1 Timɔtée 1:10 - MAWUXÓWÉMA

¹⁰ Nǔblíblíwatɔ́ lɛ́ɛ, súnnu e nɔ ɖó xó xá súnnu gbɛ̌ yětɔn lɛ́ɛ é, nyɔ̌nu e nɔ ɖó xó xá nyɔ̌nu gbɛ̌ yětɔn lɛ́ɛ é, kannumɔjɔ́watɔ́ lɛ́ɛ, adingbannɔ lɛ́ɛ, mɛ e nɔ xwlé nǔ dó nǔvú jí lɛ́ɛ, kpódó mɛ e nɔ wa nǔ e ma sɔgbe xá nǔkplɔ́nmɛ titewungbe ɔ́ ǎ lɛ́ɛ bǐ kpó.

1 Timɔtée 1:10 Iomraidhean Croise

Bǐbɛ́mɛ 19:5

Ée mɛ lɛ́ɛ wá ɔ́, yě ylɔ́ Lɔ̌ti bó kanbyɔ́ ɛ ɖɔ: “Fítɛ́ mɛ e wá gɔ̌n towe zǎn élɔ́ mɛ lɛ́ɛ ɖe? Đe yě tɔ́n bónú mǐ ná zé yě dó ɖu gbɛ.”

Bǐbɛ́mɛ 37:27

Mi gbɔ nú mǐ ná sɔ́ ɛ sa nú Isimayɛ́li ví lɛ́ɛ. Mǐ ní má hu i ó, ɖó nɔví mǐtɔn wɛ é nyí; hun mǐtɔn wɛ.” Bɔ nɔví tɔn lɛ́ɛ yí gbe nú xó e é ɖɔ ɔ́.

Bǐbɛ́mɛ 40:15

ɖó Eblée tomɛ wɛ è kplá mì sín gǎnnugǎnnu wá fí; un ka wa nǔɖé nyi do ɖo fí cóbɔ è wlǐ mì dó gan ǎ.”

Tíntɔ́n 20:7

Ma zé nyɛ Mawu Mavɔmavɔ, Mawu towe ɔ́ sín nyǐkɔ dó da ayihún ó, ɖó nyɛ Mawu Mavɔmavɔ ɔ́ nɔ́ gɔn tó dɔn nú mɛ e ná zé nyǐkɔ ce dó da ayihún ná ɔ́ ǎ.

Tíntɔ́n 21:16

“Mɛ e ná fin gbɛtɔ́ ɔ́, è nǎ hu i; é sixú nyí sa wɛ è ko yi sa, é ká sixú hɛn ɛ ɖó xwé tɔn gbe, è ɖǒ ná hu i.

Ozée 10:4

Yě ɖo akɔ jɛ wɛ ɔ́, xó gbló wɛ yě nɔ́ ɖɔ, adingban wɛ yě nɔ́ ɖó bó nɔ́ xwlé nǔ d'é jí. Mɔ̌ ɖokpó ɔ́, nǔjlɔ́jlɔ́wiwa ɔ́, gběhan aɖǐvɛ́nɔ e wú ɖo hwɛnxlo mɛ ɔ́ ɖɔhun wɛ é cí nú yě.

Levíi ví 18:22

“Súnnu súnnu ɖó ná ɖó xó xá yěɖée ǎ; yě nyí súnnu kpó nyɔ̌nu kpó ǎ. Mi bló mɔ̌ hǔn, su wɛ mi ɖu.

Levíi ví 20:13

“Nú súnnu súnnu ɖó xó xá yěɖée ɔ́, su wɛ yě ɖu. È nǎ hu yě mɛ we lɛ́ɛ dandan. Yě nyí súnnu kpó nyɔ̌nu kpó ǎ. Yě ɖésúnɔ kɔ wɛ kú yětɔn ná nɔ.

Zakalíi 5:4

Mawu Mavɔmavɔ Nǔbǐwúkpétɔ́ ɔ́ ɖɔ émí ɖésú wɛ ná sɛ́ nudómɛ énɛ́ ɔ́ dó. Nudómɛ énɛ́ ɔ́ ná gba nǔ ɖo ajotɔ́ lɛ́ɛ ɖokpó ɖokpó xwé, bó ná gba ɖo mɛ e nɔ ɖó adingban bo nɔ xwlé nyǐkɔ ce d'é jí lɛ́ɛ ɖokpó ɖokpó xwé. Nudómɛ énɛ́ ɔ́ ná nɔ to ɔ́ mɛ, bó ná hɛn nǔ bǐ gblé. Xɔtín kpódó awǐnnya e è dǒ gbá xɔ lɛ́ɛ ná lɛ́ɛ kpó bǐ wɛ ná hánnyá.

Zakalíi 8:17

Mi ma lin nǔ nyanya ɖěbǔ dó miɖée wú ó. Mi ma ɖe kúnnu agɔ bo xwlé nǔ d'é jí ó, ɖó nyɛ Mawu Mavɔmavɔ ɔ́, un gbɛ́ wǎn nú nǔ mɔ̌hunkɔtɔn lɛ́ɛ wiwa.”

Malacíi 3:5

Mawu Mavɔmavɔ Nǔbǐwúkpétɔ́ ɔ́ ɖɔ: ‘Un ná wá tɛ́ntin mitɔn, bó ná ɖɔ hwɛ xá mi. Un ná hwlɛndó, bó ná dó hwɛ mɛ e nɔ wa bǒ lɛ́ɛ, mɛ e nɔ lɛ aga lɛ́ɛ, mɛ e nɔ dó akpá bó má nɔ́ ɖe ǎ lɛ́ɛ, mɛ e ma nɔ sú axɔ́ azɔ̌watɔ́ ǎ lɛ́ɛ, mɛ e nɔ táfú asúkúsi kpó tɔ́cyɔvǐ kpó, abǐ mɛ e nɔ́ jɛ agɔ dó jǒnɔ lɛ́ɛ, kpódó mɛ e ma nɔ ké ya ɖěbǔ nú mì ǎ lɛ́ɛ bǐ kpó.’ ”

Jǎan 8:44

Awǒvi wɛ nyí tɔ́ mitɔn, bɔ nǔ e nɔ jló e lɛ́ɛ wiwa wɛ nɔ myá nukún nú mi. Mɛhutɔ́ wɛ é ko nyí sín do, é yí wǎn nú nǔgbó ǎ, ɖó nǔgbó ɖě ɖo nu tɔn ǎ; é ná ɖó nǔvú ɔ́, nǔ ɖo gaan wɛ, ɖó é ɖésúnɔ bǐ wɛ ko nyí adingbannɔ, bo nyí adingbannɔ lɛ́ɛ sín tɔ́.

Hlɔ̌manu 1:26

Énɛ́ ɔ́ wú wɛ Mawu jó yě dó bɔ yě nɔ wa agbaza sín jlǒ e nyí winnyánú lɛ́ɛ. Nyɔ̌nu yětɔn lɛ́ɛ ɖésú nɔ́ ɖó xó xá nyɔ̌nu yě ɖɔhun lɛ́ɛ; é ka nyɔ́ mɔ̌ ǎ.

Sɛ́nflínmɛ 24:7

Ényí Izlayɛ́li ví ɖé fin nɔví tɔn, bó sɔ́ ɛ dó ɖó kannumɔ abǐ é sɔ́ ɛ sa ɔ́, è nǎ hu mɛ e bló mɔ̌ ɔ́. Lě e mi ná ɖe nǔ nyanya sín tɛ́ntin mitɔn gbɔn ɔ́ nɛ́.

1 Timɔtée 4:6

A kplɔ́n nǔ énɛ́ lɛ́ɛ nɔví lɛ́ɛ ɔ́, a nǎ nyí Klísu Jezu sín mɛsɛntɔ́ ɖagbe, bó ná ɖe xlɛ́ ɖɔ nǔɖiɖixó kpódó nǔkplɔ́nmɛ titewungbe e a xwedó lɛ́ɛ kpán wɛ nyí Yɛsinsɛn sín nǔɖuɖu nú we.

1 Timɔtée 6:3

Ényí mɛɖé kplɔ́n nǔ ɖěvo mɛ, bó ma yí gbe nú xó nǔgbó Aklúnɔ mǐtɔn Jezu Klísu tɔn lɛ́ɛ kpódó nǔkplɔ́nmɛ e sɔgbe xá sinsɛn mǐtɔn ɔ́ kpó ǎ hǔn,

2 Timɔtée 1:13

Đó nǔɖiɖi kpódó wǎn yíyí e mǐ ɖó ɖo bǔ e mǐ ɖe xá Klísu Jezu ɔ́ kpán mɛ é wú ɔ́, hɛn xó jɔ xó e a se ɖo nu ce lɛ́ɛ é, bónú yě ní nyí kpɔ́ndéwú nú we.

2 Timɔtée 4:3

Đó hweɖénu ná wá su, bɔ nǔkplɔ́nmɛ titewungbe ɔ́ sɔ́ ná nyɔ́ se nú gbɛtɔ́ lɛ́ɛ ǎ; lo ɔ́, yě ná xwedó jlǒ yě ɖésúnɔ tɔn, bó ná kplé nǔkplɔ́nmɛtɔ́ wɔ̌buwɔ́bú ɖé lɛ́ɛ nú yěɖée, bɔ yě ná nɔ́ ɖɔ nǔ e nyɔ́ se nú yě lɛ́ɛ nú yě.

Titu 1:13

Nǔ énɛ́ e gbeyíɖɔ ɔ́ ɖɔ dó yě wú ɔ́, nǔgbó ka wɛ; énɛ́ wú ɔ́, gbɛ̌ nǔ nú yě syɛ́nsyɛ́n, bónú yě ní ɖó nǔɖiɖi e sɔgbe é,

Titu 1:9

É ɖó ná hɛn xó jɔ xó, xó ɖeji d'é wú e sɔgbe xá ɖěe è kplɔ́n ɛ ɔ́ dó ayi mɛ syɛ́nsyɛ́n; énɛ́ ɔ́, é ná nyí mɛ, bó ná sixú zé nǔkplɔ́nmɛ titewungbe ɔ́ dó ná akɔ́nkpinkpan mɛ ɖě lɛ́ɛ, bó ná nɔ́ ɖe mɛ e nɔ kpé ta do nú xó ɔ́ lɛ́ɛ sín nǔwanyido xlɛ́ yě.

Eblée 13:4

Asi dida abǐ asú dida ní nyí nǔsísí; asú kpó asi kpó ní nɔ gbejí nú yěɖée. Mawu ná ɖó hwɛ nú mɛ e nɔ ɖo nǔblíblí wa wɛ lɛ́ɛ kpódó mɛ e nɔ ɖo aga lɛ wɛ lɛ́ɛ kpó.

Judi 1:7

Mi flín Sodɔ́mu kpó Gomɔ́ɔ kpó, kpódó to e sɛkpɔ́ yě lɛ́ɛ kpó; to énɛ́ mɛ nu lɛ́ɛ wa nǔ wɛnsagun énɛ́ lɛ́ɛ ɖɔhun; yě lɛ́ jó yěɖée dó nú agalilɛ kpódó hɛ̌nnú wiwa kpó; to énɛ́ mɛ nu lɛ́ɛ ɔ́, è sɔ́ zo mavɔ mavɔ dó ɖo tó dɔn nú yě wɛ; è ɖo tó énɛ́ ɔ́ dɔn nú yě wɛ, bó dó ɖo sɛ́n dó nú mɛ bǐ wɛ.

Nǔɖexlɛ́mɛ 18:13

Nǔhwɛ́nkún e è nɔ ylɔ́ ɖɔ kanɛ́lu ɔ́, kpó nǔhwɛ́nkún ɖěvo ɖěvo lɛ́ɛ kpó; nǔsáwǔ, mǐla kpó zǎlínkpɔ́n kpó; vɛ̌ɛn, ami, linfín, kpó blěe kpó; nyibú kpó lɛ̌ngbɔ́ kpó, sɔ́ kpó kɛkɛ́ví kpó, kannumɔ lɛ́ɛ kpó gbɛtɔ́ ɖěvo lɛ́ɛ kpó.

Nǔɖexlɛ́mɛ 21:27

Amɔ̌ nǔblíblí ɖěbǔ ná byɔ́ toxo énɛ́ mɛ ǎ; mɛ e nɔ jó éɖée dó nú suɖunú kpó adingban kpó ɔ́, ɖě ná byɔ́ toxo énɛ́ mɛ ǎ. Mɛ e sín nyǐkɔ e è nǎ wlán dó gbɛwéma e nyí Lɛ̌ngbɔ́ví ɔ́ tɔn ɔ́ mɛ lɛ́ɛ kɛ́ɖɛ́ wɛ ná byɔ́ toxo ɔ́ mɛ.

Nǔɖexlɛ́mɛ 21:8

Amɔ̌ nǔvɔ́nɔ lɛ́ɛ ɔ́, nǔmaɖitɔ́ lɛ́ɛ ɔ́, suɖutɔ́ lɛ́ɛ ɔ́, mɛhutɔ́ lɛ́ɛ ɔ́, agalɛtɔ́ lɛ́ɛ ɔ́, majíkiblótɔ́ lɛ́ɛ ɔ́, vodúnsɛntɔ́ lɛ́ɛ kpódó adingbannɔ lɛ́ɛ bǐ kpán ɔ́, tɛn yětɔn ná nɔ myɔ togotogo e mɛ hwemí ɖo jiji ɖe wɛ é mɛ; é wɛ nyí kú wegɔ́ ɔ́.”

Nǔɖexlɛ́mɛ 22:15

Amɔ̌, avǔn lɛ́ɛ, majíkiblótɔ́ lɛ́ɛ, agalɛtɔ́ lɛ́ɛ, mɛhutɔ́ lɛ́ɛ, vodúnsɛntɔ́ lɛ́ɛ, kpó mɛ e yí wǎn nú adingban, bó nɔ wa adingbanzɔ́ lɛ́ɛ bǐ kpó ná nɔ toxo ɔ́ gúdo!