइ आछ्याँबै केमैं आल; आछ्याँबै के आलब्मैंइ छेनाले छ्ह थोल् खाँम्।

हितोपदेश 16:6

भर पर्दिल्‍ले छ्ह थोद्, धै परमेश्‍वरजी क्हिए पाप क्षमा लब्मुँ, धै याहवेहजी बिब् ङिंस्याँ क्हिला तोइ न्होंह्रो आत।

हितोपदेश 3:7

क्हि ह्रोंसन् ह्रब्-सेब् आप्हैंन्; याहवेहलाइ म्हाँदिद्, आछ्याँबै केमैं पिवाद्।

मत्ती 5:45

छ लस्‍याँ मत्‍त्रे क्‍हेमैं स्‍वर्गर टिबै आबाए सन्‍तान तब्‍मुँ। तलेबिस्याँ परमेश्‍वरजी दुष्‍ट म्हिमैं नेरो छ्याँब् लब्मैं ङ्हिंना-ङ्हिंनए फिर त्‍हिंयाँ प्रेमिंमुँ, धै धर्मि नेरो पापिमैं ङ्हिंना ङ्हिंनए ल्हागिर नाँ युमिंइमुँ।

मत्ती 5:9

आक्‍ह्रिबै म्हिमैं क्ह्रिमिंब्मैंइ आशिक योंब्मुँ, तलेबिस्याँ परमेश्‍वरजी चमैंने खीए सन्‍तान बिब्‍मुँ।

मत्ती 6:13

ङिलाइ पापर च्होल् आपिंनु, दुष्‍टउँइँले जोगेमिंनु। [तलेबिस्याँ ग्याल्स, शक्‍ति नेरो थेबै मान खोंयोंइ बिले क्हिलन् ग। आमेन।]

मर्कूस 14:7

तलेबिस्याँ ङ्हाँदुमैं क्‍हेमैंने खोंयोंन् बिलै तरिब्‍मुँ। क्‍हेमैंइ चमैंलाइ तोइ पिंदा ङ्हाँस्‍याँ खोंयों पिंलेन् खाँम्। दिलेया ङम् खोंयोंइ या क्‍हेमैंने आत।

लूका 1:79

झाइले मिछु खैबर टिब्मैं नेरो कालए सुँर फेल् म्हैब्मैंइ चारबै ह्‍वे योंब्मुँ, धै च ह्‍वेइ ङ्यो शान्तिए घ्याँर डोरेब्मुँ।”

लूका 6:35

छले आङिं, ह्रोंसए शत्तुरमैंलाज्यै या म्‍हाँया लद्, चमैंए फिर ल्हयो खद्, एल् आखाँबै म्‍हिमैंलाज्यै या छे पिंन्। छलस्याँ परमेश्‍वरङाँइँले क्‍हेमैंइ थेबै इनाम योंब्‍मुँ। धै क्‍हेमैं ताँन् भन्दा थेबै परमेश्‍वरए च्ह-च्हमि ठर्दिब्‍मुँ, तलेबिस्याँ परमेश्‍वरजी बैगुनिमैं नेरो दुष्‍टमैं फिर ल्हयो खम्।

लूका 6:9

झाइले येशूजी फरिसीमैं नेरो शास्‍त्रिमैंने बिइ, “क्‍हेमैंने बालु ङइ ताँ घ्रि ङ्योएम्! प्रिबै त्हिंइर छ्याँबै के लब स्वाब उ आछ्याँबै के लब स्वाब? म्‍हि जोगेब छ्याँब उ सिल् पिंब छ्याँब?”

यूहन्‍ना 17:15

क्हिजी चमैं चु ह्‍युलउँइँले बोमिंन् बिसि ङ यो छ्युँ आल। दिलेया दुष्‍टउँइँले जोगेमिंन् बिसि ङ यो छ्युँ लम्।

रोमी 12:18

खाँन् समा ताँनने क्ह्रिसि टिद्।

रोमी 14:17

तलेबिस्याँ ङ्योइ परमेश्‍वरलाइ म्रुँलाइ धोंले म्हाँदिइ बिस्‍याँ खीजी ङ्योलाइ थेबै आशिक पिंम्। च आशिक तो जा बिस्‍याँ तोन्‍दोंरि सै चब् थुँब् योंब मत्‍त्रे आङिं, दिलेया पबित्र प्ल्हजी ठिक ठर्दिमिंसि पिंबै शान्‍ति नेरो आनन्‍द ग।

रोमी 14:19

छतसि ङ्यो क्ह्रिसि घ्रिइ घ्रिलाइ ल्होबै केमैं खोंयोंन् बिलै लरिले।

रोमी 5:1

ङ्योइ बिश्‍वास लबइले परमेश्‍वरए उँइँरि ठिक ठर्दिसि प्रभु येशू ख्रीष्‍टउँइँले ङ्यो परमेश्‍वरने क्ह्रिल् योंइमुँ।

रोमी 7:19

ङइ लदा ङ्हाँबै छ्याँबै के ङ आल, बरु ङइ लदा आङ्हाँबै आछ्याँबै केन् ङइ लम्।

रोमी 7:21

छतसि ङइ छले क्होइमुँ: छ्याँबै के लदा ङ्हाँना-ङ्हाँन् ङइ पाप मत्‍त्रे लम्,

रोमी 8:6

ओंसोंबै बानिए इच्‍छार सैं ह्‍यास्याँ म्‍हि सिम्, परमेश्‍वरए प्ल्हए इच्‍छार सैं ह्‍यास्याँ म्‍हिइ छारा छ्ह नेरो शान्‍ति योंम्।

गलाती 5:22

दिलेया पबित्र प्ल्हए रोमैं छाब् ग: आगुए फिर म्हाँया खब, सैं तोंब, शान्ति तब, सैदिल् खाँब आगुए फिर ल्हयो खब, अरूमैंल छ्याँब तरिगे ङ्हाँब, लम् बिबै के पूरा लब,

गलाती 6:10

छतसि मौका योंन् समा ङ्योइ ताँन् म्हिमैंलाइ ल्होबै केमैं लरिले, खासगरि बिश्‍वासी अलि-अङाँमैंलाइ ल्होले।

कलस्सी 3:15

क्‍हेमैंए सैंर ख्रीष्‍टजी पिंबै शान्तिइ प्लिंरिगे। क्हेमैं ताँन् ज्यु घ्रिर्न क्ह्रिसि शान्ति योंरिगे बिसि परमेश्‍वरजी क्‍हेमैं त्‍हाँब् ग। धै धन्‍यबाद पिंब्‍मैं तद्।

१ तिमोथी 6:18

चमैंइ छ्याँबै केमैं लरिगे, धै छ्याँबै केमैं लसि म्हिमैं ल्होब्मैं, पिंब्मैं तरिगे बिसि चमैंने बिद्।

हिब्रू 12:14

ताँन् म्‍हिमैंने क्ह्रिब भों लद्, धै पबित्रले छ्ह थोबै सैं लद्। छले छ्ह आथोस्‍याँ खाबज्‍यै या प्रभु म्रोंल् आखाँ।

हिब्रू 13:16

घ्रिइ घ्रिने छ्याँबै के लब नेरो ह्रोंसने मुँबै सै फा-फु चुब आम्‍लेद्, तलेबिस्याँ छाबै ख्रोमैं म्रोंसि परमेश्‍वर सैं तोंम्।

याकूब 4:17

छतसि ठिक के लल् ह्रसेया आलबै म्हिइ पाप लम्।

१ पत्रुस 3:12

तलेबिस्याँ ठिक के लब्‍मैंलाइ परमेश्‍वरजी छेनाले छैं लरिमुँ, धै न्ह क्रोंले खीजी चमैंए प्राथना थेमुँ, दिलेया आछ्याँबै के लब्‍मैंलाइ खीजी बिरोधर लम्।”

३ यूहन्‍ना 1:11

ओ ङइ खोबै थु, आछ्याँबै के लब्मैंइ धोंले आलद्, बरु छ्याँबै के लब्मैंइ धोंलेन् क्हिज्यै या छ्याँबै केमैं लद्। छ्याँबै के लब्मैं परमेश्‍वरए म्हिमैं ग, आछ्याँबै के लब्मैंइ परमेश्‍वरलाइ आम्रोंइमुँ।