Kɛ́nsísɔ́ 20:14 - MAWUXÓWÉMA

¹⁴ Mɔyízi nɔ Kadɛ́ci bo sɛ́ mɛ dó axɔ́sú Edɔ́mu tɔn ɔ́. É ɖɔ sɛ́ dó e ɖɔ: “Đǒtó xó e ɖɔ wɛ mǐ nɔví towe Izlayɛ́li ví lɛ́ɛ ɖe é; a tunwun wǔvɛ́ e mǐ mɔ lɛ́ɛ bǐ.

Kɛ́nsísɔ́ 20:14 Iomraidhean Croise

Bǐbɛ́mɛ 25:23

Bɔ Mawu Mavɔmavɔ yí gbe n'i ɖɔ: “Akɔta we wɛ ɖo adɔgo towe mɛ. Togun vovo we wɛ ná tɔ́n sín xo towe mɛ; togun ɔ́ ɖokpó ná ɖó hlɔ̌nhlɔ́n hú ɖokpó; mɛxó ɔ́ wɛ ká ná nɔ mɛ kpɛví ɔ́ glɔ́.”

Bǐbɛ́mɛ 25:25

Vǐ nukɔntɔn e tɔ́n ɔ́ nyí vɔvɔ, bɔ fún kpé wǔ tɔn bǐ, awu ɖaxó fúnnɔ mɛ wɛ é ɖe ɖɔhun. È nɔ ylɔ́ vǐ ɔ́ ɖɔ Esawu.

Bǐbɛ́mɛ 25:26

Ée éyɛ́ tɔ́n ɔ́, nɔví tɔn tɔ́n, bɔ alɔ tɔn hɛn Esawu sín afɔgbɛnnu. È nɔ ylɔ́ vǐ ɔ́ ɖɔ Jakɔ́bu. Xwe kanɖé ko (60) wɛ Izáki ɖó hwenu e é ji vǐ énɛ́ lɛ́ɛ é.

Bǐbɛ́mɛ 32:29

Nya ɔ́ ɖɔ n'i ɖɔ: “È sɔ́ ná nɔ́ ylɔ́ we ɖɔ Jakɔ́bu ǎ; bɛ́ sín din ɔ́, Izlayɛ́li wɛ è nǎ nɔ́ ylɔ́ we ɖɔ, ɖó a dǒ alɔ xá Mawu, bó dó alɔ xá gbɛtɔ́ lɛ́ɛ bó ɖu ɖ'é jí.”

Tíntɔ́n 18:8

Nǔ e Mawu Mavɔmavɔ wa xá axɔ́sú Ejípu tɔn ɔ́ kpó Ejípunu lɛ́ɛ kpó ɖó Izlayɛ́li ví lɛ́ɛ wú ɔ́, ya e yě ji ɖo alixo bɔ Mawu Mavɔmavɔ hwlɛ́n yě ɖ'é mɛ lɛ́ɛ ɔ́, Mɔyízi wlí bǐ ɖɔ nú asi tɔn tɔ́.

Amɔ́si 1:11

Mawu Mavɔmavɔ ɖɔ: “Edɔ́munu lɛ́ɛ ɔ́, nǔ e yě wa nyi do bɔ un jló ná kɛ nu d'é wú nú yě ɔ́ nyí ɖokpó kɛ́ɖɛ́ ǎ, amɔ̌, élɔ́ e yě wa ɔ́ vɛ́ nú mì tawun. Yě nɔ́ nya nɔví yětɔn lɛ́ɛ kpó hwǐ kpó; yě sɔ́ ɖó nǔbláwǔkúnúmɛ ǎ, ɖó xomɛsin yětɔn nɔ ɖo nǔ hɛn gblé wɛ hwebǐnu; adǎn jí jɛ́n yě nɔ́ ɖe hwebǐnu. Nǔ e wú un ma ná lɛ́ kɔ sín gbeta e un ɖe tɔ́n ɔ́ gúdo ǎ é nɛ́.

Malacíi 1:2

Mawu Mavɔmavɔ ɖɔ nú Izlayɛ́li ví lɛ́ɛ ɖɔ: “Un yí wǎn nú mi.” Yě kanbyɔ́ ɛ ɖɔ: “Fítɛ́ nǔ e ɖe xlɛ́ ɖɔ a yǐ wǎn nú mǐ ɔ́ ɖe?” Mawu Mavɔmavɔ yí gbe bo ɖɔ: “Esawu ɔ́, Jakɔ́bu sín nɔví wɛ é nyí ǎ cé?

Kɛ́nsísɔ́ 13:26

Ée yě wá ɔ́, yě yi Mɔyízi kpó Aalɔ́ɔn kpó, kpódó togun Izlayɛ́li tɔn ɔ́ bǐ kpó gɔ́n, ɖo Kadɛ́ci, ɖo gbětótló Paláni tɔn mɛ. Yě ɖǒ nǔ e yě mɔ ɖo dɔ̌n ɔ́ sín gbe nú yě bǐ, bó xlɛ́ atínsínsɛ́n to ɔ́ mɛ tɔn yě.

Kɛ́nsísɔ́ 20:15

Tɔ́gbó mǐtɔn lɛ́ɛ yi Ejípu ɖ'ayǐ, bɔ mǐ nɔ fínɛ́ ɖésú. Ejípunu lɛ́ɛ dó ya nú mǐ, yě dǒ ya nú tɔ́gbó mǐtɔn lɛ́ɛ kpó mǐ kpó.

Kɛ́nsísɔ́ 20:22

Izlayɛ́li ví lɛ́ɛ bǐ gosín Kadɛ́ci toxo ɔ́ mɛ, bó yi Hɔ́ɔ só ɔ́ kɔn,

Sɛ́nflínmɛ 23:7

Nú mi kpo ɖo gbɛ jɛ́n wɛ ɔ́, mi ma ba fífá nú togun we énɛ́ lɛ́ɛ ó; mi ma ka ba nukɔn yiyi yětɔn gbeɖé ó.

Jozuwée 2:10

Đó mǐ se ɖɔ hwenu e mi tɔ́n sín Ejípu bó wá jɛ Xu Vɔvɔ ɔ́ tó ɔ́, Mawu Mavɔmavɔ bló bɔ sin ɔ́ xú, bɔ mi gbɔn ayǐkúngban xúxú jí bó dín. Mǐ lɛ́ se ɖɔ mi hu Amɔliti lɛ́ɛ sín axɔ́sú we: Sihɔ́ni kpó Ɔgu kpó ɖo Judɛ́ɛn tɔ ɔ́ sín zǎnzǎnhwe jí, lobo hɛn nǔ yětɔn lɛ́ɛ bǐ gblé.

Jozuwée 2:9

bo ɖɔ nú yě ɖɔ: “Un tunwun ɖɔ Mawu Mavɔmavɔ ná to élɔ́ mi. Nǔwiwa mitɔn nɔ dó xɛsi nú mǐ ɖésú, káká bɔ mɛ ɖěbǔ sín ayi sɔ́ nɔ jɛ ayǐ ɖo to mǐtɔn mɛ fí ǎ, ɖó mi wú.

Jozuwée 9:10

Mǐ lɛ́ se nǔ e é dó sin xá axɔ́sú Amɔliti tɔn we e nɔ Judɛ́ɛn tɔ ɔ́ sín zǎnzǎnhwe jí lɛ́ɛ é: yě wɛ nyí axɔ́sú Hɛcibɔ́ni tɔn Sihɔ́ni kpódó axɔ́sú Basáni tɔn Ɔgu e nɔ Acitalɔ́ti é kpó.

Jozuwée 9:9

Yě yí gbe n'i ɖɔ: “Mǐ mɛsɛntɔ́ towe lɛ́ɛ ɔ́, to e mɛ mǐ gosín ɔ́ lín ɖésú. Mawu Mavɔmavɔ, Mawu towe sín nyǐkɔ wɛ mǐ se, mǐ ká lɛ́ se nǔjíwǔ e é bló ɖo Ejípu lɛ́ɛ bǐ.