तीतुस 1:4 - Garhwali

⁴ अर तीतुस या चिठ्‍ठी मि त्वे खुणि लिखणु छौं, किलैकि हम दुईया का दुई एक ही प्रभु पर बिस्वास करद्‍यां। इलै तू मेरा सच्‍चा नौना का जन छैई। अर मि प्रार्थना करदु कि, पिता परमेस्वर अर हमतै बचौण वळा प्रभु यीशु मसीह की किरपा अर शान्ति त्वेतै मिलु।

गढवली नयो नियम

⁴ मि य चिठ्ठी तीतुस तैं लिखणु छों, तू मेरा अपड़ा नौंना जन छै, किलैकि तू भि मसीह पर विश्वास करदी छै जन मि करदु; परमेश्वर पिता अर हमारा उद्धारकर्ता मसीह यीशु कि तरपां बट्टी त्वे तैं कृपा अर शान्ति मिलदी रौ।

तीतुस 1:4 Iomraidhean Croise

लूका 2:11

अर वु इन च कि आज राजा दाऊद का नगर मा तुम खुणि छुटकारा देण वळा को जनम होयुं च, अर उई मसीह प्रभु च।

यूहन्ना 4:42

तब ऊ लोग वीं जनानि बटि बुलण लगि गैनी, “अब हम तेरा बुलयां पर ही बिस्वास नि करद्‍यां, किलैकि हमुन अफि सुण्यालि, अर यू भि जाण्यालि कि सच्‍चि मा यूई मनखि दुनियां तैं छुटकारा देण वळु च।”

रोमियों 1:12

अर जब मि तुम लोगु का बीच मा रौलु, त वे बगत हम आपस मा एक-दुसरा तैं बिस्वास मा और जादा बढौला।

रोमियों 1:7

हे मेरा भै-बैंणो, या चिठ्‍ठी रोम नगर मा रौण वळा सब बिस्वासी लोगु खुणि च, जु कि हमरा पिता परमेस्वर तैं भौत प्यारा छिन अर वेका द्‍वारा पवित्र होण खुणि चुण्यां छिन। अर हम इन प्रार्थना करद्‍यां कि हमरा पिता परमेस्वर अर प्रभु यीशु मसीह की तरफा बटि तुमतै वेकी किरपा अर शान्ति मिलदी रौ।

2 कुरिन्थि 12:18

अर मिन तीतुस भै तैं समझै-बुझै के तुमरा पास भेजि, अर वेका दगड़ा मा एक और भै तैं भि भेजि त अब मितैं एक बात बता, कि जब तीतुस भै उख पौंछी त क्या वेन तुमरा दगड़ा मा छल-कपट कैरिके तुमतै ठगि? मगर मि अर तीतुस भै हमेसा तुम सभ्यों खुणि बड़ी इमानदारी से काम करद्‍यां।

2 कुरिन्थि 2:13

पर जब मिन अपणा दगड़्या तीतुस तैं उख नि पै, त मेरु मन बड़ु बेचेन ह्‍वे गै। तब मिन उखा बिस्वासी भै-बैंणो बटि विदै लिनी, अर मकिदुनिया मुलक कू चलि ग्यों।

2 कुरिन्थि 4:13

अर जन कि पवित्रशास्‍त्र मा भि लिख्यूं च कि, “मितैं परमेस्वर पर बिस्वास च, इलै वेका वचन को परचार करलु।” अर ये ही वचन का मुताबिक मि अर मेरा दगड़्या वेका वचन को परचार करद्‍यां।

2 कुरिन्थि 7:6

मगर परेसान होयां लोगु तैं दिलासा देण वळु परमेस्वर च। अर वेन ठिक बगत पर तीतुस भै तैं हमरा पास भेजि, अर वेका द्‍वारा हमतै दिलासा दिये गै।

2 कुरिन्थि 8:16

हे मेरा भै-बैंणो, इलै मि तीतुस तैं तुमरा पास फिर से भेजणु छौं। अर मि पिता परमेस्वर को धन्यवाद देन्दु किलैकि वेका बदौलत ही तीतुस भि दिल से तुमरि उथगा ही चिन्ता-फिकर करदु जथगा मि करदु।

2 कुरिन्थि 8:23

अर अगर तीतुस भै का बारा मा कुई भि सवाल च, त मि तुमतै बतै देन्दु कि वु मेरु मददगार च अर सेवा का काम मा इमानदार मनखि। अर वेका दगड़ा मा जु दुई भै औणा छिन ऊ बिस्वासी समुदाय का लोगु का द्‍वारा भिजे जाण छिन। अर यू दुईया का दुई यीशु मसीह की सेवा का द्‍वारा वेतैं आदर-सम्मान देन्दिन।

2 कुरिन्थि 8:6

इलै हमुन तीतुस भै तैं जैन ये दान तैं इकट्‍ठा करण को काम तुमरा बीच मा शुरु कैरी छौ, मिन वेसे बिन्ती कैरी कि वु फिर से तुमरा बीच मा ऐके वेतैं पूरु कैरो।

गलातियों 2:3

अर कै भि अध्यक्ष न मेरा दगड़्या मा अयां तीतुस भै का बारा मा नि पूछी, अर ना ही वेका खतना का बारा मा, कि वेन खतना का रिवाज तैं पूरु कर्युं च की ना। जब की उ त एक यूनानी जाति को मनखि छौ।

गलातियों 3:26

अर यीशु मसीह पर बिस्वास करण का द्‍वारा ही तुम सब लोग परमेस्वर की औलाद छाँ।

गलातियों 3:28

इलै अब नऽ त कुई यहूदी च अर ना ही कुई यूनानी, नऽ त कुई गुलाम च अर ना ही कुई आजाद, अर नऽ त कुई बैख च अर ना ही कुई जनानि, किलैकि तुम सभ्या का सभि यीशु मसीह मा एक छाँ।

इफिसुस 1:2

अर मि इन प्रार्थना करदु, कि तुमतै हमरा पिता परमेस्वर अर प्रभु यीशु की तरफा बटि वेकी महान किरपा अर शान्ति मिलदी रौ।

कुलुसी 1:2

कुलुसी नगर मा रौण वळा यीशु मसीह का भक्‍त अर बिस्वासयोग्य लोगु खुणि लिखणु छौं। मि इन प्रार्थना करदु, कि हमरा पिता परमेस्वर की तरफा बटि तुम सभ्यों तैं वेकी किरपा अर शान्ति मिलदी रौ।

1 तीमुथियुस 1:12

मि हमरा प्रभु मसीह यीशु को धन्यवाद करदु, जैन मितैं मजबूत बणै। किलैकि वेन मितैं बिस्वासयोग्य समझि के अपणी सेवा करणु खुणि ठैरै।

2 तीमुथियुस 1:1

हे मेरा भै-बैंणो मि पौलुस छौं, अर मितैं परमेस्वर न अपणी इच्छा का मुताबिक यीशु मसीह खुणि खास चेला ठैरै के चुण्यालि। अर मि या चिठ्‍ठी तीमुथियुस खुणि लिखणु छौं, जु कि मेरा प्रिय नौना का जन च। अर जु लोग यीशु मसीह पर बिस्वास करदिन, ऊंतैं जीवन देण को करार परमेस्वर को कर्युं च। अर येका बारा मा बतौणु खुणि ही परमेस्वर न मितैं चुणी के भेज्यूं च। तीमुथियुस मि प्रार्थना करदु कि, पिता परमेस्वर अर हमरु प्रभु यीशु मसीह अपणी किरपा, दया अर शान्ति त्वेतै देणु रौ।

2 तीमुथियुस 4:10

किलैकि भै देमास न ईं दुनियां की चीजों तैं जादा प्यार कैरी, इलै उ मितैं छोड़ि के थिस्सलुनीकी नगर कू चलि गै। अर क्रेसकेंस भै गलाति नगर कू अर भै तीतुस भि दलमतिया नगर कू चलि गै।

तीतुस 1:3

अर ठिक बगत पर परमेस्वर न अपणु शुभ समाचार परगट कैरी, अर यू शुभ समाचार हमतै बचौण वळा परमेस्वर का द्‍वारा परचार करणु खुणि मि मा सौंपे गै।

तीतुस 2:13

अर जब हम वीं धन्य आस का दगड़ा मा, परमेस्वर अर हमतै बचौण वळा यीशु मसीह को बड़ा सम्मान से ईं धरती पर दुबरा वापस औण को इंतजार करद्‍यां, तब ये इंतजार करण का बगत मा भि हमतै यू ही धरमी जीवन जीण चयेणु।

2 पतरस 1:1

हे मेरा भै-बैंणो, मि शमौन पतरस यीशु मसीह को सेवक अर एक खास चेला छौं। मि या चिठ्‍ठी तुम सभ्यों खुणि लिखणु छौं, जौं तैं पिता परमेस्वर की तरफा बटि यू कीमती मौका मिल्यूं च, कि हम सब छुटकारा देण वळा यीशु मसीह पर बिस्वास कैरा। अर यीशु मसीह ही च, जु कि परमेस्वर की नजर मा धरमी च।

2 पतरस 1:11

अर इन कैरिके तुम हमरा पिता परमेस्वर अर बचौण वळा यीशु मसीह का राज्य मा जै सकिल्या जु कि सदनि को च, अर यां को तुमतै पूरु अधिकार दिये जालु।

2 पतरस 2:20

अर या बात सच्‍च च, कि अगर ऊ लोग हमरा प्रभु अर छुटकारा देण वळा यीशु मसीह का बारा मा पूरा ज्ञान का द्‍वारा दुनियां की अशुद्ध चीजों से बचण का बाद, अगर फिर से दुनियां का कामों मा ही लगि जनदिन, त या बात साफ ह्‍वे जान्दी कि अब ऊंकी हालत पैलि से भि जादा खराब ह्‍वे जान्दी।

2 पतरस 3:18

इलै तुम हमरा प्रभु अर बचौण वळा यीशु मसीह की दया अर वेका ज्ञान मा बढदी जा, अर वेको आदर-सम्मान अब बटि लेके हमेसा-हमेसा तक होन्दी रौ। आमीन।

2 पतरस 3:2

ताकि तुम परमेस्वर का पवित्र रैबर्यों का द्‍वारा पैलि बटि बुलयां वचन तैं याद कैरा। अर हमरा परमेस्वर अर बचौण वळा प्रभु की आज्ञाओं तैं जु कि तुमतै खास चेलों का द्‍वारा दिये गैनी, ऊं सब बातों तैं अपणा ध्यान मा रखा।

1 यूहन्ना 5:14

अर हमतै पिता परमेस्वर पर पूरु यकीन च कि हम वेकी मनसा का मुताबिक जु कुछ भि वेसे मंगद्‍यां, त उ हमरि बात तैं सुणदु च।

यहूदा 1:3

हे मेरा प्यारा भै-बैंणो, मि भौत चान्दु छौ, कि मि तुमतै बचयै जाण का बारा बतौ, जै बचयै जाण मा हम सब हिस्सेदार छां। मगर अब मितैं यू जरुरी लगदु, कि मि तुमरा हौसला तैं बढ़ो, ताकि तुम लोग वे बिस्वास मा कड़ी मेनत कैरा, जु कि बिस्वासी लोगु तैं हमेसा खुणि एक ही बार सौंपे गै।