1 Piyɛ́ɛ 1:7 - MAWUXÓWÉMA

⁷ Nǔ énɛ́ lɛ́ɛ ɖo mi gbo wɛ nú è nǎ tɛ́n lě e nǔɖiɖi mitɔn jínjɔ́n ayǐ gbɔn ɔ́ kpɔ́n. Siká ɔ́, nǔ wɛ é nyí bó ná vɔ, có è ka nɔ tɛ́n ɛ kpɔ́n gbɔn myɔ nu; mɔ̌ ɖokpó ɔ́, nǔɖiɖi mitɔn e xɔ akwɛ́ ɖaxó hú siká ɔ́, è nɔ tɛ́n ɛ kpɔ́n, bó ná dó kpɔ́n lě e é lí dǒ gbɔn é. Bɔ énɛ́ ɔ́, hwenu e Jezu Klísu ná ɖe éɖée xlɛ́ ɔ́, è nǎ sixú mlá mi; è nǎ sixú kpa susu nú mi, bó ná sixú wlí yɛ̌yi nú mi.

1 Piyɛ́ɛ 1:7 Iomraidhean Croise

Jɔ̌bu 23:10

Nǔ ɖo mɔ̌ có, é tunwun ali e jí un ɖe ɔ́ ganjí; é dó mì kpɔ́n ɔ́, un ná tɔ́n wǔ ɖiɖi aji ɖɔhun, un ná tɔ́n siká e è zě gbɔn myɔ nu, bo ɖe nǔ kwíji lɛ́ɛ sín mɛ é ɖɔhun.

Jɔ̌bu 28:1

Nǔgbó wɛ, fí e è nɔ kun kpatágan ɖe ɔ́ tíin, fí e è nɔ kun siká bó nɔ́ kɔn ɖe ɔ́ tíin.

Ɖɛhan 17:3

A kíjé ayi ce mɛ kpɔ́n, a ba jǒnɔ mì zǎn mɛ, a dǒ mì kpɔ́n, a ka mɔ nǔ ɖěbǔ ǎ. Un ɖo nǔ vo lin wɛ, bó ɖo vo ɖɔ wɛ ǎ.

Nǔnywɛ́xó 16:16

È ɖǒ nǔnywɛ́ ɔ́, é nyɔ́ hú è ɖǒ siká; è ɖǒ nukúnnú-mɔjɛnǔmɛ ɔ́, é nyɔ́ hú è ɖǒ kpatágan.

Nǔnywɛ́xó 17:3

Siká kpó kpatágan kpó ɔ́, zo wɛ è nɔ xo dó, bó nɔ́ tunwun ɖagbe kpó nyanya kpó. Amɔ̌, gbɛtɔ́ lɛ́ɛ ɔ́, Mawu Mavɔmavɔ wɛ nɔ mɔ nǔ jɛ ayixa yětɔn mɛ, bó nɔ́ tunwun ayixa ɖagbe kpó ayixa nyanya kpó.

Nǔnywɛ́xó 8:19

Đagbe e un nɔ wa nú mɛ ɔ́ nyɔ́ hú siká, é nyɔ́ hú siká akú; nǔ e un nɔ ná mɛ ɔ́ nyɔ́ hú kpatágan akú.

Nǔnywɛ́tɔ́xó 5:14

Mɛ̌ wɛ gbɛtɔ́ zɔn bó gosín nɔ tɔn xo mɛ; mɛ̌ mɔ̌ jɛ́n é ká ná lɛ́ zɔn bó lɛ́ kɔ sín gbɛ ɔ́ mɛ. Nǔ e é wa ɖo gbɛmɛ fí ɔ́, é nɔ́ hɛn kpɛví ɖé vɔ́vɔ́ yi ǎ.

Ezayíi 48:10

Un ɖe nǔ kwíji kwíji sín mi mɛ; é ká nyí lě e è nɔ xo zo dó kpatágan bó nɔ́ ɖe nǔ kwíji kwíji sín mɛ ɔ́ ɖɔhun ǎ. Lo ɔ́, wǔvɛ́ sín zo wɛ un xo dó mi.

Jelemíi 48:36

Énɛ́ ɔ́ wú wɛ ayi ce bǐ fan dó Mɔwabu ta mɛ, è ɖo nǔwamɛhan ji dó kpete mɛ wɛ ɖɔhun. Yéége, ayi ce fan è ɖo nǔwamɛhan ji dó kpete mɛ wɛ ɖɔhun dó Kíi-Ɛlɛ́sinu lɛ́ɛ ta mɛ, ɖó dɔkun e yě bɛ́ kplé lɛ́ɛ bǐ yi.

Jelemíi 9:7

Đɛ̌ yětɔn cí aɖǐgá ɖɔhun. Adingban jɛ́n yě nɔ́ ɖó. Yě nɔ́ ɖɔ xó ɖagbe nú nɔzo yětɔn, ayi yětɔn mɛ ɔ́, mɔ ɖó n'i wɛ yě ká ɖe.”

Zakalíi 13:9

Un ná zé atɔnvlɔ́ɖó énɛ́ ɔ́ dó myɔ mɛ, bó ná ɖe nǔ kwíji e ɖo yě wú ɔ́ síin, lě e è nɔ zé kpatágan dó myɔ mɛ bó nɔ ɖe nǔ blíblí e ɖ'é mɛ lɛ́ɛ síin é ɖɔhun. Un ná tɛ́n yě kpɔ́n lě e è nɔ tɛ́n siká kpɔ́n gbɔn ɖo myɔ mɛ é. Énɛ́ ɔ́, yě ná sú xó ylɔ́ mì, bɔ un ná yí gbe nú yě. Un ná ɖɔ: ‘Togun ce wɛ mi nyí’, bɔ yě ná nɔ yí gbe ɖɔ: ‘Nǔgbó wɛ Mawu Mavɔmavɔ, hwi wɛ nyí Mawu mǐtɔn!’ ”

Malacíi 3:3

É ná jɛ fínɛ́, bó ná za zunkɔ́ lɛ́ɛ, bó ná ɖe nǔ kwíji lɛ́ɛ síin. É ná slá wǔ nú Levíi ví vɔ̌sánú-xwlémawutɔ́ lɛ́ɛ bǐ dégbédégbé, lě e è nɔ́ xo zo dó siká kpódó kpatágan kpó, bó nɔ́ ɖe nǔ kwíji sín mɛ gbɔn é, bɔ vɔ̌sánú-xwlémawutɔ́ énɛ́ lɛ́ɛ ná xwlé vɔ̌sánú yětɔn lɛ́ɛ Mawu Mavɔmavɔ, lě e è nɔ́ bló gbɔn ɖ'ayǐ é.

Kɛ́nsísɔ́ 5:28

Nú nyɔ̌nu ɔ́ má ká hɛn éɖée blí ǎ, bó ɖo gbejí ɔ́, è nǎ mɔ ɖɔ é ɖo xomɛvɔ́, bɔ é ná lɛ́ ji vǐ.

Matíe 19:28

Bɔ Jezu yí gbe n'i ɖɔ: “Má ɖɔ nǔgbó nú mi: hwenu e nyɛ Gbɛtɔ́ví ɔ́ ná wá jínjɔ́n axɔ́súzinkpo ce jí, ɖo susu ce mɛ, ɖo gbɛ yɔ̌yɔ́ ɔ́ mɛ ɔ́, mi mɛ wěwe e xwedó mì lɛ́ɛ lɔmɔ̌ ná jínjɔ́n axɔ́súzinkpo wěwe jí, bó ná ɖɔ hwɛ xá Izlayɛ́li sín akɔta wěwe lɛ́ɛ,

Matíe 25:21

Bɔ gǎn ɔ́ ɖɔ n'i ɖɔ: ‘A wa nǔ ɖó ganjí; mɛsɛntɔ́ ɖagbe gbejínɔtɔ́ wɛ nú we. Un sɔ́ we ɖó nǔ kpɛɖé nu, bɔ a blǒ ɖó ganjí; din ɔ́, un ná sɔ́ we ɖó nǔ gěgé nu. Énɛ́ ɔ́ wú ɔ́, bo wá j'awǎ xá mì.’

Matíe 25:23

Bɔ gǎn ɔ́ ɖɔ n'i ɖɔ: ‘A wa nǔ ɖó ganjí; mɛsɛntɔ́ ɖagbe gbejínɔtɔ́ wɛ nú we. Un sɔ́ we ɖó nǔ kpɛɖé nu, bɔ a blǒ ɖó ganjí; din ɔ́, un ná sɔ́ we ɖó nǔ gěgé nu. Énɛ́ ɔ́ wú ɔ́, bó wá j'awǎ xá mì.’

Luki 12:33

Mi sa nǔ e mi ɖó lɛ́ɛ, bó má akwɛ́ tɔn nú wamamɔnɔ lɛ́ɛ. Mi hɛn akwɛ́kpo e ma ná gbi ǎ lɛ́ɛ; mi kplé dɔkun ɖó Mawu gɔ́n fí e nǔɖé ma ná wa ɛ ɖe ǎ é; ɖó ajotɔ́ nɔ yi fínɛ́ ǎ; nǔvínúví nɔ ɖu nǔ ɖo fínɛ́ ǎ.

Luki 17:30

Hwenu e nyɛ Gbɛtɔ́ví ɔ́ ná ɖe susu ce xlɛ́ ɔ́, lě e é ná nyí gbɔn ɔ́ nɛ́.

Jǎan 12:26

Mɛ ɖé jló ná nyí mɛsɛntɔ́ ce hǔn, mɛ ɔ́ ní xwedó mì, bɔ fí e un ná nɔ ɔ́ wɛ é lɔmɔ̌ ná nɔ. Ényí mɛɖé nyí mɛsɛntɔ́ ce ɔ́, Tɔ́ ce ná sɔ́ mɛ ɔ́ su.”

Jǎan 5:44

Mi mɛ e nɔ ɖo susu kpa nú miɖée wɛ, bó ma nɔ ba nú Mawu ná sɔ́ mi su ǎ lɛ́ɛ ɔ́, nɛ̌ mi ka sixú ɖi nǔ gbɔn?

Mɛsɛ́dó 8:20

Piyɛ́ɛ ka yí gbe n'i ɖɔ: “Hwi kpódó akwɛ́ towe kpó bǐ ní bó dɔn, ɖó a lin ɖɔ è nɔ sɔ́ akwɛ́ dó xɔ nǔníná Mawu tɔn.

Hlɔ̌manu 2:10

É ka ɖo mɔ̌ có Mawu ná ná susu, yɛ̌yi, kpódó fífá kpó mɛ e nɔ wa nǔ ɖagbe lɛ́ɛ bǐ. É ná ná Jwifu lɛ́ɛ jɛ nukɔn, bó ná ná mɛ e ma nyí Jwifu ǎ lɛ́ɛ bɔ d'é wú.

Hlɔ̌manu 2:29

Lo ɔ́, mɛ e nyí Jwifu nǔgbó nǔgbó ɔ́ wɛ nyí mɛ e nyí Jwifu ɖo ayi mɛ é, mɛ e gbo ada ɖo ayi mɛ é. Ada énɛ́ ɔ́, Yɛ Mawu tɔn wɛ nɔ gbo nú mɛ; ényí nǔ e è wlán dó sɛ́nwéma mɛ lɛ́ɛ wɛ nɔ́ gbo nú mɛ ǎ. Jwifu nǔgbó nǔgbó énɛ́ ɔ́, gbɛtɔ́ wɛ nɔ kpa susu n'i ǎ, lo ɔ́, Mawu wɛ nɔ́ kpa susu n'i.

Hlɔ̌manu 2:7

É ná ná gbɛ mavɔ mavɔ mɛ e nɔ ɖó kan dó nǔ ɖagbe wiwa wú, bó nɔ́ ɖo susu kpó yɛ̌yi kpó, kpódó jɔmakú kpó ba ɖo gɔ̌n tɔn gbɔn mɔ̌ wɛ lɛ́ɛ.

Hlɔ̌manu 8:19

Nǔ e è blǒ lɛ́ɛ bǐ wɛ ɖo te, bó ɖó jló ɖaxó, bó ná mɔ hwenu e Mawu ná ɖe vǐ tɔn lɛ́ɛ xlɛ́ dó é.

1 Kɔlɛ́ntinu 3:13

Amɔ̌, Aklúnɔ sín azǎn ɔ́ wɛ ná ɖe lě e azɔ̌ mɛ ɖokpó ɖokpó tɔn ɖe gbɔn é xlɛ́, bɔ é ná jɛ wěxo. Nǔgbó ɔ́, azǎn énɛ́ ɔ́ ná wá kpó myɔ kpó, bɔ myɔ ná gbéjé azɔ̌ e mɛ ɖokpó ɖokpó wa ɔ́ kpɔ́n, bó ná ɖe azɔ̌ alɔkpa e é nyí ɔ́ xlɛ́.

1 Kɔlɛ́ntinu 4:5

Énɛ́ ɔ́ wú ɔ́, mi ma ɖɔ hwɛ dó mɛ ɖěbǔ cóbónú hwenu e Mawu ɖó ɔ́ ná su ó; mi nɔ te nú Aklúnɔ ní wá: é ná ɖe nǔ e ɖo hwlǎhwlá ɖo zǐnflú mɛ ɔ́ nyi wěxo, bɔ linlin e ɖo ayixa mɛ nú gbɛtɔ́, bɔ è ma mɔ nukúnnú jɛ wú ǎ lɛ́ɛ ɔ́, é ná ɖe xlɛ́; énɛ́ ɔ́, Mawu ná kpa mɛ ɖokpó ɖokpó lě e é jɛ xá gbɔn é.

Jaki 1:12

Nǔ nyɔ́ nú mɛ e nɔ syɛ́nlǐn ɖo mɛdókpɔ́n hwenu é; ɖó nú é ɖe lǐnsyɛ́nsyɛ́n tɔn xlɛ́ gúdo ɔ́, é ná mɔ gbɛ jɔ gbɛ yí; gbɛ jɔ gbɛ énɛ́ wɛ nyí ajɔ e sín akpá Mawu dó nú mɛ e yí wǎn n'i lɛ́ɛ é.

1 Piyɛ́ɛ 1:13

Énɛ́ ɔ́ wú ɔ́, ayi mitɔn ní nɔ gbesisɔ mɛ, bó ná wa nǔ. Mi nɔ acéjí, bó zé nukúnɖíɖó mitɔn bǐ ɖó nǔníná e Mawu ná ná mi hwenu e Jezu Klísu ná ɖe éɖée xlɛ́ ɔ́ jí.

1 Piyɛ́ɛ 1:5

nú mi mɛ e hlɔ̌nhlɔ́n tɔn ɖo hinhɛn wɛ gbɔn nǔɖiɖi jí káká jɛ hwenu e hwlɛngán e ko sɔgbe, bɔ è nǎ ɖe xlɛ́ ɖo hwenu gǔdo gúdo tɔn lɛ́ɛ mɛ ɔ́ ná wá dó é.

1 Piyɛ́ɛ 2:4

Mi sɛkpɔ́ Aklúnɔ, awǐnnya gbɛɖe e gbɛtɔ́ lɛ́ɛ xo nyi kɛ́n, bɔ Mawu ka mɔ dó mɔ awǐnnya xɔ akwɛ́ bó sɔ́ é,

1 Piyɛ́ɛ 2:7

Awǐnnya xɔ akwɛ́ ɖaxó ɖokpó wɛ nyí awǐnnya énɛ́ ɔ́ nú mi mɛ e ɖi nǔ lɛ́ɛ; amɔ̌ nú mɛ e ma ɖi nǔ ǎ lɛ́ɛ ɔ́, é nyí: “Awǐnnya e xɔmɛtɔ́ lɛ́ɛ ma dó mɔ nǔɖéwanú ǎ, bó xo nyi kɛ́n, bɔ é húzú awǐnnya e ɖo tají é”.

1 Piyɛ́ɛ 4:12

Mɛvívɛ́ná ce lɛ́ɛ mi, adǎn ɖaxó e ɖo mi gbo wɛ ɔ́ ní ma kpácá mi, bónú mi mɔ dó mɔ nǔ e ma jɛ kpɔ́n gbeɖé ǎ é ná ó.

1 Piyɛ́ɛ 4:13

É nyɔ́ wa ɔ́, mi jɛ awǎ ɖó mǐmá e mi ɖó ɖo ya e Klísu jí lɛ́ɛ mɛ é wútu, bónú awǎjijɛ ná gɔ́ ayi mɛ nú mi hwenu e Mawu ná ɖe Klísu ɔ́ sín susu xlɛ́ é.

1 Piyɛ́ɛ 5:1

Din ɔ́, mɛ e nyí agunmɛxó ɖo mi mɛ lɛ́ɛ ɖɔ xó ná wɛ un ɖe. Nyɛ lɔ ɔ́, agunmɛxó wɛ un nyí; un nyí kúnnuɖetɔ́ wǔvɛ́ e Klísu mɔ lɛ́ɛ tɔn, bó ɖó mǐmá ɖo susu e è nǎ wá ɖe xlɛ́ ɔ́ mɛ. Nǔ e ɖɔ nú yě wɛ un ɖe ɔ́ ɖíe:

2 Piyɛ́ɛ 1:1

Nyɛ Sinmɔ́ɔ Piyɛ́ɛ e nyí mɛsɛntɔ́ Jezu Klísu tɔn, bó nyí mɛsɛ́dó tɔn ɔ́ wɛ wlán wěma élɔ́; mɛ e è nǎ nǔɖiɖi xɔ akwɛ́ mǐtɔn ɖɔhun gbɔn azɔ̌ jlɔ́jlɔ́ e Mawu mǐtɔn Mɛhwlɛ́ngántɔ́ Jezu Klísu wa é gbla mɛ lɛ́ɛ wɛ un wlán sɛ́ dó, bó dó gbe yě.

2 Piyɛ́ɛ 1:4

Mɔ̌ wɛ é dó akpá ɖaxó ɖaxó e xɔ akwɛ́ lɛ́ɛ nú mǐ gbɔn; énɛ́ ɔ́, nú mi mɔ nǔ e sín akpá e é dó lɛ́ɛ yí ɔ́, mi ná sixú gló jlǒ e nɔ hɛn nǔ gblé bo ɖo axɔ́sú ɖu wɛ ɖo gbɛmɛ fí é, bó ná ɖó mǐmá ɖo ninɔmɛ Mawu tɔn mɛ.

2 Piyɛ́ɛ 3:14

Énɛ́ ɔ́ wú ɔ́, nɔví ce vívɛ́ná lɛ́ɛ mi, ée mi ɖo te kpɔ́n nǔ énɛ́ lɛ́ɛ sín jijɛ ɔ́, mi bo ɖo nǔ e wú mi kpé ɔ́ bǐ wa wɛ, bó ná dó nyí mɛ mímɛ́ ma ɖó blɔ̌ ɖo wǔ ɖo Mawu nukɔn, bó ná dó nɔ fífá mɛ kpó Mawu kpó.

Judi 1:24

Mawu ɖokpó géé e nyí Mɛhwlɛ́ngántɔ́ mǐtɔn gbɔn Aklúnɔ mǐtɔn Jezu Klísu jí ɔ́, é mɛ e kpé wú bó ná cyɔ́n alɔ mi jí, bɔ mi ma ná jɛ ayǐ ǎ ɔ́, é mɛ e kpé wú bó ná ɖe mi xlɛ́ blɔ̌máɖowǔ, bɔ awǎjijɛ ná kpé mi ɖo kpɔ́nɔxámɛ tɔn sín susu mɛ ɔ́, susu, yɛ̌yi, hlɔ̌nhlɔ́n kpódó acɛkpikpa kpó nyí étɔn sín do, bó nyí din, bó lɛ́ nyí káká sɔ́yi. Amǐ.

Nǔɖexlɛ́mɛ 1:7

Mi kpɔ́n! É jǎwe ɖo akpɔ́kpɔ́ mɛ! Mɛ bǐ ná mɔ ɛ; mɛ e sɔ́ hwǎn ɛ lɛ́ɛ lɔ ná mɔ ɛ. Akɔta e ɖo ayǐkúngban jí lɛ́ɛ bǐ ná ná alě ɖó éyɛ́ wú. Nǔgbó wɛ, é ná nyí mɔ̌! Amǐ.

Nǔɖexlɛ́mɛ 2:10

Wǔvɛ́ e a nǎ mɔ ɔ́ ní ma dó xɛsi nú we ó. Đǒtó: Awǒvi ná bɛ́ mɛ gěgé ɖo mi mɛ dó gankpá mɛ, bó ná dó tɛ́n mi kpɔ́n; mi ná mɔ wǔvɛ́ xɔ azǎn wǒ. Nɔ gbejí káká yi kú; énɛ́ ɔ́, un ná ná we gbɛ bɔ é ná cí axɔ́súgbákún e nɔ́ ná gbɛ mɛ é ɖɔhun.

Nǔɖexlɛ́mɛ 3:10

Đó xó e un ɖɔ nú we ɖɔ hwi ní ɖó kan dó nǔ wú ɔ́, a hɛn dó ayi mɛ; énɛ́ wútu ɔ́, hwenu e awě e ná wá xo gbɛ ɔ́ bǐ, bó ná tɛ́n mɛ e ɖo ayǐkúngban jí lɛ́ɛ kpɔ́n ɔ́ ná wá ɔ́, nyɛ lɔ ná cyɔ́n alɔ jǐ we.

Nǔɖexlɛ́mɛ 3:18

Énɛ́ ɔ́ wú wɛ un ɖo nǔ kplɔ́n we wɛ ɖɔ hwi ní xɔ siká e è ko zé dó myɔ mɛ, bɔ nǔblíblí ɖé ma sɔ́ ɖ'é mɛ ǎ ɔ́ ɖo así ce, bó ná dó nyí dɔkunnɔ. Xɔ awu wěwé lɛ́ɛ lɔ ɖo así ce, bó ná dó, dó mɛ̌ towe e ɖo winnyá hu nú we wɛ ɔ́ jí. Mɔ̌ ɖokpó ɔ́, xɔ nukúntínkɛn ɖo así ce, bó ná dó nukún towe lɛ́ɛ jí, bó ná sixú mɔ nukúnnú.

1 Samuwɛ́li 2:30

Énɛ́ ɔ́ wútu ɔ́, nǔ e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: Un ɖɔ xwédo towe kpó tɔ́gbó towe xwédo kpó ná nyí vɔ̌sánú-xwlémawutɔ́ ce káká sɔ́yi. Amɔ̌, din ɔ́, nǔ sɔ́ sixú nyí mɔ̌ gbeɖé ǎ. Đó mɛɖé sɔ́ mì su ɔ́, un ná sɔ́ ɛ su; mɛɖé ka dó vɛ̌ nú mì lɛ́ɛ ɔ́, un ná dó vɛ̌ nú yě.