1 Samuwɛ́li 20:3 - MAWUXÓWÉMA

³ Davídi lɛ́ yí xó, bó ɖɔ n'i ɖɔ: “Un xwlé Mawu nú we ɖɔ nǔgbó wɛ. Tɔ́ towe tunwun ganjí ɖɔ xɔ́ntɔn towe wɛ un nyí; énɛ́ wú wɛ é má ná ba ɖɔ hwi ní mɔ do ná ǎ, é táá vɛ́ nú we. Amɔ̌, Mawu Mavɔmavɔ nukɔn ɖíe ɖɔ ɖe wɛ un ɖe, bó ɖo ɖiɖɔ wɛ ɖo hwi ɖésúnɔ nukɔn e, afɔ ɖiɖe ɖokpó jɛ́n ɖo kú kpó nyɛ kpó tɛ́ntin.”

1 Samuwɛ́li 20:3 Iomraidhean Croise

2 Samuwɛ́li 15:21

Itayi ka xwlé Mawu nú axɔ́sú ɔ́ ɖɔ: “Mawu Mavɔmavɔ ɖo gbɛ! Sɛ́mɛɖó ce axɔ́sú ɔ́ ɖo gbɛ; è yi fí ɖé ɔ́, nyi lɔ ná yi. È nɔ gbɛ ɔ́, nyi lɔ ná nɔ gbɛ. È kú ɔ́, nyi lɔ ná kú.”

2 Axɔ́sú 2:2

Lě e nǔ lɛ́ɛ jɛ gbɔn ɔ́ ɖíe: Hwenu e yě ɖo ali jí bó ɖo yiyi wɛ ɔ́, Elíi ɖɔ nú Elizée ɖɔ: “Kɛnklɛ́n nɔ fí, ɖó káká Betɛ́li wɛ Mawu Mavɔmavɔ sɛ́ mì dó.” Elizée ka xwlé Mawu n'i ɖɔ: “Mawu Mavɔmavɔ ɖo gbɛ bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, yě yi Betɛ́li.

2 Axɔ́sú 2:4

Elíi lɛ́ ɖɔ nú Elizée ɖɔ: “Kɛnklɛ́n nɔ fí, ɖó Mawu Mavɔmavɔ sɛ́ mì dó Jeliko.” É ka xwlé Mawu n'i ɖɔ: “Mawu Mavɔmavɔ ɖo gbɛ, bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Ée é ɖɔ mɔ̌ ɔ́, yě yi Jeliko.

2 Axɔ́sú 2:6

Elíi lɛ́ ɖɔ nú Elizée ɖɔ: “Kɛnklɛ́n nɔ fí, ɖó Mawu Mavɔmavɔ sɛ́ mì dó Judɛ́ɛn tɔ tó.” É ká xwlé Mawu n'i ɖɔ: “Mawu Mavɔmavɔ ɖo gbɛ bónú hwi lɔ ɖo gbɛ jɛ́n wɛ ɔ́, un ɖo nǎ jó we dó wɛ ǎ.” Bɔ yě zɔn kpɔ́ ɖidó.

Ɖɛhan 116:3

Kú ko dó wlɔ mì bǐ, xɛsi jɛ jǐ ce mɛ ɖo yɔdo tó ɖɔhun, ahwi xo mì bɔ un ɖo aluwɛ mɛ.

Jelemíi 38:16

Ée Jelemíi ɖɔ mɔ̌ ɔ́, axɔ́sú ɔ́ dó akpá n'i ɖo nǔglɔ́ ɖɔ: “Mawu Mavɔmavɔ e ná gbɛ mǐ ɔ́ ɖo gbɛ, un na hu we ǎ, un ka ná jó we nú mɛ e jló ná hu we lɛ́ɛ ǎ.”

Jelemíi 4:2

Hwe nɛ́ nu ɔ́, a nǎ xwlé nyɛ Mawu Mavɔmavɔ e ɖo gbɛ ɔ́, a nǎ xwlé nǔgbó nǔgbó tɔn, a nǎ xwlé ɖó sɛ́nxwi jí, a nǎ xwlé kpó ayi towe bǐ kpó. A blǒ mɔ̌ ɔ́, akɔta ɖě lɛ́ɛ na byɔ́ mì ɖɔ nyɛ ní xo ɖɛ dó émí jí, yě ná zé mì dó xɔ susu ná.

Sɛ́nflínmɛ 28:66

Gbɛ mitɔn sɔ́ ná nyí gbɛ jɔ gbɛ ɖé ǎ. Mi ná nɔ́ ɖo xɛsi jí zǎn kéze. Gbɛ mitɔn ná ɖo gblɛlɛ mɛ.

Sɛ́nflínmɛ 6:13

Mi ná ɖó sísí n'i, bó ná sɛn é ɖokpónɔ géé. É ɖokpónɔ sín nyǐkɔ wɛ mi ná nɔ́ xwlé.

Eblée 6:16

Ényí gbɛtɔ́ lɛ́ɛ ɖo nǔ ná xwlé wɛ ɔ́, mɛ e hú gǎn yě ɔ́ wɛ yě nɔ xwlé, bɔ nǔ e yě xwlé ɔ́ nɔ nyí gǎnjɛwú, bó nɔ sú nǔ dó nǔdindɔn bǐ ɖo tɛ́ntin yětɔn.

1 Samuwɛ́li 1:26

Ana ɖɔ n'i ɖɔ: “Aklúnɔ ce, a flín nyɔ̌nu e wá fí gbe ɖokpó, bó wá sa vo nú Mawu Mavɔmavɔ é a? Un xwlé nǔ nú we; nyɔ̌nu ɔ́ jɛ́n ɖíe mɔ wɛ a ɖe e; ényí mɛ ɖěvo wɛ ǎ.

1 Samuwɛ́li 17:55

Hwenu e Sawúlu mɔ Davídi bɔ é xwe ahwan fun xá Filisitɛ́ɛn ɔ́ gbé ɔ́, é kanbyɔ́ Avunɛ́ɛ ahwangán tɔn e kpa acɛ nú ahwangɔnu ɔ́ ɖɔ: “Avunɛ́ɛ, mɛ̌ ví ká nyí nyaví énɛ́?” Bɔ Avunɛ́ɛ xwlé nǔ n'i ɖɔ: “Sɛ́mɛɖó, un mɔ do ná ǎ.”

1 Samuwɛ́li 20:2

Jonatáan yí gbe n'i ɖɔ: “Gbeɖé kpɔ́n, è nǎ hu we ǎ. Tɔ́ ce nɔ ja nǔ ɖěbǔ wa gbé ma ɖó te nú mì ǎ. Étɛ́wú é ká ná hwlá énɛ́ ɔ́ dó mì. Adingban wɛ, nǔ sixú nyí mɔ̌ ǎ.”

1 Samuwɛ́li 20:4

Jonatáan kanbyɔ́ Davídi ɖɔ: “Étɛ́ a jló nú má bló nú we?”

1 Samuwɛ́li 25:26

Din ɔ́ sɛ́ ce, un xwlé Mawu nú we ɖɔ nú Mawu Mavɔmavɔ ɖo gbɛ jɛ́n wɛ bónú hwi lɔ ɖo gbɛ ɔ́, Mawu Mavɔmavɔ wɛ hɛn we ɖó te ɖɔ hwi ní má kɔn hun kɔn nyi ayǐ dó ba hwɛjijɔ nú hwiɖée ó. Mɛ e nyí kɛntɔ́ towe lɛ́ɛ kpó mɛ e ɖo nyanya towe lin wɛ lɛ́ɛ kpó ɔ́, nǔ e ná gbo Navalu ɔ́ ní gbo yě lɔ.

1 Samuwɛ́li 27:1

Davídi wá lin tamɛ bo ɖɔ dó ayi mɛ ɖɔ: “É lín káká ɔ́, Sawúlu ná wá hu mì gbe ɖokpó. Nǔɖé sɔ́ kpo nú mì din zɛ má hɔn yi Filisitɛ́ɛn lɛ́ɛ gɔ́n wú ǎ. Énɛ́ ɔ́, Sawúlu ná gbɔjɛ́, bó gɔn biba mì kpé gbɔn Izlayɛ́li to ɔ́ bǐ mɛ; un bló mɔ̌ ɔ́, un ná gló e.”