Sofoníi 1:5 - MAWUXÓWÉMA

⁵ Un ná sú mɛ e nɔ xá xɔ ta, bo nɔ sɛn sun kpó hwe kpó lɛ́ɛ sín kún dó. Mɛ e nɔ ɖɔ émí ná nɔ gbejí nú nyɛ Mawu Mavɔmavɔ, bɔ é ká lɛ́ yá ɔ́, yě nɔ́ ɖɔ émí ná nɔ gbejí nú vodún Mɔlɛ́ki lɛ́ɛ ɔ́, un ná sú mɛ énɛ́ lɛ́ɛ bǐ sín kún dó.

Sofoníi 1:5 Iomraidhean Croise

1 Axɔ́sú 11:33

Un ná bló mɔ̌, ɖó Salomɔ́ɔ kpó Izlayɛ́li ví lɛ́ɛ kpó jó mì dó, bó nɔ sɛn Sidɔ́ɔnnu lɛ́ɛ sín vodún Asitaatée; yě nɔ́ sɛn Mɔwabunu lɛ́ɛ sín vodún Kemɔci, yě nɔ́ sɛn Amumɔ́ɔ ví lɛ́ɛ sín vodún Milukɔ́mu. Yě ká lɛ́ xwedó ali ce, bó ná nɔ wa nǔ e sɔgbe ɖo nukún ce mɛ ɔ́ ǎ, yě nɔ́ nyi sɛ́n ce lɛ́ɛ ǎ, yě nɔ́ wa nǔ e un zɔ́n lɛ́ɛ ǎ, yě nɔ́ wa nǔ Davídi Salomɔ́ɔ sín tɔ́ ɔ́ ɖɔhun ǎ.

1 Axɔ́sú 11:5

Salomɔ́ɔ nɔ sɛn Sidɔ́ɔnnu lɛ́ɛ sín vodún Asitaatée ɔ́, bó nɔ sɛn Amumɔ́ɔ ví lɛ́ɛ sín vodún Milukɔ́mu, nǔvɛ́mɔ Mawu tɔn ɔ́.

1 Axɔ́sú 18:21

Ée yě kplé ɔ́, Elíi sɛkpɔ́ yě, bó ɖɔ: “Hwetɛ́nu wɛ mi ka ná sɛn nǔ we yi jɛ? Mi sɔ́ ɖokpó bó sɛn. Ényí Mawu Mavɔmavɔ wɛ ɖó acɛ nǔgbó hǔn, mi bo sɛn ɛ. É ká nyí vodún Baalu wɛ ɖó acɛ nǔgbó hǔn, mi bo sɛn ɛ!” Ée é ɖɔ mɔ̌ ɔ́, mɛɖé kɛ nu ɖo yě mɛ ǎ.

2 Axɔ́sú 17:32

Yě nɔ́ sɛn Mawu Mavɔmavɔ lɔmɔ̌, bó cyán mɛ e ná nɔ sá vɔ̌ nú yě nú Mawu lɛ́ɛ gbɔn fí bǐ. Yě mɛ énɛ́ lɛ́ɛ ná nɔ wa azɔ̌ nú yě gbɔn goxɔ e yě bló nú Mawu gbɔn vodún xwé e gbɔn só jí só jí lɛ́ɛ é gbe.

2 Axɔ́sú 17:33

Yě nɔ́ ɖo Mawu Mavɔmavɔ sɛn wɛ, bó nɔ lɛ́ ɖo vodún yětɔn lɛ́ɛ sɛn wɛ lě e yě kó nɔ bló gbɔn sín do ɖo to yětɔn mɛ é.

2 Axɔ́sú 17:41

Yě nɔ́ ɖo Mawu Mavɔmavɔ sɛn wɛ, bó ka nɔ lɛ́ ɖo vodún yětɔn lɛ́ɛ sɛn wɛ. Bɔ káká jɛ égbé din ɔ́, vǐ yětɔn lɛ́ɛ kpó vǐvú yětɔn lɛ́ɛ kpó kpo ɖo nǔ wa wɛ tɔ́gbó yětɔn lɛ́ɛ ɖɔhun.

2 Axɔ́sú 23:12

Axɔ́sú ɔ́ gba vɔ̌sákpe e ɖo Akázi sín xɔ ta, bɔ axɔ́sú Judáa tɔn lɛ́ɛ bló lɛ́ɛ, bó gba vɔ̌sákpe e Manasée bló gbɔn kɔ́xota we e ɖo Mawu Mavɔmavɔ xwé ɔ́ gbe lɛ́ɛ. É gba bǐ hánnyá bó bɛ́ yi kɔn nyi Sedlɔ́n tɔdo mɛ.

Ezayíi 22:1

Xó e Mawu ɖɔ dó Nǔɖexlɛ́mɛ tɔdo ɔ́ wú é ɖíe: Jeluzalɛ́mu! Nɛ̌ ká gbɔn nú we? Étɛ́wú toví towe lɛ́ɛ bǐ xá xɔ ta?

Ezayíi 44:5

Mɛ ɖě ná ɖo yě mɛ bó ná ɖɔ: ‘Mawu Mavɔmavɔ tɔn wɛ un nyí.’ Mɛ ɖěvo ná ɖɔ: ‘Jakɔ́bu ví wɛ un nyí.’ Mɛ ɖěvo ná wlán dó alɔ ɖɔ: ‘Mawu Mavɔmavɔ tɔn’, bó ná sɔ́ Izlayɛ́li nyíkɔ ɔ́ dó yí go ná.”

Ezayíi 45:23

Nyɛ wɛ nyí Mawu nǔgbó; énɛ́ wú ɔ́, un xwlé nyɛ ɖésú nú mi; xó e tɔ́n sín nu ce mɛ lɛ́ɛ bǐ wɛ nyí xó nǔgbó; xó ɖokpó ɖíe, bɔ un ná húzú ǎ: gbɛtɔ́ e ɖo ayǐkúngban ɔ́ jí lɛ́ɛ bǐ ná jɛ kpo ɖo nukɔn ce, bó ná xwlé nǔ bó ɖɔ:

Ezayíi 48:1

Jakɔ́bu togun e mi, mi ɖótó; mi nɔ ɖɔ Izlayɛ́li ví wɛ émí nyí, bó jɔ ɖo Judáa kún mɛ. Mi nɔ xwlé nǔ dó Mawu Mavɔmavɔ nyíkɔ mɛ, mi nɔ xomlá Mawu Izlayɛ́li tɔn ɖo ɖɛ mitɔn lɛ́ɛ mɛ. Lo ɔ́, nǔ e ɖɔ wɛ mi ɖe ɔ́ ká yi xo mitɔn mɛ ǎ, mi nɔ wa nǔ ɖó sɛ́nxwi jí ǎ.

Jelemíi 12:16

Togun dídá énɛ́ lɛ́ɛ kplɔ́n nǔ togun ce bɔ é nɔ xwlé nǔ dó vodún Baalu nyíkɔ mɛ. Amɔ̌, nú yědɛɛ lɛ́ɛ zán gbɛ yětɔn ganjí lě e togun ce ɖó ná bló gbɔn ɔ́, nú yě nɔ́ xwlé nǔ dó nyǐkɔ ce mɛ bó nɔ ɖɔ ‘Mawu Mavɔmavɔ ɖo gbɛ’ ɔ́, yě ná mɔ tɛn ɖo togun ce tɛ́ntin.

Jelemíi 19:13

Xwé e ɖo Jeluzalɛ́mu lɛ́ɛ kpó Judáa xɔ́sú lɛ́ɛ sín xwé kpó ná húzú nǔ blíblí Tafɛ́ti tɔdo élɔ́ ɖɔhun, ɖó xwé énɛ́ lɛ́ɛ bǐ sín xɔ ta wɛ yě nɔ́ dó zǎlínkpɔ́n zo nú nǔɖíɖó sɛ́xwé tɔn lɛ́ɛ gbɔn, bó nɔ́ ba ahan nú vodún lɛ́ɛ gbɔn.”

Jelemíi 32:29

Babilɔ́nunu e ɖo ahwan tɔ́n ɛ wɛ lɛ́ɛ ná byɔ́ toxo ɔ́ mɛ, bó ná dó toxo ɔ́ zo; ɖo tají ɔ́, xwé e gbe è nɔ dó zǎlínkpɔ́n zo nú vodún Baalu ɖe, bó nɔ ba ahan nú nǔmɛsɛn lɛ́ɛ ɖe, bó ná dó dó xomɛsin nú mì ɖe lɛ́ɛ ɔ́, Babilɔ́nunu lɛ́ɛ na dó bǐ zo.

Jelemíi 4:2

Hwe nɛ́ nu ɔ́, a nǎ xwlé nyɛ Mawu Mavɔmavɔ e ɖo gbɛ ɔ́, a nǎ xwlé nǔgbó nǔgbó tɔn, a nǎ xwlé ɖó sɛ́nxwi jí, a nǎ xwlé kpó ayi towe bǐ kpó. A blǒ mɔ̌ ɔ́, akɔta ɖě lɛ́ɛ na byɔ́ mì ɖɔ nyɛ ní xo ɖɛ dó émí jí, yě ná zé mì dó xɔ susu ná.

Jelemíi 49:1

Xó e Mawu Mavɔmavɔ ɖɔ dó Amumɔ́ɔ ví lɛ́ɛ wú ɔ́ ɖíe: “Izlayɛ́li sɔ́ ɖó vǐ e ná ɖu toxo énɛ́ lɛ́ɛ sín gǔ ɔ́ ɖě ǎ wɛ a? Étɛ́wú vodún Milukɔ́mu ka klá jɛ Gadi yíkúngban ɔ́ nu ɖo Izlayɛ́li mɔ̌? Étɛ́wú Amumɔ́ɔ ví lɛ́ɛ wá cí toxo e ɖo Gadi yíkúngban jí lɛ́ɛ mɛ?”

Jelemíi 5:2

Jelemíi ɖɔ: “Jeluzalɛ́munu lɛ́ɛ nɔ xwlé nǔ bó nɔ́ ɖɔ: ‘Mǐ xwlé Mawu Mavɔmavɔ, mɛ e ɖo gbɛ é.’ Nǔ yǎyá wɛ yě wa, adingban wɛ yě ɖó.

Jelemíi 5:7

Mawu ɖɔ: “Jeluzalɛ́mu, étɛ́wú un ka ná sɔ́ hwɛ kɛ we? Vǐ towe lɛ́ɛ ɖíe ko jó mì dó e. Yě nɔ́ xwlé vodún, vodún ká nyí Mawu ǎ. Un na nǔ bǐ yě, yě ká lɛ́ dó afɔ gbě. Ahwan wɛ yě nɔ́ dó gbě yi agalɛtɔ́ xwé.

Jelemíi 7:10

Mi ná nɔ ɖo nǔ énɛ́ lɛ́ɛ bló wɛ, bó ká ná nɔ́ lɛ́ kɔ wá gɔ̌n ce, ɖo xwé élɔ́ e è sɔ́ ɖó vo nú mì ɔ́ gbe, bó ná nɔ́ ɖɔ: ‘Éénɛ́, mǐ gǎn!’ Mi nɔ bló mɔ̌, bó nɔ́ mɔ tɛn bó nɔ́ dó nǔ nyanya e jló mi lɛ́ɛ bǐ sin.

Jelemíi 7:9

Étɛ́! Mi ná nɔ ɖo ajo ja wɛ, mi ná nɔ ɖo mɛ hu wɛ, mi ná nɔ ɖo aga lɛ wɛ, mi ná nɔ ɖo nyǐkɔ ce xwlé dó wǔvɔ́ wɛ, mi ná nɔ ɖo zǎlínkpɔ́n dó zo nú vodún Baalu wɛ, mi ná nɔ ɖo vodún e mi ma tunwun kpɔ́n ǎ lɛ́ɛ sɛn wɛ!

Jelemíi 8:2

bó tɛ́ xú énɛ́ lɛ́ɛ gbɔn fí bǐ; è nǎ tɛ́ ɖó hwe kpó sun kpó sunví lɛ́ɛ bǐ kpó nukɔn; nǔ énɛ́ lɛ́ɛ wɛ mɛ énɛ́ lɛ́ɛ yí wǎn ná bó sɛn. Nǔ énɛ́ lɛ́ɛ wɛ yě xwedó, nǔ énɛ́ lɛ́ɛ wɛ yě nɔ́ kan nǔ byɔ́, nǔ énɛ́ lɛ́ɛ wɛ yě nɔ́ ɖe kɔ́ ná hwenu e yě ɖo gbɛ é. Mɛ ɖé ná ɖ'alɔ xú énɛ́ lɛ́ɛ wú ǎ; mɛɖé ká ná ɖi yě ǎ; yě ná nyí zunkɔ́ kpowun ɖo ayǐkúngban jí.

Ozée 10:2

Ayixa yětɔn nɔ́ nɔ fí ɖokpó ǎ: hwɛ e yě hu lɛ́ɛ ji nǔɖé ɔ́, yě ná kpan. Mawu Mavɔmavɔ ná flí vɔ̌sákpe yětɔn lɛ́ɛ xwe, é ná gba awǐnnya e yě sɔ́ dó ɖó vodún ná, bó nɔ sɛn lɛ́ɛ.

Ozée 4:15

Óo! Izlayɛ́linu lɛ́ɛ mi! Mi fɔ́n bó ɖo aga lɛ wɛ. Amɔ̌, Judáanu lɛ́ɛ mi, mi ma hu hwɛ e yě hu ɔ́ ó. Mi ma yi Gilugalu ó, mi ma yi Bɛti-Awɛni ó, mi ma ka xwlé nǔ bó ɖɔ: “Mawu Mavɔmavɔ ɖo gbɛ” ó.

Amɔ́si 5:26

Égbé din ɔ́, mi bɛ́ axɔ́sú Sikútu kpó sunví Kinyu e mi nɔ sɛn ɔ́ kpó sín bǒcyɔ lɛ́ɛ hɛn; mi ɖésúnɔ wɛ ká sɔ́ alɔ mitɔn dó bló nǔ énɛ́ lɛ́ɛ ná; mɔ̌ jɛ́n mi ka nɔ bɛ́ nǔ énɛ́ lɛ́ɛ hɛn ɖ'ayǐ a? Mi tunwun ganjí ɖɔ émí kún nɔ bló mɔ̌ ó sín.

Matíe 6:24

“Mɛ ɖé sixú sɛn gǎn we ǎ; ɖó é ná gbɛ́ wǎn nú mɛ ɖě, bo na yí wǎn nú mɛ ɖě; abǐ é ná se tónú nú mɛ ɖě, bo na vɛ́ tóli nú mɛ ɖě. Mi sixú sɛn Mawu bo lɛ́ sɛn dɔkun ǎ.”

Mɛsɛ́dó 10:9

Ayǐhɔ́ngbe tɔn ɔ́, yě ɖo ali jí xweyǐgbe, bó kó sɛ yá Jopée. Đo Jopée dɔ̌n ɔ́, Piyɛ́ɛ xá xɔ ta hwenɛ́nu ɖo gan wěwe mɛ ɖɔhun mɔ̌, bó ná xo ɖɛ.

Hlɔ̌manu 14:11

Đó Mawuxówéma ɔ́ ɖɔ: “Nyɛ Aklúnɔ gbɛɖe ɔ́, un tɛ ɖɛ̌ jí ɖɔ: gbɛtɔ́ lɛ́ɛ bǐ ná jɛ kpo ɖo nukɔn ce, bɔ mɛ ɖokpó ɖokpó ná zé gbe yi jǐ, bó ɖɔ nyɛ Aklúnɔ ɔ́ wɛ nyí Mawu.”

Sɛ́nflínmɛ 10:20

“Mi ní ɖó sísí nú Mawu Mavɔmavɔ, Mawu mitɔn; mi nɔ sɛn ɛ; é ɖokpónɔ géé wú wɛ mi ná ɖó kan dó bó ná nɔ sɛn; é ɖokpónɔ sín nyǐkɔ wɛ mi ná nɔ́ xwlé.

Sɛ́nflínmɛ 4:19

Mi ma kpɔ́n hwe kpó sun kpó, kpó sunví lɛ́ɛ kpó, kpódó nǔbúdo tobutóbú e ɖo jǐxwé lɛ́ɛ bǐ kpó bó jɛ yě sɛn jí ó, yě ní má dɔn mi, bónú mi jɛ kpo ɖo nukɔn yětɔn bó sɛn yě ó; ɖó nǔ énɛ́ lɛ́ɛ ɔ́, togun e ɖo gbɛ ɔ́ mɛ lɛ́ɛ wɛ Mawu Mavɔmavɔ, Mawu mitɔn ná, bɔ yě ná wa azɔ̌ yětɔn.

Jozuwée 23:7

Mi ma kpé nǔɖé xá togun e kpó mi kpó kpo ɖo kpɔ́ lɛ́ɛ ó, mi ma ka ylɔ́ vodún yětɔn lɛ́ɛ ɖě sín nyǐkɔ ó, mi ma ka xwlé vodún yětɔn lɛ́ɛ ɖě sín nyǐkɔ dó nǔɖé jí ó, mi ma sɛn yě ɖě ó, mi ma ka jɛ kpo nú yě ɖě ó.