2 Piyɛ́ɛ 1:3 - MAWUXÓWÉMA

³ Hlɔ̌nhlɔ́n Mawu tɔn e Aklúnɔ ɖó ɔ́ ná nǔ e ɖo tají bɔ mǐ ná dó ɖó sísí nú Mawu ɖo gbɛzán mǐtɔn mɛ ɔ́ bǐ mǐ; é wɛ nyí ɖɔ: é bló bɔ mǐ tunwun Mawu e ylɔ́ mǐ bónú mǐ ná ɖó mǐmá ɖo susu é ɖésúnɔ tɔn kpó xomɛnyínyɔ́ tɔn kpó mɛ é.

2 Piyɛ́ɛ 1:3 Iomraidhean Croise

Ɖɛhan 110:3

Gbe e gbe a nǎ sɔ́ ahwannú bó xwe ahwan ɔ́, ahwanfuntɔ́ akowunká kɛ́ɖɛ́ wɛ ná kplá we yi. Dɔ̌nkpɛvú towe lɛ́ɛ ná sɛ kplé dó wǔ we, ɖo só mímɛ́ ɔ́ jí, ahǔn e nɔ́ ja ayǐtéhɔ̌nnu é ɖɔhun.

Ɖɛhan 84:11

Nǔgbó ɔ́, è nɔ kɔ́xo towe lɛ́ɛ ta xɔ azǎn ɖokpó ɔ́, é nyɔ́ hú è blǒ azǎn afatɔ́n ɖo fí ɖěvo. Mawu ce, un yí wǎn nú xwé towe lihɛ́nnu ninɔ hú adǎkaxotɔ́ lɛ́ɛ xwé ninɔ.

Nǔnywɛ́xó 12:4

Nyɔ̌nu e nyí nyɔ̌nu jɔ nyɔ̌nu ɔ́, wi wɛ é nyí bó ɖo ta nú asú tɔn. Nyɔ̌nu e nɔ́ dó winnyá mɛ é ká nyí xúɖuxúɖu ɖo lanmɛ nú asú tɔn.

Nǔnywɛ́xó 31:10

Nǔ nyɔ́ nú mɛ e mɔ nyɔ̌nu jɔ nyɔ̌nu é. Nyɔ̌nu jɔ nyɔ̌nu xɔ akwɛ́ hú jɛ̌ nana.

Nǔnywɛ́xó 31:29

Asú tɔn nɔ́ ɖɔ: “Nyɔ̌nu gěgé ɖó zǐnzán ɖagbe, amɔ̌, towe hú yě bǐ tɔn.”

Matíe 28:18

Jezu ka sɛ yá yě, bó ɖɔ nú yě ɖɔ: “Mawu ná acɛ e ɖo jǐnukúnsin, kpódó ée ɖo ayǐkúngban jí ɔ́ kpó bǐ mì.

Hlɔ̌manu 8:32

Éyɛ́ mɛ e ma hwlɛ́n Vǐ é ɖésúnɔ tɔn ǎ, bó sɔ́ ɛ jó dó mǐ bǐ tamɛ ɔ́, nɛ̌ é ma ka ná ná nǔ bǐ mǐ kpó Vǐ tɔn kpó ǎ gbɔn?

Hlɔ̌manu 9:24

Đó mǐdɛɛ lɛ́ɛ wɛ nyí mɛ e é ylɔ́ lɛ́ɛ; é ka nyí mɛ e é ylɔ́ sín Jwifu lɛ́ɛ mɛ lɛ́ɛ kɛ́ɖɛ́ wɛ ǎ, lo ɔ́, mɛ e é ylɔ́ sín togun ɖě lɛ́ɛ mɛ lɛ́ɛ lɔ ɖ'é mɛ.

1 Kɔlɛ́ntinu 1:9

Mawu ɖo gbejí. É wɛ ylɔ́ mi, bónú mi ná nɔ bǔ xá Vǐ tɔn Aklúnɔ mǐtɔn Jezu Klísu.

2 Kɔlɛ́ntinu 12:9

Bɔ Mawu yí gbe nú mì ɖɔ: “Wǔjɔmɛ ce wɛ nyí nǔ e hudó we ɔ́ bǐ, ɖó hwenu e a ma kpé nǔ wú ǎ ɔ́ wɛ hlɔ̌nhlɔ́n ce nɔ́ ɖe nǔwiwa tɔn lɛ́ɛ bǐ xlɛ́ dégbédégbé.” Hǔn, un ɖo gbesisɔ mɛ bó ná sɔ́ gǎnmaɖó ce dó jlá ajɔ̌ nú nyɛɖée kpó ayixa ce bǐ kpó, bónú hlɔ̌nhlɔ́n Klísu tɔn ná cyɔ́n alɔ jǐ ce.

Efɛ́zinu 4:1

Đó nǔ énɛ́ lɛ́ɛ bǐ wú ɔ́, nyɛ mɛ e ɖo ganxó ɖó un ɖo Aklúnɔ sɛn wɛ wútu ɔ́, un ɖo byɔ̌byɔ́ mi wɛ ɖɔ mi ní zán gbɛ mitɔn ní sɔgbe xá lě e Mawu jló gbɔn hwenu e é ylɔ́ mi é.

Efɛ́zinu 4:4

Agbaza ɖokpó géé wɛ ɖe, bɔ Yɛsinsɛn ɖokpó géé ɖe lě e nukúnɖíɖó e wú Mawu ylɔ́ mǐ é lɔ nyí ɖokpó géé gbɔn é.

Filípunu 3:8

É nyí nǔ énɛ́ lɛ́ɛ kɛ́ɖɛ́ wɛ un mɔ dó mɔ nǔ lá mɛ ná ǎ; lo ɔ́, nǔ lɛ́ɛ bǐ wɛ un mɔ dó mɔ nǔ lá mɛ ná, ɖó vǐví ɖaxó e un mɔ hwenu e un wá tunwun ɖɔ Klísu Jezu ɔ́, Aklúnɔ ce wɛ é nyí ɔ́ wútu; éyɛ́ wútu wɛ un gbɛ́ nǔ bǐ, bó nɔ́ mɔ nǔ bǐ dó mɔ babá, bó ná sixú nyí étɔn,

Filípunu 4:8

Nɔví ce lɛ́ɛ mi, bó ná dó fó xó ce ɔ́, un ɖo byɔ̌byɔ́ mi wɛ ɖɔ ayixa mitɔn ní nɔ nǔ e nyɔ́, bɔ susu jɛ xá lɛ́ɛ jí: nǔ e nyí nǔgbó ɔ́ bǐ, nǔ e è nǎ ɖó sísí ná é, nǔ e sɔgbe é, nǔ e mɛ́ é, nǔ e nɔ nyɔ́ mɛ nukún mɛ é kpódó nǔ e wlí yɛ̌yi ɔ́ kpán; ayixa mitɔn ní nɔ nǔ énɛ́ lɛ́ɛ jí.

Kolósinu 1:16

Đó jǐ tɔn wɛ Mawu bló nǔ e ɖo jǐnukúnsin lɛ́ɛ kpódó ée ɖo ayǐkúngban jí lɛ́ɛ bǐ kpán gbɔn: nǔ e mɔ wɛ è ɖe lɛ́ɛ kpódó ée è ma ɖo mimɔ wɛ ǎ lɛ́ɛ kpó, hlɔ̌nhlɔ́n nǔɖoyɛswímɛ tɔn lɛ́ɛ, gǎnhúnǔtɔ́ lɛ́ɛ, gǎn lɛ́ɛ kpódó acɛkpikpa lɛ́ɛ kpán; jǐ tɔn wɛ Mawu bló nǔ lɛ́ɛ bǐ gbɔn, bɔ nǔ lɛ́ɛ bǐ nyí étɔn.

1 Tɛsalonikinu 2:12

Mǐ nɔ ɖo nǔ kplɔ́n mi wɛ, bó nɔ ɖo gbɔ dó nú mi wɛ, bó nɔ byɔ́ mi syɛ́nsyɛ́n ɖɔ gbɛzínzán mitɔn ní nyɔ́ Mawu e ylɔ́ mi dó axɔ́súɖuɖu tɔn kpó susu tɔn kpó mɛ ɔ́ sín nukún mɛ.

1 Tɛsalonikinu 4:7

Đó Mawu ylɔ́ mǐ, bónú mǐ ná wa nǔ blíblí ǎ; lo ɔ́, é ylɔ́ mǐ nú mǐ ná zán gbɛ mímɛ́.

2 Tɛsalonikinu 2:14

Nǔ énɛ́ wú wɛ Mawu ylɔ́ mi gbɔn Wɛn Ɖagbe e mǐ dó mi ɔ́ gbla mɛ; é ylɔ́ mi bónú mi ná ɖó susu Aklúnɔ mǐtɔn Jezu Klísu tɔn.

1 Timɔtée 4:8

Agbaza mɛ gándídó ɔ́, nǔ ɖagbe wɛ; amɔ̌ nǔ kpɛɖé jɛ́n wɛ é nyɔ́ ná; ayi mɛ gándídó ɔ́ ka nyɔ́ nú nǔ lɛ́ɛ bǐ, ɖó é dó akpá nú mi ɖɔ mi ná mɔ gbɛ din tɔn, kpódó ée ja ɔ́ kpó.

2 Timɔtée 1:9

É wɛ hwlɛ́n mǐ gán, bó ylɔ́ mǐ nú mǐ ná nyí mɛɖeɖóvo tɔn; é ká nyí nǔ e mǐ nɔ wa lɛ́ɛ wútu wɛ é ylɔ́ mǐ ǎ; lo ɔ́, tito é ɖésúnɔ tɔn kpódó fɛ́nú tɔn kpó wú wɛ é ylɔ́ mǐ. É ko ná fɛ́nú énɛ́ mǐ ɖo bǔ e mǐ ɖe ɖo Klísu Jezu mɛ cóbɔ gbɛ ɔ́ wá tíin é mɛ.

Eblée 1:3

É wɛ nyí susu Mawu tɔn sín wěziza sín xlɛ́, bó nyí Mawu sín xlɛ́ titewungbe tɔn. É sɔ́ xó tɔn hlɔ̌nhlɔ́nnɔ ɔ́ dó hɛn gbɛ ɔ́ ɖó te. Ée é lɛ gbɛtɔ́ lɛ́ɛ wé sín hwɛ yětɔn lɛ́ɛ mɛ gúdo ɔ́, é jínjɔ́n Mawu e nyí hlɔ̌nhlɔ́n bǐ nɔ ɔ́ sín ɖisíxwé ɖo sɛ́xwé.

1 Piyɛ́ɛ 1:15

Lo ɔ́, mi ní nyí mɛ mímɛ́ ɖo nǔwiwa mitɔn bǐ mɛ, lě e Mawu e ylɔ́ mi ɔ́ nyí mɛ mímɛ́ gbɔn é.

1 Piyɛ́ɛ 1:5

nú mi mɛ e hlɔ̌nhlɔ́n tɔn ɖo hinhɛn wɛ gbɔn nǔɖiɖi jí káká jɛ hwenu e hwlɛngán e ko sɔgbe, bɔ è nǎ ɖe xlɛ́ ɖo hwenu gǔdo gúdo tɔn lɛ́ɛ mɛ ɔ́ ná wá dó é.

1 Piyɛ́ɛ 2:21

Nǔ e Mawu ylɔ́ mi na é nɛ́; ɖó Klísu ɖésúnɔ ji ya dó ta mitɔn mɛ, bó jó xlɛ́ tɔn nyi ayǐ nú mi, bónú mi ná zé afɔ dó afɔdo tɔn lɛ́ɛ mɛ.

1 Piyɛ́ɛ 2:9

Amɔ̌ midɛɛ lɛ́ɛ ɔ́, akɔta e è cyán ɔ́ wɛ mi nyí, bó nyí vɔ̌sánú-xwlémawutɔ́ axɔ́sú ɔ́ tɔn; akɔta ɖe ɖó vo wɛ mi nyí, bó nyí togun Mawu tɔn. Mawu e ylɔ́ mi nú mi ná gosín ablu mɛ, bó wá wěziza tɔn ɖagbe ɖagbe ɔ́ nu ɔ́ cyán mi bónú mi ná jlá azɔ̌ ɖagbe ɖagbe e é nɔ wa lɛ́ɛ.

1 Piyɛ́ɛ 3:9

Mi ma zé nyanya dó sú nyanya xɔ ná ó, abǐ mi ma zé zun dó sú zun xɔ ná ó; é nyɔ́ wa ɔ́, nyɔ̌ná wɛ mi ná nɔ byɔ́ ɖo Mawu gɔ́n dó sú axɔ́ ná; nǔ e Mawu ylɔ́ mi ná é nɛ́.

1 Piyɛ́ɛ 5:10

Lo ɔ́, ényí mi ji ya nú hwenu kpɛɖé gúdo ɔ́, Mawu fɛ́nú bǐ nɔ e ylɔ́ mi nú mi ná ɖó mǐmá ɖo susu tɔn mavɔ mavɔ ɔ́ mɛ, ɖo bǔ e mi ɖe xá Klísu ɔ́ mɛ ɔ́, é ɖésúnɔ ná wa azɔ̌ ɖo mi wú, bɔ mi ná nyɔ́ yí fó; é ná bló bɔ mi ná syɛ́nlǐn; é ná ná hlɔ̌nhlɔ́n mi; é ná dó mi do nyi dodó syɛ́nsyɛ́n lɛ́ɛ jí.

2 Piyɛ́ɛ 1:10

Énɛ́ ɔ́ wú ɔ́, nɔví lɛ́ɛ mi, mi lɛ́ dó gǎn d'é jí, bó zán gbɛ mitɔn nú é ní sɔgbe xá ylɔ̌ e Mawu ylɔ́ mi ɔ́ kpó cyán e é cyán mi ɔ́ kpó; ɖó nú mi nɔ wa nǔ gbɔn alɔkpa énɛ́ mɛ ɔ́, mi ná jɛ nǔ nyanya mɛ gbeɖé ǎ.

2 Piyɛ́ɛ 1:2

Mawu ní ná fɛ́nú kpó fífá kpó mi, bónú é túnflá ɖó Mawu kpó Aklúnɔ mǐtɔn Jezu kpán e mi tunwun ɔ́ wú.

2 Piyɛ́ɛ 1:5

Đó mǐmá e mi ná ɖó ɖo ninɔmɛ Mawu tɔn mɛ ɔ́ wú ɔ́, mi zán hlɔ̌nhlɔ́n e ɖo mi wú ɔ́ bǐ, bó ɖó zǐnzán ɖagbe gɔ́ nú nǔɖiɖi mitɔn, bó ɖó nǔtunwuntunwun gɔ́ nú zǐnzán ɖagbe mitɔn.

2 Piyɛ́ɛ 1:6

Bó ɖó mɛɖéejíɖuɖe gɔ́ nú nǔtunwuntunwun, bó ɖó suúlu gɔ́ nú mɛɖéejíɖuɖe, lobo zé sísí ɖó nú Mawu gɔ́ nú suúlu.

2 Piyɛ́ɛ 1:8

Jijɔ énɛ́ lɛ́ɛ wɛ mi ɖó ná ɖó; ényí mi ɖó jijɔ énɛ́ lɛ́ɛ bónú é túnflá ɔ́, yě ná zɔ́n bɔ, ɖo Aklúnɔ mǐtɔn Jezu Klísu sín tunwuntunwun mɛ ɔ́, mi sɔ́ ná ɖi fɔnlín ǎ, mi ka sɔ́ ná gɔn sínsɛ́n ǎ.

2 Piyɛ́ɛ 2:20

Nǔgbó ɔ́, ényí yě mɛ e tunwun Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn, bó ma ka ko hɔn sín nǔblíblíwiwa gbɛmɛ fí tɔn lɛ́ɛ mɛ zinzin ǎ lɛ́ɛ lɛ́ jó yěɖée dó nú nǔblíblíwiwa énɛ́ lɛ́ɛ, bɔ yě ɖu ɖo yě jí ɔ́, ninɔmɛ e yě nɔ wá ɖó ɖo vivɔnu ɔ́ nɔ lɛ́ nylá hú ée yě ko ɖó ɖo bǐbɛ́mɛ é.

2 Piyɛ́ɛ 3:18

Lo ɔ́, mi ní ɖo Jezu Klísu e nyí Aklúnɔ mǐtɔn, bó nyí Mɛhwlɛ́ngántɔ́ mǐtɔn ɔ́ tunwun d'é jí wɛ, bó ɖo fɛ́nú tɔn tunwun d'é jí wɛ. Susu n'i sín din káká sɔ́yi mavɔ mavɔ. Amǐ.

Hwliti 3:11

Din ɔ́ yɔkpɔ́, ma ɖi xɛsi ó, un ná bló nǔ e a nǎ ɖɔ ɔ́ bǐ nú we, ɖó mɛ bǐ wɛ tunwun ɖɔ nyɔ̌nu jijɔɖagbenɔ wɛ nú we.