Sofoníi 1:12 - MAWUXÓWÉMA

¹² É jɛ hwenɛ́nu ɔ́, un ná zé zogbɛ́n dó kíjé Jeluzalɛ́mu toxo ɔ́ bǐ xéɖéxéɖé. Un ná dó gbɛya nú mɛ ɖěɖě e ɖo cúɖúɖú ahan ɖo go mɛ ɖɔhun, lobo nɔ ɖɔ dó ayi mɛ ɖɔ: ‘Mawu Mavɔmavɔ ma sixú ɖo nǔɖé ná wa wɛ; é sixú wa nǔ ɖagbe ɖé ǎ, é ká sixú wa nǔ nyanya ɖé ǎ’ lɛ́ɛ. Un ná dó gbɛya nú yě mɛ énɛ́ lɛ́ɛ.

Sofoníi 1:12 Iomraidhean Croise

Jɔ̌bu 21:15

Hwi mɛ e è nɔ ylɔ́ ɖɔ Nǔbǐwúkpétɔ́ ɔ́, étɛ́ wɛ a nyí bɔ mǐ nǎ sɛn we? Mǐ sa vo nú we ɔ́, étɛ́ ká ná nyɔ́ nú mǐ ɖ'é mɛ?”

Ɖɛhan 10:4

Mɛdídá ɖo awa glá wɛ, bó nɔ́ ɖɔ: “Mawu nɔ́ dɔn tó ɖě nú mɛ ǎ, Mawu ɖě ká tíin lɔ ǎ.” Fí e ayi tɔn mɔ nǔ jɛ ɔ́ bǐ nɛ́.

Ɖɛhan 14:1

Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ. Xlonɔ lɛ́ɛ nɔ́ ɖɔ dó ayi mɛ ɖɔ: “Mawu ɖě tíin ǎ.” Yě gblé, bó ja dɔn dě ɖɔhun; zǐnzán yětɔn gbɛ́ hɛn, mɛ ɖé ɖo yě mɛ bó nɔ wa nǔ ɖagbe ǎ.

Ɖɛhan 94:7

bó nɔ́ ɖɔ: “Mawu Mavɔmavɔ ɖo nǔ énɛ́ lɛ́ɛ ɖě mɔ wɛ ǎ, Mawu Jakɔ́bu tɔn mɔ nǔ énɛ́ lɛ́ɛ ɖě ǎ.”

Ezayíi 5:19

Yě nɔ́ ɖɔ: “Nǔ e Mawu Mavɔmavɔ ɖo nǎ wa wɛ ɔ́, é ní yá wǔ bló nú mǐ ná kpɔ́n. Nǔ ɔ́ ní yá wǔ jɛ nú mǐ ná kpɔ́n. Nǔ e bló gbé Mɛ mímɛ́ Izlayɛ́li tɔn ja ɔ́, ní bló. Mǐ jló ná tunwun nǔ e bló gbé é ja é.”

Jelemíi 10:5

Nǔmɛsɛn énɛ́ lɛ́ɛ cí xɛblɛ́nú e ɖo kákan mɛ ɔ́ ɖɔhun; yě nɔ́ ɖɔ xó ǎ; mɛ wɛ nɔ sɔ́ nǔmɛsɛn énɛ́ lɛ́ɛ, ɖó yě sixú ɖi zɔnlin ǎ. Mi ma ɖi xɛsi nú yě ó; yě sixú wa ɖagbe ǎ, yě ká sixú wa nyanya ǎ.”

Jelemíi 48:11

Mawu ɖɔ: “Mɔwabu ɔ́, vivo mɛ jɛ́n é ɖe sín do; ahwan sɛ tɛn nú mɛ tɔn lɛ́ɛ kpɔ́n ǎ. Mɛ ɖěbǔ húzú i sín zɛ̌n e mɛ é ɖe ɔ́ dó zɛ̌n ɖěvo mɛ kpɔ́n ǎ. É cí vɛ̌ɛn e è sɔ́ ɖ'ayǐ é ɖɔhun. Nyɛ Mawu ɖɔ: vɛ̌ɛn ɖagbe nyí wɛ jɛ́n é ɖe tɛgbɛ; é ɖyɔ́ wǎn ǎ.

Ezekiyɛ́li 8:12

Mawu kanbyɔ́ mì ɖɔ: “Hwɛ gbɛtɔ́ ɔ́, a mɔ nǔ e wa wɛ tomɛxó Izlayɛ́li tɔn énɛ́ lɛ́ɛ ɖe ɖo ablu mɛ, bɔ mɛ ɖokpó ɖokpó ɖo vodún tɔn nukɔn ɔ́ a? Yě ɖo nǔ wa wɛ gbɔn mɔ̌ bó ká nɔ́ ɖo hwɛjijɔ ba wɛ bó nɔ́ ɖɔ: ‘Mawu Mavɔmavɔ ɖo mǐ mɔ wɛ ǎ; é kó jó to ɔ́ dó.’ ”

Ezekiyɛ́li 9:4

bó ɖɔ n'i ɖɔ: “Gbɔn Jeluzalɛ́mu toxo ɔ́ bǐ mɛ, bó ɖó wuntun nukɔn nú mɛ e ɖo alě ná wɛ, bó ɖo wǔvɛ́ mɔ wɛ, ɖó nǔ baɖabaɖa e dó sin wɛ è ɖe ɖo toxo ɔ́ mɛ lɛ́ɛ wú lɛ́ɛ.”

Ezekiyɛ́li 9:9

Bɔ Mawu yí gbe nú mì ɖɔ: “Hwɛ e hu wɛ Izlayɛ́li ví lɛ́ɛ kpó Judáanu lɛ́ɛ kpó ɖe ɔ́ d'agba bó vɛ́ jlɛ́. Mɛhutɔ́ kɛ́ɖɛ́ wɛ gɔ́ to ɔ́; nǔ agɔ agɔ kɛ́ɖɛ́ wɛ yě nɔ́ wa ɖo toxo élɔ́ mɛ, ɖó mɛ lɛ́ɛ nɔ́ ɖɔ: ‘Mawu Mavɔmavɔ ɖo mǐ mɔ wɛ ǎ, é kó jó to ɔ́ dó.’

Amɔ́si 6:1

Mi mɛ e vo fɛɛ ɖo Sinyɔ́ɔ ɖo Samalíi só ta, bó vɛdó ɖɔ nǔɖé kún ná wa émí ó lɛ́ɛ ɔ́, heelú mi. Mi wɛ nyí akɔta e jɛ nukɔn ɖo akɔta ɖě lɛ́ɛ mɛ ɔ́ bɔ è ɖɔ; è ɖɔ mi gɔ́n wɛ Izlayɛ́linu lɛ́ɛ nɔ wá.

Abudiyási 1:6

Yéége Esawu ví lɛ́ɛ mi, mi kpɔ́n lě e è bɛ̌ nǔ mitɔn lɛ́ɛ bǐ gbɔn é! Dɔkun mitɔn e ɖo nǔglɔ́ lɛ́ɛ bǐ wɛ è lɛ̌ mɔ bó bɛ́.

Malacíi 2:17

Xó mitɔn lɛ́ɛ nɔ́ kpé agbɔ̌n nú Mawu Mavɔmavɔ; mi ka nɔ kanbyɔ́ ɖɔ: “Xó tɛ́ e tɛ́ é mǐ ká nɔ́ ɖɔ bɔ é nɔ́ kpé agbɔ̌n n'i?” Éɖíe, má ɖɔ nú mi. Xó élɔ́ lɛ́ɛ e mi nɔ ɖɔ ɔ́ wɛ nɔ́ kpé agbɔ̌n nú mì. Mi nɔ ɖɔ: “Mawu Mavɔmavɔ nɔ́ sɔ́ nukún ɖagbe dó kpɔ́n mɛ e nɔ wa nǔ nyanya lɛ́ɛ. Mɛ mɔ̌hunkɔ lɛ́ɛ sín nǔ wɛ nɔ́ nyɔ́ nukún tɔn mɛ.” Mi nɔ lɛ́ ɖɔ: “Fítɛ́ Mawu hwɛjijɔnɔ ɔ́ ka ɖe?”

2 Piyɛ́ɛ 3:4

bó ná ɖɔ: “É dó akpá ɖɔ émí ná wá; mɔ̌ wɛ ǎ cé? Énɛ́! Fítɛ́ é ka ɖe? Tɔ́gbó mǐtɔn lɛ́ɛ ko kú; lo ɔ́, nǔ bǐ ɖo lě e é ko ɖe gbɔn sín hwenu e gbɛ ɔ́ ko tíin ɔ́ ɖokpóó é.”

Nǔɖexlɛ́mɛ 2:23

Un ná hu vǐ tɔn lɛ́ɛ; énɛ́ ɔ́, agun Klísu tɔn lɛ́ɛ bǐ ná tunwun ɖɔ nyɛ wɛ nyí mɛ e nɔ tunwun linlin kpódó jlǒ gbɛtɔ́ tɔn lɛ́ɛ kpán é. Un ná sú lě e mi mɛ ɖokpó ɖokpó wa nǔ gbɔn ɔ́ sín axɔ́ mi.