Sofoníi 3:15 - MAWUXÓWÉMA

¹⁵ Mawu Mavɔmavɔ ɖe hwɛ e è ɖǒ nú mi é síin. É nya kɛntɔ́ mitɔn lɛ́ɛ dó gbě. Mawu Mavɔmavɔ Izlayɛ́li xɔ́sú ɔ́ ɖo kpɔ́ xá mi, nǔ nyanya sɔ́ ná ɖó adohu nú mi ǎ.

Sofoníi 3:15 Iomraidhean Croise

Bǐbɛ́mɛ 30:23

É mɔ xo, bó ji vǐ súnnu ɖokpó, bó ɖɔ: “Mawu ɖe winnyá nú mì.”

Ɖɛhan 149:2

Izlayɛ́li, j'awǎ ɖó mɛ e ɖó we é wú. Sinyɔ́ɔ ví lɛ́ɛ mi, Xomɛ ní hun mi ɖó axɔ́sú mitɔn wú.

Ɖɛhan 19:9

Gbeta Mawu Mavɔmavɔ tɔn lɛ́ɛ nɔ́ xwe ali; yě nɔ́ dó xomɛhunhun nú mɛ. Nǔ e Mawu Mavɔmavɔ zɔ́n mɛ lɛ́ɛ ɖo wɛn; yě nɔ́ ná nukúnnú-mɔjɛnǔmɛ mɛ.

Ɖɛhan 85:3

A sɔ́ nǔ e togun towe wa nyi do ɔ́ kɛ ɛ; a súnsún hwɛ e é hu lɛ́ɛ bǐ. Agbɔ̌n

Ezayíi 12:6

Sinyɔ́ɔnu lɛ́ɛ mi, mi ɖe awǎjijɛ mitɔn xlɛ́! Mi sú xó kpó xomɛhunhun kpó, ɖó mɛ e ɖo gɔ̌n mitɔn ɔ́, Mawu mímɛ́ Izlayɛ́li tɔn ɔ́, nǔ ɖaxó wɛ.

Ezayíi 25:8

Mawu Mavɔmavɔ ná sú kú sín kún dó káká sɔ́yi; Aklúnɔ Mavɔmavɔ ná súnsún ɖasin sín nukún mɛ nú mɛ bǐ. É ná ɖe winnyá nú togun tɔn gbɔn to ɔ́ bǐ mɛ. Xó e Mawu Mavɔmavɔ ɖɔ é nɛ́.

Ezayíi 33:22

Mawu Mavɔmavɔ wɛ nyí gǎn mǐtɔn; Mawu Mavɔmavɔ wɛ nyí alixlɛ́mɛtɔ́ mǐtɔn; Mawu Mavɔmavɔ wɛ nyí axɔ́sú mǐtɔn. É wɛ nyí mɛhwlɛ́ngántɔ́ mǐtɔn.

Ezayíi 35:10

Mɛ e é hwlɛ́n gán lɛ́ɛ ná lɛ́ kɔ wá; Sinyɔ́ɔ wɛ yě ná wá, kpó awǎjijɛ kpó, kpó xósúsú kpó. Awǎjijɛ mavɔ mavɔ ɖé ná ɖo nukún yětɔn ta, xomɛ ná ɖo yě hun wɛ mɔ̌hunkɔtɔn; nǔ linlin kpó azɔn winwɛn kpó bǐ ná vɔ.

Ezayíi 51:22

Xó e Aklúnɔ towe, Mawu Mavɔmavɔ, Mawu towe e nɔ́ jɛ hun dó togun tɔn jí ɔ́ ɖɔ ɔ́ ɖíe: “Un ná yí kɔ́fu e ɖo alɔ towe mɛ, bɔ nukún towe mɛ nɔ́ gbá zǐn é sín así we; kɔ́fu e mɛ xomɛsin ce ɖe é, bɔ a sɔ́ ná nu ɖě ǎ.

Ezayíi 52:9

Dǒglin Jeluzalɛ́mu tɔn lɛ́ɛ mi, mi sú xó bó j'awǎ, ɖó Mawu Mavɔmavɔ ɖo wǔsyɛ́n dó lanmɛ nú togun tɔn wɛ. É ɖe Jeluzalɛ́mu sín mɛ kannu.

Ezayíi 54:14

A nǎ nɔ́ xwedó hwɛjijɔ dó wa nǔ; mɛ ɖěbǔ sɔ́ ná dó tagba nú we ǎ; a sɔ́ ná ɖi xɛsi nú nǔɖé ǎ; mɛ ɖěbǔ sɔ́ ná nɔ́ dó adohuhu nú we ǎ; ado sɔ́ ná hu we ǎ.

Ezayíi 60:18

È sɔ́ ná se dǎka xó ɖě ɖo to towe mɛ gbeɖé ǎ. È ka sɔ́ ná se nǔhɛngblé kpó nǔ nyanya dó sin kpó xó ɖě ɖo dogbó towe jí gbeɖé ǎ. A nǎ nɔ́ ylɔ́ ahohó towe lɛ́ɛ ɖɔ ‘Hwlɛngán’, bó ná nɔ́ ylɔ́ hɔntogbó towe lɛ́ɛ ɖɔ ‘Susu nú Mawu’.

Ezayíi 65:19

Un ná nɔ́ j'awǎ ɖó Jeluzalɛ́mu wú, xomɛ ná nɔ́ hun mì ɖésú ɖó togun ce wú. È sɔ́ ná se avǐ kpó xósúsú kpó ɖě gbeɖé ɖo fínɛ́ ǎ.

Jelemíi 8:19

Togun ce ɖo xó sú wɛ sín to línlín mɛ bó nɔ́ ɖɔ: ‘Mawu Mavɔmavɔ ka sɔ́ ɖo Sinyɔ́ɔ ǎ wɛ a? Sinyɔ́ɔ sɔ́ ɖó axɔ́sú ǎ cé?’ ” Mawu ɖɔ: “Étɛ́wú yě ká sɛn vodún dó dó xomɛsin nú mì? Yě sɛn nǔ énɛ́ lɛ́ɛ e to ɖěvo mɛ nu lɛ́ɛ nɔ́ sɔ́ alɔ yětɔn dó bló bɔ é má ká nyí nǔɖé ǎ lɛ́ɛ dó dó xomɛsin nú mì?”

Ezekiyɛ́li 35:10

“A nɔ́ ɖɔ: ‘Un ná yí axɔ́súɖuto Izlayɛ́li tɔn, bó ná yí axɔ́súɖuto Judáa tɔn. Axɔ́súɖuto we énɛ́ lɛ́ɛ mɛ wɛ nyɛ Mawu Mavɔmavɔ ka nɔ.’

Ezekiyɛ́li 36:15

Un sɔ́ ná jó we dó bɔ togun ɖě lɛ́ɛ ná zun we abǐ yě ná cá we ko bɔ a nǎ se ǎ. A sɔ́ ná hu toví towe lɛ́ɛ ɖě ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.”

Ezekiyɛ́li 39:29

Un ná gba yɛ ce kɔn nyi Izlayɛ́li ví lɛ́ɛ jí; énɛ́ ɔ́, un sɔ́ ná jó yě dó gbeɖé ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.”

Ezekiyɛ́li 48:35

Dǒ e lɛ́ lɛ̌ dó toxo ɔ́, ga tɔn bǐ nyí nǔjlɛ́kpo yětɔn děgba ɛnɛ afɔwó (18.000). “Sín gbe énɛ́ gbe ɔ́, è nǎ nɔ ylɔ́ toxo ɔ́ ɖɔ: ‘Mawu Mavɔmavɔ ɖo fí.’ ”

Amɔ́si 9:15

Un ná bló bɔ togun ce ná dó ɖɔ do nyi ayǐkúngban e nyí étɔn ɔ́ jí, bɔ è sɔ́ ná ɖe e sín to e un ná ɛ ɔ́ mɛ ǎ. Xó e nyɛ Mawu Mavɔmavɔ, Mawu mitɔn ɖɔ ɔ́ nɛ́.”

Micée 7:10

Kɛntɔ́ ce lɛ́ɛ ná mɔ nǔ e jɛ nɛ́ ɔ́, bɔ winnyá ná hu yě. Yě mɛ e nɔ kanbyɔ́ mì ɖ'ayǐ ɖɔ: “Fítɛ́ Mawu Mavɔmavɔ, Mawu towe ká ɖe” a jí lɛ́ɛ ɔ́, è nǎ gbídí yě ɖó afɔ wú lě e è nɔ ɖo zɔnlin ɖi wɛ bó nɔ́ gbídí babá ɖó afɔ wú é ɖɔhun, bɔ un ná mɔ kpó nukún ce lɛ́ɛ kpó, bó ná j'awǎ.

Xabakúku 2:17

Đó dǎka e mi xo Libáan to ɔ́ wú ɔ́ ná húzú kpan nukɔn mi; mi hu kanlin kɔn nyi kpɔ́. Kanlin ná dó xɛsi mi, ɖó mi kɔn hun kɔn nyi ayǐ, mi xo dǎka gbɔn to ɔ́ mɛ, mi xo dǎka to ɔ́ kpó mɛ e ɖo to ɔ́ mɛ lɛ́ɛ bǐ kpó wú.

Xabakúku 2:8

Mi vɔ akɔta gěgé; énɛ́ wútu ɔ́, togun e kpo lɛ́ɛ bǐ ná vɔ mi, ɖó mi kɔn hun kɔn nyi ayǐ; mi xo dǎka gbɔn to ɔ́ mɛ, mi xo dǎka to ɔ́ kpódó mɛ e ɖo to ɔ́ mɛ lɛ́ɛ bǐ kpó wú.

Sofoníi 3:17

Mawu Mavɔmavɔ, Mawu towe ɖo kpɔ́ xá we. É dó hlɔ̌nhlɔ́n, bó ná jiɖiɖe we, ɖɔ a nǎ ɖu ɖ'é jí. É ɖo awǎ jɛ wɛ ɖó hwi wútu. Wǎn yíyí tɔn ná gbɛ yɔ̌yɔ́ we. É ɖo xomɛhunhun mɛ ɖó hwi wútu.

Sofoníi 3:5

Nǔ ɖo mɔ̌ có, Mawu Mavɔmavɔ ɖo toxo ɔ́ mɛ; é nɔ́ wa nǔ jlɔ́jlɔ́; é nɔ́ wa nǔ nyanya ǎ. Mawu nɔ́ ɖɔ hwɛ xá mɛ ayǐhɔ́ngbe ayǐhɔ́ngbe dó jlɔ̌jlɔ́ jí. É gblá gbeɖé ǎ. É ɖo mɔ̌ bló wɛ có winnyá hú dǎnúwatɔ́ lɛ́ɛ ǎ, yě kpo ɖo dǎka yětɔn xo wɛ.

Zakalíi 12:3

Hwenɛ́nu ɔ́, un ná sɔ́ Jeluzalɛ́mu dó ɖó awǐnnya kpinkpɛn ɖé nú togun lɛ́ɛ bǐ. Mɛ e ná zé dó jǐ lɛ́ɛ bǐ ná gblé wǔ. Énɛ́ ɔ́, akɔta e ɖo ayǐkúngban jí lɛ́ɛ bǐ ná kplé bó húzú kpan nukɔn ɛ.”

Zakalíi 14:11

È nǎ jɛ toxo ɔ́ mɛ, mɛ ɖé sɔ́ ná ɖo adǎn jí ɖɔ émí ná gba toxo ɔ́ ǎ. Ayi ná jɛ ayǐ ɖo Jeluzalɛ́mu.

Zakalíi 9:9

Sinyɔ́ɔnu lɛ́ɛ mi, mi j'awǎ! Jeluzalɛ́munu lɛ́ɛ mi, mi j'awǎ kpó awǒbóbó kpó. Axɔ́sú mitɔn ɖíe ja gɔ̌n mitɔn e. Nǔjlɔ́jlɔ́watɔ́ ɖé wɛ, é ɖu ɖ'é jí. É sɔ́ éɖée hwe, é jínjɔ́n tócí ɖé jí, tócí ví ɖé jí.

Jǎan 1:49

Natanayɛ́li yí gbe n'i ɖɔ: “Mɛ̌si, hwi wɛ nyí Mawu ví ɔ́ nǔgbó; hwi wɛ nyí Izlayɛ́li xɔ́sú.”

Jǎan 12:15

“Mi ma ɖi xɛsi ó Sinyɔ́ɔnu lɛ́ɛ mi, axɔ́sú mitɔn ɖíe jǎwe bó jínjɔ́n tócíví jí e!”

Jǎan 19:19

Pilátu wlán xógbe élɔ́, bó sɔ́ ɖó aklúzu ɔ́ jí aga ɖɔ: “Jezu Nazalɛ́ti tɔn, Jwifu lɛ́ɛ xɔ́sú.”

Jǎan 5:30

“Un sixú wa nǔɖé ɖo nyɛ ɖésúnɔ sín acɛ mɛ ǎ. Nǔ e Mawu ɖɔ nú mì ɔ́ wɛ un nɔ xwedó dó ɖɔ hwɛ xá mɛ, bɔ un nɔ dó hwɛjijɔ, ɖó jlǒ nyɛ ɖésúnɔ tɔn wɛ un nɔ wa ǎ; lo ɔ́, mɛ e sɛ́ mì dó ɔ́ sín jlǒ wɛ un nɔ wa.

Nǔɖexlɛ́mɛ 12:10

Énɛ́ ɔ́ gúdo ɔ́, un se gbe ɖaxó ɖé ɖi sín jǐxwé bó ɖɔ: “Hwlɛngán sín hwenu su lo! Mawu ɖe axɔ́súɖuɖu tɔn kpó hlɔ̌nhlɔ́n tɔn kpó xlɛ́ lo! Klísu tɔn ɖe acɛkpikpa e nyí étɔn ɔ́ xlɛ́ lo! Đó hwɛdómɛtɔ́ e ɖo te ɖo Mawu mǐtɔn nukɔn bó ná dó hwɛ nɔví mǐtɔn lɛ́ɛ zǎn kéze ɔ́, è ko zin i dɛ́.

Nǔɖexlɛ́mɛ 18:20

Jǐnukúnsin! Jɛ awǎ ɖó gba e é gba ɔ́ wú! Mɛɖeɖóvo Mawu tɔn lɛ́ɛ, mɛsɛ́dó lɛ́ɛ kpó gbeyíɖɔ lɛ́ɛ kpó e, mi lɔmɔ̌ ní jɛ awǎ! Đó Mawu ko ɖó nǔ nyanya e é wa nú mi ɔ́ sín hwɛ n'i.

Nǔɖexlɛ́mɛ 19:16

È wlǎn nyǐkɔ ɖé dó awu tɔn kpó asá tɔn kpó wú; è wlǎn ɖɔ: “Axɔ́sú axɔ́sú lɛ́ɛ tɔn; Aklúnɔ aklúnɔ lɛ́ɛ tɔn.”

Nǔɖexlɛ́mɛ 7:15

Énɛ́ ɔ́ wú wɛ yě ɖo te ɖo axɔ́súzinkpo ɔ́ nukɔn, bó ɖo azɔ̌ wa nú Mawu wɛ zǎn kéze ɖo sinsɛnxɔ tɔn mɛ. Mɛ e ɖo ayǐjínjɔ́n ɖo axɔ́súzinkpo ɔ́ jí ɔ́ ná cyɔ́n alɔ yě jǐ.