Ozée 3:5 - MAWUXÓWÉMA

⁵ Énɛ́ ɔ́ gúdo ɔ́, Izlayɛ́li ví lɛ́ɛ ná lɛ́ kɔ wá. Yě ná ba Mawu Mavɔmavɔ, Mawu yětɔn kpódó Davídi axɔ́sú yětɔn ɔ́ kpó mɔ. Nú é wá yá ɔ́, kpó sísí kpó wɛ yě ná ba Mawu Mavɔmavɔ ɔ́ kpó ɖagbe e é nɔ́ wa nú mɛ lɛ́ɛ kpó.

Ozée 3:5 Iomraidhean Croise

1 Axɔ́sú 12:16

Ée akɔta Izlayɛ́li tɔn e ɖo Totaligbé lɛ́ɛ bǐ mɔ ɖɔ axɔ́sú ɔ́ kún bló nǔ e ba wɛ émí ɖe ɔ́ ó ɔ́, yě ɖɔ: “Ani wɛ ɖo mǐ kpódó Davídi kpó tɛ́ntin? Mǐ kpó Jɛsée ví énɛ́ ɔ́ kpó kpé nǔɖé ǎ, Izlayɛ́li ví e mi, mi wá mǐ ní lɛ́ kɔ yi xwé! Din ɔ́, Davídi ví, kpé nukún dó axɔ́súɖuto towe wú!” Ée Izlayɛ́li ví lɛ́ɛ ɖɔ mɔ̌ ɔ́, yě ɖidó.

Ezayíi 17:7

Gbe énɛ́ gbe ɔ́, gbɛtɔ́ ná lílɛ́ bó kpan nukɔn mɛ e ɖó e ɔ́, bɔ nukún tɔn bǐ ná ɖo Mawu mímɛ́ Izlayɛ́li tɔn ɔ́ wú.

Ezayíi 2:2

Gbe ɖokpó ná wá su, bɔ só e jí Mawu Mavɔmavɔ xwé ɔ́ ɖe ɔ́ ná hú ga só kpɛví kpɛví lɛ́ɛ, é ná yi jǐ hú só ɖě lɛ́ɛ bǐ. Énɛ́ ɔ́, akɔta lɛ́ɛ bǐ ná nyi ahwan wá gɔ̌n tɔn.

Ezayíi 2:3

Akɔta gěgé ná jɛ ali ɖidó dɔ̌n bó ná ɖɔ: “Mi wá mǐ yi Mawu Mavɔmavɔ só ɔ́ ta, mi wá mǐ yi Mawu Jakɔ́bu tɔn xwé. É ná kplɔ́n nǔ e é jló ɖɔ mǐ nǎ wa é mǐ, bɔ mǐ nǎ xwedó ali e é ɖe nú mǐ é.” Nǔgbó ɔ́, Sinyɔ́ɔ wɛ Mawu Mavɔmavɔ sɛ́n ɔ́ ná gosín, Jeluzalɛ́mu wɛ Mawu Mavɔmavɔ xó ɔ́ ná gosín wá nú mǐ.

Ezayíi 60:5

A mɔ yě ɔ́, xomɛ ná hun we, nǔ ná víví nú we mɔ̌hunkɔtɔn, a nǎ j'awǎ; ɖó è nǎ bɛ́ xu mɛ dɔkun lɛ́ɛ wá gɔ̌n towe, dɔkun akɔta lɛ́ɛ tɔn ná wá gɔ̌n towe.

Ezayíi 9:13

Énɛ́ ɔ́ wú wɛ Mawu Mavɔmavɔ zé kéze ɖokpó ɖó te, bó gbo ta Izlayɛ́li, bó sɛ́n sí tɔn; é sɛ́n děma kpó fántín kpó.

Jelemíi 23:5

Mawu Mavɔmavɔ ɖɔ: “Ayǐ ɖé ná wá hɔ́n, bɔ un na bló bɔ vǐ ayijlɔ́jlɔ́nɔ ɖokpó ná jɔ ɖo Davídi kún mɛ. É ná ɖu axɔ́sú ɖo to mɛ fí; é ná ɖó nǔnywɛ́. É ná nɔ xwedó hwɛjijɔ; é ná nɔ́ wa nǔ ɖó sɛ́nxwi jí.

Jelemíi 30:24

Xomɛsin ɖaxó e jí Mawu Mavɔmavɔ ɖe ɔ́ ɖo nǎ xwɛ wɛ ǎ. É ná xwɛ cóbónú Mawu Mavɔmavɔ ná wa nǔ e é lin lɛ́ɛ bǐ ǎ. Ayǐ ɖo hǐnhɔ́n wɛ ɔ́, mi ná mɔ nǔ jɛ nǔ énɛ́ lɛ́ɛ bǐ mɛ.

Jelemíi 30:9

Yě ná sɛn nyɛ Mawu Mavɔmavɔ, Mawu yětɔn, bɔ un ná lɛ́ sɔ́ mɛ ɖokpó ɖó axɔ́sú yětɔn Davídi sín zinkpo jí, bɔ é ná nyí axɔ́sú yětɔn bɔ yě ná nɔ́ sɛn ɛ.”

Jelemíi 33:17

Đó xó e Mawu Mavɔmavɔ ɖɔ é ɖíe: “Axɔ́sú Davídi ná ba vǐ tɔn e ná nɔ Izlayɛ́li zinkpo jí ɔ́ kpo gbeɖé ǎ.

Jelemíi 33:9

Hwenɛ́nu lo ɔ́, un ylɔ́ Jeluzalɛ́mu sín nyǐkɔ ɔ́, é ná nɔ́ víví nú mì. É wɛ un ná nɔ́ dó ba acɔ́ ná ɖo akɔta e ɖo ayǐkúngban ɔ́ jí lɛ́ɛ bǐ nukɔn. Hwenu e akɔta lɛ́ɛ na se ɖagbe e wa nú Jeluzalɛ́mu gbé un ja ɔ́, xɛsi ná ɖi yě, bɔ yě ná sísɔ́. Nú yě mɔ nyɔ̌ná e un ná Jeluzalɛ́mu ɔ́, kpó lě e nǔ tɔn lɛ́ɛ ɖo nukɔn yi gbɔn wɛ ɔ́ kpó ɔ́, ado ná hu yě.”

Ezekiyɛ́li 16:63

Énɛ́ ɔ́, a nǎ flín gbɛ e a ko zán ɖ'ayǐ é, bɔ é ná hu winnyá nú we; hwenu e un ná sɔ́ hwɛ towe lɛ́ɛ kɛ we ɔ́, a nǎ dán ɖě wa gbɔn káká bɔ nukikɛ ná gló we. Xó e nyɛ Aklúnɔ Mavɔmavɔ ɖɔ ɔ́ nɛ́.”

Ezekiyɛ́li 38:16

A nǎ tɔ́n ahwan togun ce Izlayɛ́li ɔ́, bó ná cyɔ́n to ɔ́ ahǔn ɖɔhun. É ká ná lín káká có nǔ énɛ́ lɛ́ɛ ná jɛ. Un ná sɛ́ we dó bɔ a nǎ wǎ tɔ́n ahwan to ce, énɛ́ ɔ́, to ɖě lɛ́ɛ ná tunwun ɖɔ nyɛ wɛ nyí Mawu mímɛ́ ɔ́. Hwi Gɔgu ɔ́ wɛ un ka ná zán dó bló nǔ énɛ́ ɔ́.

Ezekiyɛ́li 38:8

É wá yá ɔ́, un ná zɔ́n nǔ we. Xwe wá ɖo xwe jí jɛ wɛ ɔ́, un ná sɛ́ we dó, bɔ a nǎ yi tɔ́n ahwan Izlayɛ́li to ɔ́. Izlayɛ́li ví e xo ahwan zlɛ́ lɛ́ɛ ɔ́, yě ná gosín to e mɛ yě gbadó gbɔn lɛ́ɛ mɛ, bó ná wá kplé kpɔ́ gěgé ɖo Izlayɛ́li, só e è ko jó dó bɔ é kó lín bɔ mɛ ɖě ma sɔ́ ɖ'é jí ǎ lɛ́ɛ jí. Yě mɛ énɛ́ lɛ́ɛ e è nǎ kplá sín akɔta ɖě lɛ́ɛ mɛ lɛ́ɛ ɔ́, yě ná wá vo bǐ ɖo to yě ɖésúnɔ tɔn ɔ́ mɛ.

Daniyɛ́li 10:14

Din ɔ́, un wá bó ná ɖɔ nǔ e ná wá jɛ dó togun towe jí sɔ gúdo ɔ́ nú we. Nǔ ɔ́ wɛ Mawu ɖe xlɛ́ we bɔ a mɔ.’

Daniyɛ́li 2:28

Amɔ̌, Mawu ɖokpó ɖo sɛ́xwé, bó nɔ́ ɖe nǔbúdo lɛ́ɛ xlɛ́ mɛ. Axɔ́sú Nabukodonɔzɔ́ɔ, Mawu énɛ́ ɔ́ wɛ ná ɖɔ nǔ e ná jɛ sɔ ɔ́ nú mɛ. Din ɔ́, nǔ e è mɔ ɖo dlɔ̌ mɛtɔn mɛ ɔ́ ɖíe:

Ozée 11:10

Vǐ ce lɛ́ɛ ná xwedó nyɛ Mawu Mavɔmavɔ ɔ́; un ná dó gbe kinnikínní ɖɔhun dó ylɔ́ yě bɔ yě ná kán wezun sín xu mɛ wá.

Ozée 5:15

Mawu Mavɔmavɔ ɖɔ: “Un ná yi, un ná yi nɔ xwé ce gbe, káká jɛ hwenu e yě ná tunwun ɖɔ émí wa nǔ nyi do bó ná lɛ́ kɔ wá gɔ̌n ce dó é. Nú adǎn kó jɛ yě gbo jí ɔ́, yě ná ba mì mɔ.”

Ozée 5:6

Yě ná hɛn lɛ̌ngbɔ́ kpó nyibú kpó dó yi sá vɔ̌ nú Mawu Mavɔmavɔ, yě ká ná mɔ ɛ ǎ, ɖó é kó ɖo zɔ nú yě.

Ozée 6:1

Mawu Mavɔmavɔ ɖɔ: “Énɛ́ ɔ́, mi ná ɖɔ: Mi wá nú mǐ ná lɛ́ kɔ yi Mawu Mavɔmavɔ gɔ́n, ɖó é wɛ gblé wǔ mǐ, é ká ná gbɔ azɔn nú mǐ. É wɛ vúnvún mǐ, é jɛ́n ká ná kpé nukún dó mǐ wú.

Amɔ́si 9:11

Mawu Mavɔmavɔ ɖɔ: “É wá yá ɔ́, un ná fɔ́n Davídi sín xwé e mu ɔ́ ɖó te. Un ná bló dǒ e zɛ lɛ́ɛ ɖó. Un ná bló nǔ e gba hánnyá lɛ́ɛ ɖó. Un ná vɔ́ xwé ɔ́ bló ɖó lě e é kó ɖe gbɔn ɖ'ayǐ é.

Micée 4:1

Ayǐ ɖé ná wá hɔ́n, bɔ só e jí sinsɛnxɔ ɔ́ ɖe ɔ́ ná yi jǐ hú só lɛ́ɛ bǐ, é ná hú ga só kpɛví kpɛví lɛ́ɛ bǐ, bɔ togun lɛ́ɛ ná nyi ahwan wá asá tɔn mɛ.

Kɛ́nsísɔ́ 24:14

Din ɔ́, un ná lɛ́ kɔ yi togun ce mɛ. Wǎ má ɖɔ nǔ e togun élɔ́ ná wa xá togun towe ɖo sɔ gúdo ɔ́ nú we.”

Hlɔ̌manu 11:25

Nɔví ce lɛ́ɛ mi, nǔbúdo ɖokpó ɖíe, bɔ un jló ná ɖe xlɛ́ mi, bónú mi ma sɔ́ miɖée dó mɔ nǔnywɛ́tɔ́ ná ó: togun Izlayɛ́li tɔn akpá bǔ húzú tótlítɔ́. Lo ɔ́, yě ná nɔ mɔ̌ sɔ́yi ǎ; hwenu e togun ɖě lɛ́ɛ bǐ ná mɔ hwlɛngán dó ɔ́ jɛ́n yě ná nɔ mɔ̌ jɛ.

Hlɔ̌manu 2:4

Abǐ a vɛdó ɖɔ émí ná hu tɛ́ nú xomɛnyínyɔ́ ɖaxó Mawu tɔn ɔ́ kpó sɔxwixwe tɔn kpó, kpódó xomɛfífá tɔn ɖaxó ɔ́ kpó wɛ sín a? Abǐ a tunwun ɖɔ xomɛnyínyɔ́ Mawu tɔn ɖo dindɔn we wɛ nú a na lɛ́ kɔ sín hwɛ towe lɛ́ɛ gúdo ǎ cé?

Sɛ́nflínmɛ 4:30

Hwenu e nǔ e un ɖɔ nú mi lɛ́ɛ bǐ ná jɛ, bɔ mi ná ɖo aluwɛ mɛ ɔ́, mi ná lɛ́ kɔ wá Mawu Mavɔmavɔ, Mawu mitɔn gɔ́n, bó ná lɛ́ jɛ tónú se n'i jí.