फिलिप्पियों 2:1 - गददी

¹ मसीह मन्ज तुन्दी जिन्दगी तुसिओ मजबुत करदी हा अतै तसेरा प्‍यार तुसिओ तसल्ली दिन्दा हा। तुन्दी संगति पवित्र आत्मा सोगी हा अतै तुसै अक्की दूये पुर दया अतै तरस करदै हिन।

फिलिप्पियों 2:1 Iomraidhean Croise

लूका 2:25

यरूशलेम मन्ज शिमौन नां रा अक्क मणु बड़ा धर्मी अतै भक्त थू। सो पवित्र आत्मा सितै भरूरा थू। सो इस्त्राएल रै मणु रा छुटकारा दिणैबाळै मसीहा जो भाळू करदा थू।

यूहन्‍ना 14:18

“मुँ तुसिओ अनाथ ना छड़णा; अऊँ तूसु बलै इन्दा हा

यूहन्‍ना 14:27

अऊँ तुसिओ शान्ती दि चलूरा, अपणी शान्ती तुसिओ दिन्दा हा; जियां संसार दिन्दा, अऊँ तुसिओ ना दिन्दा तून्दा मन परेशान ना भोआ अतै ना ही डरा।”

यूहन्‍ना 17:13

अबै अऊँ तिजो बलै इन्दा हा, अतै ऐह गल्ला संसारा मन्ज बलदा हा, कि ऐह मेरी खुशी अपणै मन्ज पान।

चेलै रै कम 2:46

सो रोज अक्क मन भूच्ची करी मन्दरा मन्ज इकट्ठै भुन्दै, अतै घर-घर रोटी त्रोड़दै अतै खुशी सोगी अतै मना री सीधाई सोगी खाणा खान्दै थियै,

चेलै रै कम 4:32

विस्वास करनैवाळै री मण्ड़ळी अक्क चित अतै अक्क मन री थी, ऐड़ी तक की कोई भी अपणी सम्पति जो अपणा ना बलदा थू, पर सब कुछ सांझै रा थू।

रोमियो 5:5

ऐह उम्मीद असिओ निराश ना भूणा दिन्दी, क्ओकि अहै जाणदै कि प्रमात्मैं असिओ कैतनी गहराई सोगी प्रेम करू क्ओकि तिनी पवित्र आत्मा असिओ दितुरीआ ताकि इन्दै दिल प्रमात्मैं रै प्रेम सोगी भरी गान।

रोमियो 8:26

ऐस तरीकै सितै पवित्र आत्मा भी इन्दी कमजोरी मन्ज मदद करदा क्ओकि अहै ना जाणदै कि प्रार्थना कस तरीकै करना चहिन्दी। पवित्र आत्मा अप्पू ही आहें भरी भरी करी, जैड़ी बयान थऊँ बाहर हिन, असु तांयें बिनती करदा हा।

1 कुरिन्थियों 12:13

तैस तरीकै ही अहै सबीये चाहे यहूदी या गैर यहूदी, चाहे दास या आजाद सबी जो अक्क ही आत्मा रै द्धारा अक्क शरीर भूणै तांयें बपतिस्मा लैऊरा हा, अतै असु सबी रै अन्दर अक्क ही पवित्र आत्मा दितुरा हा।

1 कुरिन्थियों 15:31

हे विस्वासी भाईओ, मिन्जो तैस घमण्ड़ री सौगन्द हा जैड़ा इन्दै प्रभु यीशु मन्ज अऊँ तून्दै बारै मन्ज करदा हा कि अऊँ हर रोज मौत रा सामना करदा हा।

1 कुरिन्थियों 3:16

कै तुहै ना जाणदै कि तुहै प्रमात्मैं रा मन्दर हिन, अतै प्रमात्मैं रा आत्मा तूसु मन्ज वास करदा?

2 कुरिन्थियों 13:14

प्रभु यीशु मसीह रा अनुग्रह अतै प्रमात्मैं रा प्रेम अतै पवित्र आत्मा री सहभागिता तूसु सबी सोगी भुन्दी रेय्आ।

2 कुरिन्थियों 2:14

पर प्रमात्मैं रा धन्यवाद भोआ क्ओकि अहै मसीह सोगी जुड़ी गच्छुरै हिन तैस बलै जय हा अतै सो इन्दी अगुवाई करदा अपणै ज्ञान जो खुशबु सांईयै इन्दै द्धारा हर जगह फैलाणै मन्ज।

गलातियों 4:6

अहै जैड़ै प्रमात्मैं रै पुत्र हिन, ठेरैतांये प्रमात्मैं अपणै पुत्र रा आत्मा जैड़ा इन्दै दिला मन्ज भैजुरा हा, सो आत्मा प्रमात्मैं जो “हे अब्बा, हे पिता” बल्ली करी हक्का पान्दा हा।

गलातियों 5:22

पर पवित्र आत्मा इन्दी जिन्दगी मन्ज ऐस तरीकै रै फल पैदा करदा हा, प्रेम, खुशी, शान्ती, धीरज, कृपा, भलाई, विस्वास,

इफिसियों 4:4

क्ओकि अक्क ही देह हा अतै अक्क ही आत्मा हा, जिआं तुहै हैदुरै हिन भविष्‍य री महिमा भरी अक्क ही उम्मीद तांयै।

फिलिप्पियों 1:8

ऐत मन्ज प्रमात्मां मेरा गवाह हा, कि अऊँ मसीह यीशु सांईं प्‍यार करीके तूसु सबी जो चाहन्दा।

फिलिप्पियों 3:3

क्ओकि असली खतना बाळै ता अहै ही हिन जैड़ै प्रमात्मैं री आत्मिक अगुवाई सितै भजन करदै हिन अतै मसीह यीशु पुर घमण्ड़ करदै हिन अतै मणु रै कर्मा पुर भरोसा ना रखदै हिन।

कुलुस्सियों 2:2

अऊँ कठण मेहनत ठेरै तांयै करदा हा ताकि अऊँ तियां जो विस्वास मन्ज मजबुत करी सकू, अतै सो अक्की दूये सोगी प्‍यार मन्ज बणी रैहन। सो प्रमात्मैं रै तैस भेद जो खरै तरीकै जाणन जैड़ा मसीह रै बारै मन्ज हा।

कुलुस्सियों 3:12

प्रमात्मैं तूसु मणुओ पवित्र करीके चुणुरा हा अतै सो तूसु सोगी प्‍यार करदा हा ठेरैतांये बड़ी ज्यादा करूणा अतै भलाई अतै दीनता अतै नम्रता अतै सहनशीलता अपनाई लेय्आ।

इब्रानियों 6:18

ठेरैतांये प्रमात्मैं दोनो वायदा अतै सौगन्द दिती ऐह दोनों चिजा कदी ना बदलिणी क्ओकि प्रमात्मां कदी भी झूठ ना बलदा। ठेरैतांये ही अहै जैड़ै तसेरी शरण पाणै तांयै दौड़ी करी गै हिन बड़ै भरोसै सोगी तैहा उम्मीद जो पकड़ी सकदै हिन जैड़ी इन्दै अगो हा।

1 पतरस 1:2

पिता प्रमात्मैं पैहलै थऊँ ही तुसिओ जाणी अतै चुणी लैऊरा अतै तसेरी आत्मै तुसिओ पवित्र करूरा। तुहै यीशु मसीह री आज्ञा रा पालन करीके तसेरै खूना रै द्धारा धुली गच्छुरै हिन। अऊँ प्रार्थना करदा कि प्रमात्मां तुसिओ होर भी अनुग्रह अतै शान्ती दिन्दा रेय्आ।

1 यूहन्‍ना 3:24

अतै जैडा प्रमात्मैं री आज्ञा जो मन्दा, सो मसीह मन्ज हा अतै सो तियां मन्ज बणी रहन्‍दा अतै तैस सितै मतलब तैसा पवित्र आत्मा सितै जैड़ी कि तिनी असु जो दितुरी हा, अहै जाणदै हिन कि मसीह असु मन्ज बणी रहन्‍दा।

1 यूहन्‍ना 4:12

प्रमात्मां कदी भी कुणी ना हेरू, जे अहै अप्पू मन्ज प्‍यार रखन ता प्रमात्मां असु मन्ज बणी रहन्‍दा अतै तसेरा प्‍यार असु मन्ज सिद्व भुच्‍ची गछूरा।

1 यूहन्‍ना 4:16

अतै जैडा प्‍यार प्रमात्मां असु सितै रखदा तैस जो अहै जाणी गै हिन अतै असिओ प्रमात्मैं पुर विस्वास हा। प्रमात्मां प्‍यार हा जैडा प्यारा मन्ज बणी रहन्‍दा सो प्रमात्मैं मन्ज बणी रहन्‍दा अतै प्रमात्मां तैस मन्ज बणी रहन्‍दा।