Kɛ́nsísɔ́ 9:14 - MAWUXÓWÉMA

¹⁴ Nú tomɛyitɔ́ ɖé ɖo mi gɔ́n, bó jló ná ɖu Dǐndínwáyixwe ɔ́ xá mi ɔ́, é ɖó ná bló lě e nyɛ Mawu Mavɔmavɔ ɖɔ gbɔn ɔ́, bó ná xwedó lě e é ɖe gbɔn ɖo sɛ́n ɔ́ mɛ ɔ́ dó ɖu. Lě e mi Izlayɛ́li ví lɛ́ɛ ɖu gbɔn ɔ́ wɛ tomɛyitɔ́ lɛ́ɛ ná ɖu gbɔn.”

Kɛ́nsísɔ́ 9:14 Iomraidhean Croise

Ɛsidlási 6:21

Izlayɛ́li ví lɛ́ɛ bǐ ɖu Dǐndínwáyixwe ɔ́ sín nǔɖuɖu: mɛ e lɛ́ kɔ sín kannumɔgbénu wá lɛ́ɛ, kpódó mɛ e ko jó walɔ kwíji kwíji to ɔ́ mɛ nu lɛ́ɛ tɔn lɛ́ɛ dó é kpó. Yě mɛ énɛ́ lɛ́ɛ wá gɔ́ nú Izlayɛ́li ví ɖě lɛ́ɛ bó nɔ́ sɛn Mawu Mavɔmavɔ, Mawu Izlayɛ́li tɔn.

Tíntɔ́n 12:43

Mawu Mavɔmavɔ lɛ́ ɖɔ nú Mɔyízi kpó Aalɔ́ɔn kpó ɖɔ: “Sɛ́n e kan Dǐndínwáyixwe ɔ́ lɛ́ɛ ɖíe: Mɛ e ɖo akɔta ɖěvo mɛ lɛ́ɛ ɖěbǔ ná ɖu xwe ɔ́ sín nǔɖuɖu ǎ.

Tíntɔ́n 12:47

Izlayɛ́li ví lɛ́ɛ sín togun ɔ́ bǐ wɛ ná nɔ ɖu Dǐndínwáyixwe ɔ́.

Levíi ví 19:10

Mɔ̌ ɖokpó ɔ́, mi ma lɛ́ kɔ yi gbɛ vǐwun e mi blɛ́ gbɔn vǐwungbo mitɔn lɛ́ɛ mɛ lɛ́ɛ ó; mi ma ka cyán éé kɔn nyi kɔ́ mɛ lɛ́ɛ ó; mi ná jó dó nú wamamɔnɔ lɛ́ɛ, kpódó jǒnɔ lɛ́ɛ kpó. Nyɛ wɛ nyí Mawu Mavɔmavɔ, Mawu mitɔn.

Levíi ví 22:25

Mi ma ka yí kanlin mɔ̌hunkɔ lɛ́ɛ ɖě ɖo jǒnɔ ɖé sí, bó dó sá vɔ̌ nú nyɛ Mawu mitɔn ó. Wǔ énɛ́ ɔ́ e è gblě yě ɔ́, blɔ̌ wɛ nyí ɖo yě wú. Nú mi zé kanlin mɔ̌hunkɔtɔn ɖé dó sá vɔ̌ nú mì ɔ́, un ná yí ǎ.”

Levíi ví 24:22

“Sɛ́n ɖokpó ɔ́ wɛ mɛ bǐ ná nyi; jǒnɔ kpó toví kpó ɔ́, sɛ́n ɖokpó ɔ́ wɛ yě bǐ ná nyi; ɖó nyɛ wɛ nyí Mawu Mavɔmavɔ, Mawu mitɔn.”

Levíi ví 25:15

Nú mi ja ayǐkúngban xɔ gbé ɖo to mitɔn mɛ nu sí ɔ́, xwe nabí e kpo bɔ è nǎ ɖu ‘Awǎjijɛxwe’ ɔ́ wɛ mi ná kpɔ́n dó xɔ, bɔ éyɛ́ ná kpɔ́n xwe nabí e a nǎ dó ya jinukún ɖo gle ɔ́ jí cóbɔ ‘Awǎjijɛxwe’ ɔ́ ná wá ɔ́ dó sa.

Kɛ́nsísɔ́ 15:15

Sɛ́n ɖokpó ɔ́ wɛ togun ɔ́ bǐ ná xwedó, toví kpó jǒnɔ kpó bǐ. Sɛ́n ɖé wɛ, bó ná nɔ ayǐ káká sɔ́yi. Mi kpó jǒnɔ kpó bǐ wɛ ɖó ná nyi sɛ́n énɛ́ ɔ́, ɖo nyɛ Mawu Mavɔmavɔ nukɔn.

Kɛ́nsísɔ́ 15:16

Sɛ́n e mi ná nɔ́ nyi lɛ́ɛ kpó tito e mi ná nɔ́ xwedó lɛ́ɛ kpó wɛ jǒnɔ lɛ́ɛ lɔ ná nɔ́ xwedó.”

Sɛ́nflínmɛ 29:11

Mawu Mavɔmavɔ, Mawu mitɔn jɛ akɔ xá mi, bó sɔ́ nǔ slé jí. Akɔ énɛ́ ɔ́ ná bɛ́ azɔ̌ bɛ́ sín égbé.

Sɛ́nflínmɛ 31:12

Mi ná kplé togun ɔ́ bǐ: mɛxó súnnu kpó mɛxó nyɔ̌nu kpó, kpó yɔkpɔ́vú kpó bǐ ná kplé, mɛ e nyí jǒnɔ bó ɖo to mitɔn mɛ lɛ́ɛ lɔmɔ̌ ná wá, bɔ mɛ bǐ ná ɖótó sɛ́n e xa wɛ è ɖe é, bó ná tunwun lě e è ɖǒ ná ɖó sísí nú Mawu Mavɔmavɔ, bó ná nyi sɛ́n tɔn gbɔn é.