Daniyɛ́li 9:24 - MAWUXÓWÉMA

²⁴ Mawu zé xwe tɛ́nwe tɛ́nwe donu kanɖé gban (70) ɖó te nú togun towe, kpó to mímɛ́ e mɛ a ɖe ɔ́ kpó. Hwenu tají ɖé wɛ bɔ tónúmase bǐ ná fó, bɔ nǔwanyido bǐ ná nɔ te, bɔ è nǎ zé hwɛ bǐ kɛ mɛ, lobɔ hwɛjijɔ mavɔ mavɔ ɔ́ ná bɛ́ azɔ̌, bɔ nǔmimɔ lɛ́ɛ kpó xóɖɔɖ'ayǐ lɛ́ɛ kpó ná jɛ, bɔ è nǎ lɛ́ ylɔ́ Mawu nyíkɔ dó goxɔ mímɛ́ bǐ ɔ́ jí.

Daniyɛ́li 9:24 Iomraidhean Croise

2 Tan 29:24

Vɔ̌sánú-xwlémawutɔ́ lɛ́ɛ ká gbo gbe gbǎgbá lɛ́ɛ bó kɔn hun yětɔn dó vɔ̌sákpe ɔ́ jí dó sá hwɛsɔ́kɛmɛvɔ́ ná dó hwɛ e Izlayɛ́li togun ɔ́ bǐ hu lɛ́ɛ tamɛ. Đó togun Izlayɛ́li tɔn ɔ́ bǐ tamɛ wɛ axɔ́sú ɔ́ ná gbe ɖɔ è nǐ sá vɔ̌ e è nɔ dó zo ɔ́ kpó hwɛsɔ́kɛmɛvɔ́ ɔ́ kpó dó.

Ɖɛhan 2:6

É ɖɔ nú yě ɖɔ: “Nyɛ wɛ sɔ́ axɔ́sú ce ɖó zinkpo jí ɖo Sinyɔ́ɔ, só mímɛ́ ce jí.”

Ɖɛhan 45:7

Axɔ́súzinkpo towe ná nɔ ayǐ káká yi káká sá, axɔ́súzinkpo Mawu tɔn ɖɔhun. Hwɛjijɔ jí wɛ axɔ́súɖuɖu towe jínjɔ́n.

Ezayíi 42:4

Nǔ ná cikɔ n'i ǎ, kan mɛ ná gbɔ́jɔ́ ɛ káká cóbónú é ná sɔ́ hwɛjijɔ jínjɔ́n ayǐ gbɔn gbɛ ɔ́ mɛ ǎ. Togun e gbɔn zɔ zɔ lɛ́ɛ ná ɖo te kpɔ́n nǔkplɔ́nmɛ tɔn.”

Ezayíi 51:6

Mi kpɔ́n jǐxwé aga dɔ̌n sɛ́ dó; mi kpɔ́n do, bó kpɔ́n ayǐkúngban ɔ́; jǐnukúnsin ná kɛn azizɔ ɖɔhun, ayǐkúngban ná gbi avɔ ɖɔhun, bɔ mɛ e ɖo ayǐkúngban ɔ́ jí lɛ́ɛ ná kɔn nyi ayǐ sukpɔ ɖɔhun; amɔ̌, hwlɛngán e un ná hɛn wá ɔ́ ná nɔ ayǐ káká sɔ́yi; hwɛjijɔ ce ná ɖó dogbó ǎ.

Ezayíi 51:8

Đó nǔ e gbo sɛ́davɔ e kɔ́súkɔ́sú ɖu ɔ́ wɛ ná gbo yě. Amɔ̌, hwlɛngán e un ná hɛn wá ɔ́ ná nɔ te káká sɔ́yi, hwlɛngán ce ná nɔ te káká yi gbɛ mavɔ mavɔ.”

Ezayíi 56:1

Xó e Mawu Mavɔmavɔ ɖɔ ɔ́ ɖíe: “Mi bló nǔ e sɔgbe é, bó nɔ́ xwedó hwɛjijɔ, ɖó hwlɛngán e ná hɛn wá wɛ un ɖe ɔ́ kó sɛ yá. Hwɛjijɔ ce ko ɖo kɛ́nnɛ́kɛ́nnɛ́ bó ná ɖe éɖée xlɛ́.

Ezayíi 61:1

Yɛ Aklúnɔ Mavɔmavɔ tɔn ɖo jǐ ce, ɖó Mawu Mavɔmavɔ wɛ sɔ́ mì ɖó vo; é sɛ́ mì dó ɖɔ má yi dó wɛn ɖagbe ɖé wamamɔnɔ lɛ́ɛ, má yi hɛn sɔ mɛ e ɖo wǔvɛ́ mɔ wɛ ɖo ayi mɛ lɛ́ɛ, má yi ɖɔ nú kannumɔ lɛ́ɛ ɖɔ yě jɛ yěɖée sí, má yi ɖɔ nú gantɔ́ lɛ́ɛ ɖɔ è jó yě.

Gbɛvíhan 4:22

Sinyɔ́ɔ, fí e è dɔn tó nú we yi jɛ ɔ́ kpé. È sɔ́ ná kplá we yi to ɖěvo mɛ ɖě ǎ. Amɔ̌, hwɛ Edɔ́mu ɔ́, Mawu ná dɔn tó nú we, ɖó hwɛ e a hu lɛ́ɛ wú; é ná ɖe acɛ e a gba lɛ́ɛ nyi wěxo.

Ezekiyɛ́li 28:12

“Hwɛ gbɛtɔ́ e, ji nǔwamɛhan ɖokpó nú Tíi xɔ́sú ɔ́. A nǎ ɖɔ n'i ɖɔ nyɛ Mawu Mavɔmavɔ wɛ ɖo han ɔ́ ji n'i wɛ; han ɔ́ ɖíe: ‘Tíi xɔ́sú e, a ɖǒ nǔnywɛ́ ɖaxó, a nyɔ̌ ɖɛkpɛ bɔ nǔ vɔ ɖ'é wú; énɛ́ ɔ́ zɔ́n bɔ a nyǐ nǔ e nyɔ́ yi fó é sín kpɔ́n d'é wú.

Ezekiyɛ́li 4:5

Azǎn nabí e un nǎ ɖɔ bɔ a nǎ nɔ mɔ̌ xɔ ɔ́ ná sɔgbe xá xwe nabí e Izlayɛ́li togun ɔ́ hu hwɛ ná é; hǔn azǎn ɖokpó ɖo xwe ɖokpó nyí wɛ; hǔn a nǎ hɛn hwɛgban Izlayɛ́li togun ɔ́ tɔn nú azǎn afɔɖé kɛnnɛ gban (390) .

Ezekiyɛ́li 4:6

Ényí a blǒ azǎn énɛ́ lɛ́ɛ fó ɔ́, a nǎ mlɔ́ aɖisí jí, bó ná hɛn hwɛgban Judáa togun ɔ́ tɔn nú azǎn kanɖé (40); un ná zé azǎn ɖokpó dó lɛ́n xwe ɖokpó.

Levíi ví 25:8

“Mi yi to e ná ná mi wɛ un ɖe ɔ́ mɛ ɔ́, mi ná xa gbɔjɛzán xwe tɛ́nwe; hǔn mi ná xa xwe tɛ́nwe tɛ́nwe donu tɛ́nwe; é bló xwe kanɖé tɛ́nnɛ (49).

Levíi ví 8:15

Mɔyízi gbo gbe nyibúsú ɔ́, bó yí hun tɔn bó sɔ́ alɔví tɔn d'é mɛ, bó sá dó vɔ̌sákpe ɔ́ sín zo lɛ́ɛ wú lɛ́ lɛ̌ dó, bó dó slá wǔ nú vɔ̌sákpe ɔ́. É kɔn hun e kpo ɔ́ nyi vɔ̌sákpe ɔ́ sín dodó wú; lě e é slá wǔ nú vɔ̌sákpe ɔ́, bó ɖe ɖó vo bɔ è nǎ nɔ́ sá vɔ̌ e nɔ súnsún hwɛ sín kɔ nú mɛ ɔ́ ɖ'é jí gbɔn ɔ́ nɛ́.

Zakalíi 4:14

Bɔ é tínmɛ nú mì ɖɔ: “Mɛ we e Mawu Mavɔmavɔ e kpa acɛ dó ayǐkúngban ɔ́ bǐ nu ɔ́ dó ami ta ná, dó ɖe yě ɖó vo, bɔ yě ná wa azɔ̌ n'i lɛ́ɛ wɛ.”

Kɛ́nsísɔ́ 14:34

Azǎn kanɖé (40) wɛ mi sɔ́ ɖó te bo dó ba do nú to ɔ́; mɔ̌ ɖokpó ɔ́, mi ná hɛn hwɛgban mitɔn lɛ́ɛ xɔ xwe kanɖé (40); xwe ɖokpó ɖo azǎn ɖokpó tɛnmɛ. Énɛ́ ɔ́, nú un húzú kpan nukɔn mɛ ɔ́ nǔ e ɖ'é mɛ ɔ́ mi ná tunwun.

Matíe 1:21

É ná ji vǐ súnnu ɖokpó, bɔ a nǎ sun nyǐ vǐ ɔ́ ɖɔ Jezu , ɖó é ná hwlɛ́n togun tɔn gán sín hwɛ tɔn lɛ́ɛ mɛ.”

Matíe 11:13

Ɖó gbeyíɖɔ Mawu tɔn lɛ́ɛ bǐ kpódó sɛ́n Mɔyízi tɔn lɛ́ɛ kpó ko ɖɔ xó dó axɔ́súɖuto sɛ́xwé tɔn wú káká wá jɛ Jǎan hwenu.

Matíe 4:5

Énɛ́ ɔ́ gúdo ɔ́, awǒvi kplá Jezu yi Jeluzalɛ́mu, to mímɛ́ ɔ́ mɛ, bó sɔ́ ɛ ɖó sinsɛnxɔ ɔ́ ta aga ɖéé,

Maki 1:24

“Étɛ́ wɛ mǐ kpó hwi kpó kpédó, Jezu Nazalɛ́tinu? Kún mǐtɔn sú dó gbé wɛ a ja bo wá a? Un tunwun mɛ e a nyǐ é; mɛ mímɛ́ Mawu tɔn wɛ a nyǐ.”

Luki 1:35

Wɛnsagun ɔ́ ká yí gbe n'i ɖɔ: “Yɛsinsɛn ná wá jǐ towe, bó ná ɖe hlɔ̌nhlɔ́n Mawu tɔn xlɛ́; énɛ́ ɔ́ wú wɛ vǐ e a nǎ ji ɔ́, è nǎ nɔ́ ylɔ́ ɛ ɖɔ mɛɖeɖóvo Mawu tɔn, bó ná nɔ́ ylɔ́ ɛ ɖɔ Mawu ví.

Luki 21:22

Đó hlɔnbiba sín azǎn wɛ azǎn énɛ́ lɛ́ɛ ná nyí, bɔ nǔ e è ko wlán ɖ'ayǐ é bǐ ná jɛ.

Jǎan 1:41

Nǔ nukɔntɔn e Andlé bló ɔ́, é wɛ nyí ɖɔ é yi mɔ nɔví tɔn Sinmɔ́ɔ, bo ɖɔ n'i ɖɔ: “Mǐ mɔ Mɛsíya ɔ́.”

Jǎan 3:34

Mɛ e Mawu sɛ́ dó ɔ́, Mawuxó wɛ é nɔ ɖɔ; ɖó Mawu nɔ ɖó jlɛ̌ nú Yɛ tɔn e é nɔ ná mɛ e é sɛ́ dó ɔ́ ǎ.

Mɛsɛ́dó 3:14

Midɛɛ lɛ́ɛ ɔ́, mi gbɛ́ mɛ e nyí mɛ mímɛ́, bó nyí hwɛjijɔnɔ ɔ́, bó ka byɔ́ ɖɔ è nǐ ɖe mɛ e nyí mɛhutɔ́ ɔ́ nyi te.

Mɛsɛ́dó 3:22

Mɔyízi ko ɖɔ jí: “Aklúnɔ Mawu mitɔn ná bló bɔ gbeyíɖɔ nyɛ ɖɔhun ɖokpó ná tɔ́n ɖo togun mitɔn mɛ. Mi ná ɖótó nǔ e é ná ɖɔ nú mi lɛ́ɛ bǐ sésé.

Mɛsɛ́dó 4:26

Axɔ́sú e ɖo wɛ̌kɛ́ ɔ́ mɛ lɛ́ɛ sɔ́ ahwan nú, bɔ gǎn lɛ́ɛ ɖó gbe kpɔ́, bó tɔ́n ahwan Aklúnɔ Mawu kpó Klísu tɔn kpó.’

Hlɔ̌manu 5:10

Kɛntɔ́ Mawu tɔn wɛ mǐ kó nyí ɖ'ayǐ; lo ɔ́, Mawu dó hwɛ gbɔ xá mǐ gbɔn kú e Vǐ tɔn kú ɔ́ gbla mɛ. Din e Mawu dó hwɛ gbɔ xá mǐ ɔ́, é ɖo gannaganna ɖɔ é ná hwlɛ́n mǐ gán gbɔn vǐ tɔn sín gbɛ gbla mɛ.

1 Kɔlɛ́ntinu 1:30

Lo ɔ́, Mawu dɔn mi kpó Klísu Jezu kpán ɖó bǔ, bó sɔ́ ɛ dó ɖó nǔnywɛ́ mǐtɔn. Gbɔn Klísu Jezu jí ɔ́, mǐ húzú hwɛjijɔnɔ ɖo Mawu nukɔn; Mawu ɖe mǐ ɖó vo gbɔn jǐ tɔn; é hwlɛ́n mǐ sín hwɛ mǐtɔn lɛ́ɛ mɛ gbɔn jǐ tɔn.

Filípunu 3:9

bó ná nɔ bǔ xá ɛ titewungbe; un sɔ́ nɔ́ lin ɖɔ tónú e un nɔ se nú sɛ́n ɔ́ wútu wɛ un nyí hwɛjijɔnɔ ɖo Mawu nukɔn ǎ; nǔɖiɖi e un ɖó nú Klísu ɔ́ wútu wɛ un nyí hwɛjijɔnɔ ɖo Mawu nukɔn. Un nyí hwɛjijɔnɔ ɖó Mawu ná mì hlɔ̌nhlɔ́n e é nɔ ná mɛ e ɖi nǔ nú Klísu lɛ́ɛ, bɔ yě ná sixú nyí hwɛjijɔnɔ é.

Kolósinu 1:20

Mɔ̌ ɖokpó ɔ́, é ɖɔ émí ná bló bɔ gbɛ ɔ́ bǐ ná dó hwɛ gbɔ xá émí; é ɖó fífá ayǐ gbɔn kú e Vǐ tɔn kú ɖo aklúzu jí é gbla mɛ, bɔ nǔ e ɖo ayǐkúngban jí lɛ́ɛ, kpódó ée ɖo sɛ́xwé lɛ́ɛ bǐ kpó dó hwɛ gbɔ xá ɛ.

Kolósinu 2:14

Wěma e jí è wlǎn hwɛ mǐtɔn lɛ́ɛ dó, bɔ è ɖo hwɛ dó mǐ wɛ, bɔ tito tɔn lɛ́ɛ ma sɔgbe xá mǐ ǎ ɔ́, Mawu ká wěma ɔ́ nyi aklúzu jí, bó súnsún hwɛ mǐtɔn e ɖ'é jí lɛ́ɛ bǐ.

Eblée 10:14

Đó, gbɔn vɔ̌ ɖokpó géé e Klísu sá ɔ́ gblá mɛ ɔ́, é bló bɔ mɛ e è slá wǔ ná lɛ́ɛ húzú mɛɖeɖóvo, bɔ nǔ bǐ vɔ ɖ'é wú káká sɔ́yi.

Eblée 2:17

Énɛ́ ɔ́ wú wɛ é ɖó ná húzú, bó cí nɔví tɔn lɛ́ɛ ɖɔhun ɖo ali lɛ́ɛ bǐ nu, bó ná sixú nyí vɔ̌sánú-xwlémawutɔ́ ɖaxó, gbejínɔtɔ́, kpódó nǔbláwǔkúnúmɛtɔ́ kpó ɖo mawuzɔ́ e wa wɛ é ɖe ɔ́ mɛ, bónú Mawu ná sɔ́ hwɛ e togun ɔ́ hu lɛ́ɛ kɛ ɛ.

Eblée 7:26

Hǔn, Jezu wɛ nyí vɔ̌sánú-xwlémawutɔ́ ɖaxó e jɛ xá mǐ é, ɖó é nyí mɛ mímɛ́; é wa nǔ nyanya ɖěbǔ ǎ; hwɛ ɖěbǔ ɖo kɔ n'i ǎ. È sɔ́ ɛ ɖó vo nú hwɛhutɔ́ lɛ́ɛ, bó sɔ́ ɛ dó jǐ aga ɖo sɛ́xwé.

Eblée 9:26

Ényí mɔ̌ wɛ é nyí ɔ́, é ɖó ná ko ji ya azɔn mɔ̌kpán sín hwenu e Mawu ɖó gbɛ ɔ́ dó é; nǔgbó ɔ́, azɔn ɖokpó géé jɛ́n é wá, bɔ xó fó, hwenu e nǔ lɛ́ɛ bǐ sín fífó ko sɛ yá é, bó sɔ́ éɖée dó sá vɔ̌ ná, bó ná dó ɖe hwɛhuhu síin.

2 Piyɛ́ɛ 1:1

Nyɛ Sinmɔ́ɔ Piyɛ́ɛ e nyí mɛsɛntɔ́ Jezu Klísu tɔn, bó nyí mɛsɛ́dó tɔn ɔ́ wɛ wlán wěma élɔ́; mɛ e è nǎ nǔɖiɖi xɔ akwɛ́ mǐtɔn ɖɔhun gbɔn azɔ̌ jlɔ́jlɔ́ e Mawu mǐtɔn Mɛhwlɛ́ngántɔ́ Jezu Klísu wa é gbla mɛ lɛ́ɛ wɛ un wlán sɛ́ dó, bó dó gbe yě.

1 Jǎan 3:8

Mɛ e nɔ ɖo hwɛ hu wɛ ɔ́, awǒvi tɔn wɛ é nyí, ɖó awǒvi ɔ́ ko ɖo hwɛ hu wɛ sín do, bɔ Mawu ví ɔ́ ka wá, bó ná sú awǒvi sín nǔwiwa lɛ́ɛ sín kún dó.

Nǔɖexlɛ́mɛ 14:6

Énɛ́ ɔ́ gúdo ɔ́, un mɔ wɛnsagun ɖěvo, bɔ é ɖo zinzɔn wɛ gbɔn jɔhɔn mɛ aga; é ɖó Wɛn Ɖagbe mavɔ mavɔ ɖé bó ná dó mɛ e ɖo ayǐkúngban jí lɛ́ɛ; é ná dó wɛn ɔ́ to bǐ, akɔta bǐ, gbe bǐ kpódó togun bǐ kpó.

Nǔɖexlɛ́mɛ 3:7

“Wlǎn wěma sɛ́ dó agun Klísu tɔn e ɖo Filadɛlufíi ɔ́ sín wɛnsagun, bó ɖɔ n'i ɖɔ: “Mɛ e nyí mɛ mímɛ́, bó nyí mɛ titewungbe ɔ́, mɛ e sí axɔ́sú Davídi sín cávi ɔ́ ɖe ɔ́, mɛ e nɔ hun hɔn bɔ mɛ ɖěbǔ ma nɔ sixú sú ǎ é, mɛ e nɔ sú hɔn bɔ mɛ ɖěbǔ ma nɔ sixú hun ǎ é ɔ́, xó e é ɖɔ ɔ́ ɖíe: