Biblia Todo Logo
Bìoball air-loidhne

- Sanasan -




2 Axɔ́sú 1:3 - MAWUXÓWÉMA

3 Wɛnsagun Mawu Mavɔmavɔ tɔn ɖokpó ka ɖɔ nú Elíi Ticibéenu ɔ́ ɖɔ: “Sɔ́ nǔ, bó yi kpé mɛ e axɔ́sú Samalíi tɔn sɛ́ dó lɛ́ɛ, bó kanbyɔ́ yě ɖɔ: ‘Mawu ɖo Izlayɛ́li ǎ wú wɛ mi xwe nǔ kan gbé ɖo Eklɔ́ni vodún Baalu-Zebúbi gɔ́n a?’

Faic an caibideil Dèan lethbhreac




2 Axɔ́sú 1:3
21 Iomraidhean Croise  

Elíi Ticibéenu ɔ́ xwlé Mawu nú axɔ́sú Akábu ɖɔ: “Mawu Mavɔmavɔ ɖo gbɛ; ɖo Mawu Izlayɛ́li tɔn e sín mɛsɛntɔ́ un nyí ɔ́ nyíkɔ mɛ ɔ́, un ɖo ɖiɖɔ nú we wɛ ɖɔ: ‘Xwe e jǎwe lɛ́ɛ mɛ ɔ́, ahǔn ná ja ǎ, jǐ ká ná ja ǎ, káká jɛ hwenu e un ná ɖɔ é.’ ”


Hwenu e kan mɛ gbɔ́jɔ́ mì bɔ agbɔ̌n kpé mì bǐ ɔ́, un wá flín we, bó xo ɖɛ sɛ́ dó we Mawu Mavɔmavɔ, bɔ ɖɛ ce wá gɔ̌n towe, ɖo sinsɛnxɔ mímɛ́ towe mɛ.


Hanjigbɛ́gán ɔ́ sín hanjiwéma mɛ wɛ han élɔ́ ɖe. Asáfu sín han wɛ; è nɔ ji bó nɔ́ xo kanhún d'é mɛ.


Wɛnsagun Aklúnɔ tɔn ɖɔ nú Filípu ɖɔ jí: “A nǎ sí te, bó ɖidó to ɔ́ sín afɔligbé. Ali e gosín Jeluzalɛ́mu, bó gbɔn gbětótló mɛ yi Gaza ɔ́ wɛ a nǎ wlí.”


Sɛ́nkplɔ́nmɛtɔ́ e gosín Jeluzalɛ́mu wá lɛ́ɛ nɔ́ ɖo ɖiɖɔ wɛ ɖɔ: “Bɛluzebúlu (yɛ nyanya lɛ́ɛ xɔ́sú) wɛ ɖo jǐ tɔn; yɛ nyanya lɛ́ɛ xɔ́sú énɛ́ ɔ́ sín hlɔ̌nhlɔ́n wɛ é nɔ́ dó nya yɛ nyanya lɛ́ɛ ná.”


Naamáni lɛ́ kɔ ɖidó gbeyíɖɔ Mawu tɔn ɔ́ gɔ́n tlóló, é kpódó mɛ e xwedó e lɛ́ɛ kpó. Ée é wá ɔ́, é nɔ te nukɔn tɔn bo ɖɔ n'i ɖɔ: “Un mɔ din ɖɔ nǔmɛsɛn ɖě kún sɔ́ ɖo fí ɖěbǔ ɖo ayǐkúngban ɔ́ jí zɛ Mawu Izlayɛ́li tɔn ɔ́ wú ó. Din ɔ́, kɛnklɛ́n bó yí nǔ e nyɛ mɛsɛntɔ́ towe hɛn wá nú we é.”


Yě yí gbe n'i ɖɔ: “Nya ɖé wɛ, bó dó awu ɖé, bɔ è sɔ́ lǎkúnmí fún dó lɔn ná; é sin anyǔkan dó alin.” Ée yě ɖɔ mɔ̌ ɔ́, axɔ́sú Akaziasi sú xó bó ɖɔ: “Hǔn! Elíi Ticibéenu ɔ́ wɛ!”


Yě yí gbe n'i ɖɔ: “Nya ɖé wá kpé mǐ, bó ɖɔ nú mǐ ɖɔ Mawu Mavɔmavɔ ɖɔ Mawu ɖo Izlayɛ́li ǎ wú wɛ hwi sɛ́ mɛ dó nǔ kan gbé ɖo Eklɔ́ni vodún Baalu-Zebúbi gɔ́n a jí? Énɛ́ ɔ́ wú wɛ wǔ e hwi gblé ɔ́, hwi kún ɖo nǎ gán ɖ'é mɛ wɛ ó, hwi ná kú dandan.”


É wá su gbe ɖokpó, bɔ axɔ́sú Akaziasi jɛ ayǐ gbɔn flɛtɛ́li nu. Síngbó tɔn e ɖo Samalíi ɔ́ jí wɛ é jɛ ayǐ sín, bó gblé wǔ ɖésú. Énɛ́ ɔ́, é sɛ́ mɛ dó Eklɔ́ni toxo ɔ́ mɛ, bónú è nǎ yi kan nǔ byɔ́ vodún Eklɔ́ni tɔn Baalu-Zebúbi ɖɔ émí ná gán ɖo wǔ e émí gblé ɔ́ mɛ ají.


Ée yě bló nǔ lɛ́ɛ gbɔn mɔ̌ ɔ́, Mawu Mavɔmavɔ ɖɔ nú Elíi Ticibéenu ɔ́ ɖɔ:


Wɛnsagun Mawu Mavɔmavɔ tɔn ɔ́ lɛ́ wá azɔn wegɔ́ ɔ́ bó ɖó alɔ wǔ tɔn, bó ɖɔ n'i ɖɔ: “Fɔ́n bó ɖu nǔ, ɖó ali towe lín ga ɖésú.”


Ée é ɖɔ mɔ̌ ɔ́, é mlɔ́ ayǐ, bó dɔ́ amlɔ ɖo atín ɔ́ sá. Lo ɔ́, wɛnsagun Mawu Mavɔmavɔ tɔn ɖokpó wá ɖó alɔ wǔ tɔn, bó ɖɔ n'i ɖɔ: “Fɔ́n bó ɖu nǔ.”


Ée gan e mɛ è nɔ xwlé vɔ̌sánú hwe lɛ́ kɔ tɔn Mawu Mavɔmavɔ ɔ́ xo ɔ́, gbeyíɖɔ Mawu Mavɔmavɔ tɔn Elíi sɛkpɔ́ vɔ̌sákpe ɔ́, bó ɖɔ: “Mawu Mavɔmavɔ, Mawu Ablaxámu tɔn, Mawu Izáki tɔn, Mawu Izlayɛ́li tɔn! Đe xlɛ́ égbé din ɖɔ hwi wɛ nyí Mawu Izlayɛ́li tɔn, bɔ nyɛ nyí mɛsɛntɔ́ towe; ɖe xlɛ́ ɖɔ gbe towe wɛ un xwedó dó bló nǔ énɛ́ lɛ́ɛ bǐ.


Akú ɖó ɔ́, é kó lín, bɔ xwe tɔn atɔngɔ́ ɔ́ mɛ ɔ́, Mawu Mavɔmavɔ ɖɔ nú Elíi ɖɔ: “Yi Akábu gɔ́n, un ná sɛ́ jǐ dó bɔ é ná ja kɔn nyi ayǐkúngban ɔ́ jí.”


Mawu Mavɔmavɔ ná jó we nú mì égbé, bɔ un ná hu we sɔ́ nyi ayǐ, bó gbo ta towe. Égbé ɔ́, un ná ná Filisitɛ́ɛn lɛ́ɛ sín lan xɛ lɛ́ɛ kpó gběkanlin lɛ́ɛ kpó bɔ yě ná ɖu. Énɛ́ ɔ́, gbɛ ɔ́ bǐ ná tunwun ɖɔ Mawu Izlayɛ́li tɔn ɔ́ hú gan nǔ bǐ.


Ée Elizée gbeyíɖɔ Mavɔmavɔ tɔn ɔ́ se ɖɔ Izlayɛ́li xɔ́sú ɔ́ vún awu dó kɔ nú éɖée ɔ́, é sɛ́ mɛ dó ɖɔ è nǐ yi kanbyɔ́ ɛ ɖɔ: “Étɛ́wú a ka vún awu dó kɔ nú hwiɖée? Ní wá gɔ̌n ce, énɛ́ ɔ́, é ná tunwun ɖɔ gbeyíɖɔ Mawu tɔn ɖokpó ɖo Izlayɛ́li fí.”


Un ná bló mɔ̌, ɖó Salomɔ́ɔ kpó Izlayɛ́li ví lɛ́ɛ kpó jó mì dó, bó nɔ sɛn Sidɔ́ɔnnu lɛ́ɛ sín vodún Asitaatée; yě nɔ́ sɛn Mɔwabunu lɛ́ɛ sín vodún Kemɔci, yě nɔ́ sɛn Amumɔ́ɔ ví lɛ́ɛ sín vodún Milukɔ́mu. Yě ká lɛ́ xwedó ali ce, bó ná nɔ wa nǔ e sɔgbe ɖo nukún ce mɛ ɔ́ ǎ, yě nɔ́ nyi sɛ́n ce lɛ́ɛ ǎ, yě nɔ́ wa nǔ e un zɔ́n lɛ́ɛ ǎ, yě nɔ́ wa nǔ Davídi Salomɔ́ɔ sín tɔ́ ɔ́ ɖɔhun ǎ.


Mɛ ɖé lɛ́ɛ nɔ́ ɖɔ: “Mi yi kan nǔ ɖo bokantɔ́ lɛ́ɛ gɔ́n; yě wɛ nɔ́ ɖo xó ɖɔ dó vɛ̌go mɛ wɛ bó nɔ́ ɖo awɔntín mɛ gbe dó wɛ, bó nɔ́ ɖo nǔ e ná jɛ sɔ lɛ́ɛ ɖɔ wɛ. É nyɔ́ nú togun ɖokpó ɖokpó ní yi kan nǔ byɔ́ nǔmɛsɛn tɔn lɛ́ɛ; togun ɖokpó ɖokpó ní yi ɖɔ xó xá mɛkúkú dó mɛ e ɖo gbɛ lɛ́ɛ ta mɛ.” Nú yě ɖɔ mɔ̌ nú mi hǔn,


Lean sinn:

Sanasan


Sanasan