Daniyɛ́li 4:27 - MAWUXÓWÉMA

²⁷ lobo sú xó bó ɖɔ: “Kpɔ́n Babilɔ́nu to ɖaxó e un gbá, bó sɔ́ dó bló hɔnmɛ ná é! É xlɛ́ lě e un syɛ́n gbɔn é, é xlɛ́ lě e acɛkpikpa ce xɔ susu gbɔn é.”

Daniyɛ́li 4:27 Iomraidhean Croise

Bǐbɛ́mɛ 11:4

Yě lɛ́ ɖɔ: “Din ɔ́, mǐ ní gbá toxo ɖaxó ɖokpó, síngbó ɖaxó ɖokpó, bɔ é ná yi jǐ yi sɔ́ jǐnukúnsin. Énɛ́ ɔ́, nyǐkɔ mǐtɔn ná yi jǐ, bɔ mǐ ná gba kpé ayǐkúngban ɔ́ bǐ jí ǎ.”

1 Axɔ́sú 21:29

“A mɔ lě e Akábu sɔ́ éɖée hwe gbɔn ɖo nukɔn ce ɔ́ a? Ée é sɔ́ éɖée hwe mɔ̌ ɔ́, un sɔ́ ná kɔn nǔ nyanya dó xwédo tɔn jí hwenu e é ɖo axɔ́sú ɖu wɛ ɔ́ ǎ; lo ɔ́, vǐ tɔn hwenu wɛ nǔ nyanya ɔ́ ná kɔn dó xwédo tɔn jí.”

Ɖɛhan 119:46

Un ná ɖɔ sɛ́n towe lɛ́ɛ nú axɔ́sú lɛ́ɛ, winnyá ná hu mì ǎ.

Nǔnywɛ́xó 11:2

Goyíyí ɔ́, tɛ́ hu nú mɛ wɛ é nɔ́ dɔn wá. Amɔ̌, nǔwaɖójlɛ̌jí ɔ́, nǔnywɛ́tɔ́ lɛ́ɛ sí wɛ è nɔ mɔ ɖe.

Nǔnywɛ́xó 16:6

Mɛ e nyɔ́ xomɛ bó ɖo gbejí ɔ́, è nɔ sɔ́ hwɛ kɛ ɛ; mɛ e nɔ ɖó sísí nú Mawu Mavɔmavɔ ɔ́ nɔ́ hɔn nú hwɛhuhu.

Nǔnywɛ́xó 28:13

Mɛ e nɔ sɔ́ hwɛ tɔn hwlá ɔ́ nɔ yi nukɔn ǎ; amɔ̌, mɛ e nɔ ɖɔ hwɛ tɔn lɛ́ɛ, bó nɔ jó dó ɔ́, è nɔ sɔ́ hwɛ tɔn kɛ ɛ.

Ezayíi 10:13

É nɔ́ ɖɔ: “Nǔ e un wa lɛ́ɛ bǐ ɔ́, hlɔ̌nhlɔ́n ce kpó nǔnywɛ́ ce kpó wɛ un dó bló yě ná, ɖó un bí. Un ɖe dogbó ɖěɖě e ɖo togun lɛ́ɛ tɛ́ntin lɛ́ɛ sín, un gba agɔ̌ yětɔn lɛ́ɛ, un fɛ́ zinkpo sín axɔ́sú lɛ́ɛ glɔ́.

Ezayíi 47:10

Dǎka e a nɔ xo lɛ́ɛ wú wɛ a nɔ ɖeji dó; a nɔ́ ɖɔ: ‘Mɛ ɖé mɔ mì ǎ.’ Nǔnywɛ́ towe kpó nǔ e a tunwun ɔ́ kpó wɛ flú we, bɔ a nɔ ɖɔ: ‘Nyɛ ɔ́, è sixú jlɛ́ mì dó mɛɖé wú ǎ.’

Ezayíi 47:8

Din ɔ́, gbɛɖutɔ́, ɖǒtó mì; a jǐnjɔ́n ayǐ towe, bó vo bó nɔ ɖɔ dó ayi mɛ ɖɔ: ‘Nyɛ ɔ́, è sixú jlɛ́ mì dó mɛɖé wú ǎ; un ná nyí asúkúsi gbeɖé ǎ; vǐ ce lɛ́ɛ ɖě ká ná hwe gbeɖé ǎ.’

Jelemíi 29:7

Mi ba lě e toxo e mɛ un sɔ́ ahwan dó wlí mi yi ɖó ɔ́ ná yi nukɔn gbɔn é; mi xo ɖɛ nú Mawu Mavɔmavɔ dó toxo ɔ́ tamɛ, ɖó nyɔ̌ná mitɔn ɖo nukɔn yiyi to ɔ́ tɔn sí.’

Jelemíi 38:20

Énɛ́ ɔ́, Jelemíi ɖɔ: “È nǎ jó we nú yě ǎ. Tunwun ɖɔ xó e ɖɔ nú we wɛ un ɖe ɔ́, Mawu Mavɔmavɔ wɛ ɖo ɖiɖɔ nú we wɛ; bo ɖótó mì, énɛ́ ɔ́, nǔ towe bǐ ná nyɔ́, bɔ nǔɖé ná wa we ǎ.

Ezekiyɛ́li 18:7

é nɔ́ táfú mɛ ǎ; è sɔ́ nǔ ɖó gbanu ɖo gɔ̌n tɔn bó wá sú axɔ́ ɔ́, é nɔ́ zé jó; é nɔ́ ja ajo ǎ; é nɔ́ ná nǔɖuɖu mɛ e xovɛ́ sin é, bó nɔ́ ná avɔ mɛ e ɖo mɛ̌ é;

Ezekiyɛ́li 29:3

Xó e nyɛ Aklúnɔ Mavɔmavɔ ɖɔ sɛ́ dó e ɔ́ ɖíe: un ná wa nǔ xá we Ejípu xɔ́sú. Un ná wa nǔ xá we; lǒ ɖaxó ɖé wɛ a nyǐ, bó mlɔ́ tɔ e ɖo to towe mɛ lɛ́ɛ tɛ́ntin, bó nɔ́ ɖɔ: Nilu tɔ ɔ́ kpó ala tɔn lɛ́ɛ kpó ɔ́, nyi wɛ bló yě.

Ezekiyɛ́li 29:9

Ejípu to ɔ́ ná jɛ vɔ̌ káká bó cí gbětótló ɖɔhun, bɔ è nǎ tunwun ɖɔ nyi wɛ nyí Mawu Mavɔmavɔ. “A ɖɔ Nilu tɔ ɔ́, émítɔn tɔn wɛ, émí ɖésú wɛ bló.

Jowɛ́li 2:14

Afɔ nyɔ́ ɔ́, é sixú jó nǔ e é kó lin bó ná wa ɖ'ayǐ ɔ́ dó, bó ná nyɔ̌ná mi túnflá. Énɛ́ ɔ́, mi hɛn ɔ́, mi ná hɛn jinukún kpó vɛ̌ɛn kpó wá n'i.

Amɔ́si 6:13

Nǔmaɖinǔ lɛ́ɛ tamɛ wɛ mi nɔ j'awǎ dó. Mi nɔ ɖɔ: “É ma nyí hlɔ̌nhlɔ́n mǐtɔn wɛ zɔ́n bɔ mǐ kpé nǔ bǐ wǔ ǎ cé?

Jonási 3:9

Afɔ nyɔ́ ɔ́, Mawu ná húzú gbe, bó ná jó xomɛsin dó bɔ mǐ sɔ́ ná dɔn ǎ.”

Xabakúku 1:11

Yě nɔ́ dín jɔhɔn ɖaxó ɖé ɖɔhun, bó nɔ́ lɛ́ yi tɔ́n ɖo fí ɖěvo. Hlɔ̌nhlɔ́n yětɔn wɛ nyí mawu e yě nɔ́ sɛn é.

Sofoníi 2:15

Nǔ e ná wá gbo toxo élɔ́ e nɔ ɖo afɔ tɛ ayǐ wɛ, bó nɔ́ mɔ ɖɔ nǔɖé kún ná jɛ ó, émí kún nyí mɛ ɖé gbɛ́ ó é nɛ́. Yéége! É gba bǐ. É húzú adɔ̌tɛn nú kanlin lɛ́ɛ. Mɛ e ná gbɔn toxo élɔ́ kpá dín lɛ́ɛ bǐ ná sɔ́ alɔ ɖó nu bo sú xó.

Matíe 3:8

Nǔwiwa mitɔn lɛ́ɛ ní bó ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo nǔgbó.

Luki 11:41

Mi gbɔ bó ná nǔɖuɖu e ɖo kɔ́fu kpódó agbǎn kpó xomɛ ɔ́ wamamɔnɔ lɛ́ɛ; énɛ́ ɔ́, nǔ bǐ ná nyí nǔ mímɛ́ ɖo nukún mitɔn mɛ.

Mɛsɛ́dó 24:25

Lo ɔ́, ée Pɔ́lu ɖo xó ɖɔ dó lě e è nǎ zán gbɛ ɖagbe gbɔn é wú wɛ, bó ɖo xó ɖɔ dó lě e è nǎ ɖu ɖo mɛ ɖésúnɔ jí gbɔn é wú wɛ, bó lɛ́ ɖo xó ɖɔ dó lě e Mawu na wá ɖɔ hwɛ xá gbɛtɔ́ lɛ́ɛ gbɔn ɔ́ wú wɛ ɔ́, xɛsi jɛ Felísi jí, bɔ é ɖɔ nú Pɔ́lu ɖɔ: “To yi hwɛ̌; un ko wá mɔ vivo ɔ́, un ná lɛ́ ylɔ́ we.”

Mɛsɛ́dó 26:20

Lo ɔ́, un to yi ɖɔ Mawuxó ɔ́ nú Damásinu lɛ́ɛ kpódó Jeluzalɛ́munu lɛ́ɛ kpó hwɛ̌, bó lɛ́ wá yi ɖɔ nú mɛ e ɖo Judée gbé jí lɛ́ɛ bǐ, kpódó mɛ e ma nyí Jwifu ǎ lɛ́ɛ kpán, bó ɖɔ nú yě ɖɔ yě ní lɛ́ kɔ sín hwɛ yětɔn lɛ́ɛ gúdo; yě ní wá Mawu gɔ́n; yě ní nɔ wa nǔ e ná ɖe xlɛ́ ɖɔ yě lɛ́ kɔ sín hwɛ yětɔn lɛ́ɛ gúdo nǔgbó é.

Mɛsɛ́dó 8:22

Hǔn, bo lɛ́ kɔ sín linlin towe nyanya énɛ́ gúdo, bó sa vo nú Aklúnɔ, bónú nǔ sixú nyí mɔ̌ ɔ́, é ná sɔ́ nǔ nyanya énɛ́ e a lin ɔ́ kɛ we;

2 Kɔlɛ́ntinu 5:11

Mǐ tunwun nǔ e nyí sísí ɖó nú Aklúnɔ é, bó ɖo biba wɛ nú gbɛtɔ́ lɛ́ɛ ná wá mǐtɔn jí. Mawu tunwun mǐ céɖécéɖé, bɔ un ɖi ɖɔ, ɖo ayi mi ɖésúnɔ tɔn mɛ ɔ́, mi tunwun nyɛ lɔmɔ̌.

Galatinu 5:13

Nɔví lɛ́ɛ mi, midɛɛ lɛ́ɛ ɔ́, mi ná nɔ mi ɖésúnɔ sí wú wɛ Mawu ylɔ́ mi; amɔ̌ mi ma kpɔ́n ɖɔ émí ko ɖo émí ɖésúnɔ sí, bó wa nǔ e jló mi ɔ́ ó. Lo ɔ́, mi xwedó wǎn yíyí Mawu tɔn, bó húzú mɛsɛntɔ́ nú miɖée.

Galatinu 5:22

Lo ɔ́, nǔ e Yɛsinsɛn nɔ ná mɛ ɔ́ wɛ nyí wǎn yíyí, xomɛhunhun, vivo mimɔ, suúluɖíɖó, xomɛnyínyɔ́, ɖagbewiwa, gbejíninɔ,

Galatinu 5:6

ɖó ényí mǐ ɖo kpɔ́ xá Klísu Jezu ɔ́, adagbigbo nyí nǔɖé ǎ; adamagbo lɔ ka nyí nǔɖé ǎ. Nǔ e ɖo tají ɔ́ wɛ nyí nǔɖiɖi e nɔ wa nǔ kpódó wǎn yíyí kpó é.

Efɛ́zinu 4:28

Mɛ e nɔ jɛ ajo ɖ'ayǐ ɔ́, ní jó ajo dó bó wa azɔ̌, bó nyí é ɖésúnɔ kpódó ayijlɔ́jlɔ́ kpó; énɛ́ ɔ́, é ná ɖó nǔ e é ná dó dó alɔ mɛ e nǔɖé hudó lɛ́ɛ é.

Sɛ́nflínmɛ 24:13

Ényí hwe yi xɔ ɔ́, mi ná sɔ́ wá n'i, bɔ é ná dó awu ɔ́ bó yi xɔ, bó ná xo ɖɛ nú mi. Mi bló mɔ̌ ɔ́, é ná nyí nǔ ɖagbe bɔ mi ná wa ɖo Mawu Mavɔmavɔ, Mawu mitɔn nukɔn.

Sɛ́nflínmɛ 32:27

Lo ɔ́, un ɖo xɛsi ɖi wɛ ɖɔ kɛntɔ́ yětɔn lɛ́ɛ ní má ko mì ó; yě táá vɛdó ɖɔ émí wɛ bló bɔ nǔ cí mɔ̌ nú yě sín, lobo ná lin ɖɔ nyi kún mɔ do nú nǔɖé ó.

Sɛ́nflínmɛ 8:17

Hwenu e nǔ ná nyɔ́ nú mi ɖo to ɔ́ mɛ ɔ́, mi ma lin gbeɖé ɖɔ émí ɖésú wɛ dó gǎn, bó wa nǔ bɔ nǔ nyɔ́ nú émí ó.

1 Piyɛ́ɛ 4:8

Nǔ e mi ná wa jɛ nukɔn nú nǔ lɛ́ɛ bǐ ɔ́ wɛ nyí ɖɔ mi ní ɖó wǎn yíyí ɖaxó nú miɖée; ɖó wǎn yíyí ɔ́ nɔ súnsún hwɛ wɔ̌buwɔ́bú e è hu ɔ́ sín kɔ nú mɛ.