Gbɛvíhan 2:11 - MAWUXÓWÉMA

¹¹ Un y'avǐ káká bɔ nukún ce ɖibla tɔ́n; ahwi xo mì, awakanmɛ ce bǐ wɛ kú ɖó nǔ e ɖo togun ce gbo wɛ é wútu; nǔgbó ɔ́, yɔkpɔ́vú lɛ́ɛ ɖo kúkú wɛ gbɔn alixo alixo ɖo toxo ɔ́ mɛ.

Gbɛvíhan 2:11 Iomraidhean Croise

Jɔ̌bu 16:13

gǎ tɔn lɛ́ɛ gosín ɖisí amyɔ wá gɔ̌n ce; é da gǎ dó alin mɛ nú mì, ma kú nǔbláwǔ nú mì; é gba vǐvɛ́ ce kɔn nyi kɔ́ mɛ.

Jɔ̌bu 30:27

Sín hwenu e un jɛ ya énɛ́ ji jí magbokɔ ɔ́, un sɔ́ vo ɖo nyiɖée mɛ ɖěbǔ ɖěbǔ ǎ.

Ɖɛhan 119:82

Un ɖo nukún ɖó xó e ɖɔ wɛ a ɖe é káká bɔ nukún ce bó bɔ un ɖɔ: “Hwetɛ́nu a nǎ dó gbɔ nú mì dó?”

Ɖɛhan 22:14

Yě hun nu bo ɖo nǎ wlí mì ɖu wɛ kinnikínní e ɖo adǎn jí, bó ɖo gbe dó wɛ é ɖɔhun.

Ɖɛhan 31:9

A lɔn nú un jɛ kɛntɔ́ lɔmɛ ǎ; a fɔ́n mì sí te, a ɖe mì nyi te.

Ɖɛhan 38:8

ɖó alin ce bǐ nɔ́ ɖo wlǐwlí wɛ; nǔɖé sɔ́ ɖo ganjí ɖo wǔ ce ǎ.

Ɖɛhan 6:7

Un wɛn azɔn káká bɔ nǔ ci kɔ nú mì. Zǎn mɛ tɛgbɛ ɔ́, zan ce bǐ wɛ nɔ́ nyí ɖasin, ɖasin wɛ nɔ fá adɔ̌zan ce bǐ.

Ɖɛhan 69:3

Un ɖo bɔ̌ yi wɛ, bɔ nǔ e wú un nǎ gán dó é ɖe ǎ. Nyi ɖíe wá ɖo tɔzan jí e, tɔ ɖi bú mì bǐ sésé.

Ezayíi 22:4

Énɛ́ ɔ́ wú wɛ un ɖɔ nú mi ɖɔ: “Mi ma ɖɔ émí ná ɖó kɔ wǔ ce ó, mi jó mì dó nú má ya avǐ nú é ná jɛ mɛ nú mì. Mi ma ɖɔ émí ná ɖó alɔ akɔ́n jí nú mì, ɖó awě ɖaxó e xo togun ce ɔ́ wú ó.

Ezayíi 38:14

Un ɖo xó ɖɔ wɛ ɖo kɔ gúdo azɔnxɛ ɖo finfan wɛ ɖɔhun; un ɖo azɔn wɛn wɛ xwelé ɖo finfan wɛ ɖɔhun. Un kpɔ́n jǐxwé káká bɔ nukún ce bo. Aklúnɔ, adǎn élɔ́ e ɖo gbigbo mì wɛ ɔ́, blǒ gbɔn ɖě nú mì.

Ezayíi 51:20

Vǐ towe lɛ́ɛ ɖo ayǐmlɔ́mlɔ́ gbɔn ali kpá ali kpá; yě cí agbanlín e ɖo fɛ́ca mɛ é ɖɔhun; yě sɔ́ ɖó hlɔ̌nhlɔ́n ɖě ǎ; xomɛsin Mawu Mavɔmavɔ tɔn wɛ ɖo nǔ wa xá yě wɛ; adǎn e Mawu gblɔ́n nú yě ɔ́ wɛ ɖo nǔ dó sin xá yě wɛ.

Jelemíi 14:17

Jelemíi, ɖɔ nú yě ɖɔ émí ɖo avǐ ya wɛ ɖasin hoho zǎn kéze, magbokɔ. Đó è dó nǔ togun émítɔn bɔ é syɛ́n ɖésú, akpá ɖaxó wɛ jɛ wǔ tɔn,

Jelemíi 4:19

Adɔgo ce! Adɔgo ce! Un ɖo slósló ɖo wǔvɛ́ nu wɛ; hǔn ce nɔ́ xo káká bó nɔ́ ɖibla wɛ́n. Kotokítí tɛ́ ɖíe ɖo xo ce mɛ e! Un sixú nɔ xwíí ǎ; un se lanzo ɖo nǔ ɖɔ wɛ; un ɖo xósúsú se wɛ, mɛ ɖo ahwangbénu ɖɔhun.

Jelemíi 44:7

Jelemíi lɛ́ ɖɔ: “Din ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɖo nǔ élɔ́ lɛ́ɛ kanbyɔ́ mi wɛ: ‘Étɛ́wú mi ka ɖo nǔ wa dó miɖée wú wɛ sɔ́ mɔ̌? Mi jló ná sú Judáa ví súnnu, nyɔ̌nu, dɔ̌nkpɛvú kpó yɔkpɔ́vú kpó sín kún dó wɛ a? Mi jló nú donu mitɔn ɖě ná kpo ǎ wɛ a?

Jelemíi 8:19

Togun ce ɖo xó sú wɛ sín to línlín mɛ bó nɔ́ ɖɔ: ‘Mawu Mavɔmavɔ ka sɔ́ ɖo Sinyɔ́ɔ ǎ wɛ a? Sinyɔ́ɔ sɔ́ ɖó axɔ́sú ǎ cé?’ ” Mawu ɖɔ: “Étɛ́wú yě ká sɛn vodún dó dó xomɛsin nú mì? Yě sɛn nǔ énɛ́ lɛ́ɛ e to ɖěvo mɛ nu lɛ́ɛ nɔ́ sɔ́ alɔ yětɔn dó bló bɔ é má ká nyí nǔɖé ǎ lɛ́ɛ dó dó xomɛsin nú mì?”

Gbɛvíhan 1:11

Togun Jeluzalɛ́mu tɔn ɔ́ bǐ ɖo azɔn wɛn wɛ; é ɖo nǔɖuɖu ba wɛ; é sɔ́ nǔ e vɛ́ n'i hú nǔ bǐ ɔ́ jó, bó ná dó mɔ nǔɖuɖu ɖu, bó ná dó mɔ hlɔ̌nhlɔ́n; Jeluzalɛ́mu sa vo nú Mawu bó ɖɔ: “Mawu Mavɔmavɔ, kpɔ́n lě e yě gbɛ́ wǎn nú mì sɔ é!”

Gbɛvíhan 1:16

Énɛ́ ɔ́ wú wɛ un ɖo avǐ ya wɛ; ɖasin ɖo sisa sín nukún ce jí wɛ; mɛ e sixú dó gbɔ nú mì bó ná hlɔ̌nhlɔ́n mì ɔ́ sɛ yi zɔ nú mì; mɛ e ná ná gbɛ mì ɔ́ sɛ yi zɔ nú mì. Ahwi xo vǐ ce lɛ́ɛ bǐ ɖó kɛntɔ́ ɖu ɖo jǐ ce.

Gbɛvíhan 1:20

“Mawu Mavɔmavɔ, kpɔ́n adǎn e ɖo gbigbo mì wɛ é! Kpɔ́n wǔvɛ́ e mɔ wɛ un ɖe ɖo agbaza mɛ é; ayixa ce bǐ wɛ gbadó, ɖó lě e un fɔ́n gǔ dó jǐ we sɔ é wú. Ahwan hu vǐ ce lɛ́ɛ bǐ, è wǎ gɔ̌n ce ɔ́, è nǎ ɖɔ kúxwé wɛ.

Gbɛvíhan 5:17

Mǐ ɖo azɔn jɛ wɛ ɖo ayi mɛ, nukún mǐtɔn sɔ́ nɔ́ mɔ nǔ ganjí ǎ,

Luki 23:29

Đó ayǐ ɖé lɛ́ɛ ná wá hɔ́n, bɔ è nǎ ɖɔ: ‘Nǔ nyɔ́ nú wɛnsinɔ lɛ́ɛ, bó nyɔ́ nú mɛ e ma ji vǐ kpɔ́n gbeɖé ǎ lɛ́ɛ, bó nyɔ́ nú mɛ e ma ná anɔ̌ vǐ kpɔ́n gbeɖé ǎ é.’

1 Samuwɛ́li 30:4

Bɔ Davídi kpó mɛ e kpó é kpó zɔn lɛ́ɛ bǐ kpó wlí avǐ bo ya káká bɔ agbɔ̌ kpé yě.