Gbɛvíhan 2:21 - MAWUXÓWÉMA

²¹ Yɔkpɔ́vú kpódó degénɔ kpó ɖo títɛ́ gbɔn kɔ́ mɛ kɔ́ mɛ ɖo alixo alixo. È hu ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó ɖo ahwangbénu. Gbe e gbe a sin xomɛ ɔ́, a hu yě; a gbo gbe yě ma kú nǔbláwǔ nú yě.

Gbɛvíhan 2:21 Iomraidhean Croise

2 Tan 36:17

Ée Mawu Mavɔmavɔ sin xomɛ mɔ̌ ɔ́, é sɛ́ Babilɔ́nu xɔ́sú ɔ́ dó to ɔ́ mɛ bó jó nǔ e ɖo to ɔ́ mɛ lɛ́ɛ bǐ n'i. Axɔ́sú ɔ́ hu sɔ́ja lɛ́ɛ káká yi Mawu Mavɔmavɔ xwé ɔ́ gbe; é jó dɔ̌nkpɛvú dó ǎ, é jó ɖyɔ̌vǐ dó ǎ, é jó mɛxó dó ǎ, é jó degénɔ dó ǎ; mɛ bǐ wɛ é hu.

Ɛsitɛ́ɛ 3:13

È bɛ̌ wěma lɛ́ɛ nú wɛnsagun lɛ́ɛ ɖɔ yě nǐ yi má gbɔn togun e ɖo axɔ́sú ɔ́ sín acɛ mɛ lɛ́ɛ bǐ mɛ. È wlǎn dó wěma ɔ́ mɛ ɖɔ è nǐ gbo gbe Jwifu lɛ́ɛ bǐ, è nǐ hu yě bǐ; mɛ wínnyáwínnyá lɛ́ɛ kpódó mɛ kpikpo lɛ́ɛ kpó; nyɔ̌nu lɛ́ɛ kpó yɔkpɔ́vú lɛ́ɛ kpó. Yě nǐ hu yě, bó bɛ́ nǔ yětɔn lɛ́ɛ bǐ; è ma kú nǔbláwǔ nú yě ó. Azǎn ɖokpó wɛ è nǎ sɔ́ ɖó te tawun, bó dó hu yě ná. Azǎn énɛ́ ɔ́ wɛ nyí azǎn wǒ-atɔngɔ́ e ɖo sun wěwegɔ́ ɔ́ mɛ é; sun wěwegɔ́ ɔ́ wɛ è nɔ ylɔ́ ɖɔ Adáa.

Ezayíi 27:11

Atínla xú ɔ́, é nɔ́ fɛ́n j'ayǐ, bɔ nyɔ̌nu lɛ́ɛ nɔ́ wá cyán bó nɔ́ dó zo. Togun énɛ́ ɖó nǔnywɛ́ ɖěbǔ ǎ. Énɛ́ wú wɛ mɛ e ɖó e ɔ́ sɔ́ kú nǔbláwǔ ɖěbǔ n'i ǎ; mɛ e bló e ɔ́, sɔ́ hwɛ kɛ ɛ ǎ.

Jelemíi 11:22

Mawu Mavɔmavɔ Nǔbǐwúkpétɔ́ ɔ́ ɖɔ: “Éɖíe, un ná dɔn tó nú Anatɔ́tinu nɛ́ lɛ́ɛ; dɔ̌nkpɛvú yětɔn lɛ́ɛ ná kú ɖo ahwangbénu; vǐ yětɔn súnnu kpó nyɔ̌nu kpó bǐ nǎ kú adɔ.

Jelemíi 13:14

Un na gba ta yětɔn ɖě dó ɖě wú. Un na dɔn tɔ́ kpó vǐ kpó sín ta kpé go. Un na jó yě ɖě dó ǎ; mɛɖé sín nǔ ká ná blá wǔ nú mì ǎ; kɛnklɛ́n ná nɔ mɛ ǎ; nǔ ɖěbǔ na ɖó mì te, bɔ un ná gɔn kún yětɔn sú dó ǎ. Xó e nyɛ Mawu Mavɔmavɔ ɖɔ ɔ́ nɛ́.’ ”

Jelemíi 18:21

Énɛ́ wú ɔ́, jó vǐ yětɔn lɛ́ɛ dó nú adɔ ní hu yě; sɔ́ hwǐ dó hu yě tɛ́. Asi yětɔn lɛ́ɛ ní ba vǐ kpo; yě ní húzú asúkúsi; jɛmɛjí ní hu asú yětɔn lɛ́ɛ. Ahwan ní hu mɛ wínnyáwínnyá yětɔn lɛ́ɛ.

Jelemíi 21:7

Énɛ́ ɔ́ gúdo ɔ́, un ná jó Sedesíyasi Judáa xɔ́sú ɔ́, un ná jó gǎn hɔn-yitɔ́ tɔn lɛ́ɛ, un ná jó togun tɔn bǐ, mɛ e ná gán ɖo jɛmɛjí sí lɛ́ɛ, mɛ e ná gán ɖo ahwan sí lɛ́ɛ kpó mɛ e ná gán ɖo adɔ sí lɛ́ɛ kpó ɔ́, un ná jó yě bǐ nú Nabukodonɔzɔ́ɔ Babilɔ́nu xɔ́sú ɔ́; un ná jó yě nú kɛntɔ́ yětɔn, mɛ e jló ná hu yě lɛ́ɛ. Un ná jó yě, bɔ Nabukodonɔzɔ́ɔ ná hu yě bǐ tɛ́; é ná jó mɛ ɖokpó dó ǎ. É ká ná lɛ́n nǔɖé kpɔ́n ǎ, mɛɖé nǔ ná blá wǔ n'i ǎ. Xó e nyɛ Mawu Mavɔmavɔ ɖɔ ɔ́ nɛ́.”

Jelemíi 4:31

Nǔgbó wɛ, un se mɛɖé ɖo xó sú wɛ nyɔ̌nu ɖo ajidonu ɖɔhun; é ɖo xó sú wɛ mɛ ja nukɔn ví jí gbé ɖɔhun. Sinyɔ́ɔ toxo, hwi wɛ ɖo xó sú wɛ. Hwi wɛ ɖo azɔn wɛn wɛ bó nɔ dlɛ́n alɔ bo nɔ ɖɔ: “Un jɛ mɛhutɔ́ lɛ́ɛ lɔ mɛ! Gbɛ ce vɔ!”

Jelemíi 51:22

Hwi wɛ un dó gblé gbɛ dó nú súnnu kpó nyɔ̌nu kpó, hwi wɛ un dó gblé gbɛ dó nú degénɔ kpó yɔkpɔ́vú kpó, hwi wɛ un dó gblé gbɛ dó nú dɔ̌nkpɛvú kpó ɖyɔ̌vǐ kpó.

Jelemíi 6:11

Mawu, xomɛsin towe gɔ́ ayi ce, un sixú hɛn ɖó te ǎ.” Mawu ɖɔ: “Ényí mɔ̌ hǔn, gba kɔn dó yɔkpɔ́vú lɛ́ɛ jí gbɔn alixo alixo; gba kɔn dó mɛ wínnyáwínnyá lɛ́ɛ jí, ɖo fí e yě kplé ɖe lɛ́ɛ. Đó è nǎ zě asú kpó asi kpó yi. È nǎ zě mɛ kpikpo yi; è nǎ zě mɛ e dɔ́ ji é yi.

Jelemíi 9:20

‘Kú fán dǒ mǐtɔn; kú byɔ́ xwé mǐtɔn ɖagbe ɖagbe lɛ́ɛ gbe. Kú hu yɔkpɔ́vú lɛ́ɛ kɔn nyi alixo alixo; é hu dɔ̌nkpɛvú lɛ́ɛ kɔn nyi tokplétɛn lɛ́ɛ.’ ”

Jelemíi 9:21

Mawu ɖɔ: “Jelemíi, ɖɔ nú yě ɖɔ nyɛ Mawu Mavɔmavɔ ɖɔ: mɛ kúkú gbɔn kɔ́ mɛ, è fúnfún zunkɔ́ gbɔn gle mɛ ɖɔhun. Mɛ kúkú tɛ́ gbɔn kɔ́ mɛ è xo hankán kɔn nyi ayǐ ɖo nǔkún-yatɔ́ lɛ́ɛ gúdo ɖɔhun, mɛɖé ká ɖe bó ná bɛ́ ǎ.”

Gbɛvíhan 1:15

Aklúnɔ ɖe alɔ sín ahwanfuntɔ́ syɛ́nsyɛ́n e ɖo xwé ce gbe lɛ́ɛ bǐ sín kanmɛ. É sɛ́ ahwangɔnu ɖokpó dó mì, bó ná dó vívá kún nú dɔ̌nkpɛvú ce lɛ́ɛ. Nyɛ Sinyɔ́ɔ Judáa toxo ɔ́, é li mì lě e è nɔ li vǐwun gbɔn ɖo vǐwun to mɛ é.

Gbɛvíhan 1:18

Mawu Mavɔmavɔ wa nǔ xá mì gbɔn mɔ̌, hwɛ tɔn ka jɔ, ɖó un ko fɔ́n gǔ dó nǔ e é ɖɔ lɛ́ɛ jí ɖ'ayǐ. Mi togun lɛ́ɛ mi, mi bǐ ní ɖótó ganjí. Mi kpɔ́n ya e ji wɛ un ɖe ɔ́: ahwan wlí ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó yi to ɖěvo mɛ.

Gbɛvíhan 1:4

Ali e è nɔ gbɔn yi Sinyɔ́ɔ lɛ́ɛ ɖo aluwɛ mɛ, mɛɖé sɔ́ nɔ́ yi ɖu xwe ɖo Sinyɔ́ɔ ǎ. È sɔ́ nɔ́ mɔ mɛɖé ɖo tokplétɛn lɛ́ɛ ǎ. Vɔ̌sánú-xwlémawutɔ́ Sinyɔ́ɔ tɔn lɛ́ɛ ɖo gbɛvo sa wɛ. Đyɔ̌vǐ Sinyɔ́ɔ tɔn lɛ́ɛ ɖo lele mɛ. Sinyɔ́ɔ ɖésú ɖo akpɔ mɔ wɛ.

Gbɛvíhan 2:17

Mawu Mavɔmavɔ bló nǔ e é lin ɖɔ émí ná bló é; é bló nǔ e é kó ɖɔ ɖ'ayǐ xóxó ɖɔ émí ná bló é: é gba toxo ɔ́ ma kú nǔbláwǔ n'i. É wa nǔ xá we dó dó xomɛhunhun nú kɛntɔ́ towe lɛ́ɛ, é dó goyíyí goyíyí jí nú mɛ e ma mɔ we gbɔ ǎ lɛ́ɛ.

Gbɛvíhan 2:2

Aklúnɔ kú nǔbláwǔ nú togun tɔn ǎ; é gba nɔtɛn togun tɔn tɔn lɛ́ɛ bǐ. Hwenu e Aklúnɔ ɖo xomɛsin jí ɔ́, é gba toxo e è mɛ ahohó lɛ́ lɛ̌ dó ɖo Judáa lɛ́ɛ bǐ; é zin axɔ́súɖuto ɔ́ kpódó gǎn e ɖ'é mɛ lɛ́ɛ kpó dɛ́, é kɔ́n wi yětɔn.

Gbɛvíhan 3:43

A zě xomɛsin towe cyɔ́n; a jɛ gǔdo mǐtɔn, bó hu mǐ tɛ́; a kú nǔbláwǔ nú mǐ ǎ.

Ezekiyɛ́li 24:21

Izlayɛ́li ví lɛ́ɛ é ɖíe: ‘Nyɛ Aklúnɔ Mavɔmavɔ ɔ́, xwé ce e mi yí wǎn ná ganjí ɔ́, un ná jó dó bɔ è nǎ ɖu su ná; xwé énɛ́ wú wɛ mi ka nɔ ɖo gǔgó wɛ; mi mɔ xwé énɛ́ ɔ́, é nɔ́ víví nú mi; é wɛ nyí nǔ e mi ɖó nukún é. Vǐ mitɔn súnnu kpó nyɔ̌nu kpó e mi jó dó nyi Jeluzalɛ́mu lɛ́ɛ ɔ́, è nǎ hu bǐ.

Ezekiyɛ́li 5:11

“Nyɛ Aklúnɔ Mavɔmavɔ ɔ́, un xwlé gbɛ ce bó tɛ ɖɛ̌ jí ɖɔ mi zé bǒcyɔ mitɔn lɛ́ɛ kpó suɖunú mitɔn lɛ́ɛ kpó dó hɛn xwé ce blí. Din ɔ́, ahwan ná wlí mi bǐ; è nǎ xwlɛ́ ta nú mi bó xwlɛ́ atán nú mi; mɛ ɖěbǔ sín nǔ ná blá wǔ nú mì ǎ; un ná ɖe mɛɖé kpo ǎ, ɖó mi mɛ́ ǎ.

Ezekiyɛ́li 7:4

Nǔ mitɔn ná blá wǔ nú mì ǎ; kpɔ́n bó bló ná nɔ mɛ ǎ, ɖó nyi lɔ ná wa nǔ e mi dó sin lɛ́ɛ bǐ sín nǔ xá mi; énɛ́ ɔ́, nǔ baɖabaɖa e mi dó sin lɛ́ɛ ɔ́, mi ná sixú zé hwlá ǎ. Un ná wa nǔ mɔ̌, bɔ mi ná tunwun ɖɔ nyɛ wɛ nyí Mawu Mavɔmavɔ.

Ezekiyɛ́li 7:9

Nǔ mitɔn ná blá wǔ nú mì ǎ, kpɔ́n bó bló ná nɔ mɛ ǎ, ɖó nyi lɔ ná wa nǔ e mi dó sin lɛ́ɛ bǐ sín nǔ xá mi. Énɛ́ ɔ́, nǔ baɖabaɖa e mi dó sin lɛ́ɛ ɔ́, mi ná sixú zé hwlá ǎ. Un ná wa nǔ mɔ̌, bɔ mi ná tunwun ɖɔ nyɛ wɛ nyí Mawu Mavɔmavɔ, nyi wɛ ɖo nǔ wa xá mi wɛ.

Ezekiyɛ́li 8:18

Énɛ́ ɔ́ wú wɛ nyi lɔmɔ̌ ná ɖe xomɛsin ce xlɛ́ yě, bɔ yě ná tunwun ɖɔ nǔ tíin; mɛ ɖé nú ná blá wǔ nú mì ǎ, un ka ná jó mɛɖé dó ǎ; yě ná bó dó hlɔ̌nhlɔ́n bó sú xó ylɔ́ mì ɖɔ nyɛ ní wá dó alɔ émí ɔ́, un ná ɖótó yě ǎ.”

Ezekiyɛ́li 9:10

Ée é nyí mɔ̌ ɔ́, mɛ ɖé nú ɖo wǔ ná blá nú mì wɛ ǎ; un ná jó mɛɖé dó ǎ. Un ná sú nǔ e yě wa ɔ́ sín axɔ́ yě.”

Amɔ́si 4:10

“Un sɛ́ jɛmɛjí dó mi lě e un sɛ́ dó Ejípu gbɔn ɖ'ayǐ é. Un zé hwǐ dó hu mɛ wínnyáwínnyá mitɔn lɛ́ɛ, bó jó mɛ lɛ́ɛ dó bɔ yě bɛ̌ sɔ́ mitɔn lɛ́ɛ yi. Mi se mɛkúkú lɛ́ɛ sín wǎn ɖo fí e mi ɖe é. Nu nyí mɔ̌ có mi lɛ́ kɔ wá gɔ̌n ce ǎ.” Xó e Mawu Mavɔmavɔ ɖɔ ɔ́ nɛ́.

Amɔ́si 8:13

Gbe énɛ́ ɔ́ gbe ɔ́, kɔ ná xú ɖyɔ̌vǐ ɖagbe ɖagbe lɛ́ɛ kpó dɔ̌nkpɛvú lɛ́ɛ kpó káká bɔ yě ná xú gǒ.

Zakalíi 11:6

Nyɛ Mawu Mavɔmavɔ ɔ́ lɔmɔ̌ ɖo ɖiɖɔ wɛ ɖɔ un kún ná kú nǔbláwǔ nú mɛ e ɖo ayǐkúngban jí lɛ́ɛ ó. Un ná jó gbɛtɔ́ ɖokpó ɖokpó dó nyi mɛ e ɖo akpá tɔn ɔ́ kpódó axɔ́sú kpó sín acɛ mɛ. Axɔ́sú lɛ́ɛ ná sú nǔ e ɖo ayǐkúngban jí lɛ́ɛ sín kún dó. Un ka ɖo mɛ ɖěbǔ ná hwlɛ́n gán sín alɔ yětɔn mɛ wɛ ǎ.”

Sɛ́nflínmɛ 28:50

Súnnu e ɖo akɔta énɛ́ ɔ́ mɛ lɛ́ɛ jɔ lan, yě ɖó sísí nú mɛxó ǎ, yɔkpɔ́vú nú ká nɔ́ blá wǔ nú yě ǎ.

Sɛ́nflínmɛ 32:25

È nǎ hu gbɛtɔ́ ɖó hwǐ wú, gbɔn ali lɛ́ɛ jí; mɛ bǐ ná ɖo síja jí ɖo xwé lɛ́ɛ gbe. Mɛ bǐ ná kú. Dɔ̌nkpɛvú kpó ɖyɔ̌vǐ kpó, kpó degénɔ kpó vǐ ɖo anɔ̌ nu kpó bǐ ná kú.’

Jozuwée 6:21

Yě vívá nǔ e ɖo toxo ɔ́ mɛ lɛ́ɛ bǐ sín kún. Yě hu súnnu lɛ́ɛ, bó hu nyɔ̌nu lɛ́ɛ, bó hu mɛ wínnyáwínnyá lɛ́ɛ kpódó degénɔ lɛ́ɛ kpó. Yě hu káká bó hu nyibú bó hu gbɔ̌ kpódó tócí lɛ́ɛ kpó.

1 Samuwɛ́li 15:3

Din ɔ́, yi bo gba Amalɛ́ki, bó hɛn nǔ tɔn lɛ́ɛ bǐ gblé. Ma jó é ɖésúnɔ dó ó. A nǎ hu nǔ e ɖo to ɔ́ mɛ lɛ́ɛ bǐ; a nǎ hu súnnu kpó nyɔ̌nu kpó, yɔkpɔ́vú kpó vǐ yɛ̌yɛ́ kpó, nyibú kpó gbɔ̌ kpó, lǎkúnmí kpó tócí kpó.’ ”