Eblée 10:22 - MAWUXÓWÉMA

²² Hǔn, mi nú mǐ ná sɛkpɔ́ Mawu kpódó ayijlɔ́jlɔ́ kpó, kpódó gǎnjɛwú kpíkpé e nǔɖiɖi nɔ ná mɛ ɔ́ kpó, kpódó ayi e è slá wǔ ná bɔ nǔ nyanya ɖěbǔ ma ɖ'é mɛ ǎ é kpó, kpódó agbaza e è zě sin mímɛ́ dó lɛ ná é kpó.

Eblée 10:22 Iomraidhean Croise

1 Axɔ́sú 15:3

Hwɛ e tɔ́ tɔn ko hu jɛ nukɔn n'i ɖ'ayǐ lɛ́ɛ bǐ wɛ élɔ́ hu; é sɔ́ ayixa tɔn bǐ jó nú Mawu Mavɔmavɔ, Mawu tɔn tɔ́gbó tɔn Davídi ɖɔhun ǎ.

1 Tan 12:33

Ahwangán afɔɖé kpó sɔ́ja e nu yě ɖe lɛ́ɛ kpó wɛ gosín akɔta Isakáa tɔn ɔ́ mɛ. Yědɛɛ lɛ́ɛ ɔ́, nú Izlayɛ́li ví lɛ́ɛ ja nǔɖé bló gbé ɔ́, yě nɔ́ tunwun hwenu e yě ná bló dó é, kpó lě e yě ná bló gbɔn ɔ́ kpó.

1 Tan 28:9

Vǐ ce Salomɔ́ɔ, hwɛ ɔ́, a ɖǒ ná tunwun Mawu nyɛ tɔ́ towe tɔn, lobo sɛn é ɖokpónɔ géé, kpódó ayixa towe bǐ kpó. Đó Mawu Mavɔmavɔ nɔ́ mɔ nukúnnú jɛ ayixa lɛ́ɛ bǐ mɛ, é tunwun nǔ e lin wɛ è ɖe lɛ́ɛ bǐ. Ényí a ba ɛ ɔ́, é ná jó éɖée dó bɔ a nǎ mɔ ɛ. Lo ɔ́ ényí a jǒ e dó ɔ́, é ná jó we dó bǐ gbídígbídí.

1 Tan 29:17

Mawu ce, un tunwun ɖɔ a nɔ mɔ nǔ jɛ ayixa mɛtɔn mɛ. Un tunwun ɖɔ a yǐ wǎn nú nǔ jlɔ́jlɔ́. Nyɛ ɖésú wɛ jló bó ná nǔ énɛ́ lɛ́ɛ we kpó ayijlɔ́jlɔ́ kpó. Togun towe e kplé ɖo fí din ɔ́ lɔmɔ̌ ná nǔ we kpó jlǒ kpó, bɔ un mɔ bɔ é víví nú mì.

Ɖɛhan 111:1

Mi kpa Mawu Mavɔmavɔ! Un ná nɔ kpa Mawu Mavɔmavɔ kpó ayi ce bǐ kpó, un ná nɔ́ kpa ɛ ɖo ayijlɔ́jlɔ́nɔ lɛ́ɛ tɛ́ntin, un ná nɔ́ kpa ɛ ɖo kplékplé mɛ e nɔ sɛn ɛ lɛ́ɛ tɔn mɛ.

Ɖɛhan 119:10

Un ɖo biba we wɛ kpó ayi ce bǐ kpó. Ma jó mì dó nú un nɔ zɔ nú nǔ e a zɔ̌n lɛ́ɛ, bó bú ali ó.

Ɖɛhan 119:145

Mawu Mavɔmavɔ, un ɖo xó sú ylɔ́ we wɛ kpó ayi ce bǐ kpó; sɔ nú mì, un jló ná xwedó tito towe lɛ́ɛ.

Ɖɛhan 119:2

Nǔ nyɔ́ nú mɛ e nɔ nyi sɛ́n tɔn lɛ́ɛ, mɛ e nɔ ba ɛ kpó ayi yětɔn bǐ kpó lɛ́ɛ.

Ɖɛhan 119:34

Nǎ nukúnnú mɔ jɛ nǔ mɛ mì, nú má hɛn sɛ́n towe bó nyi kpó ayi ce bǐ kpó.

Ɖɛhan 119:58

Un jló ná nyɔ́ ɖo así we kpó xomɛ kpó; nyɔ̌ xomɛ dó wǔ ce lě e a dǒ akpá tɔn gbɔn é.

Ɖɛhan 119:69

Mɛ e nɔ mɔ ɖɔ émí sɔ lě lɛ́ɛ nɔ́ ɖó adingban dó nu ce dó hɛn mì blí, amɔ̌, nyɛ ɔ́, sɛ́n towe lɛ́ɛ nyinyi wɛ nɔ myá nukún nú mì.

Ɖɛhan 119:7

Un ɖo gbeta e a ɖe tɔ́n bɔ é sɔgbe lɛ́ɛ ɔ́ kplɔ́n wɛ ɔ́, un ná sɔ́ ayi ɖó wɛn bó ná mlá we.

Ɖɛhan 119:80

Má nɔ gbejí nú tito towe lɛ́ɛ, bó má wá ɖu winnyá ó.

Ɖɛhan 32:11

Gbejínɔtɔ́ lɛ́ɛ mi, Mawu Mavɔmavɔ ní nyí awǎjijɛ mitɔn! Ayijlɔ́jlɔ́nɔ lɛ́ɛ mi, mi hun xomɛ; mi sú xó dó ɖe awǎjijɛ mitɔn xlɛ́.

Ɖɛhan 51:10

Đɔ nú mì ɖɔ émí sɔ́ hwɛ kɛ mì, énɛ́ ɔ́, xomɛ ná hun mì bó ná túnflá, bɔ xú e a cɛ́ dó lanmɛ nú mì lɛ́ɛ lɔ ná ɖú we.

Ɖɛhan 73:28

Nyɛ ɔ́, Mawu kpá ninɔ wɛ nyí ɖagbe nú nyɛ. Aklúnɔ Mawu Mavɔmavɔ, hwi wɛ un dó ɖó bibɛtɛn, bó ná mɔ tɛn dó ɖɔ nǔ e a wa lɛ́ɛ bǐ.

Ɖɛhan 84:11

Nǔgbó ɔ́, è nɔ kɔ́xo towe lɛ́ɛ ta xɔ azǎn ɖokpó ɔ́, é nyɔ́ hú è blǒ azǎn afatɔ́n ɖo fí ɖěvo. Mawu ce, un yí wǎn nú xwé towe lihɛ́nnu ninɔ hú adǎkaxotɔ́ lɛ́ɛ xwé ninɔ.

Ɖɛhan 9:1

Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ; è nɔ ji dó han e è nɔ ylɔ́ ɖɔ “Vǐ kú” ɔ́ sín hangbe mɛ.

Ɖɛhan 94:15

È nǎ lɛ́ xwedó sɛ́n dó ɖɔ hwɛ, bɔ mɛ e ɖó ayixa ɖagbe é bǐ ná yí gbe ná.

Tíntɔ́n 29:4

“Mɔ̌ ɖokpó ɔ́, a nǎ kplá Aalɔ́ɔn kpódó vǐ tɔn súnnu lɛ́ɛ kpó wá goxɔ ɔ́ nukɔn; fínɛ́ wɛ un ná ɖɔ xó xá togun ɔ́ ɖe, bó ná zé sin dó slá wǔ nú yě.

Nǔnywɛ́xó 23:26

Vǐ ce, ɖeji dó wǔ ce; nǔ wa nyi ɖɔhun ní nɔ́ víví nú we.

Ezayíi 29:13

Aklúnɔ ɖɔ dó togun élɔ́ wú ɖɔ: “Togun élɔ́ ɔ́, nu kɛ́ɖɛ́ jɛ́n é nɔ́ víví nú mì; nu jɛ́n é nɔ́ sɔ́ mì su ɖe; ayi tɔn ɖo wǔ ce ǎ. Sísí e ɖó nú mì wɛ é ɖe bó ɖɔ ɔ́, nǔdówá gbɛtɔ́ tɔn wɛ; nǔ wɛ é nyí bɔ è kplɔ́n dó ta mɛ kpowun.

Ezayíi 52:15

Amɔ̌, din ɔ́, xó tɔn kpácá togun gěgé; axɔ́sú lɛ́ɛ sɔ́ ná tunwun nǔ e yě ná ɖɔ ɖo nukɔn tɔn é ǎ, ɖó nǔ e mɔ wɛ yě ɖe ɔ́ gbɔn vo nú nǔ e è ɖɔ nú yě ɔ́. Nǔ e kpɔ́n wɛ yě ɖe é kpó nǔ e yě se ɔ́ kpó nyí nǔ ɖokpó ɔ́ ǎ.”

Jelemíi 24:7

Un na ná ayixa yě, bɔ yě ná tunwun ɖɔ nyi wɛ nyí Mawu Mavɔmavɔ; yě ná lɛ́ kɔ wá gɔ̌n ce kpó ayi yětɔn bǐ kpó; énɛ́ ɔ́, yě ná nyí togun ce bɔ un ná nyí Mawu yětɔn.

Jelemíi 3:10

Nǔ ɖo mɔ̌ có nɔví tɔn Judáa afɔdógbětɔ́ ɔ́ lɛ́ kɔ wá gɔ̌n ce kpó ayi tɔn bǐ kpó ǎ. Yɛmɛnú wɛ é wa.” Xó e Mawu Mavɔmavɔ ɖɔ ɔ́ nɛ́.

Jelemíi 30:21

Mɛ e ná nyí gǎn ɖo yě nu ɔ́, un ná sɔ́ ɖo tɛ́ntin yětɔn; mɛ e ná kpa acɛ dó yě nu ɔ́, un ná sɔ́ ɖo yě mɛ. Un ná dɔn ɛ bɔ é ná sɛkpɔ́ mì, ɖó nú un ma ylɔ́ mɛɖé ǎ ɔ́, mɛ ɔ́ sixú syɛ́n ta bó sɛkpɔ́ mì ǎ. Nyɛ Mawu Mavɔmavɔ wɛ ɖɔ mɔ̌.

Ezekiyɛ́li 16:9

“Un zé sin bó klɔ́ kanjɔ e ɖo wǔ towe ɔ́ síin, bó sá nǔsáwǔ wǎnɖagbenɔ nú we.

Ezekiyɛ́li 36:25

Un ná kɔn sin mímɛ́ dó mi jí, bɔ mi ná húzú mɛ mímɛ́. Un ná lɛ mi sín nǔ blíblí e mi wa lɛ́ɛ kpó vodún e mi sɛn lɛ́ɛ kpó mɛ.

Levíi ví 14:7

bó ná mi dó mɛ e slá wǔ ná gbé è ja ɔ́ wú azɔn tɛ́nwe, bó ná ɖɔ ɖɔ mɛ ɔ́ nyí mɛ mímɛ́, lobo ná yi gběhan mɛ, bó ná jó xɛ gbɛɖe ɔ́ dó, bɔ é ná zɔn yi.

Levíi ví 16:4

É ná lɛ wǔ, bó ná dó awu gaga, bó ná dó gbagwé, bó ná sin gǒjíblánú, bó ná sɔ́ tablá ɖó ta; lɛ̌ɛnkanvɔ wɛ è dǒ tɔ nǔ énɛ́ lɛ́ɛ bǐ. Nǔ énɛ́ lɛ́ɛ bǐ wɛ è sɔ́ ɖó vo nú Mawu Mavɔmavɔ.

Levíi ví 8:6

Ée Mɔyízi ɖɔ mɔ̌ ɔ́, é ylɔ́ Aalɔ́ɔn kpó vǐ tɔn súnnu lɛ́ɛ kpó, bɔ yě sɛkpɔ́ ɛ, bɔ é slá wǔ nú yě.

Zakalíi 13:1

Mawu Mavɔmavɔ Nǔbǐwúkpétɔ́ ɔ́ lɛ́ ɖɔ: “Hwenɛ́nu ɔ́, sin ná sa sín tɔjɔtɛn ɖé mɛ, bó ná lɛ hwɛ e Davídi ví lɛ́ɛ kpó Jeluzalɛ́munu lɛ́ɛ kpó hu ɔ́ sín kɔ nú yě, bó ná lɛ nǔ blíblí e yě wa lɛ́ɛ sín kɔ nú yě.”

Kɛ́nsísɔ́ 8:7

Lě e a nǎ slá wǔ nú yě gbɔn ɔ́ ɖíe: a nǎ mi sin e è nɔ dó slá wǔ nú mɛ ɔ́ dó yě wú, bɔ yě ná xwlɛ́ fún e ɖo yě wú ɔ́ bǐ; yě ná nya avɔ yětɔn lɛ́ɛ, énɛ́ ɔ́, yě ná húzú mɛ mímɛ́.

Matíe 3:11

Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ, bó ná dó ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo; amɔ̌, mɛ e ɖo gǔdo ce jǎwe ɔ́, mɛ énɛ́ ɔ́ hú gǎn mì, bɔ un nyí mɛɖé bó ná sixú hɛn afɔkpa tɔn lɛ́ɛ n'i vɔ́vɔ́ ǎ; éyɛ́ ɔ́, Yɛsinsɛn kpódó zo kpó wɛ é ná sɔ́ dó lɛ yɛhwesin nú mi.

Luki 1:1

Teofílu! Mɛ gěgé tɛ́nkpɔ́n bó kpi nǔ e jɛ ɖo tɛ́ntin mǐtɔn lɛ́ɛ é sín tan dó wěma mɛ.

Jǎan 3:5

Jezu yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ gbɔn sin kpódó Yɛsinsɛn kpó mɛ ǎ ɔ́, é sixú byɔ́ axɔ́súɖuɖu Mawu tɔn mɛ ǎ.

Jǎan 8:9

Ée yě mɛ e kplá nyɔ̌nu ɔ́ wá nú Jezu lɛ́ɛ se mɔ̌ ɔ́, yě jɛ yiyi jí ɖokpó ɖokpó, bɛ́ sín mɛxó lɛ́ɛ jí, bɔ é wá kpo Jezu ɖokpónɔ géé kpódó nyɔ̌nu ɔ́ kpó.

Mɛsɛ́dó 22:16

Din ɔ́, étɛ́ nɔ te kpɔ́n wɛ a ka lɛ́ ɖe? Sí te, bónú è nǐ ylɔ́ nyǐkɔ tɔn dó lɛ yɛhwesin nú we, bó ná ɖe we sín hwɛ towe mɛ.’ ”

Mɛsɛ́dó 8:21

Nǔɖé kan we ɖo xó élɔ́ mɛ ǎ; nǔɖé ka nyí towe ɖ'é mɛ ǎ; ɖó ayi towe jlɔ́ ɖo Mawu nukɔn ǎ.

1 Kɔlɛ́ntinu 6:11

Nǔ e mɛɖé lɛ́ɛ ɖo mi mɛ, bó ko nyí ɖ'ayǐ ɔ́ nɛ́. Amɔ̌, è ko lɛ mi wé sín hwɛ mɛ; è ko ɖe mi ɖó vo, bɔ mi na nyí Mawu tɔn; è ko sɔ́ mi dó húzú hwɛjijɔnɔ, ɖo Aklúnɔ Jezu Klísu sín nyǐkɔ mɛ, gbɔn Yɛ Mawu mǐtɔn tɔn jí.

2 Kɔlɛ́ntinu 7:1

Mɛvívɛ́ná ce lɛ́ɛ mi, akpá énɛ́ lɛ́ɛ e Mawu dó ɔ́, mǐ wɛ é dó yě ná. Énɛ́ ɔ́ wú ɔ́, mǐ ní slá wǔ nú agbaza kpó lǐndɔ̌n kpó, bó dó gǎn, bó ɖi xɛsi nú Mawu ɖo gbɛzán mǐtɔn mɛ, lobo ná nyí mɛ mímɛ́ yi fó.

Efɛ́zinu 3:12

Bǔ e mǐ ɖe xá Klísu é kpó nǔɖiɖi e mǐ ɖó n'i é kpó zɔ́n bɔ mǐ glá bó sɛkpɔ́ ɛ kpó jiɖiɖe ɖaxó ɖé kpó.

Efɛ́zinu 5:26

É bló mɔ̌, bó sɔ́ sin kpódó xó tɔn kpó dó lɛ agun ɔ́ wé, bónú é ná sixú nyí agun e jɛ xá bó ná nyí agun Mawu tɔn é.

Efɛ́zinu 6:5

Kannumɔ lɛ́ɛ mi, mi se tónú nú gǎn mitɔn e ɖo ayǐkúngban jí fí lɛ́ɛ é, kpó sísí kpó, kpó sísɔ́sísɔ́ kpó, kpódó ayijlɔ́jlɔ́ kpó Klísu sɛn wɛ mi ɖe ɖɔhun.

1 Timɔtée 4:2

Yě ná ɖótó nǔ énɛ́ lɛ́ɛ ɖo yɛmɛnúwatɔ́ lɛ́ɛ kpó adingbannɔ lɛ́ɛ kpó sín nu, bó ná jó yěɖée dó bɔ yɛmɛnúwatɔ́ énɛ́ lɛ́ɛ e nǔmasɔgbewiwa ɖó wuntun ayixa yětɔn lɛ́ɛ gan zozo wɛ è dǒ ɖó wuntun ɖɔhun lɛ́ɛ ná dɔn yě bǐ bǔ.

Titu 3:5

é hwlɛ́n mǐ gán, é ka nyí ɖɔ mǐ wa nǔ jlɔ́jlɔ́ wútu wɛ é hwlɛ́n mǐ gán ǎ; lo ɔ́, nǔ mǐtɔn wɛ blá wǔ n'i. É hwlɛ́n mǐ gán, bó lɛ mǐ wé; mɛlɛwé énɛ́ ɔ́ mɛ wɛ Yɛsinsɛn nɔ ná lɛ̌vɔ́jɔ kpó gbɛ yɔ̌yɔ́ kpán mǐ ɖe.

Eblée 10:1

Sɛ́n Jwifu lɛ́ɛ tɔn nyí nǔ ɖagbe e jǎwe lɛ́ɛ sín ninɔmɛ pɛ́pɛ́pɛ́ ǎ; yɛ nǔ lɛ́ɛ tɔn kpowun wɛ. Sɛ́n ɔ́ sixú zɔ́n bɔ mɛ e nɔ sɛkpɔ́ Mawu lɛ́ɛ ná nyí mɛ mímɛ́ bɔ nǔ vɔ ɖ'é wú ǎ; é sixú zɔ́n nú yě ná nyí mɛ mímɛ́ gbɔn vɔ̌ ɖokpó e sá wɛ è nɔ ɖe ayǐhɔ́ngbe ayǐhɔ́ngbe ɖo xwewú xwewú tɛgbɛ ɔ́ gbla mɛ gbeɖé ǎ.

Eblée 10:19

Énɛ́ hǔn nɔví ce lɛ́ɛ mi, mǐ ɖó jiɖiɖe kpíkpé ɖɔ mǐ ná yi Tɛn mímɛ́ bǐ ɔ́ mɛ gbɔn hun Jezu tɔn gbla mɛ.

Eblée 11:28

Nǔɖiɖi e Mɔyízi ɖó ɔ́ wɛ zɔ́n bɔ é ɖó Dǐndínwáyi sín xwe ɔ́ ayǐ, bó ná gbe ɖɔ è nǐ mì hun dó hɔn lɛ́ɛ wú, bónú wɛnsagun e nɔ hu mɛ ɔ́ ma hu nukɔngbéví Izlayɛ́li ví lɛ́ɛ tɔn ó.

Eblée 12:24

Mi sɛkpɔ́ Jezu e nyí ɖɛ̌mɛnu nú akɔjijɛ yɔ̌yɔ́ ɔ́ é; bó sɛkpɔ́ hun tɔn e kɔn nyi ayǐ é, hun tɔn énɛ́ e ɖó acɛ hú hun Abɛ́li tɔn é.

Eblée 4:16

Hǔn, mi bo nú mǐ ná sɛkpɔ́ axɔ́súzinkpo Mawu tɔn, fí e fɛ́nú ɖe ɔ́, kpódó jiɖiɖe kpán; é ná sɔ́ hwɛ kɛ mǐ ɖo fínɛ́. Mǐ ná mɔ fɛ́nú ɖo fínɛ́, bónú é ná d'alɔ mǐ ɖo nǔ e hudó mǐ lɛ́ɛ mɛ, ɖo hwe tɔn nu.

Eblée 6:11

Amɔ̌ mǐ jló ɖɔ ɖokpó ɖokpó mitɔn ní ɖe bǐbí dó nǔ wú énɛ́ xlɛ́ káká sɔ́yi vivɔnu, bónú nǔ e ɖó nukún wɛ mi ɖe ɔ́ ná jɛ.

Eblée 7:19

Nǔgbó ɔ́, Mɔyízisɛ́n ɔ́ bló bɔ nǔɖé nyɔ́ káká yi fó ǎ; nukúnɖíɖó ɖagbe ɖé ka wá bó nyɔ́ hú mɔ̌; nukúnɖíɖó énɛ́ wɛ bló bɔ mǐ nɔ sɛkpɔ́ Mawu.

Eblée 9:10

Đó Mawu sinsɛn gbɔn mɔ̌ ɔ́, nǔɖuɖu kpó ahan nunu kpó, kpódó wǔsláslá sín nǔwiwa tɛnmɛ tɛnmɛ lɛ́ɛ kpó sín sɛ́n kpowun wɛ; tito gbɛtɔ́ tɔn kpowun wɛ, bó wa azɔ̌ káká jɛ hwenu e Mawu vɔ́ nǔ lɛ́ɛ bǐ to dó é.

Eblée 9:19

Nǔ nukɔntɔn e Mɔyízi bló ɔ́ wɛ nyí ɖɔ: é xa nǔ e sɛ́n ɔ́ zɔ́n ɖɔ è ní wa lɛ́ɛ bǐ ɖo togun ɔ́ bǐ nukɔn lě e è wlǎn gbɔn dó sɛ́nwéma ɔ́ mɛ é. Énɛ́ ɔ́ gúdo ɔ́, é sɔ́ nyibúví kpódó gbǎgbá kpó sín hun, kpó sin kpó; é sɔ́ izɔ́pukpo, kpó avɔ vɔvɔ cɛ́cɛ́ ɖé kpó, bó sɔ́ dó hun kpó sin kpó ɔ́ mɛ, lobo mì dó sɛ́nwéma ɔ́ wú, bó lɛ́ mì dó togun ɔ́ bǐ wú.

Jaki 1:6

Amɔ̌, mɛ ɔ́ ní byɔ́ kpó nǔɖiɖi kpó ma xo nǔ kpɔ́n; ɖó mɛ e nɔ xo nǔ kpɔ́n ɔ́ cí aslɔkɛ́ e sí te ɖo xu jí, bɔ jɔhɔn nɔ dó alɔ mɛ, bó nɔ xo dó ɖisí, bó nɔ xo dó amyɔ é ɖɔhun.

Jaki 4:8

Mi sɛkpɔ́ Mawu; énɛ́ ɔ́ é ná sɛkpɔ́ mi. Mi hwɛhutɔ́ lɛ́ɛ, mi klɔ́ alɔ mitɔn lɛ́ɛ; mi yɛmɛnúwatɔ́ lɛ́ɛ, mi slá wǔ nú ayixa mitɔn lɛ́ɛ!

1 Piyɛ́ɛ 1:2

Mawu Tɔ́ ɔ́ cyán mi, bɔ é sɔgbe xá lě e é ɖésúnɔ ko to gbɔn ɖ'ayǐ é, bɔ mi nyí mɛɖeɖóvo tɔn, gbɔn Yɛ tɔn sín nǔwiwa gbla mɛ, nú mi ná se tónú nú Jezu Klísu, bɔ hun tɔn ná lɛ mi wé. Mawu ní ná fɛ́nú kpó fífá kpó mi ní túnflá.

1 Piyɛ́ɛ 3:21

Nǔ e sín akpajlɛ́ nyí wɛ sin ɔ́ ɖe ɔ́ wɛ nyí yɛhwesin e ɖo mi lɔ hwlɛngán wɛ din e. Yɛhwesin ɔ́, ɖixó agbaza tɔn lɛ́ɛ wɛ é nɔ ɖe síin ǎ, lo ɔ́ vo sa nú Mawu wɛ é ɖe ɖɔ é ní ná ayixa mímɛ́ mi. Fɔ́n e Jezu Klísu fɔ́n sín kú ɔ́ zɔ́n bɔ yɛhwesin hwlɛ́n mi gán.