1 Piyɛ́ɛ 5:9 - MAWUXÓWÉMA

⁹ Mi lí dǒ ɖo nǔɖiɖi mɛ, bó syɛ́nlǐn ɖo awǒvi nukɔn, ɖó mi tunwun ɖɔ nɔví mitɔn e gba kpé gbɛ ɔ́ bǐ mɛ lɛ́ɛ ɔ́, wǔvɛ́ ɖokpó ɔ́ mɔ wɛ yě lɔmɔ̌ ɖe.

1 Piyɛ́ɛ 5:9 Iomraidhean Croise

Luki 22:32

Lo ɔ́, un sa vo nú Mawu ɖó ta towe mɛ, bónú nǔɖiɖi má wá hwe dó we ó. Hwenu e a ka ná lɛ́ kɔ wá gɔ̌n ce ɔ́, dǒ wǔsyɛ́n lanmɛ nú nɔví towe lɛ́ɛ.”

Jǎan 16:33

Un ɖɔ nǔ énɛ́ lɛ́ɛ nú mi, bónú mi ná ɖó vivo ɖo nyɛ mɛ. Mi ná mɔ wǔvɛ́ ɖo gbɛ ɔ́ mɛ; lo ɔ́, mi kpan akɔ́n, ɖó un ko ɖu ɖo gbɛ ɔ́ jí.”

Mɛsɛ́dó 14:22

Yě nɔ dó wǔsyɛ́n lanmɛ nú ahwanvú Jezu tɔn lɛ́ɛ, bó nɔ́ ná akɔ́nkpinkpan yě, nú yě ná lí dǒ ɖo nǔɖiɖi mɛ, bó nɔ́ ɖɔ nú yě ɖɔ: “Ya gěgé wɛ mǐ ɖó nǎ ji, bó ná dó byɔ́ axɔ́súɖuɖu Mawu tɔn mɛ.”

1 Kɔlɛ́ntinu 10:13

Mi mɔ tɛ́nkpɔ́n ɖěbǔ zɛ ée gbɛtɔ́ nɔ mɔ é wú ǎ. Mawu nɔ́ gɔn akpá e é dó lɛ́ɛ ɖe ǎ; é ná lɔn bɔ tɛ́nkpɔ́n ɖé ná wá nú mi bó hú gǎn hlɔ̌nhlɔ́n e mi ɖó é ǎ; amɔ̌ hwenu e tɛ́nkpɔ́n ná wá nú mi ɔ́, é ná ná hlɔ̌nhlɔ́n mi bɔ mi ná dɛ ɖ'é nu; énɛ́ ɔ́, é ná ɖe ali nú mi bɔ mi ná tɔ́n sín mɛ.

Efɛ́zinu 4:27

Mi ma ná tɛn awǒvi bónú é tɛ́n mi kpɔ́n ó.

Efɛ́zinu 6:16

Nǔɖiɖi ní nyí gǎglónú nú mi, bónú mi nɔ sɔ́ hɛn tɛgbɛ, bó ná dó xo gǎ myɔnɔ e kɛntɔ́ ná da dó mi ɔ́ cí.

Kolósinu 2:5

Ényí un tlɛ lín dó mi ɖo agbaza mɛ ɔ́, un ɖo kpɔ́ xá mi ɖo ayi mɛ, bɔ lě e un mɔ bɔ mi nɔ wa nǔ dó tito jí ganjí gbɔn, bó lí dǒ ɖo nǔɖiɖi e mi ɖó nú Klísu ɔ́ mɛ gbɔn ɔ́, víví nú mì.

1 Tɛsalonikinu 3:3

bónú mi ma jó miɖée dó nú ya e ji wɛ mǐ ɖe ɔ́ ní dán mɛ ɖokpó ɖo mi mɛ ó; ɖó mi ɖésúnɔ ɔ́, mi ko tunwun ɖɔ ya énɛ́ e ji wɛ mǐ ɖe ɔ́, tito Mawu tɔn mɛ wɛ é ko ɖe nú mǐ.

1 Timɔtée 6:12

Fun nǔɖiɖi hwan ɖagbe ɔ́. Hɛn gbɛ mavɔ mavɔ ɔ́ wú syɛ́nsyɛ́n, gbɛ mavɔ mavɔ e Mawu ylɔ́ we ná é. Gbɛ mavɔ mavɔ énɛ́ wɛ a ɖe kúnnu ɖagbe ná ɖo gbɛtɔ́ gěgé nukɔn.

2 Timɔtée 3:12

Mɛ e jló ná zán gbɛ yětɔn nú Mawu kpó sísí kpó, ɖo bǔ e yě ɖe xá Klísu Jezu é mɛ ɔ́ bǐ wɛ è nǎ tlɛ dó ya ná lɔ.

2 Timɔtée 4:7

Un fun ahwan ɖagbe ɔ́; un dó wezun ɔ́ káká yi vivɔnu; un kpo ɖo nǔ ɖi nú Klísu Jezu wɛ.

Eblée 11:33

Nǔɖiɖi e yě ɖó ɔ́ zɔ́n bɔ yě fun ahwan, bó ɖu ɖo to gěgé jí; yě wa nǔ e sɔgbe ɔ́, bó mɔ nǔ e sín akpá Mawu dó ɔ́ yí. Nǔɖiɖi e yě ɖó ɔ́ zɔ́n bɔ yě sú kinnikínní lɛ́ɛ sín nu dó.

Eblée 12:8

Ényí é ma kplɔ́n mi vǐ tɔn ɖě lɛ́ɛ bǐ ɖɔhun ǎ ɔ́, hǔn mi nyí vǐ jɔ vǐ ǎ, agaví wɛ mi nyí.

Jaki 4:7

Hǔn, mi bo hwíhwɛ́ miɖée ɖó Mawu glɔ́; mi ló dǒ ɖo awǒvi nukɔn; énɛ́ ɔ́, é ná hɔn yi zɔ nú mi.

1 Piyɛ́ɛ 1:6

Énɛ́ ɔ́ wú ɔ́, nú é ná bó byɔ́ ɖɔ mi ná nɔ aluwɛ mɛ din nú hwenu kpɛɖé, ɖó nǔ tɛnmɛ tɛnmɛ e ɖo mi gbo wɛ lɛ́ɛ wú ɔ́, nyɔ̌ná énɛ́ lɛ́ɛ nɔ dó xomɛhunhun nú mi.

1 Piyɛ́ɛ 2:21

Nǔ e Mawu ylɔ́ mi na é nɛ́; ɖó Klísu ɖésúnɔ ji ya dó ta mitɔn mɛ, bó jó xlɛ́ tɔn nyi ayǐ nú mi, bónú mi ná zé afɔ dó afɔdo tɔn lɛ́ɛ mɛ.

1 Piyɛ́ɛ 3:14

Ényí é ná bó byɔ́ ɖɔ mi ná ji ya ɖó mi ɖo nǔ jlɔ́jlɔ́ wa wɛ wú hǔn, nǔ nyɔ́ nú mi. Mi ma ɖi xɛsi ɖěbǔ nú gbɛtɔ́ lɛ́ɛ ó; mi ma ka jó miɖée dó nú è gba ayi dó nú mi ó.

1 Piyɛ́ɛ 4:13

É nyɔ́ wa ɔ́, mi jɛ awǎ ɖó mǐmá e mi ɖó ɖo ya e Klísu jí lɛ́ɛ mɛ é wútu, bónú awǎjijɛ ná gɔ́ ayi mɛ nú mi hwenu e Mawu ná ɖe Klísu ɔ́ sín susu xlɛ́ é.

Nǔɖexlɛ́mɛ 1:9

Un nɔ nyí Jǎan; nɔví mitɔn wɛ un nyí; ɖo bǔ e mǐ ɖe xá Jezu é mɛ ɔ́, un ɖo ya ji xá mi wɛ, bó ɖo axɔ́súɖuɖu ɔ́ mɛ xá mi; un ɖo te kpódó suúlu kpó xá mi. Un ɖo tɔtɛ́ntin-yíkúngban e è nɔ ylɔ́ ɖɔ Patimɔ́si ɔ́ jí, ɖó un jlá Mawuxó ɔ́ bó ɖe kúnnu nú Jezu wútu.

Nǔɖexlɛ́mɛ 6:11

È nǎ awu gaga wěwé yě mɛ ɖokpó ɖokpó, bó ɖɔ nú yě ɖɔ yě ní lɛ́ gbɔjɛ́ nú hwenu kpɛɖé, káká jɛ hwenu e azɔ̌gbɛ́ yětɔn kpó nɔví yětɔn e è ɖǒ ná hu yě ɖɔhun lɛ́ɛ kpó ná sɔgbe dó é.

Nǔɖexlɛ́mɛ 7:14

Un yí gbe n'i ɖɔ: “Aklúnɔ ce, un ma tunwun nɛ́, hwi wɛ tunwun.” Bɔ é ɖɔ nú mì ɖɔ: “Mɛ e è dǒ ya ɖaxó ɔ́ ná lɛ́ɛ é wɛ. Yě nya awu gaga yětɔn lɛ́ɛ, bó bɛ́ dó Lɛ̌ngbɔ́ví ɔ́ sín hun mɛ, bɔ awu lɛ́ɛ wé.