Kɛ́nsísɔ́ 16:13 - MAWUXÓWÉMA

¹³ A kplá mǐ sín to e mɛ nyibúnɔ́sin kpó wǐin kpó ɖo sisa ɖe wɛ ɔ́ mɛ, bó ná hu mǐ ɖo gbětótló mɛ. É ɖo mɔ̌ có énɛ́ ɔ́ kó kpé we ǎ, bɔ a jlǒ ná kpa acɛ nú mǐ gǎn mǐtɔn wɛ a nyǐ ɖɔhun.

Kɛ́nsísɔ́ 16:13 Iomraidhean Croise

Tíntɔ́n 1:11

Ée axɔ́sú ɔ́ ɖɔ mɔ̌ ɔ́, è ɖe azɔ̌gán ɖé lɛ́ɛ ɖó yě nu, bónú yě ná nɔ́ ɖó azɔ̌ syɛ́nsyɛ́n lɛ́ɛ kɔ jí nú Izlayɛ́li ví lɛ́ɛ dó dó ya nú yě. Lě e yě bló gbɔn bɔ Izlayɛ́li ví lɛ́ɛ ɖó Pitɔ́mu toxo kpó Hlamusɛ́si toxo kpó ayǐ ɔ́ nɛ́. Toxo énɛ́ lɛ́ɛ mɛ wɛ è nɔ bɛ́ axɔ́sú sín jinukún lɛ́ɛ ɖó.

Tíntɔ́n 1:22

Axɔ́sú Ejípu tɔn ɔ́ ká ná gbe togun tɔn ɔ́ bǐ ɖɔ: “È ji vǐ súnnu Eblée ɖěbǔ hǔn, mi sɔ́ ɛ nyi dó Nilu mɛ , mi ka ná jó nyɔ̌nu lɛ́ɛ bǐ dó nyi gbɛ.”

Tíntɔ́n 16:3

Izlayɛ́li ví lɛ́ɛ ɖɔ nú yě ɖɔ: “Hwenu e mǐ nɔ xá dó lanzɛ́n bó nɔ́ ɖu nǔ gɔ́ xo ɖo Ejípu ɔ́, é nyí Mawu Mavɔmavɔ ko hu mǐ hwenɛ́nu wɛ ɔ́, é nyɔ́ hú. Đó mi kplá mǐ wá gbětótló élɔ́ mɛ, bó ná jó mǐ mɛ tobutóbú élɔ́ lɛ́ɛ dó, bɔ mǐ ná kú adɔ.”

Tíntɔ́n 17:3

Kɔ ɖo Izlayɛ́li ví lɛ́ɛ xú wɛ ɖésú, bɔ yě ɖo nǔ hlún ɖɔ dó Mɔyízi jí wɛ ɖɔ: “Étɛ́wú a kplá mǐ sín Ejípu, bó ná jó mǐ kpó vǐ mǐtɔn lɛ́ɛ kpó, kpódó kanlin mǐtɔn lɛ́ɛ kpó dó bɔ mǐ ná wɛ́n vɛ̌?”

Tíntɔ́n 2:14

Bɔ mɛ ɔ́ yí gbe n'i ɖɔ: “Mɛ̌ wɛ sɔ́ we gǎn abǐ hwɛɖɔtɔ́ ɖó mǐ nu? A jló ná hu mì lě e a hu Ejípunu ɔ́ gbɔn é wɛ a?” Ée Mɔyízi se mɔ̌ ɔ́, ado hu i, bɔ é ɖɔ: “Yě tunwun nǔ e un dó sin ɔ́ lɔ mɛ!”

Tíntɔ́n 2:23

Nǔ énɛ́ lɛ́ɛ jɛ ɔ́, xwe tɔn ko sɛ yi, bɔ Ejípu xɔ́sú ɔ́ wá kú. Izlayɛ́li ví lɛ́ɛ kpo ɖo azɔn wɛn wɛ ɖo kannumɔzɔ́ e wa wɛ yě ɖe ɔ́ glɔ́, bó ɖo xó sú wɛ. Xó e sú wɛ yě ɖe ɖo kannumɔgbénu ɔ́ hun káká yi Mawu gɔ́n.

Ezekiyɛ́li 34:18

Ée mi mɔ ama ɖagbe ɖo amagbo mɛ bó ɖo ɖuɖu wɛ ɔ́, é kpé ǎ cé? Bɔ étɛ́wú mi ká nɔ gbídí ama e kpo ɔ́ ɖó afɔ wú? Ée mi mɔ sin ɖiɖi bó ɖo nunu wɛ ɔ́, é kpé ǎ cé? Bɔ étɛ́wú mi ka nɔ dó afɔ sin e kpo ɔ́ mɛ, bó nɔ́ hɛn blú?

Kɛ́nsísɔ́ 11:20

lo ɔ́, mi ná ɖu xɔ sun ɖokpó kpíkpé; mi ná ɖu káká bɔ é ná kpé kɔ nú mi; mi ná ɖu káká bɔ é ná nɔ́ tɔ́n gbɔn awɔntín mɛ nú mi, ɖó mi gbɛ́ wǎn nú nyɛ Mawu Mavɔmavɔ e ɖo tɛ́ntin mitɔn ɔ́; mi hlún nǔ ɖɔ ɖo nukɔn ce, bó ɖɔ: ‘Aniwú wɛ mǐ ká tɔ́n sín Ejípu tawun?’ ”

Kɛ́nsísɔ́ 11:4

É su gbe ɖěvo gbe bɔ lan ɖuɖu jɛ nǔvɔ́nɔ e ɖo Izlayɛ́li ví lɛ́ɛ tɛ́ntin lɛ́ɛ jló jí. Izlayɛ́li ví lɛ́ɛ ɖésú lɛ́ jɛ nǔ hlún ɖɔ jí ɖɔ: “Mɛ̌ wɛ ná ná lan mǐ bɔ mǐ ná ɖu?

Kɛ́nsísɔ́ 11:5

Mǐ ɖo nǔ e mǐ nɔ́ ɖu vɔ̌nu ɖ'ayǐ ɖo Ejípu lɛ́ɛ flín wɛ: hweví, kɔnkɔ́nbu, ayǐkpɛn, mǎ, ayomása, áyo.

Kɛ́nsísɔ́ 13:27

Yě ɖɔ nú Mɔyízi ɖɔ: “Mǐ yi to e mɛ a sɛ́ mǐ dó ɔ́ mɛ. Anɔ̌sin kpó wǐin kpó nɔ́ sa ɖo to ɔ́ mɛ nǔgbó. Atínsínsɛ́n to ɔ́ mɛ tɔn ɖě ɖíe.

Kɛ́nsísɔ́ 14:2

Yě bǐ ɖó gbe kpɔ́, bó jɛ nǔ hlún ɖɔ dó Mɔyízi kpó Aalɔ́ɔn kpó wú jí, bó nɔ́ ɖɔ nú yě ɖɔ: “Ényí mǐ kó kú ɖo Ejípu ɔ́, é nyɔ́ hú; abǐ ényí mǐ gbɔ bó kú ɖo gbětótló ɔ́ mɛ fí ɔ́, é nyɔ́ hú!

Kɛ́nsísɔ́ 14:3

Aniwú Mawu Mavɔmavɔ ka kplá mǐ xwe to énɛ́ ɔ́ mɛ, bɔ mǐ ná kú ɖo ahwangbénu, bɔ asi mǐtɔn lɛ́ɛ kpó vǐ mǐtɔn lɛ́ɛ kpó ná nyí mɛ e ɖu ɖo jǐ mǐtɔn lɛ́ɛ sín ahwankannumɔ? Mǐ lɛ́ kɔ yi Ejípu ɔ́, é nyɔ́ nú mǐ hú ǎ cé?”

Kɛ́nsísɔ́ 16:12

Ée Mɔyízi ɖɔ mɔ̌ ɔ́, é sɛ́ mɛ dó bɔ è yi ylɔ́ Eliavu ví Datáni kpó Abilámu kpó wá. Lo ɔ́, yě ɖɔ sɛ́ dó Mɔyízi ɖɔ: “Mǐ jǎwe ǎ!

Luki 19:14

To tɔn mɛ nu lɛ́ɛ ka gbɛ́ wǎn n'i, bɔ yě ɖe mɛ, bɔ wɛn jɛ gǔdo tɔn nú yě ní yi ɖɔ nú mɛ e jló ná sɔ́ ɛ axɔ́sú ɔ́ ɖɔ: ‘Mǐ ba nú mɛ énɛ́ ní ɖu axɔ́sú ɖo mǐ nu ǎ!’

Mɛsɛ́dó 7:35

“Mɔyízi énɛ́ e yě kó gbɛ́, bó kanbyɔ́ ɛ ɖɔ: ‘Mɛ̌ ká sɔ́ we gǎn, abǐ hwɛɖɔtɔ́’ a jí é wɛ Mawu wá sɛ́ dó yě, lobo ná ɛ hlɔ̌nhlɔ́n gbɔn wɛnsagun e tɔ́n dó jǐ tɔn ɖo zungodwe mɛ ɔ́ jí, nú é ná ɖu gǎn ɖo yě nu, lobo hwlɛ́n yě gán.