Jelemíi 26:2 - MAWUXÓWÉMA

² “Nyɛ Mawu Mavɔmavɔ wɛ ɖo xó ɖɔ nú we wɛ, yi nɔ te ɖo xwé ce sín kɔ́xota, bó ɖɔ xó nú mɛ e ná gosín Judáa toxo lɛ́ɛ mɛ, bó ná tɔ́n kɔ́ ɖe nú mì gbé lɛ́ɛ bǐ. Wlǐ xó e un ná ɖɔ nú we lɛ́ɛ bǐ ɖɔ nú yě, ma ɖe ɖěbǔ kpo ó.

Jelemíi 26:2 Iomraidhean Croise

Jelemíi 1:17

Jelemíi, hwɛ ɔ́, sí te, sɔ́ nǔ bó ná yi ɖɔ nǔ e un zɔ́n we lɛ́ɛ nú yě. Ma ɖi xɛsi ɖo nukɔn yětɔn ó, é má nyí mɔ̌ ǎ ɔ́, un ná dó xɛsi we ɖo nukɔn yětɔn.

Jelemíi 1:7

Bɔ Mawu Mavɔmavɔ ɖɔ nú mì ɖɔ: “Ma ɖɔ émí nyí yɔkpɔ́vú ó; mɛ e gɔ́n un ná sɛ́ we dó lɛ́ɛ ɔ́, a nǎ yi bǐ gɔ́n bó ná ɖɔ nǔ e un zɔ́n we lɛ́ɛ bǐ nú yě.

Jelemíi 19:14

Jelemíi lɛ́ kɔ sín Tafɛ́ti tɔdo mɛ, fí e Mawu Mavɔmavɔ sɛ́ ɛ dó ɖɔ é ní yi ɖɔ xó dó nyǐkɔ émítɔn mɛ ɖe é; ée é lɛ́ kɔ wá ɔ́, é cí kɔ́xota ɖo Mawu Mavɔmavɔ xwé ɔ́ gbe, bó ɖɔ nú togun ɔ́ bǐ ɖɔ:

Jelemíi 23:28

Gbeyíɖɔ ɖé kú dlɔ̌ ɖé hǔn, é ní wlí ɖɔ bó! Nú un ka ɖɔ xó nú mɛ ɖé hǔn, mɛ ɔ́ ní ɖɔ lě e un ɖɔ gbɔn n'i ɔ́ pɛ́pɛ́pɛ́. È ma sɔ́ jinukún ɖó wɔn tɛnmɛ ó. Xó e nyɛ Mawu Mavɔmavɔ ɖɔ ɔ́ nɛ́.

Jelemíi 25:2

Xó ɔ́ wɛ Jelemíi ɖɔ ɖo Judáa togun ɔ́ bǐ kpó Jeluzalɛ́mu ví lɛ́ɛ bǐ kpó nukɔn; é ɖɔ:

Jelemíi 28:5

Gbeyíɖɔ Jelemíi ka yí gbe nú gbeyíɖɔ Hananiya ɖo vɔ̌sánú-xwlémawutɔ́ lɛ́ɛ kpó mɛ e ɖo Mawu Mavɔmavɔ xwé lɛ́ɛ bǐ kpó nukɔn ɖɔ:

Jelemíi 36:10

Xɔ ɖokpó ɖo Mawu xwé ɔ́ gbe; wěgbójínɔtɔ́ Gemaliyáhu sín xɔ wɛ. Gemaliyáhu ɔ́, Cafáni ví wɛ. Xɔ ɔ́ ɖo hɔntogbó yɔ̌yɔ́ ɔ́ kpá, ɖo sinsɛnxɔ ɔ́ sín kɔ́xota e ɖo aga ɔ́ jí. Dɔ̌n wɛ Baalúki nɔ bó zé gbe dó jǐ, bó xa Jelemíi xó e yě wlán dó anyǔwéma ɔ́ jí é.

Jelemíi 42:4

Ée yě ɖɔ mɔ̌ ɔ́, gbeyíɖɔ Mawu tɔn Jelemíi ɖɔ nú yě ɖɔ: “Un se xó e mi ɖɔ é. Un na sa vo nú Mawu Mavɔmavɔ, Mawu mǐtɔn lě e mi ɖɔ gbɔn ɔ́. É ká ɖɔ xó ɖé ɔ́, un ná ɖɔ bǐ nú mi, un ná hwlá ɖěbǔ dó mi ǎ.”

Jelemíi 7:2

“Yi cí Mawu Mavɔmavɔ xwé ɔ́ sín hɔnta bó jlá xó élɔ́: Judáanu e mi, mi mɛ e nɔ gbɔn hɔntogbó élɔ́ lɛ́ɛ nu, bó nɔ́ yi ɖe kɔ́ nú Mawu Mavɔmavɔ lɛ́ɛ, mi ɖótó Mawuxó!

Jelemíi 7:27

Mawu ɖɔ: “Jelemíi, a na bó ɖɔ xó énɛ́ lɛ́ɛ bǐ nú yě ɔ́, yě ná ɖótó we ǎ. A na bó sú xó bó ɖɔ xó nú yě ɔ́, yě ná kɛ nu d'é mɛ nú we ǎ.

Ezekiyɛ́li 3:10

Mɛ ɔ́ lɛ́ ɖɔ nú mì ɖɔ: “Hwɛ gbɛtɔ́ ɔ́, ɖǒtó xó e ɖɔ nú we gbé un ja é céɖécéɖé bó hɛn ayi mɛ.

Ezekiyɛ́li 33:7

“Hwɛ gbɛtɔ́ e, hwi wɛ un sɔ́ mɛcɔ́tɔ́ ɖó Izlayɛ́li ví lɛ́ɛ nu, bónú yě ɖo nǔ nyanya ɖé mɛ ná jɛ wɛ ɔ́, a nǎ nɔ́ ɖɔ nú yě. A nǎ nɔ́ ɖótó mì, bɔ nú un dó wɛn ɖé we ɔ́, a nǎ nɔ́ dó yě.

Ezekiyɛ́li 40:4

Nya ɔ́ ɖɔ nú mì ɖɔ: “Hwɛ gbɛtɔ́ e, hun nukún towe ganjí, bó ɖótó te ganjí, bó ɖó ayi te ganjí, lobo kpɔ́n nǔ e ná xlɛ́ we wɛ un ɖe é. Ɖó a nǎ mɔ ganjí wú wɛ un kplá we wá fí; énɛ́ gúdo ɔ́, a nǎ ɖɔ nǔ e a mɔ é nú Izlayɛ́li ví lɛ́ɛ.”

Matíe 28:20

Mi kplɔ́n nǔ yě, bónú yě ní se tónú nú nǔ e un kplɔ́n mi lɛ́ɛ bǐ. Mi ka tunwun ɖɔ un ɖo kpɔ́ xá mi tɛgbɛ bɛ́ sín din káká yi jɛ gbe e gbe gbɛ ɔ́ ná vɔ dó é.”

Luki 19:47

Ayǐhɔ́ngbe ayǐhɔ́ngbe ɔ́, Jezu nɔ kplɔ́n nǔ mɛ lɛ́ɛ ɖo sinsɛnxɔ mɛ; vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó ɖo biba ná hu i wɛ.

Jǎan 18:20

Bɔ Jezu ka yí gbe n'i ɖɔ: “Agbawungba wɛ un ɖɔ xó nú mɛ lɛ́ɛ bǐ ɖe. Tɛgbɛ wɛ un ka nɔ ɖo nǔ kplɔ́n mɛ lɛ́ɛ wɛ ɖo kplɔ́ngbasá lɛ́ɛ, kpódó sinsɛnxɔ mɛ kpó, fí e Jwifu lɛ́ɛ bǐ nɔ kplé ɖe é. Un ɖɔ nǔ ɖěbǔ ɖo nǔglɔ́ ǎ.

Jǎan 8:2

Ayǐhɔ́ngbe zǎnzǎn tɛɛn ɔ́, é lɛ́ kɔ yi sinsɛnxɔ mɛ, bɔ mɛ lɛ́ɛ bǐ nyi ahwan wá gɔ̌n tɔn, bɔ é jínjɔ́n ayǐ, bó jɛ nǔ kplɔ́n yě jí.

Mɛsɛ́dó 20:20

Nǔ e ná nyí le nú mi ɔ́, un hwlá ɖěbǔ dó mi ǎ: un ɖɔ bǐ nú mi, bó kplɔ́n bǐ mi ɖo agbawungba kpódó xwé mitɔn lɛ́ɛ gbe kpó.

Mɛsɛ́dó 20:27

Đó un jlá tito Mawu tɔn ɔ́ bǐ mi; un hwlá ɖěbǔ dó mi ǎ.

Mɛsɛ́dó 5:25

Bɔ mɛ ɖě wá xwetɔ́n, bó ɖɔ nú yě ɖɔ: “Mɛ e mi wlí sú dó gankpá mɛ lɛ́ɛ nɛ́ ɖo sinsɛnxɔ mɛ, bó ɖo nǔ kplɔ́n togun ɔ́ wɛ nɛ́.”

Mɛsɛ́dó 5:42

Ayǐhɔ́ngbe ayǐhɔ́ngbe ɔ́, yě nɔ́ gɔn nǔ kplɔ́n mɛ lɛ́ɛ ɖo sinsɛnxɔ mɛ mɛ kpó xwé lɛ́ɛ gbe kpó ǎ, yě ka nɔ́ gɔn Wɛn Ɖagbe e ɖɔ xó dó Jezu-Klísu wú ɔ́ jlá yě ǎ.

Sɛ́nflínmɛ 12:5

Lo ɔ́, fí e é ná sɔ́ ɖo akɔ mitɔn lɛ́ɛ sín ayǐkúngban jí, bó ná nɔ́ nɔ, bó ná nɔ́ ɖe susu tɔn xlɛ́ ɖe é kɛ́ɖɛ́ wɛ mi ná nɔ́ yi sɛn ɛ ɖe.

Sɛ́nflínmɛ 4:2

Mi ma gɔ́ nǔ ɖěbǔ nú nǔ e Mawu Mavɔmavɔ, Mawu mitɔn zɔ́n mi bɔ un ɖɔ nú mi lɛ́ɛ é ó; mi ma ɖe ɖěbǔ kpo ó; mi zé bǐ dó wa azɔ̌ ná.

Jozuwée 8:35

É xa Mɔyízisɛ́n lɛ́ɛ bǐ sésé nú yě; é wɔn ɖokpó géé ǎ. Togun ɔ́ bǐ nukɔn wɛ é xa ɖe; nyɔ̌nu lɛ́ɛ, yɔkpɔ́vú lɛ́ɛ kpódó jǒnɔ e ɖo yě mɛ lɛ́ɛ bǐ kpó lɔ ɖo fínɛ́.

Nǔɖexlɛ́mɛ 22:19

Ényí mɛɖé ka ɖe nǔɖé kpo sín xóɖɔɖ'ayǐ e ɖo wěma élɔ́ mɛ lɛ́ɛ mɛ ɔ́, atín e nɔ ná gbɛ mɛ, bɔ è ɖɔ xó tɔn dó wěma élɔ́ mɛ ɔ́, sínsɛ́n e nyí étɔn ɖo atín énɛ́ sín sínsɛ́n mɛ ɔ́, Mawu ná ɖe síin, bɔ toxo mímɛ́ e xó è ɖɔ dó wěma élɔ́ mɛ ɔ́, mǐmá e nyí étɔn ɖo toxo énɛ́ mɛ ɔ́, Mawu ná ɖe síin.