Sofoníi 2:7 - MAWUXÓWÉMA

⁷ Ayǐkúngban énɛ́ ɔ́ ná húzú Judáa ví e kpo ɖo gbɛ lɛ́ɛ tɔn, bɔ kanlin yětɔn lɛ́ɛ ná nɔ́ wá ɖu ama ɖo fínɛ́, bɔ gbadanu su ɔ́, yě ná nɔ́ yi dɔ́ xwé gbe, ɖo Acikelɔ́ni. Đó Mawu Mavɔmavɔ, Mawu yětɔn ná jɛ hun dó yě jí, bó ná zé nǔ e ɖo yě gbo wɛ é dó húzú ɖagbe nú yě.

Sofoníi 2:7 Iomraidhean Croise

Bǐbɛ́mɛ 50:24

Jozɛ́fu ɖɔ nú nɔví tɔn lɛ́ɛ gbe ɖokpó ɖɔ: “Un ná kú, amɔ̌, Mawu ná wá gɔ́ alɔ nú mi dandan. É ná kplá mi sín Ejípu fí yi to e sín akpá é kó dó nú Ablaxámu, Izáki kpó Jakɔ́bu kpó ɔ́ mɛ.”

Ɖɛhan 80:14

Aglǔza gbě tɔn lɛ́ɛ nɔ́ wá dó awɔnnu mɛ bó nɔ kíjé, gběkanlin lɛ́ɛ nɔ wá ɖu nǔ ɖo fínɛ́.

Ɖɛhan 85:1

Hanjigbɛ́gán ɔ́ sín hanjiwéma mɛ wɛ han élɔ́ ɖe. Kolée ví súnnu lɛ́ɛ sín han wɛ.

Tíntɔ́n 4:31

Bɔ togun ɔ́ ɖi nǔ ná. Yě mɔ nǔ jɛ wú ɖɔ Mawu Mavɔmavɔ mɔ lě e è ɖo ya dó nú émí mɛ Izlayɛ́li ví lɛ́ɛ gbɔn wɛ ɔ́, bó wá ba yě kpɔ́n, bó ná hwlɛ́n yě gán. Énɛ́ ɔ́, yě jɛ kpo bó ɖe kɔ́ nú Mawu Mavɔmavɔ.

Ezayíi 11:11

Gbe énɛ́ gbe ɔ́, Aklúnɔ ná lɛ́ vɔ́ zán hlɔ̌nhlɔ́n tɔn, bó ná xɔ gbɛ nú mɛ e kpo ɖo gbɛ ɖo togun tɔn mɛ lɛ́ɛ: é ná xɔ gbɛ nú mɛ e kpo ɖo gbɛ ɖo Asilíi lɛ́ɛ, mɛ e kpo ɖo gbɛ ɖo Ejípu lɛ́ɛ, mɛ e kpo ɖo gbɛ ɖo Patlɔ́si lɛ́ɛ, mɛ e kpo ɖo gbɛ ɖo Nubíi lɛ́ɛ, mɛ e kpo ɖo gbɛ ɖo Elámu lɛ́ɛ, mɛ e kpo ɖo gbɛ ɖo Babilɔ́nu lɛ́ɛ, mɛ e kpo ɖo gbɛ ɖo Hamáti lɛ́ɛ, kpó mɛ e kpo ɖo gbɛ ɖo tɔtɛ́ntinto mɛ lɛ́ɛ kpó.

Ezayíi 11:14

Yě bǐ ná zɔn kpɔ́, bó zun dó Filisitɛ́ɛn lɛ́ɛ jí ɖo gbadahwe jí, bó ná lɛ́ zɔn kpɔ́ bó yi fɔ akɔta e ɖo gbětótló mɛ lɛ́ɛ sín nǔ ɖo zǎnzǎnhwe jí. Yě ná gbló ada nú acɛkpikpa yětɔn yi Edɔ́mu kpó Mɔwabu kpó, bɔ Amumɔ́ɔ ví lɛ́ɛ ná nɔ acɛ yětɔn mɛ.

Ezayíi 11:16

Ali ɖokpó ná ɖo te nú mɛ e kpo ɖo gbɛ ɖo togun tɔn mɛ ɖo Asilíi lɛ́ɛ, lě e ali ɖokpó ɖo te nú Izlayɛ́li ví lɛ́ɛ hwenu e yě gosín Ejípu é.

Ezayíi 14:1

Mawu Mavɔmavɔ ná ɖe xlɛ́ ɖɔ émí yí wǎn nú Jakɔ́bu ví lɛ́ɛ. É ná lɛ́ vɔ́ ɖe xlɛ́ ɖɔ Izlayɛ́li to ɔ́ wɛ nyí to e émí sɔ́ é. É ná lɛ́ zé mɛ tɔn lɛ́ɛ ɖó tɛn yětɔn mɛ, ɖo ayǐkúngban yě ɖésú tɔn jí. Jǒnɔ e wá cí Izlayɛ́li lɛ́ɛ ná wá gɔ́ nú yě, bɔ yě bǐ ná jɛ kpɔ́ xá Jakɔ́bu ví lɛ́ɛ.

Ezayíi 32:14

Mɛ bǐ hɔn jó axɔ́sú ɔ́ sín xwé dó. Toxo e mɛ axi nɔ jɛ ɖe é jɛ vɔ̌. Mɛ bǐ jó Ofɛ́lu slǎ ɔ́ dó, bó jó tocɔ́kpe e ta sɔ́ja lɛ́ɛ nɔ́ nɔ é dó, bɔ tócí gbě tɔn lɛ́ɛ nɔ́ wá vo ɖo fínɛ́, bɔ kanlin lɛ́ɛ nɔ́ yi ɖu ama ɖo fínɛ́.

Jelemíi 23:3

“Lɛ̌ngbɔ́ ce e kpo lɛ́ɛ ɔ́, nyɛ ɖésú ná yi xo yě kplé gbɔn to e mɛ un fúnfún yě gbɔn lɛ́ɛ mɛ. Un na kplá yě wá kpó yětɔn mɛ, bɔ yě ná ji, bó ná gba kún.

Jelemíi 29:10

“Din ɔ́, Mawu Mavɔmavɔ lɛ́ ɖɔ: ‘Nú acɛkpikpa Babilɔ́nu tɔn bló xwe kanɖé gban (70) wá yi ɔ́, akpá e un dó nú mi ɔ́, un ná ɖe: un ná lɛ́ kɔ nú mi wá Jeluzalɛ́mu fí.

Jelemíi 29:14

Nyɛ Mawu Mavɔmavɔ ɖo ɖiɖɔ nú mi wɛ ɖɔ: Un ná jó nyiɖée dó bɔ mi ná mɔ mì; un ná kplá mɛ mitɔn e ahwan wlí yi to ɖěvo mɛ lɛ́ɛ wá. Un ná xúxú mi kplé gbɔn akɔta e mɛ un gba mi dó gbɔn lɛ́ɛ, fí e un gba mi dó kpé gbɔn lɛ́ɛ bǐ, lobo ná kplá mi wá fí e un ɖe mi sín bó kplá yi to ɖěvo mɛ é.’

Jelemíi 3:18

Énɛ́ ɔ́, mi Judáa togun ɔ́ ná wá gɔ́ nú Izlayɛ́li togun ɔ́, bɔ mi bǐ nǎ zɔn kpɔ́ sín to e ɖo taligbé ɔ́ mɛ, fí e è kplá mi yi é, bó ná lɛ́ kɔ wá to élɔ́ e un ná tɔ́gbó mitɔn lɛ́ɛ ɔ́ mɛ.”

Jelemíi 30:3

Un ɖo ɖiɖɔ nú we wɛ, hwe ɔ́ nu ná wá su, bɔ un na lɛ́ kɔ nú mɛ e ahwan wlí ɖo togun ce Izlayɛ́li kpó Judáa kpó mɛ lɛ́ɛ, bɔ yě ná wá xwé. Un ná kplá yě wá to e un ná tɔ́gbó yětɔn lɛ́ɛ é mɛ, bɔ é ná nyí yětɔn.”

Jelemíi 31:7

Xó e Mawu Mavɔmavɔ ɖɔ ɔ́ ɖíe, é ɖɔ: “Mi sú xó, bó j'awǎ dó Jakɔ́bu tamɛ; mi ɖe xomɛ hunhun mitɔn xlɛ́ dó akɔta e ɖo nukɔn ɔ́ tamɛ. Mi zé gbe yi jǐ, bó ji han, bó kpa susu nú Mawu Mavɔmavɔ bó ɖɔ: ‘Mawu Mavɔmavɔ, hwlɛ̌n togun towe, hwlɛ̌n Izlayɛ́li ví e kpo lɛ́ɛ bǐ gán.’

Jelemíi 32:44

Nǔgbó wɛ, è nǎ xɔ gle gbɔn Bɛnjamɛ́ɛ yíkúngban ɔ́ jí, bó xɔ gbɔn Jeluzalɛ́mu sín tokpɔnla ɔ́ mɛ, bó xɔ gbɔn Judáa toxo lɛ́ɛ mɛ, bó xɔ gbɔn toxo e ɖo só jí lɛ́ɛ mɛ, bó xɔ gbɔn toxo e ɖo dodomɛ lɛ́ɛ mɛ, bó xɔ gbɔn toxo ɔ́ sín afɔligbé. Énɛ́ ɔ́, è nǎ nɔ́ bló wěma e ɖe xlɛ́ ɖɔ è sa gle lɛ́ɛ ɖo kúnnuɖetɔ́ nukɔn bó sú axɔ́ bó ɖó wuntun. Un ná bló bɔ yě ná ɖó ninɔmɛ e yě kó ɖó ɖ'ayǐ é.” Xó e Mawu Mavɔmavɔ ɖɔ ɔ́ nɛ́.

Jelemíi 33:12

Xó e Mawu Mavɔmavɔ Nǔbǐwúkpétɔ́ ɖɔ é ɖíe: “To élɔ́ e jɛ vɔ̌, bɔ è ma sɔ́ nɔ́ mɔ gbɛtɔ́ kpó kanlin kpó ɖěbǔ ɖe ǎ é mɛ jɛ́n è nǎ lɛ́ mɔ kanlinnyitɔ́ lɛ́ɛ ɖe, bɔ yě ná nɔ́ kpé nukún dó lɛ̌ngbɔ́ yětɔn lɛ́ɛ kpó gbɔ̌ yětɔn lɛ́ɛ kpó wú zǎn mɛ.

Jelemíi 33:7

Un ná lɛ́ sɔ́ togun Judáa tɔn ɔ́, kpó togun Jeluzalɛ́mu tɔn kpó sí te; un ná lɛ́ sɔ́ yě ɖó tɛn e mɛ yě kó ɖe ɖ'ayǐ ɔ́ mɛ.

Jelemíi 47:5

Gaza to ɔ́ bǐ nǎ xwlɛ́ ta, aluwɛ mɛ wɛ yě ɖe. Acikelɔ́ni toxo ɔ́ bǐ nǎ cí tóó, mi gbɛtɔ́ sakasaka ví e kpo ɖo gbɛ lɛ́ɛ, káká jɛ hwetɛ́nu wɛ mi ka ná já wǔtu mitɔn yi ɖó?

Ezekiyɛ́li 39:25

“Amɔ̌, nǔ e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Bɛ́ sín din ɔ́, un ná nɔ́ kú nǔbláwǔ nú Izlayɛ́li ví lɛ́ɛ. Un ná húzú ninɔmɛ yě Jakɔ́bu ví lɛ́ɛ tɔn, bó ná ɖɔ bó dó sɛ́n d'é jí, bɔ sísí e è ɖǒ ná ɖó nú nyǐkɔ mímɛ́ ce ɔ́, mɛ bǐ ná ɖó.

Ozée 6:11

Judáa e, un ɖo nǔ sɔ́ wɛ, bó ná ya hwi lɔmɔ̌ nǔkún ɖɔhun, hwenu e un ná kplá mɛ e nyí kannumɔ ɖo togun ce mɛ lɛ́ɛ wá é.”

Abudiyási 1:19

Mɛ e ɖo tofɔligbé lɛ́ɛ ná yí Esawu só ɔ́. Mɛ e ɖo ayǐkúngban wɛnjɛ jí lɛ́ɛ ná yí Filisitɛ́ɛn lɛ́ɛ sín to. Izlayɛ́linu lɛ́ɛ ná yí Eflayímu kpó Samalíi kpó sín ayǐkúngban, bɔ Bɛnjamɛ́ɛ ná yí Galadi.

Micée 2:12

Lo ɔ́, Mawu ɖɔ: “Un ná kplé mi Izlayɛ́li ví e kpo ɖo gbɛ lɛ́ɛ bǐ; un ná kplé mi ɖó kpɔ́, lě e è nɔ kplé gbɔ̌ dó wutó mɛ é ɖɔhun; lě e gbɔ̌hwan nɔ ɖo amagbo mɛ ɔ́ ɖɔhun. Gbɛtɔ́ ná lɛ́ gɔ́ to mitɔn mɛ, bɔ è na nɔ se hlǔnhlún mitɔn.

Micée 4:10

Mi mɔ wǔvɛ́, bó wɛn azɔn nyɔ̌nu ɖo ajidonu ɖɔhun; ɖó din ɔ́, mi ná gosín toxo ɔ́ mɛ, bó yi cí gle lɛ́ɛ mɛ, bó ná lɛ́ yi káká Babilɔ́nu. Mawu Mavɔmavɔ ná hwlɛ́n mi gán, bó ná ɖe mi sín kɛntɔ́ mitɔn lɛ́ɛ sín acɛ mɛ ɖo Babilɔ́nu fínɛ́.

Micée 4:7

Un ná kplé afɔkponɔ lɛ́ɛ, bónú togun ɔ́ ná lɛ́ fɔ́n. Un ná zé yě mɛ e ɖo gbejí lɛ́ɛ dó bló togun syɛ́nsyɛ́n ɖé, bɔ nyɛ Mawu Mavɔmavɔ ɔ́ ná ɖu axɔ́sú ɖo yě nu, ɖo Sinyɔ́ɔ só ɔ́ jí, sín hwenɛ́nu káká sɔ́yi.

Sofoníi 2:9

Énɛ́ ɔ́ wútu wɛ Mawu Mavɔmavɔ Nǔbǐwúkpétɔ́ ɔ́, Mawu Izlayɛ́li tɔn ɔ́ zin alɔ dó akɔ́n bó ɖɔ: “Un ɖɔ bo tɛ afɔ jí ɖɔ Mɔwabu to ɔ́ kpó Amumɔ́ɔ to ɔ́ kpó ná gba Sodɔ́mu kpó Gomɔ́ɔ kpó ɖɔhun . To yětɔn ná húzú gbětótló káká sɔ́yi. Wunkan kpó jɛ kpó kɛ́ɖɛ́ jɛ́n è nǎ nɔ mɔ ɖo fínɛ́. Mɛ e ná kpo ɖo gbɛ ɖo togun ce mɛ lɛ́ɛ ná wá fɔ nǔ yětɔn lɛ́ɛ, bó ná yí to yětɔn.”

Sofoníi 3:13

Mɛ e ná kpo ɖo gbɛ ɖo Izlayɛ́li lɛ́ɛ sɔ́ ná wa nǔ agɔ ɖě ǎ; yě sɔ́ ná ɖó adingban ɖě ǎ; yě sɔ́ ná zé ɖɛ̌ yětɔn dó blɛ́ mɛ ná ǎ. Yě ná ɖu nǔ, bó ná dɔ́ amlɔ, bɔ mɛ ɖěbǔ ná dó xɛsi nú yě ǎ.”

Sofoníi 3:20

Hwenɛ́nu ɔ́, un ná kplá mi wá xwé, bó ná kplé mi ɖó kpɔ́. Mi ná mɔ lě e un ná húzú gbɛ mitɔn gbɔn é. Un ná ná susu mi, bɔ è nǎ nɔ mlá mi ɖo togun e ɖo ayǐkúngban jí fí lɛ́ɛ bǐ mɛ.” Mawu Mavɔmavɔ wɛ ɖɔ mɔ̌.

Ajée 1:12

Zolobabɛ́li, Calutiyɛ́li ví ɔ́ kpó Jozuwée vɔ̌sánú-xwlémawutɔ́ ɖaxó e nyí Yexosadaki ví ɔ́ kpó, kpódó yě mɛ e lɛ́ kɔ sín kannumɔgbénu wá xwé lɛ́ɛ bǐ kpó ylɔ́ xó e Mawu Mavɔmavɔ, Mawu yětɔn ɖɔ nú yě gbɔn Ajée jí ɔ́ ɖɔ nǔjɔnǔ. Lě e Ajée wa azɔ̌ e Mawu Mavɔmavɔ zɔ́n ɛ é gbɔn ɔ́ nɛ́; énɛ́ ɔ́, toví lɛ́ɛ bǐ mɔ nǔ jɛ acɛkpikpa Mawu Mavɔmavɔ tɔn wú.

Ajée 2:2

É ɖɔ é ní yi ɖɔ nú Zolobabɛ́li tokpɔngán Judáa tɔn Calutiyɛ́li ví ɔ́, kpódó vɔ̌sánú-xwlémawutɔ́ ɖaxó Jozuwée Yexosadaki ví ɔ́ kpó, kpódó mɛ e lɛ́ kɔ sín kannumɔgbénu wá xwé lɛ́ɛ kpó ɖɔ:

Luki 1:68

“È nǐ kpa susu nú Aklúnɔ, Mawu Izlayɛ́li tɔn, ɖó é wá ba togun tɔn kpɔ́n, lobo hwlɛ́n ɛ gán.

Luki 7:16

Xɛsi jɛ mɛ lɛ́ɛ bǐ jí, bɔ yě nɔ kpa susu nú Mawu, bó nɔ́ ɖɔ: “Gbeyíɖɔ Mawu tɔn ɖaxó ɖokpó ɖíe tɔ́n ɖo mǐ mɛ e; Mawu wá ba togun tɔn kpɔ́n.”

Mɛsɛ́dó 8:26

Wɛnsagun Aklúnɔ tɔn ɖɔ nú Filípu ɖɔ jí: “A nǎ sí te, bó ɖidó to ɔ́ sín afɔligbé. Ali e gosín Jeluzalɛ́mu, bó gbɔn gbětótló mɛ yi Gaza ɔ́ wɛ a nǎ wlí.”

Mɛsɛ́dó 8:40

Filípu ɔ́ ka wá mɔ éɖée ɖo to e è nɔ ylɔ́ ɖɔ Azɔtɔ́si ɔ́ mɛ, bó wlí ali, bó nɔ́ ɖo Wɛn Ɖagbe ɔ́ jlá wɛ gbɔn to lɛ́ɛ mɛ to lɛ́ɛ mɛ, káká yi jɛ Sezalée.

Hlɔ̌manu 11:5

Mɔ̌ ɖokpó ɔ́, hwenu e mǐ ɖe din ɔ́, é lɛ́ kpo mɛ e Mawu cyán ɖo xomɛnyínyɔ́ tɔn mɛ ɔ́ kpɛɖé.

Hwliti 1:6

Mɔwabu fínɛ́ wɛ Nɔemíi ɖe, bó se ɖɔ Mawu Mavɔmavɔ jɔwǔ togun émítɔn, bɔ nǔɖuɖu tíin; énɛ́ ɔ́, é jɛ nǔ sɔ́ jí, é kpó vǐ tɔn sín asi we lɛ́ɛ kpó, bó ná lɛ́ kɔ yi Judáa.