Gbɛvíhan 1:10 - MAWUXÓWÉMA

¹⁰ Mɛ e ɖu ɖo jǐ tɔn lɛ́ɛ ɖ'alɔ dɔkun tɔn lɛ́ɛ jí. Jeluzalɛ́mu mɔ jǒnɔ lɛ́ɛ byɔ́ Mawuxɔ ɔ́ mɛ. Mawu, a ma ka ko gbɛ́ ɖɔ yě kún ná byɔ́ mɛ émítɔn lɛ́ɛ mɛ ó ǎ cé?

Gbɛvíhan 1:10 Iomraidhean Croise

2 Tan 36:18

Axɔ́sú Nabukodonɔzɔ́ɔ bɛ́ nǔ e è nɔ zán ɖo Mawu Mavɔmavɔ xwé gbe lɛ́ɛ bǐ, kpɛví kpó ɖaxó kpó, dɔkun e ɖo xwé ɔ́ gbe lɛ́ɛ, dɔkun e nyí axɔ́sú ɔ́ tɔn lɛ́ɛ kpó éé nyí azaglɔ́gán tɔn lɛ́ɛ tɔn lɛ́ɛ kpó yi Babilɔ́nu.

Nɛɛmíi 13:1

Gbe énɛ́ gbe ɔ́, è wǎ ɖo sɛ́nwéma Mɔyízi tɔn xa wɛ ɖo togun mɛ, bó mɔ ɖ'é mɛ ɖɔ mɛ e nyí Amumɔ́ɔ ví é kpó mɛ e nyí Mɔwabunu é kpó ɖě kún ná byɔ́ mavɔmavɔsɛntɔ́ lɛ́ɛ sín gbɛ̌ta mɛ gbeɖé ó.

Ezayíi 63:18

Mǐ togun towe e a sɔ́ ɖó vo é ɔ́, hwenu kpɛɖé jɛ́n to e a nǎ mǐ ɔ́ nyí mǐtɔn xɔ; kɛntɔ́ mǐtɔn lɛ́ɛ gbídí tɛn mímɛ́ towe ɖó afɔ wú.

Jelemíi 15:13

Mawu ɖɔ: “Judáa, nǔ e nyí towe lɛ́ɛ, dɔkun towe lɛ́ɛ ɔ́, un ná jó bǐ nú kɛntɔ́ vɔ̌nu, bɔ kɛntɔ́ ná vɔ bǐ, ɖó hwɛ e a hu gbɔn ayǐ towe lɛ́ɛ bǐ jí lɛ́ɛ wú.

Jelemíi 20:5

Dɔkun e nyí toxo élɔ́ tɔn lɛ́ɛ, nǔ e toxo élɔ́ jɛ dɛ̌n lobo wa lɛ́ɛ, nǔ e vɛ́ nú toxo élɔ́ lɛ́ɛ kpó dɔkun e nyí Judáa xɔ́sú lɛ́ɛ tɔn lɛ́ɛ kpó ɔ́, un ná jó bǐ nú kɛntɔ́ yětɔn lɛ́ɛ, bɔ yě ná bɛ́ bǐ hɛn yi Babilɔ́nu.

Jelemíi 27:19

Nǔgbó ɔ́, Mawu Mavɔmavɔ Nǔbǐwúkpétɔ́ ɔ́ ɖó xó ɖé, bó ná ɖɔ dó dotín lɛ́ɛ, ganzɛ́n ɖaxó ɔ́, basya e ɖó zɔn lɛ́ɛ, kpódó nǔ ɖěvo ɖěvo e kpo ɖo Jeluzalɛ́mu lɛ́ɛ kpó wú.

Jelemíi 27:21

Mawu Mavɔmavɔ Nǔbǐwúkpétɔ́, Mawu Izlayɛ́li tɔn ɔ́, xó e é ɖɔ dó nǔxɔ-akwɛ́ énɛ́ lɛ́ɛ e kpo ɖo Mawu Mavɔmavɔ xwé ɔ́ gbe lɛ́ɛ kpó, éé kpo ɖo axɔ́sú Judáa tɔn sín hɔnmɛ lɛ́ɛ kpó, éé kpo ɖo Jeluzalɛ́mu toxo ɔ́ mɛ lɛ́ɛ kpó ɔ́ wú ɔ́ ɖíe:

Jelemíi 50:28

Mi ɖótó mɛ e ɖo hinhɔn wɛ lɛ́ɛ, mi ɖótó mɛ e ɖo hinhɔn sín Babilɔ́nu wɛ lɛ́ɛ; yě ɖo ɖiɖɔ nú Sinyɔ́ɔnu lɛ́ɛ wɛ ɖɔ: “Mawu Mavɔmavɔ, Mawu mǐtɔn ba hlɔn nú mi, yě ɖu su nú xwé tɔn bɔ é ba hlɔn.”

Jelemíi 51:51

“Ée mǐ se hɛ̌nnú énɛ́ e ɖɔ wɛ è ɖe lɛ́ɛ ɔ́, mǐ dán ɖě wa gbɔn. Hwenu e mǐ se ɖɔ to ɖěvo mɛ nu lɛ́ɛ byɔ́ Mawu Mavɔmavɔ xwé gbe ɔ́, winnyá hu mǐ, mǐ sɔ́ sixú zé ta ǎ.”

Jelemíi 52:13

É dó Mawu Mavɔmavɔ xwé ɔ́ zo, bó dó hɔnmɛ ɔ́ kpó xwé e ɖo Jeluzalɛ́mu lɛ́ɛ bǐ kpó zo. Đo tají ɔ́, é dó gbɛtɔ́ nukúnɖéjí lɛ́ɛ sín xwé zo.

Gbɛvíhan 1:7

Jeluzalɛ́mu ɔ́, hwenu e adǎn ɖo gbigbo e wɛ ɔ́, é tunwun fí e é ná yi é ǎ. Énɛ́ ɔ́, é wá flín nǔ ɖagbe ɖagbe e é ɖó ɖ'ayǐ xóxó lɛ́ɛ bǐ. Hwenu e togun tɔn jɛ kɛntɔ́ lɛ́ɛ lɔmɛ ɔ́, mɛ ɖěbǔ wá gɔ́ alɔ n'i ǎ. Kɛntɔ́ tɔn lɛ́ɛ nɔ́ kpɔ́n ɛ bó nɔ́ ko e, ɖó é gba.

Ezekiyɛ́li 44:7

Hwenu e mi ɖo nǔ e nyí ce ɖo vɔ̌ e mi sá é mɛ lɛ́ɛ xwlé mì wɛ ɔ́, hwenu e mi ɖo kanlin e mi dó sá vɔ̌ ɔ́ é sín jǒ kpó kanjɔ tɔn kpó xwlé mì wɛ ɔ́, hwe ɖokpó énɛ́ ɔ́ nu ɔ́, mi nɔ kplá akɔta ɖěvo lɛ́ɛ, mɛ énɛ́ lɛ́ɛ e ma gbo ada ǎ, bó má ká nɔ nyi sɛ́n ce ǎ lɛ́ɛ byɔ́ xwé ce gbe. Mi ɖu su nú xwé ce. Nǔ baɖabaɖa e dó sin wɛ mi ɖe lɛ́ɛ zɔ́n, bɔ akɔ e nyi kpó mi kpó jɛ ɔ́, mi hɛn gblé.

Ezekiyɛ́li 7:22

Hwenu e è nǎ ɖu su nú xwé ce ɔ́, un ná ɖe kɔ sín yě wú, ajotɔ́ axánsúnxó ɖé lɛ́ɛ ná yi fínɛ́, bó ná ɖu su ná.

Ezekiyɛ́li 9:7

Mawu ɖɔ nú yě ɖɔ: “Mi yi ɖu su nú xwé ce; mi bɛ́ cyɔ lɛ́ɛ kɔn nyi kɔ́xo lɛ́ɛ ta.” Nǔgbó ɔ́, yě tɔ́n bó byɔ́ toxo ɔ́ mɛ bó hu mɛ lɛ́ɛ tɛ́.

Maki 13:14

“Hwenu e mi ná wá mɔ suɖunú baɖabaɖa ɔ́ ɖo tɛn e mɛ é ma ɖó ná nɔ ǎ ɔ́, (mɛ e xa nǔ énɛ́ ɔ́ ní mɔ nǔ jɛ wú); mɛ e ɖo Judée yíkúngban jí lɛ́ɛ ní hɔn yi sókan lɛ́ɛ mɛ.

Sɛ́nflínmɛ 23:3

Agaví ɖě ná sixú nɔ mawusɛntɔ́ lɛ́ɛ sín agun ɔ́ mɛ ǎ. Mɛ e nyí agaví ɔ́ káká jɛ vǐ tɔn ví jí yi jijimɛ wǒgɔ́ ɔ́ jí ɖě ná sixú nɔ mawusɛntɔ́ lɛ́ɛ sín agun ɔ́ mɛ ǎ.

Sɛ́nflínmɛ 23:4

Amumɔ́ɔ ví lɛ́ɛ kpó Mɔwabunu lɛ́ɛ kpó ɖě ná sixú nɔ mawusɛntɔ́ lɛ́ɛ sín agun ɔ́ mɛ gbeɖé ǎ. Bɛ́ sín vǐ yětɔn jí káká yi jijimɛ wǒgɔ́ ɔ́ jí lɔmɔ̌ ná sixú nɔ mawusɛntɔ́ lɛ́ɛ sín agun ɔ́ mɛ ǎ.