Jozuwée 1:4 - MAWUXÓWÉMA

⁴ Ayǐkúngban mitɔn ná gosín gbětótló ɔ́ mɛ, ɖo tofɔligbé káká yi Libáan sókan ɔ́ mɛ ɖo totaligbé, bó ná lɛ́ gosín tɔ ɖaxó e è nɔ ylɔ́ ɖɔ Efláti ɔ́ kɔn, ɖo zǎnzǎnhwe jí, bó ná gbɔn Hitíti lɛ́ɛ sín to mɛ káká yi Mɛditɛlanɛ́ɛ xu ɔ́ tó, ɖo gbadahwe jí.

Jozuwée 1:4 Iomraidhean Croise

1 Axɔ́sú 10:29

Gankwɛ́ nǔwɔntɔn (600) wɛ è nɔ dó xɔ kɛkɛ́ví ɖokpó ná sín Ejípu, bó nɔ xɔ sɔ́ ɖokpó yí gankwɛ́ kantɔn gban (150). Ajɔ̌tɔ́ ɖokpó énɛ́ lɛ́ɛ wɛ nɔ xɔ wá nú axɔ́sú Hitíti lɛ́ɛ bǐ kpódó axɔ́sú Silíi tɔn lɛ́ɛ bǐ kpó.

1 Tan 18:3

Hwenu e Hadadɛzɛ́ɛ, Silíi to e ɖo Sova, ɖo Hamáti wa jí ɔ́, sín axɔ́sú jló ná gbló ada nú acɛkpikpa tɔn káká wá Efláti tɔ ɔ́ kɔn ɔ́, Davídi hu i.

1 Tan 5:9

Ayǐkúngban yětɔn lɛ́ ɖo zǎnzǎnhwe jí, ɖo gbětótló e yi tɔsisa Efláti tɔn ɔ́ kɔn é kpá. Đó kanlin yětɔn lɛ́ɛ sukpɔ́ ɖésú ɖo Galadi yíkúngban jí.

Ɛsidlási 4:20

Đ'ayǐ xóxó ɔ́, axɔ́sú hlɔ̌nhlɔ́nnɔ lɛ́ɛ nɔ to énɛ́ ɔ́ mɛ, bó kpa acɛ nú mɛ e ɖo Efláti tɔ ɔ́ sín gbadahwe jí lɛ́ɛ bǐ, bó nɔ yí nǔjɔ, takwɛ́ kpódó aligbɔntɔ́ sín akwɛ́ kpó ɖo yě sí.

Tíntɔ́n 23:31

Bɔ un ná ɖó dogbó nú mi, sín Xu Vɔvɔ ɔ́ tó, káká yi Mɛditɛlanɛ́ɛ xu ɔ́ tó; dogbó mitɔn ná lɛ́ bɛ́ sín gbětótló mɛ, káká yi Efláti tɔ ɔ́ tó. Đó un ná jó to ɔ́ mɛ nu lɛ́ɛ nú mi, bɔ mi ná nya yě.

Sɛ́nflínmɛ 1:7

Din ɔ́, mi wlí ali, bó yi sókan mɛ fí e Amɔliti lɛ́ɛ ɖe ɔ́. Mi gba kpé ayǐkúngban e sɛkpɔ́ yě lɛ́ɛ bǐ jí: mi yi ayǐkúngban wɛnjɛ Judɛ́ɛn tɔn ɔ́ jí, mi yi sókan mɛ, mi yi tofɔligbé, mi yi xutó, mi yi Kanáanu lɛ́ɛ sín to mɛ, bó yi Libáan. Mi gba kpé fí énɛ́ lɛ́ɛ bǐ káká yi tɔ ɖaxó Efláti tɔn ɔ́ tó.

Sɛ́nflínmɛ 11:24

Fí e mi ná tɛ afɔ ɔ́ bǐ wɛ ná húzú mitɔn: to mitɔn sín dogbó ná bɛ́ sín gbětótló mɛ ɖo tofɔligbé káká yi Libáan só lɛ́ɛ kɔn ɖo totaligbé. Dogbó mitɔn ná bɛ́ sín tɔsisa ɖaxó Efláti tɔn ɔ́ kɔn, ɖo zǎnzǎnhwe jí, káká yi Mɛditɛlanɛ́ɛ xu ɔ́ kɔn ɖo gbadahwe jí.

Sɛ́nflínmɛ 3:25

Kɛnklɛ́n gbɔ nú má yi kpɔ́n to ɖagbe ɖagbe énɛ́ e ɖo Judɛ́ɛn tɔ ɔ́ sín gbadahwe jí é, gbɔ nú má yi kpɔ́n só ɖagbe ɖagbe nɛ́ lɛ́ɛ kpó Libáan só ɔ́ kpó.”

Nǔɖexlɛ́mɛ 9:14

Gbe ɔ́ ɖɔ nú wɛnsagun ayizɛ́ngɔ́ e hɛn kpɛn ɔ́ ɖɔ: “Đe wɛnsagun ɛnɛ e ɖo wlɔ mɛ ɖo Efláti, tɔsisa ɖaxó ɔ́ kpá lɛ́ɛ nyi te.”