Kɛ́nsísɔ́ 4:15 - MAWUXÓWÉMA

¹⁵ Cóbónú yě ná jɛ ali ɔ́, Aalɔ́ɔn kpódó vǐ tɔn súnnu lɛ́ɛ kpó nɔ́ bú nǔ dó nǔ mímɛ́ énɛ́ lɛ́ɛ, kpódó nǔ e è nɔ zán ɖo nǔ énɛ́ lɛ́ɛ kɔn lɛ́ɛ kpó. Yě bló fó ɔ́, Kexáti sín vǐ súnnu lɛ́ɛ nɔ́ wá ɖíɖá. Lo ɔ́, yě ná ɖó alɔ nǔ mímɛ́ lɛ́ɛ ɖě wú ǎ; yě táá kú. Nú è tún Goxɔ ɔ́, azɔ̌ e nyí yědɛɛ lɛ́ɛ tɔn bɔ yě ná wa é nɛ́.

Kɛ́nsísɔ́ 4:15 Iomraidhean Croise

2 Samuwɛ́li 15:24

Vɔ̌sánú-xwlémawutɔ́ Sadɔ́ku lɔmɔ̌ ɖo fínɛ́, bɔ Levíi ví lɛ́ɛ hɛn akɔjijɛgbá Mawu tɔn, bó ɖo fínɛ́ xá ɛ. Yě zlɔ́n akɔjijɛgbá ɔ́, bɔ vɔ̌sánú-xwlémawutɔ́ Abiyatáa ɖo vɔ̌ sá nú Mawu wɛ káká bɔ togun ɔ́ bǐ tɔ́n sín toxo ɔ́ mɛ.

2 Samuwɛ́li 6:13

Ée mɛ e hɛn akɔjijɛgbá ɔ́ lɛ́ɛ ɖe afɔ ayizɛ́n ɔ́, é ɖó yě te, bɔ è hu nyibúsú ɖokpó, nyibúví kloklo ɖokpó.

1 Axɔ́sú 8:3

Ée tomɛxó Izlayɛ́li tɔn lɛ́ɛ wá ɔ́, vɔ̌sánú-xwlémawutɔ́ lɛ́ɛ zé akɔjijɛgbá ɔ́.

1 Tan 15:15

Levíi ví lɛ́ɛ dó kpɔn akɔjijɛgbá ɔ́, lobo sɔ́ ɖó abɔ̌ta, lě e Mawu Mavɔmavɔ ɖɔ gbɔn nú Mɔyízi bɔ é ɖɔ é.

1 Tan 15:2

Énɛ́ ɔ́ gúdo ɔ́, é ɖɔ: “Levíi ví lɛ́ɛ kɛ́ɖɛ́ wɛ ɖó acɛ bo ná zé akɔjijɛgbá Mawu tɔn ɔ́, ɖó Mawu Mavɔmavɔ wɛ ɖe yě bɔ yě ná nɔ́ zé, bɔ é nyí azɔ̌ yětɔn káká sɔ́yi.”

1 Tan 23:26

Bɔ Levíi ví lɛ́ɛ sɔ́ ná nɔ́ ɖíɖá goxɔ Mawu Mavɔmavɔ tɔn ɔ́ ɖě ǎ; yě ká sɔ́ ná nɔ́ ɖíɖá nǔ e è nɔ zán ɖo goxɔ ɔ́ mɛ lɛ́ɛ ɖě ǎ.”

Tíntɔ́n 19:12

A nǎ ɖǒ dogbó nú yě lɛ́ lɛ̌ dó só ɔ́, bó ná dó sɛ́n nú yě ɖɔ yě nǐ má xá só ɔ́ jí ó, yě nǐ má ká ɖó alɔ wú ó. Mɛ ɖěbǔ ɖó alɔ wú ɔ́, mɛ ɔ́ ná kú.

Tíntɔ́n 19:21

bɔ Mawu Mavɔmavɔ ɖɔ n'i ɖɔ: “Jɛ te bo gbɛ́ nú Izlayɛ́li ví lɛ́ɛ ɖɔ yě ní má syɛ́n ta bo wá ba nǔ do ó; mɛ gěgé táá kú ɖo yě mɛ.

Tíntɔ́n 27:7

È nǎ fɔ kpo gaga lɛ́ɛ gbɔn alɔgan lɛ́ɛ mɛ, ɖo vɔ̌sákpe ɔ́ sín akpá we lɛ́ɛ xwé, bɔ è nǎ nɔ dó zé vɔ̌sákpe ɔ́.

Levíi ví 16:13

Bó ná kɔn atínkɛn wǎnnɔ ɔ́ dó myɔkán ɔ́ jí ɖo zǎlínkpɔ́nfyɔ́nú ɔ́ mɛ, ɖo Mawu Mavɔmavɔ nukɔn fínɛ́; azizɔ e ná tɔ́n sín mɛ ɔ́ ná cyɔ́n akɔjijɛgbá ɔ́ kpó nusú tɔn kpó; énɛ́ ɔ́, Aalɔ́ɔn sɔ́ ná kú ǎ.

Kɛ́nsísɔ́ 1:50

A nǎ zé azɔ̌ e nyí Goxɔ ɔ́ tɔn lɛ́ɛ dó alɔ mɛ nú Levíi ví lɛ́ɛ; fínɛ́ wɛ akɔjijɛgbá ɔ́ ɖe. Nǔ e è dǒ bló Goxɔ ɔ́ ná lɛ́ɛ kpó nǔ e è nɔ zán ɖo xwé ɔ́ gbe lɛ́ɛ kpó sín azɔ̌ lɛ́ɛ ɔ́, a nǎ zé dó alɔ mɛ nú yě. Yě wɛ ná nɔ́ zé Goxɔ ɔ́ kpó nǔ e è nɔ zán ɖ'é mɛ lɛ́ɛ bǐ kpó. Yě wɛ ná nɔ wa azɔ̌ ɖo xwé ɔ́ gbe; yě wɛ ná nɔ́ ɖó gɔnu lɛ́ lɛ̌ dó Goxɔ ɔ́.

Kɛ́nsísɔ́ 1:51

Nú è ɖo tɛn ná sɛ nú Goxɔ ɔ́ wɛ hweɖěbǔnu ɔ́, Levíi ví lɛ́ɛ wɛ ná nɔ́ tún; nú è nǎ nɔ te fí ɖé bó ɖó gɔnu ɖó fínɛ́ ɔ́, yědɛɛ lɛ́ɛ wɛ ná nɔ́ ján Goxɔ ɔ́. Nú mɛ ɖěvo ɖé sɛkpɔ́ ɔ́, è ná hu i.

Kɛ́nsísɔ́ 10:21

Levíi ví e jɔ ɖo Kexáti kún mɛ lɛ́ɛ bɛ́ nǔ mímɛ́ bǐ lɛ́ɛ, bó jɛ ali ɖidó bɔdó yě wú. Levíi ví ɖě lɛ́ɛ ɖó ná kó kɛ́ Goxɔ ɔ́ ɖ'ayǐ, cóbɔ yě ná wá.

Kɛ́nsísɔ́ 18:3

Mi zɔ́n nǔ ɖěbǔ yě ɔ́, yě ná wa; yě ná nɔ́ wa azɔ̌ e kan Goxɔ ɔ́ lɛ́ɛ bǐ. Lo ɔ́, yě ná sɛkpɔ́ nǔ mímɛ́ lɛ́ɛ ǎ; yě ná sɛkpɔ́ vɔ̌sákpe ɔ́ ǎ; é má nyí mɔ̌ ǎ ɔ́, mi kpó yě kpó bǐ ná kú.

Kɛ́nsísɔ́ 3:38

Mɔyízi kpódó Aalɔ́ɔn kpó, kpódó Aalɔ́ɔn sín vǐ lɛ́ɛ kpó ɔ́, yědɛɛ lɛ́ɛ ɖó gɔnu ɖó Mawu xwé ɔ́ nukɔn, ɖo zǎnzǎnhwe jí. Azɔ̌ yětɔn wɛ nyí ɖɔ yě ná nɔ́ sɛkpɔ́ Mawu Mavɔmavɔ ɖó Izlayɛ́li ví lɛ́ɛ tɛnmɛ, bɔ nú mɛ ɖěvo sɛkpɔ́ ɔ́, è ɖǒ ná hu i.

Kɛ́nsísɔ́ 4:14

bó ná bɛ́ nǔ e è nɔ zán ɖo vɔ̌sísá hwenu lɛ́ɛ bǐ ɖ'é jí. Yě wɛ nyí afíngannú lɛ́ɛ, gǎfu lɛ́ɛ, pɛ́li lɛ́ɛ, basya lɛ́ɛ, nǔ e è ko nɔ sixú zán ɖo vɔ̌sákpe jí lɛ́ɛ bǐ, bó ná zé anyǔ tlitli cyɔ́n jí, bó ná bɛ́ kpo e è nɔ dó zé vɔ̌sákpe ɔ́ ná lɛ́ɛ dó alɔgan lɛ́ɛ mɛ.

Kɛ́nsísɔ́ 4:19

Yě ɖo nukún kpé dó nǔ mímɛ́ lɛ́ɛ wú wɛ ɔ́, nǔ e mi ná bló, bɔ yě má ná kú ǎ ɔ́ ɖíe: hwenu e yě ná sɛkpɔ́ tɛn mímɛ́ bǐ ɔ́, hwɛ Aalɔ́ɔn kpó vǐ towe súnnu lɛ́ɛ kpó ɔ́, mi ná kplá yě mɛ ɖokpó ɖokpó ɖó tɛn yětɔn yětɔn mɛ, bó ná ɖɔ nǔ e mɛ ɖokpó ɖokpó ɖó ná wa ɔ́, abǐ nǔ e mɛ ɖokpó ɖokpó ɖó ná sɔ́ ɔ́ n'i.

Kɛ́nsísɔ́ 4:20

Yě ɖó ná byɔ́ tɛn mímɛ́ bǐ ɔ́ mɛ, bó ná fin nǔ mímɛ́ lɛ́ɛ kpɔ́n hwenu e è ɖo nǔ bǔ dó yě wɛ ɔ́ ǎ. Yě mɔ ɔ́, yě ná kú”

Kɛ́nsísɔ́ 7:9

É zé kɛkɛ́ví ɖě nú Kexáti ví lɛ́ɛ ǎ, é ká zé nyibú ɖě nú yě ǎ, ɖó nǔ mímɛ́ lɛ́ɛ wú wɛ yědɛɛ lɛ́ɛ nɔ́ kpé nukún dó, bó nɔ́ hɛn yě abɔ̌ta.

Sɛ́nflínmɛ 31:9

Mɔyízi wlán sɛ́n ɔ́ bó zé dó así nú Levíi ví vɔ̌sánú-xwlémawutɔ́ lɛ́ɛ; yě wɛ nɔ ɖíɖá akɔjijɛgbá Mawu Mavɔmavɔ tɔn ɔ́. Yě kpó tomɛxó Izlayɛ́li tɔn lɛ́ɛ kpó wɛ Mɔyízi zé sɛ́n ɔ́ jó ná.

Jozuwée 4:10

Vɔ̌sánú-xwlémawutɔ́ e hɛn akɔjijɛgbá ɔ́ lɛ́ɛ nɔ te ɖo tɔ ɔ́ tɛ́ntin káká, bɔ togun ɔ́ bló nǔ e Mawu Mavɔmavɔ ɖɔ nú Jozuwée, bɔ é ɖɔ nú yě ɔ́ bǐ. Yě bló nǔ lɛ́ɛ bɔ é sɔ gbe xá lě e Mɔyízi ɖɔ gbɔn nú Jozuwée é. Togun ɔ́ hwlɛ́ndó bo dó asá tɔ ɔ́.

1 Samuwɛ́li 6:19

Bɛti-Cɛmɛ́cinu lɛ́ɛ kpɔ́n akɔjijɛgbá Mawu Mavɔmavɔ tɔn ɔ́ mɛ, bɔ Mawu Mavɔmavɔ hu súnnu kanɖé gban (70) ɖo yě mɛ, bɔ to ɔ́ bǐ byɔ́ aluwɛ mɛ, ɖó Mawu Mavɔmavɔ sín alɔ wɛ jɛ yě wú.