2 Timɔtée 2:21 - MAWUXÓWÉMA

²¹ Ényí mɛɖé sixú ɖe nǔ nyanya e xó un ɖɔ ɔ́ sín gbɛzán tɔn mɛ ɔ́, nǔjɔnǔ wɛ è nǎ nɔ sɔ́ ɛ dó bló ná ɖó é ɖo gǎn tɔn sín acɛ mɛ bǐ sésé, bó jɛ alɔ n'i, bó ɖo gbesisɔ mɛ, bɔ é ná sɔ́ ɛ dó wa nǔ ɖagbe bǐ ná.

2 Timɔtée 2:21 Iomraidhean Croise

Ɖɛhan 119:9

Mawu, è ɖo wǐnnyáwínnyá mɛ ɔ́, nɛ̌ è ka sixú bló gbɔn bó ná nɔ́ zán gbɛ ɖagbe? Xó towe jɛ́n è nǎ nɔ́ xwedó dó wa nǔ.

Ezayíi 1:25

Jeluzalɛ́mu, alɔ ce ná lɛ́ jɛ wǔ we; un ná zé zo dó slá wǔ nú we, lě e è nɔ xo zo dó gan bó nɔ́ ɖe nǔ kwíji kwíji sín mɛ ɔ́ ɖɔhun; un ná ɖe ɖɛ zunkɔ́ towe lɛ́ɛ bǐ.

Ezayíi 52:11

Mi mɛ e lɛ́ kɔ nú nǔ e è nɔ zán sinsɛn hwenu lɛ́ɛ sín Babilɔ́nu xwe Jeluzalɛ́mu lɛ́ɛ ɔ́, mi ɖidó, mi gosín Babilɔ́nu, mi yá wǔ; mi ma ɖ'alɔ nǔ kwíji ɖěbǔ wú ó. Mi hɛn miɖée ɖó mǐmɛ́ jí bó tɔ́n sín fí.

Jelemíi 15:19

Ée un ɖɔ mɔ̌ ɔ́, Mawu Mavɔmavɔ ɖɔ nú mì ɖɔ: “Ényí a lɛ́ kɔ wá ɔ́, un ná yí we, bɔ a nǎ nɔ wa azɔ̌ nú mì. Ényí a ɖo gbesisɔ mɛ bó ná nɔ́ ɖɔ xójɔxó, bó ná jó xógblóɖiɖɔ dó ɔ́, a nǎ lɛ́ nyí gbeyíɖɔ ce. Amɔ̌, hwi wɛ ka na lɛ́ kɔ yi Judáanu lɛ́ɛ gɔ̌n ǎ, yě wɛ na lɛ́ kɔ wá gɔ̌n towe.

Malacíi 3:3

É ná jɛ fínɛ́, bó ná za zunkɔ́ lɛ́ɛ, bó ná ɖe nǔ kwíji lɛ́ɛ síin. É ná slá wǔ nú Levíi ví vɔ̌sánú-xwlémawutɔ́ lɛ́ɛ bǐ dégbédégbé, lě e è nɔ́ xo zo dó siká kpódó kpatágan kpó, bó nɔ́ ɖe nǔ kwíji sín mɛ gbɔn é, bɔ vɔ̌sánú-xwlémawutɔ́ énɛ́ lɛ́ɛ ná xwlé vɔ̌sánú yětɔn lɛ́ɛ Mawu Mavɔmavɔ, lě e è nɔ́ bló gbɔn ɖ'ayǐ é.

Mɛsɛ́dó 9:15

Aklúnɔ ka ɖɔ n'i ɖɔ: “Vɛ̌ yi, ɖó nya énɛ́ ɔ́, alǐnnyánú ɖé wɛ é nyí, bɔ un sɔ́, bó ná dó wa azɔ̌ ná, nú é ná jlá nyǐkɔ ce mɛ e ma nyí Jwifu ǎ lɛ́ɛ, bó ná jlá axɔ́sú yětɔn lɛ́ɛ, kpódó Izlayɛ́li togun ɔ́ kpó.

1 Kɔlɛ́ntinu 5:7

Mi ɖe hwɛhuhu sín tɔ́n xóxó énɛ́ ɔ́ síin, bónú mi ná húzú linfín nyinya yɔ̌yɔ́; ɖó linfín nyinya yɔ̌yɔ́ e mɛ è ma dó tɔ́n ǎ é wɛ mi nyí; ɖó Klísu e nyí Dǐndínwáyixwe mǐtɔn sín lɛ̌ngbɔ́ví ɔ́, è ko sɔ́ ɛ dó sá vɔ̌ ná.

2 Kɔlɛ́ntinu 7:1

Mɛvívɛ́ná ce lɛ́ɛ mi, akpá énɛ́ lɛ́ɛ e Mawu dó ɔ́, mǐ wɛ é dó yě ná. Énɛ́ ɔ́ wú ɔ́, mǐ ní slá wǔ nú agbaza kpó lǐndɔ̌n kpó, bó dó gǎn, bó ɖi xɛsi nú Mawu ɖo gbɛzán mǐtɔn mɛ, lobo ná nyí mɛ mímɛ́ yi fó.

2 Kɔlɛ́ntinu 9:8

Mawu ɖó acɛ e ná ná nǔ ɖagbe ɖagbe tɛnmɛ tɛnmɛ lɛ́ɛ bǐ mi é, é ná ná mi, bɔ é ná túnflá, bónú mi ná ɖó nǔ e ɖo tají nú mi lɛ́ɛ bǐ hwebǐnu, bó ná zán, bɔ é ná lɛ́ kpo ɖo mi sí ganjí, nú azɔ̌ ɖagbe lɛ́ɛ bǐ.

Efɛ́zinu 2:10

Đó nǔwiwa tɔn wɛ mǐ nyí; ɖo bǔ e mǐ ɖe xá Klísu Jezu é mɛ ɔ́, é bló mǐ, bónú mǐ ná zán gbɛ e gɔ́ nú nǔ ɖagbe wiwa é. Nǔ ɖagbe wiwa énɛ́ lɛ́ɛ wɛ é ɖésúnɔ kó sɔ́ ɖ'ayǐ nú mǐ, bónú mǐ ná bló.

1 Timɔtée 6:11

Amɔ̌ hwɛ mawuzɔ́watɔ́ ɔ́, ɖǒ wǔ zɔ nú nǔ énɛ́ lɛ́ɛ bǐ, bó xwedó hwɛjijɔ, bó nɔ sí Mawu, bó ɖó nǔɖiɖi, bó ɖó wǎn yíyí, bó ɖó hǔnkúkú kpódó xomɛfífá kpó.

2 Timɔtée 2:16

Jǒ xógbló kpódó xó e ma sɔgbe xá Mawuxó ɔ́ ǎ lɛ́ɛ kpó dó; ɖó mɛ e nɔ ɖɔ xó énɛ́ lɛ́ɛ é fɔ́n tɛgbɛ ɔ́, yě ná nɔ ɖo zɔ sɛ yi nú Mawu wɛ;

2 Timɔtée 2:20

Agbǎn e è sɔ́ siká abǐ kpatágan dó bló ná lɛ́ɛ kɛ́ɖɛ́ wɛ è nɔ mɔ ɖo xwé ɖaxó ɖokpó gbe ǎ; è nɔ lɛ́ mɔ agbǎn e è sɔ́ atín dó bló ná ɔ́ kpódó ée è sɔ́ ko dó bló ná ɔ́ kpó. Agbǎn nukɔntɔn lɛ́ɛ ɔ́, hwenu e è ja nǔjɔnǔ ɖé wa gbé ɔ́ wɛ è nɔ ɖe yě tɔ́n; amɔ̌ ɖě lɛ́ɛ ɔ́, è nɔ zán yě nú nǔ yǎyá lɛ́ɛ.

2 Timɔtée 3:17

bónú mɛ e nyí Mawu tɔn ɔ́ ná ɖo gbesisɔ mɛ titewungbe, bɔ nǔ e é ná dó wa nǔ ɖagbe bǐ na ɔ́ bǐ ná ɖo así tɔn.

2 Timɔtée 4:11

Luki kɛ́ɖɛ́ wɛ kpo ɖo gɔ̌n ce; kplá Maki bónú hwi kpó e kpó ní zɔn wá; ɖó é hɛn ɔ́, é ná d'alɔ mì ɖo azɔ̌ ce lɛ́ɛ mɛ.

Titu 3:1

A nǎ nɔ́ flín mɛ lɛ́ɛ bǐ ɖɔ yě ɖó ná nɔ́ hwíhwɛ́ yěɖée dó gǎn lɛ́ɛ kpódó acɛkpikpa lɛ́ɛ kpán glɔ́; a nǎ flín yě ɖɔ yě ɖó ná nɔ sí yě, bó ná ɖo gbesisɔ mɛ nú nǔ ɖagbe wiwa bǐ.

Titu 3:14

Mɛ mǐtɔn lɛ́ɛ lɔmɔ̌ ní kplɔ́n nǔ ɖagbe wiwa, bó nɔ wa hwebǐnu, bó ná nɔ́ sixú mɔ nǔ e ɖo tají lɛ́ɛ, bó ma zán gbɛ yětɔn dó wǔvɔ́ ó.

Titu 3:8

Xó nǔgbó ɖokpó nɛ́. Un jló ɖɔ a nǐ tɛ ɖɛ̌ nǔ énɛ́ lɛ́ɛ jí ganjí, bónú mɛ e ɖi nǔ nú Mawu lɛ́ɛ ná tɛ́ dó ɖagbewiwa wú. Nǔ e nyí nǔ ɖagbe bó nyɔ́ nú gbɛtɔ́ lɛ́ɛ é nɛ́.

1 Piyɛ́ɛ 1:22

Mi se tónú nú nǔgbó ɔ́, bó dó slá wǔ nú miɖée, bó ná dó yí wǎn titewungbe nú nɔví mitɔn ɖo nǔɖiɖi mɛ lɛ́ɛ. Hǔn, mi bo yí wǎn ɖaxó nú miɖée kpó ayixa mitɔn bǐ kpó.

1 Piyɛ́ɛ 1:7

Nǔ énɛ́ lɛ́ɛ ɖo mi gbo wɛ nú è nǎ tɛ́n lě e nǔɖiɖi mitɔn jínjɔ́n ayǐ gbɔn ɔ́ kpɔ́n. Siká ɔ́, nǔ wɛ é nyí bó ná vɔ, có è ka nɔ tɛ́n ɛ kpɔ́n gbɔn myɔ nu; mɔ̌ ɖokpó ɔ́, nǔɖiɖi mitɔn e xɔ akwɛ́ ɖaxó hú siká ɔ́, è nɔ tɛ́n ɛ kpɔ́n, bó ná dó kpɔ́n lě e é lí dǒ gbɔn é. Bɔ énɛ́ ɔ́, hwenu e Jezu Klísu ná ɖe éɖée xlɛ́ ɔ́, è nǎ sixú mlá mi; è nǎ sixú kpa susu nú mi, bó ná sixú wlí yɛ̌yi nú mi.

1 Jǎan 3:3

Mɛ ɖěbǔ ɖó nukún ɖíɖó énɛ́ ɖo Klísu mɛ hǔn, éɖée bló ɖó mǐmɛ́ jí wɛ é ɖe lě e Jezu Klísu ɖésúnɔ nyí mǐmɛ́ gbɔn é.