Hlɔ̌manu 2:4 - MAWUXÓWÉMA

⁴ Abǐ a vɛdó ɖɔ émí ná hu tɛ́ nú xomɛnyínyɔ́ ɖaxó Mawu tɔn ɔ́ kpó sɔxwixwe tɔn kpó, kpódó xomɛfífá tɔn ɖaxó ɔ́ kpó wɛ sín a? Abǐ a tunwun ɖɔ xomɛnyínyɔ́ Mawu tɔn ɖo dindɔn we wɛ nú a na lɛ́ kɔ sín hwɛ towe lɛ́ɛ gúdo ǎ cé?

Hlɔ̌manu 2:4 Iomraidhean Croise

Ɖɛhan 10:11

Mɛdídá nɔ́ ɖɔ dó ayi mɛ ɖɔ: “Mawu nɔ́ wɔn nǔ, é nɔ́ ɖe kɔ dó nǔ e wa wɛ un ɖe lɛ́ɛ, é nɔ́ mɔ nǔɖé gbeɖé ǎ.”

Ɖɛhan 104:24

Mawu Mavɔmavɔ, nǔɖíɖó towe lɛ́ɛ sukpɔ́ lóóo! A blǒ nǔ énɛ́ bǐ kpó nǔnywɛ́ kpó. Nǔ e a blǒ lɛ́ɛ wɛ gɔ́ ayǐkúngban ɔ́ jí.

Ɖɛhan 31:19

Yě mɛ adingbannɔ nɛ́ lɛ́ɛ, goyítɔ́ nɛ́ lɛ́ɛ, wǎngbɛ́númɛtɔ́ nɛ́ lɛ́ɛ ɔ́, yě mɛ énɛ́ lɛ́ɛ e nɔ́ syɛ́n ta, bo nɔ́ kpɔ́n nukún mɛ nú hwɛjijɔnɔ é ɔ́, ɖɛ̌ yětɔn ní tɛ́.

Ɖɛhan 78:38

Amɔ̌, éyɛ́ ɔ́, mɛ nú nɔ́ blá wǔ n'i, bɔ é nɔ́ sɔ́ hwɛ kɛ yě, bó sú kún yětɔn dó ǎ. Hwe gěgé nu ɔ́, é nɔ́ jó xó dó; é nɔ́ lɔn bó nɔ́ sin xomɛ ǎ, é nɔ́ lɔn bó nɔ́ zé adǎn e jí é ɖe ɔ́ bǐ dó wa nǔ ná ǎ.

Ɖɛhan 86:15

Amɔ̌, hwɛ Aklúnɔ ɔ́, Mawu xomɛfátɔ́ wɛ a nyǐ, nǔbláwǔkúnúmɛtɔ́ wɛ a nyǐ, a nɔ yá wǔ sin xomɛ ǎ, xomɛnyɔ́tɔ́ wɛ a nyǐ, gbejínɔtɔ́ wɛ a nyǐ.

Ɖɛhan 86:5

Hwi wɛ nyí Aklúnɔ, a nyɔ̌, a ɖo gbesisɔ mɛ bó ná sɔ́ hwɛ kɛ mɛ; a nɔ nyɔ́ xomɛ dó mɛ e nɔ ylɔ́ we lɛ́ɛ bǐ wú.

Tíntɔ́n 34:6

Mawu Mavɔmavɔ nɔ gbɔn Mɔyízi nukɔn, bó nɔ́ ɖɔ: “Un nyí Mawu Mavɔmavɔ, un nyí Mawu nǔbláwǔkúnúmɛtɔ́, Mawu xomɛfátɔ́, un nɔ yá wǔ sin xomɛ ǎ, un nyí Mawu xomɛnyɔ́tɔ́, un nyí Mawu gbejínɔtɔ́.

Nǔnywɛ́tɔ́xó 8:11

Mɛ e wa nǔ nyanya ɔ́, è nɔ dɔn tó tɔn n'i ɖo tɛn tɔn mɛ ǎ. Énɛ́ ɔ́ wɛ zɔ́n bɔ gbɛtɔ́ lɛ́ɛ nɔ́ ɖo nǔ nyanya wa wɛ sɔ mɔ̌.

Ezayíi 30:18

Nǔ ɖo mɔ̌ có, Mawu Mavɔmavɔ ɖó jlǒ bó ná wa ɖagbe nú mi. É ná sí te bó ná kú nǔbláwǔ nú mi, ɖó Mawu Mavɔmavɔ ɔ́, Mawu hwɛjijɔnɔ wɛ. Nǔ nyɔ́ nú mɛ e ɖo nukún ɖó e wɛ lɛ́ɛ bǐ.

Jelemíi 7:10

Mi ná nɔ ɖo nǔ énɛ́ lɛ́ɛ bló wɛ, bó ká ná nɔ́ lɛ́ kɔ wá gɔ̌n ce, ɖo xwé élɔ́ e è sɔ́ ɖó vo nú mì ɔ́ gbe, bó ná nɔ́ ɖɔ: ‘Éénɛ́, mǐ gǎn!’ Mi nɔ bló mɔ̌, bó nɔ́ mɔ tɛn bó nɔ́ dó nǔ nyanya e jló mi lɛ́ɛ bǐ sin.

Ezekiyɛ́li 11:19

Un ná ná ayixa yɔ̌yɔ́ mi, un ná ná linlin yɔ̌yɔ́ mi. Un ná ɖe ayixa mitɔn e syɛ́n awǐnnya ɖɔhun ɔ́ síin, bó ná zé ayixa e nɔ se tónú é ɖó tɛn tɔn mɛ.

Ezekiyɛ́li 16:63

Énɛ́ ɔ́, a nǎ flín gbɛ e a ko zán ɖ'ayǐ é, bɔ é ná hu winnyá nú we; hwenu e un ná sɔ́ hwɛ towe lɛ́ɛ kɛ we ɔ́, a nǎ dán ɖě wa gbɔn káká bɔ nukikɛ ná gló we. Xó e nyɛ Aklúnɔ Mavɔmavɔ ɖɔ ɔ́ nɛ́.”

Ozée 3:5

Énɛ́ ɔ́ gúdo ɔ́, Izlayɛ́li ví lɛ́ɛ ná lɛ́ kɔ wá. Yě ná ba Mawu Mavɔmavɔ, Mawu yětɔn kpódó Davídi axɔ́sú yětɔn ɔ́ kpó mɔ. Nú é wá yá ɔ́, kpó sísí kpó wɛ yě ná ba Mawu Mavɔmavɔ ɔ́ kpó ɖagbe e é nɔ́ wa nú mɛ lɛ́ɛ kpó.

Jonási 4:2

É xo ɖɛ sɛ́ dó Mawu Mavɔmavɔ bó ɖɔ: “Mawu Mavɔmavɔ, é má nyí nǔ e ɖɔ wɛ un ɖe hwenu e un kpo ɖo to ce mɛ ɔ́ nɛ́ a? Nǔ e gbɛ́ wɛ un ɖe bó hɔn ɖidó Taasísi ɔ́ nɛ́! Đó un tunwun ɖɔ Mawu xomɛnyɔ́tɔ́ wɛ a nyǐ, bó nɔ́ kú nǔbláwǔ nú mɛ; a nɔ yá wǔ sin xomɛ ǎ; ɖagbewiwa towe ɖó dogbó ǎ. A gblɔ̌n adǎn nú mɛ ɔ́, tlóló jɛ́n a nɔ lɛ́ lɛ́ kɔ sín gúdo.

Kɛ́nsísɔ́ 14:18

‘Mawu Mavɔmavɔ wɛ un nyí; un nɔ yá wǔ sin xomɛ ǎ; un nyí Mawu xomɛnyɔ́tɔ́; un nɔ sɔ́ nǔ nyanya e è wa lɛ́ɛ kpódó tónú e è ma se ǎ lɛ́ɛ kpó kɛ mɛ. Un ká nɔ mɔ mɛ e hu hwɛ ɔ́ dó mɔ hwɛjijɔnɔ ǎ. Hwɛ e vǐtɔ́ lɛ́ɛ hu ɔ́, vǐ yětɔn lɛ́ɛ ná sún sin tɔn; vǐvú yětɔn lɛ́ɛ, vitikli yětɔn lɛ́ɛ kpó kpaba yětɔn lɛ́ɛ kpó ná sún sin tɔn.’

Hlɔ̌manu 10:12

Đó vogbingbɔn ɖé ɖo mɛ e nyí Jwifu é kpódó mɛ e ma nyí Jwifu ǎ é kpo tɛ́ntin ǎ; yě bǐ wɛ ɖó Aklúnɔ ɖokpó ɔ́; Aklúnɔ e nɔ dó nú mɛ e nɔ xomlá ɛ lɛ́ɛ bǐ, bɔ é nɔ túnflá é.

Hlɔ̌manu 11:22

Kpɔ́n lě e Mawu ɖe xomɛnyínyɔ́ tɔn kpó hunnylánylá tɔn kpó xlɛ́ gbɔn é: é nɔ́ nylá hun dó mɛ e hu hwɛ lɛ́ɛ, bó ka nyɔ́ xomɛ dó wú we; lo ɔ́, a ɖǒ ná nɔ xomɛnyínyɔ́ tɔn mɛ; é ma nyí mɔ̌ ǎ ɔ́, é ná gbo hwi lɔ síin atínla ɖɔhun.

Hlɔ̌manu 11:33

Fɛ́nú Mawu tɔn d'agba lóóo! Nǔnywɛ́ tɔn kpó nǔtunwuntunwun tɔn kpó gɔ́ngɔ́n lóóo! Mɛ̌ ka sixú tín gbeta e é nɔ ɖe tɔ́n lɛ́ɛ é mɛ? Mɛ̌ ka sixú mɔ nukúnnú jɛ tito tɔn lɛ́ɛ wú?

Hlɔ̌manu 3:25

Mawu sɔ́ Klísu ɖó te nú vɔ̌sísá, bónú gbɔn hun tɔn gbla mɛ ɔ́, Klísu ná mɔ hwɛ sɔ́ kɛ mɛ yí nú mɛ e ɖi nǔ n'i lɛ́ɛ é. Lě e Mawu nyí hwɛjijɔnɔ gbɔn é wɛ é jló ná ɖe xlɛ́ gbɔn mɔ̌. Đ'ayǐ ɔ́, Mawu ɖó suúlu, bó nɔ́ ɖo nǔ wa wɛ gbɛtɔ́ lɛ́ɛ kún hu hwɛ ó ɖɔhun.

Hlɔ̌manu 6:1

Étɛ́ mǐ ka ná ɖɔ din? Mǐ nǎ ɖo gbɛ ɖo hwɛ mɛ tɛgbɛ bónú fɛ́nú Mawu tɔn ní túnflá wɛ a?

Hlɔ̌manu 6:15

Étɛ́ o! Ée mǐ ma ɖo sɛ́n ɔ́ sín acɛ mɛ ǎ, bó ɖo fɛ́nú Mawu tɔn mɛ ɔ́ wú wɛ mǐ ná hu hwɛ a? Gbeɖé kpɔ́n!

2 Kɔlɛ́ntinu 8:2

Nǔ gbo agunví lɛ́ɛ tawun ɖo fínɛ́, gbɔn wǔvɛ́ e yě mɔ lɛ́ɛ gbla mɛ. Lo ɔ́, xomɛhunhun yětɔn d'agba sɔ mɔ̌, bɔ yě nɔ́ ɖe xlɛ́ ɖɔ émí nɔ hun alɔ dó ná nǔ mɛ titewungbe; có nǔɖé ka ɖo yě sí ǎ.

Efɛ́zinu 1:18

Un nɔ byɔ́ ɛ ɖɔ ní bló bónú wěziza ní byɔ́ ayi mitɔn mɛ, bónú mi ná tunwun nǔ e nukúnɖíɖó e wútu é ylɔ́ mi ɔ́ nyí é, bó ná tunwun lě e dɔkun e ɖo nǔ ɖagbe ɖagbe e é sɔ́ ɖ'ayǐ nú mɛ e nyí étɔn lɛ́ɛ mɛ ɔ́ sɔ́ é.

Efɛ́zinu 1:7

Đó Mawu ɖe mǐ sín nǔ nyanya mɛ, bó sɔ́ hwɛ mǐtɔn lɛ́ɛ kɛ mǐ gbɔn Jezu Klísu sín hun gbla mɛ . Lě e é ɖe xomɛnyínyɔ́ tɔn maɖójlɛ̌ ɔ́ xlɛ́ mǐ gbɔn é nɛ́.

Efɛ́zinu 2:4

Lo ɔ́, xomɛnyínyɔ́ Mawu tɔn d'agba, bɔ lě e é ɖó wǎn yíyí nú mǐ sɔ́ é zɔ́n,

Efɛ́zinu 2:7

É bló mɔ̌, bónú ayǐ e ná wá hɔ́n ɖo sɔ gúdo lɛ́ɛ ɔ́, é ná ɖe dɔkun maɖókpodó e ɖo fɛ́nú tɔn mɛ ɔ́ xlɛ́ mǐ, gbɔn xomɛnyínyɔ́ e é ɖó dó mǐ wú gbɔn Klísu Jezu jí é mɛ.

Efɛ́zinu 3:16

Un nɔ byɔ́ ɛ ɖɔ, lě e susu tɔn d'agba sɔ ɔ́, ní dó wǔsyɛ́n lanmɛ nú mi kpó hlɔ̌nhlɔ́n kpó gbɔn Yɛsinsɛn jí.

Efɛ́zinu 3:8

Un sɔ mɛ e ma sɔ atɛ́n ɖo mɛɖeɖóvo Mawu tɔn lɛ́ɛ mɛ ɔ́ ǎ, có Mawu ka jɔwǔ mì, bó ɖɔ nyɛ ní jlá Wɛn Ɖagbe e nyí dɔkun maɖókpodó Klísu tɔn ɔ́ mɛ e ma nyí Jwifu ǎ lɛ́ɛ é.

Filípunu 4:19

Mawu ce ɔ́, dɔkun ɖo así tɔn bó túnflá; é ná ná nǔ e hudó mi lɛ́ɛ bǐ mi ɖo susu tɔn mɛ, gbɔn Klísu Jezu jí.

Kolósinu 1:27

Đó Mawu jló ná ɖe tito tɔn e ɖo wi mɛ ɔ́ xlɛ́ yě; tito énɛ́ e nyí é ɖésúnɔ tɔn, bɔ dɔkun ɖ'é mɛ sɔ mɔ̌, bó nyí tito ɖagbe ɖagbe ɔ́, é sɔ́ ɖ'ayǐ nú nyɔ̌ná togun lɛ́ɛ bǐ tɔn. Nǔbúdo ɔ́ ɖíe: Klísu ɖo mi mɛ, bó nɔ́ ná gǎnjɛwú mi ɖɔ mi ná ɖó mǐmá ɖo susu Mawu tɔn mɛ.

Kolósinu 2:2

Un ɖo ahwan fun wɛ, bónú yě ní ɖó akɔ́nkpinkpan nǔjɔnǔ tɔn, bónú yě ní nyí ɖokpó ɖo wǎn yíyí mɛ, bónú gǎnjɛwú e nǔnywɛ́ titewungbe ɔ́ nɔ ná mɛ ɔ́ ní gɔ́ ayi mɛ nú yě ganjí; énɛ́ ɔ́, yě ná sixú tunwun nǔbúdo Mawu tɔn; Klísu ɖésú wɛ nyí nǔbúdo énɛ́.

1 Timɔtée 1:16

Amɔ̌ énɛ́ ɔ́ wútu wɛ Mawu kú nǔbláwǔ nú mì; é jló ɖɔ Jezu Klísu ní ɖe sɔxwixwe tɔn bǐ xlɛ́ gbɔn nyɛ mɛ e nyí hwɛhutɔ́ hú hwɛhutɔ́ lɛ́ɛ bǐ é sín gbɛzán mɛ, bónú ma nyí kpɔ́n d'é wú nú mɛ e ná wá ɖi nǔ n'i, bó ná mɔ gbɛ mavɔ mavɔ lɛ́ɛ é bǐ.

1 Timɔtée 6:17

Kplɔ́n nǔ mɛ e jɛ dɔkun ɖo gbɛmɛ fí lɛ́ɛ ɖɔ yě ma nɔ yí go ó; ɖɔ nú yě ɖɔ yě ma sɔ́ nukúnɖíɖó yětɔn ɖó dɔkun énɛ́ lɛ́ɛ jí ó; ɖó è sixú gán jɛ dɔkun énɛ́ lɛ́ɛ wú ǎ. Lo ɔ́, yě ní sɔ́ nukúnɖíɖó yětɔn ɖó Mawu jí; é wɛ nɔ ná nǔ bǐ mǐ, bɔ é nɔ túnflá, bónú mǐ ná ɖu gbɛ yětɔn.

1 Piyɛ́ɛ 3:20

Mɛ e ko vɛ́ tóli nú Mawu ɖ'ayǐ xóxó ɖo hwenu e é ɖó suúlu bó nɔ te káká bɔ Nɔwée bló tɔjíhún ɔ́ fó lɛ́ɛ sín yɛ lɛ́ɛ xó ɖɔ wɛ è ɖe. Mɛ kwín we ɖé wɛ byɔ́ tɔjíhún ɔ́ mɛ: yě mɛ tántɔn wɛ nyí mɛ e byɔ́ mɛ bó gán ɖo sin xó ɔ́ mɛ é.

2 Piyɛ́ɛ 1:11

Lě e Mawu ná ná acɛ ɖaxó mi, bɔ mi ná dó byɔ́ Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn ɔ́ sín axɔ́súɖuɖu mavɔ mavɔ ɔ́ mɛ gbɔn é nɛ́.

2 Piyɛ́ɛ 3:15

Mi ní tunwun ɖɔ suúlu e Aklúnɔ mǐtɔn ɖó ɔ́ wɛ nyí hwlɛngán mitɔn, lě e Mawu ná nǔnywɛ́ nɔví mǐtɔn vívɛ́ná Pɔ́lu, bɔ é lɔmɔ̌ wlán sɛ́ dó mi gbɔn é.

2 Piyɛ́ɛ 3:3

Nǔ e mi ná tunwun jɛ nukɔn ɔ́ wɛ nyí ɖɔ: ɖo azǎn gǔdo gúdo tɔn lɛ́ɛ mɛ ɔ́, mɛ e nɔ zán gbɛ yětɔn lě e jlǒ yě ɖésúnɔ tɔn ba gbɔn lɛ́ɛ ná ɖe yěɖée xlɛ́. Yě ná ɖɔ slǎmɛ mi wú,

2 Piyɛ́ɛ 3:9

Aklúnɔ nɔ lín có bó nɔ ɖe akpá e é dó lɛ́ɛ, lě e mɛɖé lɛ́ɛ nɔ vɛdó ɔ́ ǎ. Lo ɔ́, é nɔ ɖó suúlu dó mi wú; ɖó é jló ɖɔ mɛ ɖěbǔ ní dɔn ǎ; é nyɔ́ wa ɔ́, é jló ɖɔ mɛ bǐ ní mɔ ali, bó lɛ́ kɔ sín nǔ nyanya wiwa gúdo.

Nǔɖexlɛ́mɛ 2:21

Un jó hwenu dó n'i, bónú é ná lɛ́ kɔ sín hwɛ tɔn lɛ́ɛ gúdo; lo ɔ́, é jló ná jó agalilɛ dó ǎ.

Nǔɖexlɛ́mɛ 3:20

Đǒtó, un ɖo te ɖo hɔn jí, bó ɖo hɔn xúxú wɛ; ényí mɛɖé se gbe ce, bó hun hɔn ɔ́, un ná byɔ́ xwé tɔn gbe; un ná ɖu nǔ xá ɛ, bɔ é ná ɖu nǔ xá mì.