Gbɛvíhan 4:2 - MAWUXÓWÉMA

² Sinyɔ́ɔnu mɛjɔmɛ, siká akú lɛ́ɛ ɔ́, nɛ̌ è ka sixú mɔ yě dó mɔ kozɛ́n yǎyá ɖé gbɔn? Nǔ e zɛ̌nmɛtɔ́ zé alɔ tɔn dó bló ná é!

Gbɛvíhan 4:2 Iomraidhean Croise

Ezayíi 30:14

Ahohó ɔ́ ná gba hánnyá lě e kozɛ́n nɔ́ gba hánnyá, bɔ xwɛ tɔn ma sixú bɛ́ myɔkán ǎ, é má ka sixú wún sin ǎ é ɖɔhun.”

Ezayíi 51:18

Vǐ e a ji lɛ́ɛ ɖě xlɛ́ ali we ǎ. Vǐ e a hɛn bɔ yě su lɛ́ɛ ɖokpó hɛn sɔ we ǎ.

Jelemíi 19:1

Mawu Mavɔmavɔ ɖɔ nú Jelemíi ɖɔ: “Yi zɛ̌nmɛtɔ́ xwé bó xɔ tɔyizɛ́n ɖokpó, bó kplá tomɛxó ɖé lɛ́ɛ kpó vɔ̌sánú-xwlémawutɔ́ ɖé lɛ́ɛ kpó,

Jelemíi 19:11

bó ná ɖɔ nú yě ɖɔ: Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe, é ɖɔ: Un ná gba togun élɔ́ kpó toxo élɔ́ kpó tɔyizɛ́n ɖɔhun, bɔ xó bǐ ná fó. “Tafɛ́ti fí wɛ è na ɖi cyɔ lɛ́ɛ ɖó, ɖó tɛn sɔ́ ná tíin ɖo fí ɖěvo ǎ.

Jelemíi 22:28

È na nɔ kanbyɔ́ ɖɔ: “Étɛ́! Yoyakini sín nǔ wɛ è wa zɛ̌n ɖɔhun mɔ̌ a? Nǔ tɔn wɛ è wa zɛ̌n ɖé ján ɖɔhun kpowun mɔ̌ a? Zɛ̌n tló ɖé kpowun abǐ nǔ ma xɔ akwɛ́ ɖé kpowun ɖɔhun mɔ̌ a? Étɛ́wú è ka sɔ́ é kpó vǐ tɔn lɛ́ɛ kpó nyi dó gbě? Étɛ́wú è sɔ́ yě nyi dó to e yě ma tunwun ǎ é mɛ?”

Gbɛvíhan 2:21

Yɔkpɔ́vú kpódó degénɔ kpó ɖo títɛ́ gbɔn kɔ́ mɛ kɔ́ mɛ ɖo alixo alixo. È hu ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó ɖo ahwangbénu. Gbe e gbe a sin xomɛ ɔ́, a hu yě; a gbo gbe yě ma kú nǔbláwǔ nú yě.

Gbɛvíhan 5:12

Yě sɔ́ alɔ yětɔn dó dó kan kɔ nú gǎn lɛ́ɛ; yě ɖó sísí ɖěbǔ nú tomɛxó lɛ́ɛ ǎ.

Ozée 8:8

È sú Izlayɛ́linu lɛ́ɛ sín kún dó. Zɛ̌n e má nyí nǔɖé wa nú ǎ é ɖɔhun wɛ yě ɖe din ɖo akɔta lɛ́ɛ tɛ́ntin.

Zakalíi 9:13

Đó un ná zán Judáanu lɛ́ɛ da e è nɔ dó fun ahwan ná é ɖɔhun, bɔ Eflayímunu lɛ́ɛ ná nyí gǎ. Sinyɔ́ɔnu lɛ́ɛ mi, un ná sɛ́ súnnu e ɖo mi mɛ lɛ́ɛ dó, bɔ yě ná yi tɔ́n ahwan Glɛ̌sinu lɛ́ɛ. Un ná zán yě lě e ahwanfuntɔ́ nɔ́ zán hwǐ tɔn gbɔn é.”

2 Kɔlɛ́ntinu 4:7

Lo ɔ́, mǐ mɛ e sí dɔkun Yɛsinsɛn tɔn énɛ́ ɖe lɛ́ɛ ɔ́, kozɛ́n ɖɔhun wɛ mǐ cí, bónú è nǎ mɔ ganjí ɖɔ hlɔ̌nhlɔ́n aditi énɛ́ ɔ́, Mawu tɔn wɛ; é kún nyí mǐtɔn ó.

2 Timɔtée 2:20

Agbǎn e è sɔ́ siká abǐ kpatágan dó bló ná lɛ́ɛ kɛ́ɖɛ́ wɛ è nɔ mɔ ɖo xwé ɖaxó ɖokpó gbe ǎ; è nɔ lɛ́ mɔ agbǎn e è sɔ́ atín dó bló ná ɔ́ kpódó ée è sɔ́ ko dó bló ná ɔ́ kpó. Agbǎn nukɔntɔn lɛ́ɛ ɔ́, hwenu e è ja nǔjɔnǔ ɖé wa gbé ɔ́ wɛ è nɔ ɖe yě tɔ́n; amɔ̌ ɖě lɛ́ɛ ɔ́, è nɔ zán yě nú nǔ yǎyá lɛ́ɛ.