१ पत्रुस 1:25 - परमेश्‍वरए ताँ तमु क्युइर

²⁵ दिलेया परमेश्‍वरए बचन खोंयोंन् बिलै तरिम्।” क्‍हेमैंने बिमिंबै सैं तोंबै ताँ चुन् ग।

१ पत्रुस 1:25 Iomraidhean Croise

भजनमैं 102:12

दिलेया ओ याहवेह, क्हि खोंयोंन् बिलै राजगद्दिर टिरिम्; पुस्ता-पुस्ता समा क्हिलाइ मैंरिब्मुँ।

भजनमैं 102:26

च सैमैं नास तयाब्मुँ, क्हि बिस्याँ खोंयोंन् बिलै तरिब्मुँ; क्वें धोंले चमैं स्योब तयाब्मुँ। क्वें फेर्दिब् धोंले क्हिजी प्लिसि फेर्दिमिंब्मुँ, धै चमैं ताँन् भ्योंवाब्मुँ।

भजनमैं 119:89

ओ याहवेह, क्हिजी बिबै ताँ खोंयोंन् बिलै तरिम्; सवर्गर च भोंले थेंइमुँ।

मत्ती 5:18

तलेबिस्याँ क्ह्रोंसेंन ङ क्हेमैंने बिमुँ, स्वर्ग नेरो पृथ्‍बी नास आतन् समा ठिमर प्ह्रिबै च्‍योंब भन्दा च्‍योंबै ताँ या पूरा आतन्ले म्‍हरिब् आरे।

लूका 16:17

दिलेया मु नेरो पृथ्‍बी म्‍हयाल् खाँमुँ, परमेश्‍वरए छ्वेर प्ह्रिबै ताँ घ्रि या आम्ह।

यूहन्‍ना 1:1

ताँन् भन्दा ओंसों बचन मुँल। च बचन परमेश्‍वरने बालु मुँल। धै बचन परमेश्‍वरन् मुँल।

यूहन्‍ना 1:14

परमेश्‍वरए बचन म्हिए क्हो किंसि ङ्योए म्हाँजोर युसि टिइ। खी दयाम्हाँया मुँब नेरो कह्रोंसेंन्बै ताँ पोंमल खीए चारबै ह्‍वे ङिइ म्रोंइमुँ, च चारबै ह्‍वे परमेश्‍वर आबाउँइँले युबै घ्रि मत्‍त्रे च्‍हल् मुँल।

१ कोरिन्थी 2:2

तलेबिस्याँ ङ क्‍हेमैंने मुँमा येशू ख्रीष्‍टलाइ क्रूसर च्योवाबै ताँ मत्‍त्रे लम् बिब ङए सैंर मुँल।

एफिसी 2:17

छतमा येशू युसि क्‍हेमैं परमेश्‍वरउँइँले ह्रेंगो मुँबै अरू ह्रेंमैं नेरो परमेश्‍वरने चेंदो मुँबै ङि यहूदी ह्रें ङ्हिंन-ङ्हिंनलाइन सैं तोंबै ताँ बिमिंसि क्ह्रिल् लमिंइ।

एफिसी 3:8

ङ परमेश्‍वरए म्‍हिमैं न्‍होंरि ताँन् भन्दा च्‍योंब मुँनबिलेया ख्रीष्‍टने घ्रिन् तसि खोंयोंइ आखाँबै सै न्होरए बारेर अरू ह्रेंमैंने बिप्रबै मौका ङलाइ पिंइ।

तीतस 1:3

छतसि ठिक त्हेर ङ्योलाइ मुक्‍ति पिंबै परमेश्‍वर आबाजी खीउँइँले खबै सैं तोंबै ताँ सेल् पिंसि चु ताँ बिप्रबै जिम्मा ङलाइ पिंइ। छतसि ङइ चु सैं तोंबै ताँ ताँनने बिप्रम्।

हिब्रू 6:5

धै परमेश्‍वरए ताँ छ्याँब मुँ बिसि था सेइमुँ, धै तारे तखबै जुगर परमेश्‍वरजी लबै शक्‍तिए केमैं या सेल् खाँइमुँ,

१ पत्रुस 1:12

चमैंने उँइँमिंबै ताँ चमैंए ल्हागिर आङिं, चमैंइ क्‍हेमैंए सेवा लरिल बिसि परमेश्‍वरजी सेल् पिंइ। धै चु ताँ स्वर्गउँइँले कुल्मिंबै पबित्र प्ल्हउँइँले क्हेमैंने सैं तोंबै ताँ बिमिंबै म्हिमैंउँइँले क्हेमैंइ थेइमुँ। स्‍वर्गदूतमैंज्यै या चु ताँ था सेदा ङ्हाँइमुँ।

१ पत्रुस 1:23

तलेबिस्याँ क्‍हेमैंइ परमेश्‍वरए खोंयोंइ तरिबै सोगों बचनउँइँले खोंयोंइ आखाँबै छ्ह योंइमुँ। चु छ्ह क्‍हेमैंए आबा-आमाउँइँले योंब आङिं, खोंयोंन् बिलै तरिबै सोगों बचनउँइँले छारा तसि क्‍हेमैं फिइमुँ।

१ पत्रुस 2:2

बरु भर्खर फिबै कोलोमैंइ ङ्‍हे म्हैब् धोंले सैं भोंब् लमिंबै परमेश्‍वरए ताँ म्हैद्। छ लस्याँ परमेश्‍वरए फिर लबै क्हेमैंए बिश्‍वास बडिदै ह्‍याल् खाँब्मुँ।

२ पत्रुस 1:19

धै अगमवक्तामैंइ येशूए बारेर बिबै ताँलाइ ङ्योइ भर लल् खाँम्। न्हाँग छझँ मि म्रोंबै त्हे आतन् समा धै न्हाँग छझँबै मुसारा आत्होंब् धोंले प्रभु येशू ख्रीष्‍ट युसि क्हेमैंए खोंर आचारन् समा अगमवक्तामैंइ प्ह्रिबै ताँ मिछु खैबर चारबै बत्ति धों तम्। छतसि चमैंए ताँलाइ न्ह क्रों मि क्रोंले थेंस्‍याँ क्‍हेमैंलाइ फायदा तम्।

१ यूहन्‍ना 1:1

खोंयोंइ आखाँबै छ्ह पिंबै बचन ओंसों ओंनोंन् मुँल। खीए बारेर ङिइ थेइमुँ, ङिए मिइन खीलाइ म्रोंइमुँ, ङिए योइन छुइमुँ।

१ यूहन्‍ना 1:3

क्हेमैं या ङिने बालु सैं घ्रिन् तसि प्रल् खाँरिगे बिसि ङिइ थेबै ताँ नेरो म्रोंबै ताँ क्‍हेमैंने बिम्। परमेश्‍वर आबा नेरो खीए च्‍ह येशू ख्रीष्‍टने ङ्यो सैं घ्रिन् तसि प्रम्।

दर्शन 14:6

च लिउँइँ ङइ स्‍वर्गदूत घ्रि मुर प्‍हुररिब् म्रोंइ। खोंयोंइ तरिबै सैं तोंबै ताँ चने मुँल। च सैं तोंबै ताँ पृथ्‍बीर्बै म्‍हिमैंए ल्हागिर, अथवा ताँन् ह्रें, ताँन् कुल, ताँन् क्युइ पोंब्‍मैं नेरो ताँन् ह्‍युलर्बै म्‍हिमैंए ल्हागिर मुँल।