१ पत्रुस 3:1 - परमेश्‍वरए ताँ तमु क्युइर

¹ ओ च्हमिरिमैं, ह्रोंसए प्‍युँए न्होंर टिद्। तलेबिस्याँ कोइ च्हमिरिए प्‍युँ परमेश्‍वरउँइँले खबै सैं तोंबै ताँ थेल् आङिंलेया क्हेमैंए छ्याँबै बानि ब्योर म्रोंसि चमैंए सैं एब्‍मुँ। क्हेमैंइ तोइ बिल् आत्‍हु,

१ पत्रुस 3:1 Iomraidhean Croise

उत्पत्ति 3:16

झाइले खीजी च्हमिरिने बिइ, “क्हिए प्हसे फिबै त्हेर्बै बेथा ङइ बेल्‍ले बडिमिंब्‍मुँ। क्हिइ दुःखले प्हसे फिब्‍मुँ। क्हिए सैं प्युँ ङाँइँन तरिब्‍मुँ, छतसि चइ क्हिए फिर क्‍ल्हे लब्‍मुँ।”

हितोपदेश 11:30

ठिक के लबै म्हिइ छ्याँबै छ्ह थोब्मुँ, धै म्हिमैंलाइ छ्याँबै घ्याँर डोरेल् खाँबै म्हि बुद्धि मुँब् ग।

हितोपदेश 18:19

कारग्युले नुबै गारा झोंबै सहर ट्होब् भन्दा सैं नबै अलिलाइ वाँब झन् गारो तम्, धै अलिने प्होंब जिगल्सि झोंसि म्रा तोरब् धोंन् ग।

मत्ती 18:15

“क्‍हिए अलिइ क्‍हिए बिरोधर तोइ आछ्याँबै के लस्‍याँ, ओंसों च ङाँर ह्‍यासि क्हेमैं ङ्हिं मत्‍त्रे मुँमा चइ लबै आछ्याँबै केमैं उँइँमिंन्। धै चइ क्‍हिए ताँ ङिंस्‍याँ, क्‍हिए अलि ह्रोंसलन् तइ।

रोमी 10:16

दिलेया सैं तोंबै ताँ थेनाबिलेया ल्हें म्हिइ वास्‍था आल। छतसि “ओ प्रभु, ङिइ बिबै ताँ खाबै क्‍वेंइमुँ?” बिसि यशैया अगमबक्‍ताइ ओंसोंन् बिइमुँ।

रोमी 6:17

ओंसों क्‍हेमैं पापए केब्छैं मुँल, दिलेया तोगो क्‍हेमैंए सैं न्होंउँइँले परमेश्‍वरजी बिबै ताँ ङिंब्मैं तइमुँ। छतसि परमेश्‍वरलाइ धन्‍यबाद तरिगे।

रोमी 7:2

नमुना घ्रि बिले, ब्ह्‍या लबै च्हमिरिल ह्रोंसए प्युँ सोन् समा ठिमर बिब् धोंले च प्युँनेन् टिल् त्हुम्। दिलेया प्युँ सियास्‍याँ च च्हमिरिलाइ ठिमइ फैल् आखाँ।

१ कोरिन्थी 11:3

अझै क्‍हेमैंइ चु ताँ सेरिगे बिब ङए सैं मुँ: ख्रीष्‍ट ताँन् म्हिमैंए क्र ग, झाइले प्युँ प्ह्रेंस्योए क्र ग, परमेश्‍वर ख्रीष्‍टए क्र ग।

१ कोरिन्थी 14:34

परमेश्‍वरए सेवा लमा च्हमिरिमैं तोइ आपोंन्ले टिरिगे, तलेबिस्याँ परमेश्‍वरए मिं क्वेबै त्हेर चमैंइ ताँ लल् आत। यहूदीमैंए ठिमइ बिब् धोंले चमैंइ ह्रोंसलाइ अधीनर थेंरिगे।

१ कोरिन्थी 7:16

ओ बिश्‍वासी च्हमिरि, क्‍हिइ आसे वा? ह्रोंसए अबिश्‍वासी प्‍युँलाइ परमेश्‍वरए घ्‍याँउँइँ डोरेल् खाँम् उ? छलेन ओ बिश्‍वासी मुँयुँ, क्‍हिइ आसे वा? ह्रोंसए अबिश्‍वासी प्ह्रेंस्योलाइ परमेश्‍वरए घ्‍याँउँइँ डोरेल् खाँम् उ?

एफिसी 5:33

तो मुलेया क्‍हेमैं ताँन् ह्रोंसलाइ धोंलेन् मुँयुँमैंइ ह्रोंसए प्‍ह्रेंस्‍योलाइ म्हाँया लल् त्‍हुम्, छलेन प्ह्रेंस्योमैंज्यै या ह्रोंसए प्‍युँलाइ मान लल् त्‍हुम्।

कलस्सी 3:18

ओ च्हमिरिमैं, क्हेमैं प्रभुए उँइँर छ्याँब तबै ल्हागिर ह्रों-ह्रोंसए प्‍युँए न्होंर टिद्।

कलस्सी 4:5

येशू ख्रीष्‍टए फिर बिश्‍वास आलब्मैंने न्ह क्रों मि क्रोंले प्रद्। धै क्‍हेमैंइ मौका योंमा प्रभुए सैं तोंन् लबै केमैं लद्।

२ थेसलोनिकी 1:8

परमेश्‍वर ङो सेल् आङिंब्मैं नेरो ङ्योए प्रभु येशूउँइँले खबै सैं तोंबै ताँ आक्वेंब्‍मैं ताँनलाइ खीजी दण्ड पिंब्‍मुँ।

हिब्रू 11:8

बिश्‍वासउँइँलेन् अब्राहामइ परमेश्‍वरजी बिब ङिंइ, धै ह्‍याद् बिबै क्ल्ह्‍योउँइँ ह्‍याइ। लिउँइँ च क्ल्ह्‍योए क्ल्हे चलाइन तल् पिंबै सैं परमेश्‍वरल् मुँल। दिलेया ह्रोंस खनइ ह्‍यारिइमुँ बिब ह्रोंसलाइन था आरेल।

हिब्रू 5:9

खी ताँन् जाँचउँइँले पास तल् खाँसि खीए ताँ म्हाँदिब्‍मैं ताँनए ल्हागिर खी खोंयोंइ आखाँबै छ्हए मुल तइमुँ।

१ पत्रुस 1:22

क्‍हेमैंइ क्ह्रोंसेंन्बै परमेश्‍वर म्हाँदिसि ह्रोंसलाइ चोखो लबइले, ह्रोंसए आघें अलिलाइ आफेलनाले म्हाँया लद्, धै घ्रिइ घ्रिलाइ सैं न्होंउँइँलेन् म्हाँया लद्,

१ पत्रुस 3:2

तलेबिस्याँ क्हेमैंइ परमेश्‍वरलाइ छेनाले म्हाँदिसि छ्याँबै बानि लब् म्रोंसि चमैंए सैं एब्‍मुँ।

१ पत्रुस 3:7

छलेन ओ मुँयुँमैं, ह्रोंसए प्ह्रेंस्योने बालु सैं क्ह्रिसि टिद्। क्‍हेमैं भन्दा चमैं आभोंब् मुँ बिब् सेसि ताँन् सैर चमैंलाइ मान लद्, तलेबिस्याँ परमेश्‍वरजी पिंबै छ्ह क्‍हेमैं ङ्हिंना-ङ्हिंनइ योंबै हग बराबर मुँ। क्‍हेमैंए प्राथनार बाधा आखरिगे बिसि ह्रोंसए प्ह्रेंस्योने छेनाले क्‍ह्रिसि टिद्।

१ पत्रुस 4:17

तलेबिस्याँ परमेश्‍वरजी निसाफ लबै त्हे तखइमुँ। निसाफ लमा ताँन् भन्दा ओंसों खीजी ह्रोंसए म्‍हिमैंउँइँलेन् तों लम्। छले खीजी ङ्योउँइँलेन् निसाफ तों लम् बिस्याँ, खीउँइँले खबै सैं तोंबै ताँ आक्वेंब्‍मैंलाइ झन खैबै निसाफ ललै?