Micée 7:12 - MAWUXÓWÉMA

¹² Énɛ́ ɔ́, mɛ mitɔn e ɖo gbějí lɛ́ɛ ná lɛ́ kɔ wá xwé. Yě ná gosín Asilíi, bó gosín Ejípu. Yě ná gosín to e ɖo Nilu kpó Efláti tɔ kpá lɛ́ɛ kpó mɛ. Yě ná gosín to e ɖo xutó lɛ́ɛ mɛ, bó gosín to e ɖo sókan mɛ lɛ́ɛ mɛ, bó ná wá xwé.

Micée 7:12 Iomraidhean Croise

Ezayíi 11:11

Gbe énɛ́ gbe ɔ́, Aklúnɔ ná lɛ́ vɔ́ zán hlɔ̌nhlɔ́n tɔn, bó ná xɔ gbɛ nú mɛ e kpo ɖo gbɛ ɖo togun tɔn mɛ lɛ́ɛ: é ná xɔ gbɛ nú mɛ e kpo ɖo gbɛ ɖo Asilíi lɛ́ɛ, mɛ e kpo ɖo gbɛ ɖo Ejípu lɛ́ɛ, mɛ e kpo ɖo gbɛ ɖo Patlɔ́si lɛ́ɛ, mɛ e kpo ɖo gbɛ ɖo Nubíi lɛ́ɛ, mɛ e kpo ɖo gbɛ ɖo Elámu lɛ́ɛ, mɛ e kpo ɖo gbɛ ɖo Babilɔ́nu lɛ́ɛ, mɛ e kpo ɖo gbɛ ɖo Hamáti lɛ́ɛ, kpó mɛ e kpo ɖo gbɛ ɖo tɔtɛ́ntinto mɛ lɛ́ɛ kpó.

Ezayíi 11:16

Ali ɖokpó ná ɖo te nú mɛ e kpo ɖo gbɛ ɖo togun tɔn mɛ ɖo Asilíi lɛ́ɛ, lě e ali ɖokpó ɖo te nú Izlayɛ́li ví lɛ́ɛ hwenu e yě gosín Ejípu é.

Ezayíi 43:6

Un ɖɔ nú Totaligbé ɖɔ: ‘Jǒ yě dó!’ Bó ɖɔ nú Tofɔligbé ɖɔ: ‘Ma hɛn yě ɖó te ó.’ Mi kplá vǐ ce súnnu lɛ́ɛ wá nú mì sín dɔ̌n, bó kplá vǐ ce nyɔ̌nu lɛ́ɛ wá nú mì sín fí e gbɛ ɔ́ kponu ɖó é.

Ezayíi 49:12

Kpɔ́n, yě nɛ́! Yě gosín to línlín mɛ ja: mɛ ɖě gosín totaligbé, mɛ ɖě gosín gbadahwe jí bó gbɔn xu jí, mɛ ɖě gosín tofɔligbé, ɖo Ejípu tomɛ.”

Jelemíi 23:3

“Lɛ̌ngbɔ́ ce e kpo lɛ́ɛ ɔ́, nyɛ ɖésú ná yi xo yě kplé gbɔn to e mɛ un fúnfún yě gbɔn lɛ́ɛ mɛ. Un na kplá yě wá kpó yětɔn mɛ, bɔ yě ná ji, bó ná gba kún.

Jelemíi 3:18

Énɛ́ ɔ́, mi Judáa togun ɔ́ ná wá gɔ́ nú Izlayɛ́li togun ɔ́, bɔ mi bǐ nǎ zɔn kpɔ́ sín to e ɖo taligbé ɔ́ mɛ, fí e è kplá mi yi é, bó ná lɛ́ kɔ wá to élɔ́ e un ná tɔ́gbó mitɔn lɛ́ɛ ɔ́ mɛ.”

Jelemíi 31:8

É ɖíe un ná kplá yě sín to ɖé mɛ ɖo Taligbé wá. Un ná cyán yě gbɔn ayǐkúngban ɔ́ bǐ jí, bó kplé yě. Nukúntíntɔ́nnɔ kpó afɔkponɔ kpó ɖo yě mɛ; nyɔ̌nu xoxónɔ kpó nyɔ̌nu e vǐ tɔ́n é kpó ɖo yě mɛ. Togun ce ɔ́ bǐ wɛ ná lɛ́ kɔ wá fí.

Jelemíi 46:27

Mawu ɖɔ: “Mɛsɛntɔ́ ce Izlayɛ́li, hwɛ ɔ́, ma ɖi xɛsi ó. Jakɔ́bu ví, ado ma hu we ó. Đó un na hwlɛ́n we gán ɖo gbě ji fí e a ɖe ɔ́. Un na hwlɛ́n vǐ towe lɛ́ɛ gán ɖo to e mɛ yě ɖo mɛ kan nu ɖe é. Izlayɛ́li, a nǎ lɛ́ kɔ wá, bó ná vo, bɔ ayi towe ná jɛ ayǐ; mɛ ɖěbǔ sɔ́ ná dó ya nú we ǎ.

Ezekiyɛ́li 29:21

“Hwenu e nǔ énɛ́ lɛ́ɛ ná jɛ ɔ́, un ná ná hlɔ̌nhlɔ́n Izlayɛ́li togun ɔ́, bó ká ná ná acɛ hwɛ Ezekiyɛ́li ɔ́, bɔ a nǎ ɖɔ xó nú yě, bónú yě ná tunwun ɖɔ nyɛ wɛ nyí Mawu Mavɔmavɔ.”

Ezekiyɛ́li 37:21

bɔ a nǎ ɖɔ nú yě ɖɔ: xó e Aklúnɔ Mavɔmavɔ ɖɔ ɔ́ ɖíe: Izlayɛ́li ví lɛ́ɛ mi, un ná kplá mi sín to e mɛ mi gba kpé gbɔn lɛ́ɛ mɛ; un ná kplé mi, bó ná kplá mi wá to mitɔn mɛ.

Ozée 11:11

Yě ná kán wezun sín Ejípu wá xɛ ɖɔhun. Yě ná kán wezun sín Asilíi wá ahwannɛ́ ɖɔhun. Un ná kplá yě ɖó xwé yětɔn lɛ́ɛ gbe.” Mawu Mavɔmavɔ wɛ ɖɔ mɔ̌.