Eblée 13:12 - MAWUXÓWÉMA

¹² Énɛ́ ɔ́ wútu wɛ Jezu lɔ kú ɖo toxo ɔ́ gúdo, bó ná sɔ́ hun é ɖésúnɔ tɔn dó slá wǔ nú togun ɔ́.

Eblée 13:12 Iomraidhean Croise

Levíi ví 24:23

Mɔyízi ɖɔ xó lɛ́ɛ nú Izlayɛ́li ví lɛ́ɛ, bɔ yě kplá nyaví e zun Mawu Mavɔmavɔ ɔ́ tɔ́n sín fí e yě ɖó gɔnu ɖó ɔ́, bó nyi hwǎn dó hu i. Yě bló lě e Mawu Mavɔmavɔ ɖɔ nú Mɔyízi gbɔn é.

Kɛ́nsísɔ́ 15:36

Ée Mawu Mavɔmavɔ ɖɔ mɔ̌ ɔ́, togun ɔ́ bǐ dɔn nya ɔ́ tɔ́n sín fí e yě ɖó gɔnu ɖó ɔ́, bó nyi awǐnnyaglo dó e bɔ é kú, lě e Mawu Mavɔmavɔ ɖɔ nú Mɔyízi gbɔn é.

Luki 4:29

bɔ yě sí te, bó dɔn ɛ yi to ɔ́ gúdo, bó kplá ɛ yi só e jí to yětɔn ɖe é ta aga ɖéé, bó ná kpíkpé e nyi dodomɛ.

Jǎan 17:19

Un sɔ́ nyɛ ɖésú bǐ jǒ nú we ɖó yě wú, nú yě lɔmɔ̌ ná sixú nyí towe nǔgbó.

Jǎan 19:34

Lo ɔ́, sɔ́ja ɖokpó sɔ́ hwǎn adaja mɛ n'i, bɔ tlóló ɔ́, hun kpódó sin kpó lúlú kɔn nyi ayǐ.

Mɛsɛ́dó 7:58

bó dɔn ɛ yi to ɔ́ gúdo, lobo nyi awǐnnyaglo dó hu i. Kúnnuɖetɔ́ lɛ́ɛ zɔ́n awu yětɔn hɛn nyaví dɔ̌nkpɛvú ɖé, bɔ è nɔ ylɔ́ ɛ ɖɔ Sólu.

1 Kɔlɛ́ntinu 6:11

Nǔ e mɛɖé lɛ́ɛ ɖo mi mɛ, bó ko nyí ɖ'ayǐ ɔ́ nɛ́. Amɔ̌, è ko lɛ mi wé sín hwɛ mɛ; è ko ɖe mi ɖó vo, bɔ mi na nyí Mawu tɔn; è ko sɔ́ mi dó húzú hwɛjijɔnɔ, ɖo Aklúnɔ Jezu Klísu sín nyǐkɔ mɛ, gbɔn Yɛ Mawu mǐtɔn tɔn jí.

Efɛ́zinu 5:26

É bló mɔ̌, bó sɔ́ sin kpódó xó tɔn kpó dó lɛ agun ɔ́ wé, bónú é ná sixú nyí agun e jɛ xá bó ná nyí agun Mawu tɔn é.

Eblée 10:10

Đó Jezu Klísu bló nǔ e Mawu jló ɖɔ ní bló é wú ɔ́, è slá wǔ nú mǐ gbɔn agbaza é ɖésúnɔ tɔn e é sɔ́ dó sá vɔ̌ ná azɔn ɖokpó bɔ xó fó ɔ́ gbla mɛ.

Eblée 10:29

Énɛ́ ɔ́, nɛ̌ é ka ná nyí gbɔn nú mɛ e gbɛ́ wǎn nú Mawu ví ɔ́ é lo? Mɛ e sɔ́ akɔjijɛ Mawu tɔn sín hun e gbla mɛ è slá wǔ n'i gbɔn ɔ́ dó mɔ nǔ yǎyá, bó zun Yɛ nǔbláwǔkúnúmɛtɔ́ ɔ́, nɛ̌ é ka ná nyí gbɔn n'i? Mi ɖésúnɔ ɔ́, mi ná ko tunwun ɖɔ tó e è nǎ dɔn nú mɛ énɛ́ ɔ́ ná nylá hú mɛ e gba Mɔyízisɛ́n ɔ́ é tɔn.

Eblée 2:11

Jezu e nɔ slá wǔ nú mɛ ɔ́ kpódó mɛ e é slá wǔ ná lɛ́ɛ kpó ɔ́, tɔ́ ɖokpó ɔ́ wɛ ɖó yě bǐ. Énɛ́ ɔ́ wú wɛ winnyá ma hu Jezu nú é ná ylɔ́ yě ɖɔ nɔví émítɔn lɛ́ɛ ǎ.

Jozuwée 7:24

Énɛ́ ɔ́ gúdo ɔ́, Jozuwée kpó Izlayɛ́li ví lɛ́ɛ bǐ kpó zɔn Akáni jí. Yě bɛ̌ kpatágan ɔ́ kpódó awu ɔ́ kpó, kpódó sikágó ɔ́ kpó, lobo kplá vǐ tɔn súnnu lɛ́ɛ kpódó nyɔ̌nu lɛ́ɛ kpó, bó kplá nyibú tɔn lɛ́ɛ, tócí tɔn lɛ́ɛ, gbɔ̌ tɔn lɛ́ɛ, bó bɛ́ goxɔ tɔn kpódó dɔkun tɔn ɖě lɛ́ɛ bǐ kpó. Yě bɛ̌ nǔ énɛ́ lɛ́ɛ bǐ hɛn yi tɔdo Akɔ́ɔ tɔn mɛ.

Nǔɖexlɛ́mɛ 14:20

È li vǐwun sínsɛ́n ɔ́ ɖo vǐwunto mɛ, ɖo toxo ɔ́ gúdo, bɔ hun nɔ sa sín vǐwunto ɔ́ mɛ hoho, bó gba kpé kɔ́ mɛ káká yi kilomɛ́tlu afɔɖé kanwe ko (300), bɔ do yiyi tɔn yi mɛ̌tlu ɖokpó adaɖé mɔ̌.