1 Timɔtée 4:1 - MAWUXÓWÉMA

¹ Yɛsinsɛn ɖésú ko ɖɔ céɖécéɖé ɖɔ azǎn gǔdo gúdo tɔn lɛ́ɛ mɛ ɔ́, mɛɖé lɛ́ɛ ná jó nǔɖiɖi dó, bó ná ɖótó yɛ e nɔ flú mɛ lɛ́ɛ kpódó yɛ nyanya lɛ́ɛ sín nǔkplɔ́nmɛ kpó.

1 Timɔtée 4:1 Iomraidhean Croise

Bǐbɛ́mɛ 3:13

Énɛ́ ɔ́, Mawu Mavɔmavɔ kanbyɔ́ nyɔ̌nu ɔ́ ɖɔ: “Étɛ́ a wa mɔ̌ nɛ́?” Bɔ é yí gbe n'i ɖɔ: “Dan wɛ blɛ́ mì bɔ un ɖu atín ɔ́ sín sínsɛ́n.”

1 Axɔ́sú 13:18

Bɔ gbeyíɖɔ Mawu tɔn degénɔ ɔ́ ɖɔ n'i ɖɔ: “Nyɛ lɔ ɔ́, gbeyíɖɔ Mawu tɔn wɛ un nyí hwi ɖɔhun, bɔ Mawu Mavɔmavɔ wá ɖɔ xó nú mì gbɔn wɛnsagun ɖokpó jí ɖɔ: ‘Kplá ɛ wá xwé towe gbe, bónú é ní ɖu nǔ bó nu sin.’ ” Adingban ɖó wɛ é ká ɖe.

Ezayíi 2:2

Gbe ɖokpó ná wá su, bɔ só e jí Mawu Mavɔmavɔ xwé ɔ́ ɖe ɔ́ ná hú ga só kpɛví kpɛví lɛ́ɛ, é ná yi jǐ hú só ɖě lɛ́ɛ bǐ. Énɛ́ ɔ́, akɔta lɛ́ɛ bǐ ná nyi ahwan wá gɔ̌n tɔn.

Jelemíi 23:26

hwe étɛ́ nu wɛ yě ná jó adingbanɖíɖó dó? Gbeyíɖɔ énɛ́ lɛ́ɛ nɔ ɖo adingban ɖó nú mɛ lɛ́ɛ wɛ kpowun, yě nɔ́ ɖo xó kpa ɖɔ dó blɛ́ mɛ wɛ. Ani ka ɖo ayi yětɔn mɛ tawun?

Jelemíi 48:47

Amɔ̌, ayǐ ɖo hǐnhɔ́n wɛ ɔ́, un ná zé yě ɖó ninɔmɛ e mɛ yě nɔ ɖ'ayǐ xóxó é. Xó e nyɛ Mawu Mavɔmavɔ ɖɔ ɔ́ nɛ́.” Lě e Mawu gbo Mɔwabu sín hwɛ gbɔn ɔ́ nɛ́.

Jelemíi 49:39

Amɔ̌, ayǐ ɖo hinhɔn wɛ ɔ́, un ná zé Elámunu lɛ́ɛ ɖó ninɔmɛ e mɛ yě nɔ ɖ'ayǐ xóxó é.” Xó e Mawu Mavɔmavɔ ɖɔ ɔ́ nɛ́.

Ezekiyɛ́li 1:3

Mawu Mavɔmavɔ ɖɔ xó ɖé nú nyɛ vɔ̌sánú-xwlémawutɔ́ Ezekiyɛ́li Buzi ví ɔ́, ɖo Babilɔ́nunu lɛ́ɛ sín to mɛ dɔ̌n, ɖo Kebáa tɔ ɔ́ tó; fínɛ́ wɛ hlɔ̌nhlɔ́n Mawu Mavɔmavɔ tɔn wá jǐ ce ɖe.

Ezekiyɛ́li 38:16

A nǎ tɔ́n ahwan togun ce Izlayɛ́li ɔ́, bó ná cyɔ́n to ɔ́ ahǔn ɖɔhun. É ká ná lín káká có nǔ énɛ́ lɛ́ɛ ná jɛ. Un ná sɛ́ we dó bɔ a nǎ wǎ tɔ́n ahwan to ce, énɛ́ ɔ́, to ɖě lɛ́ɛ ná tunwun ɖɔ nyɛ wɛ nyí Mawu mímɛ́ ɔ́. Hwi Gɔgu ɔ́ wɛ un ka ná zán dó bló nǔ énɛ́ ɔ́.

Daniyɛ́li 10:14

Din ɔ́, un wá bó ná ɖɔ nǔ e ná wá jɛ dó togun towe jí sɔ gúdo ɔ́ nú we. Nǔ ɔ́ wɛ Mawu ɖe xlɛ́ we bɔ a mɔ.’

Ozée 3:5

Énɛ́ ɔ́ gúdo ɔ́, Izlayɛ́li ví lɛ́ɛ ná lɛ́ kɔ wá. Yě ná ba Mawu Mavɔmavɔ, Mawu yětɔn kpódó Davídi axɔ́sú yětɔn ɔ́ kpó mɔ. Nú é wá yá ɔ́, kpó sísí kpó wɛ yě ná ba Mawu Mavɔmavɔ ɔ́ kpó ɖagbe e é nɔ́ wa nú mɛ lɛ́ɛ kpó.

Micée 4:1

Ayǐ ɖé ná wá hɔ́n, bɔ só e jí sinsɛnxɔ ɔ́ ɖe ɔ́ ná yi jǐ hú só lɛ́ɛ bǐ, é ná hú ga só kpɛví kpɛví lɛ́ɛ bǐ, bɔ togun lɛ́ɛ ná nyi ahwan wá asá tɔn mɛ.

Kɛ́nsísɔ́ 24:14

Din ɔ́, un ná lɛ́ kɔ yi togun ce mɛ. Wǎ má ɖɔ nǔ e togun élɔ́ ná wa xá togun towe ɖo sɔ gúdo ɔ́ nú we.”

Matíe 18:7

Adǎn tɛ́ ɖíe wá gbo gbɛtɔ́ lɛ́ɛ e! Ɖó nǔnyanyamɛ-dɔnmɛdó sín nǔwiwa lɛ́ɛ ɖo gbɛ ɔ́ mɛ, bɔ nǔ mɔ̌hunkɔtɔn lɛ́ɛ ɖó ná nɔ́ jɛ, amɔ̌, heelú mɛ e ka ná dɔn mɛ dó nǔ nyanya mɛ lɛ́ɛ é.

Luki 17:1

Jezu ɖɔ nú ahwanvú tɔn lɛ́ɛ ɖɔ: “Mɛ dɔn dó nǔ nyanya mɛ sixú hán ǎ; amɔ̌, heelú mɛ e ná dɔn mɛ dó nǔ nyanya mɛ é;

Jǎan 16:13

Hwenu e Yɛ e nɔ ɖe nǔgbó Mawu tɔn xlɛ́ ɔ́ ná wá ɔ́, é ná bló, bɔ mi ná tunwun nǔgbó ɔ́ bǐ; ɖó acɛ é ɖésúnɔ tɔn mɛ wɛ é ná ɖɔ xó dó ǎ; lo ɔ́, nǔ e é se ɔ́ wɛ é ná ɖɔ, bó ná ɖɔ nǔ e ɖo na jɛ wɛ lɛ́ɛ nú mi.

Mɛsɛ́dó 13:2

Gbe ɖokpó ka wá su bɔ yě ɖo Aklúnɔ sɛn wɛ, bó ɖo nu blá wɛ, bɔ Yɛsinsɛn ɖɔ nú yě ɖɔ: “Mi ɖe Baanabási kpódó Sólu kpán ɖó vo nú mì, nú yě ná yi wa azɔ̌ e wú un ylɔ́ yě é.”

Mɛsɛ́dó 17:18

Glɛ̌sinu nǔnywɛ́tɔ́ e è nɔ ylɔ́ Epikiliɛn lɛ́ɛ kpódó ée è nɔ ylɔ́ ɖɔ Sitoyisiɛn lɛ́ɛ kpán lɔ jɛ xó ɖɔ xá ɛ jí. Mɛ ɖě nɔ́ kanbyɔ́ ɖɔ: “Étɛ́ ɖɔ wɛ nǔxweɖɔtɔ́ énɛ́ ka ɖe?” Mɛ ɖěvo lɛ́ɛ ká se xó e ɖɔ dó Jezu kpódó fínfɔ́n sín kú kpó wú wɛ é ɖe ɔ́, bó nɔ́ ɖɔ: “É cí to ɖěvo mɛ vodún lɛ́ɛ xó ɖɔ nú mǐ wɛ é ɖe ɖɔhun.”

Mɛsɛ́dó 20:23

Nǔ e un tunwun kpowun ɔ́ wɛ nyí ɖɔ: ɖo to ɖokpó ɖokpó mɛ ɔ́, Yɛsinsɛn nɔ ɖo ɖiɖɔ nú mì wɛ ɖɔ gankpá mɛ yiyi kpódó yajiji gěgé kpán ɖo te kpɔ́n mì.

Mɛsɛ́dó 21:11

É wá mɔ mǐ, bó zé gǒjíblánú Pɔ́lu tɔn dó blá afɔ kpódó alɔ kpán nú éɖée, bó ɖɔ: “Nǔ e Yɛsinsɛn ɖɔ ɔ́ ɖíe: mɛ e tɔn nyí gǒjíblánú élɔ́ ɔ́, lě e Jwifu lɛ́ɛ na blá ɛ gbɔn ɖo Jeluzalɛ́mu, bó ná jó e nú mɛ e ma nyí Jwifu ǎ lɛ́ɛ é ɖíe.”

Mɛsɛ́dó 28:25

Bɔ yě nɔ gbe ma ɖó kpɔ́ mɔ̌, bó ɖidó, bɔ Pɔ́lu ɖɔ nú yě kpowun ɖɔ: “Xó e Yɛsinsɛn ɖɔ nú tɔ́gbó mǐtɔn lɛ́ɛ gbɔn gbeyíɖɔ Mawu tɔn Ezayíi jí ɔ́, nǔgbó jɛ́n é nyí.

1 Kɔlɛ́ntinu 10:20

Gbeɖé kpɔ́n! Lo ɔ́, nǔ e ɖɔ wɛ un ɖe ɔ́ wɛ nyí ɖɔ mɛ e ma nyí klísusɛntɔ́ ǎ lɛ́ɛ ɔ́, vɔ̌ e yě nɔ́ sá ɔ́, yɛ nyanya lɛ́ɛ wɛ yě nɔ́ sá ná; é nyí Mawu wɛ yě nɔ sá ná ǎ. Un ka jló ɖɔ mi ní ɖó kɔnɖókpɔ́ xá yɛ nyanya lɛ́ɛ ǎ.

1 Kɔlɛ́ntinu 11:19

Kínklán ɖó ná nɔ tɛ́ntin mitɔn, bónú è nǎ dǒ tunwun mɛ e Mawu yí gbe nú nǔwiwa yětɔn lɛ́ɛ é.

1 Kɔlɛ́ntinu 12:11

Yɛsinsɛn ɖokpó géé ɔ́ jɛ́n nɔ bló nǔ énɛ́ lɛ́ɛ bǐ; é nɔ ma nǔníná lɛ́ɛ nú mɛ ɖokpó ɖokpó lě e é jló e gbɔn é.

1 Kɔlɛ́ntinu 2:10

Mǐdɛɛ lɛ́ɛ wɛ ka nyí mɛ e Mawu ɖe nǔbúdo énɛ́ xlɛ́ gbɔn Yɛsinsɛn jí é. Nǔgbó ɔ́, Yɛsinsɛn ɔ́ nɔ ba do nú nǔ bǐ káká jɛ tito Mawu tɔn e ɖo hwlǎhwlá ɖo gɔngɔn mɛ lɛ́ɛ é lɔ jí.

2 Kɔlɛ́ntinu 11:3

Lo ɔ́, un ɖo xɛsi ɖi wɛ ɖɔ lě e mi tɛ́ dó Klísu wú ɖo gbejíninɔ kpódó mǐmɛ́ kpán mɛ gbɔn ɔ́, nǔɖé ní ma flú ayixa mitɔn, bónú mi ná jó Klísu dó, lě e Ɛvu jó éɖée dó, bɔ dan sɔ́ bǐbí ɖó nukɔn, bó ɖó nǔvú dó flú i é ɖɔhun ó.

Sɛ́nflínmɛ 32:29

Nǔnywɛ́ kpɛɖé jɛ́n hwedó yě, bɔ yě ná tunwun fí e nǔ e wa wɛ yě ɖe ɔ́ kplá yě xwe é.

Sɛ́nflínmɛ 4:30

Hwenu e nǔ e un ɖɔ nú mi lɛ́ɛ bǐ ná jɛ, bɔ mi ná ɖo aluwɛ mɛ ɔ́, mi ná lɛ́ kɔ wá Mawu Mavɔmavɔ, Mawu mitɔn gɔ́n, bó ná lɛ́ jɛ tónú se n'i jí.

Kolósinu 2:18

Mi ma lɔn nú mɛ e nɔ hun xomɛ ɖo mɛɖéesɔ́hwe ɖo wějí sín nǔwiwa lɛ́ɛ kpódó wɛnsagun lɛ́ɛ sinsɛn kpán mɛ ɔ́, ɖě ní ɖó hwɛ nú mi ó; mɛ mɔ̌hun ɔ́, nǔmimɔ e é nɔ mɔ lɛ́ɛ wú wɛ é nɔ gán jɛ, bɔ linlin gbɛtɔ́ tɔn e é nɔ ɖó lɛ́ɛ nɔ zɔ́n bɔ goyíyí dó wǔvɔ́ nɔ gbɛ́ dó e.

2 Timɔtée 3:13

Amɔ̌ gbɛtɔ́ dídá awoxotɔ́ lɛ́ɛ fɔ́n tɛgbɛ ɔ́, yě na ɖo nǔ nyanya wa d'é jí wɛ; yě ná flú mɛ ɖě lɛ́ɛ, bɔ è nǎ flú yě ɖésú.

2 Timɔtée 4:4

Yě ná nɔ́ dó tókúse nǔgbó ɔ́ mɛ, bó ná nɔ́ ɖótó xɛxó lɛ́ɛ.

Jaki 3:15

Nǔnywɛ́ mɔ̌hunkɔtɔn gosín Mawu gɔn ǎ; gbɛ élɔ́ kpó gbɛtɔ́ nyínyí kpó tɔn wɛ é nyí; awǒvi gɔ́n wɛ é gosín.

1 Piyɛ́ɛ 1:20

Mawu ko sɔ́ ɛ cóbó wá ɖó gbɛ ɔ́, bó ɖe e xlɛ́ ɖo azǎn e nyí azǎn gǔdo tɔn élɔ́ lɛ́ɛ é mɛ, ɖó ɖagbe mitɔn wú.

2 Piyɛ́ɛ 2:1

Đ'ayǐ xóxó ɔ́, gbeyíɖɔmawutɔn-nyíjɛtɔ́ ɖé lɛ́ɛ tɔ́n ɖo togun ɔ́ mɛ; mɔ̌ ɖokpó ɔ́, nǔkplɔ́nmɛtɔ́-nyíjɛtɔ́ ɖé lɛ́ɛ ná tɔ́n ɖo tɛ́ntin mitɔn; yě ná sɔ́ kplɔ́n nyanya, kplɔ́n e nɔ hɛn nǔ gblé ɔ́ byɔ́ mi mɛ, bó ná gbɛ́ gǎn e hwlɛ́n yě gán é; énɛ́ ɔ́, yě ná vɔ yěɖée bléwún.

2 Piyɛ́ɛ 3:3

Nǔ e mi ná tunwun jɛ nukɔn ɔ́ wɛ nyí ɖɔ: ɖo azǎn gǔdo gúdo tɔn lɛ́ɛ mɛ ɔ́, mɛ e nɔ zán gbɛ yětɔn lě e jlǒ yě ɖésúnɔ tɔn ba gbɔn lɛ́ɛ ná ɖe yěɖée xlɛ́. Yě ná ɖɔ slǎmɛ mi wú,

1 Jǎan 2:18

Vǐ ce lɛ́ɛ mi, hwenu gǔdo gúdo tɔn mɛ ɖíe mǐ ɖe e; mi ka ko se ɖɔ kɛntɔ́ Klísu tɔn ɔ́ ɖó ná wá; amɔ̌ din ɔ́, Klísu sín kɛntɔ́ gěgé ko wá . Énɛ́ ɔ́ wɛ zɔ́n bɔ mǐ tunwun ɖɔ hwenu gǔdo gúdo tɔn ɔ́ mɛ ɖíe mǐ ɖe e.

1 Jǎan 4:6

Amɔ̌, mǐdɛɛ lɛ́ɛ ɔ́, Mawu tɔn wɛ mǐ nyí, bɔ mɛ e tunwun Mawu ɔ́ nɔ ɖótó mǐ; mɛ e ma nyí Mawu tɔn ǎ ɔ́ nɔ ɖótó mǐ ǎ. Lě e mǐ nɔ sixú tunwun Yɛ nǔgbónɔ ɔ́, kpó yɛ adingbannɔ ɔ́ kpó gbɔn ɔ́ nɛ́.

Judi 1:18

Nǔgbó ɔ́, yě ɖɔ nú mi ɖɔ: “Azǎn gǔdo gúdo tɔn lɛ́ɛ mɛ ɔ́, mɛɖé lɛ́ɛ ná tíin, bó ná nɔ ɖɔ slǎmɛ mi wú, bó ná zán gbɛ yětɔn lě e jlǒ nyanya yětɔn lɛ́ɛ zɔ́n yě gbɔn é.”

Judi 1:4

Nǔgbó ɔ́, mɛdídá ɖé lɛ́ɛ lun byɔ́ mi mɛ, bó nɔ́ kpé ta do nú wɛn e ɖɔ xó dó nyɔ̌ná Mawu mǐtɔn tɔn wú é; yě bló mɔ̌, bó ná dó ɖe xlɛ́ ɖɔ gbɛ kwíji kwíji e zán wɛ émí ɖe ɔ́ sɔgbe, bó nɔ́ gbɛ́ Jezu Klísu e nyí Mɛ̌si mǐtɔn ɖokpó géé, bó nyí Aklúnɔ mǐtɔn é. É ko lín din bɔ Mawuxówéma ɔ́ ko ɖɔ hwɛ e è ɖǒ nú yě ɔ́.

Nǔɖexlɛ́mɛ 13:14

É nɔ zé nǔ e è nǎ gbe e ɖɔ é ní jlɛ́ ɖo kanlin nukɔntɔn ɔ́ nukɔn ɔ́ dó flú gbɛtɔ́ e ɖo ayǐkúngban jí lɛ́ɛ ná. É ɖo ɖiɖɔ nú gbɛtɔ́ e ɖo ayǐkúngban jí lɛ́ɛ wɛ ɖɔ yě ní kpa susu nú kanlin e è sɔ́ hwǐ dó gblé wǔ ná, cóbɔ é ka lɛ́ kpo ɖo gbɛ ɔ́ sín akpajlɛ́, bó dó sɔ́ ɛ su.

Nǔɖexlɛ́mɛ 16:14

Awǒvi e ɖo nǔ jlɛ̌ wɛ lɛ́ɛ sín yɛ lɛ́ɛ wɛ. Yɛ atɔn énɛ́ lɛ́ɛ ɖidó axɔ́sú e ɖo ayǐkúngban ɔ́ bǐ jí lɛ́ɛ gɔ́n, bó ná kplé yě nú ahwan e è ná fun ɖo Mawu Nǔbǐwúkpétɔ́ ɔ́ sín azǎn ɖaxó ɔ́ gbe é.

Nǔɖexlɛ́mɛ 18:2

Wɛnsagun ɔ́ sú xó tlílí bó ɖɔ: “É jɛ ayǐ lóóo, Babilɔ́nu toxo ɖaxó ɔ́ jɛ ayǐ lóóo! Awǒvi lɛ́ɛ sín nɔtɛn wɛ é nyí din, bó nyí bibɛtɛn nú yɛ nyanya alɔkpa alɔkpa lɛ́ɛ bǐ; xɛ blíblí, xɛ gbɛ́ hɛn tɛnmɛ tɛnmɛ lɛ́ɛ bǐ nɔ́ nɔ fínɛ́.

Nǔɖexlɛ́mɛ 18:23

Zogbɛ́n sín wěziza sɔ́ ná hɔ́n ɖo agblo towe mɛ gbeɖé ǎ; è sɔ́ ná se asú kpó asi kpó e da yěɖée tlóló ɔ́ sín gbe ɖě ɖo agblo towe mɛ ǎ, ɖó ajɔ̌tɔ́ towe lɛ́ɛ ko nyí nǔsúɖaxó gbɛ ɔ́ tɔn ɖ'ayǐ, bɔ a zě majíki sín nǔwiwa towe lɛ́ɛ dó flú to lɛ́ɛ bǐ ná.”

Nǔɖexlɛ́mɛ 19:20

Ahwan wlí kanlin ɔ́ kpó gbeyíɖɔnyíjɛtɔ́ e jlɛ́ nǔ ɖo nukɔn tɔn ɔ́ kpó. Nǔjlɛ́jlɛ́ énɛ́ lɛ́ɛ wɛ é dó flú mɛ e wú kanlin ɔ́ sín wuntun ɖe, bɔ yě nɔ́ sɛn kanlin ɔ́ sín akpajlɛ́ lɛ́ɛ ná. È sɔ́ kanlin ɔ́ kpó gbeyíɖɔnyíjɛtɔ́ ɔ́ kpó gbɛɖe gbɛɖe nyi dó myɔ togotogo e mɛ hwemí ɖo jiji ɖe wɛ ɔ́ mɛ.

Nǔɖexlɛ́mɛ 2:11

“Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́ ná kú kú wegɔ́ ɔ́ ǎ.”

Nǔɖexlɛ́mɛ 2:17

“Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́, un ná ná ɛ nǔɖuɖu e è nɔ ylɔ́ ɖɔ mǎna bɔ é ɖo hwlǎhwlá ɔ́. Un ná lɛ́ ná ɛ awǐnnya wěwé e jí è wlǎn nyǐkɔ yɔ̌yɔ́ ɖé dó ɔ́; mɛ ɖěbǔ tunwun nyǐkɔ énɛ́ zɛ mɛ e yí awǐnnya énɛ́ é wú ǎ.”

Nǔɖexlɛ́mɛ 2:29

“Mɛ e ɖó tó, bó ná dó se nǔ ɔ́ ní se nǔ jɛ nǔ e ɖɔ nú agun lɛ́ɛ wɛ Yɛsinsɛn ɖe ɔ́ mɛ ganjí!”

Nǔɖexlɛ́mɛ 2:7

“Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́, un ná ná ɛ gbe, bɔ é ná ɖu atín e nɔ ná gbɛ jɔ gbɛ mɛ, bó ɖo Mawu sín jikpá mɛ ɔ́ sín sínsɛ́n.”

Nǔɖexlɛ́mɛ 20:10

Hwenɛ́nu ɔ́, è zě awǒvi e ɖo yě flú wɛ ɔ́ nyi dó myɔ togotogo e mɛ hwemí ɖo jiji ɖe wɛ ɔ́ mɛ; myɔ énɛ́ mɛ wɛ è ko zé kanlin ɔ́ kpó gbeyíɖɔnyíjɛtɔ́ ɔ́ kpó nyi; yě ná ɖo ya ɖaxó ɖé ji wɛ zǎn kéze káká sɔ́yi.

Nǔɖexlɛ́mɛ 20:8

bɔ é ná yi flú to e gba kpé wɛ̌kɛ́zo ɛnɛ lɛ́ɛ mɛ é; to lɛ́ɛ wɛ nyí Gɔgu kpó Magɔ́gi kpó . É ná kplé yě, bɔ yě ná fun ahwan, bó ná sukpɔ́ nyɛ̌kɛ́n e ɖo xutó é ɖɔhun.

Nǔɖexlɛ́mɛ 3:13

“Mɛ e ɖó tó bó ná dó se nǔ ɔ́ ní mɔ nǔ jɛ nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ mɛ ganjí.”

Nǔɖexlɛ́mɛ 3:22

“Mɛ e ɖó tó bó ná dó se nǔ ɔ́ ní se nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ ganjí.”

Nǔɖexlɛ́mɛ 3:6

“Mɛ e ɖó tó bó ná dó se nǔ ɔ́, ní se nǔ jɛ nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ mɛ ganjí!”

Nǔɖexlɛ́mɛ 9:20

Gbɛtɔ́ e kpo bɔ nǔ nyanya énɛ́ lɛ́ɛ ma hu ǎ lɛ́ɛ lɛ́ kɔ sín nǔ e yě sɔ́ alɔ yě ɖésúnɔ tɔn dó bló ná lɛ́ɛ sinsɛn gúdo ǎ. Yě nɔ gɔn yɛ nyanya lɛ́ɛ sɛn ǎ; yě ka nɔ gɔn vodún e è sɔ́ siká dó bló ná lɛ́ɛ, ée è sɔ́ kpatágan dó bló ná lɛ́ɛ, ée è sɔ́ ganvɔ dó bló ná lɛ́ɛ, ée è sɔ́ awǐnnya dó bló ná lɛ́ɛ kpó ée è sɔ́ atín dó bló ná lɛ́ɛ kpán sɛn ǎ; nǔ énɛ́ lɛ́ɛ ka sixú mɔ nukúnnú ǎ; yě ka sixú se tónú ǎ; yě ka sixú ɖi zɔnlin ǎ.