Joeli 2:23 - Vakavakadewa Vou kei na iVola tale eso

²³ Dou marau, na luve i Saioni, Ka reki ena Turaga, na nomudou Kalou, Ni sa vakatauca na uca Me nomudou i vakadinadina; Sa vakatauca vakalevu na uca vei kemudou, Na uca taumada kei na uca taumuri Me vaka ena gauna e liu.

Ai Vola Tabu (Vakadewa Makawa Vakavoutaki 2021)

²³ Koi kemudou na luve i Saioni, dou marau ka rekitaki Jiova na nomudou Kalou, ni sa solia vei kemudou na uca taumada me vakasavasavataki kemudou, io, ena vakatauca vei kemudou na uca, na uca taumada kei na uca taumuri, me vaka eliu.

AI VOLA TABU

²³ Ia koi kemudou na luve i Saioni, dou marau, ka rekitaki Jiova na nomudou Kalou: ni sa solia vakavinaka vei kemudou na uca taumada, io, ena vakatauca vei kemudou na uca tau bi, na uca taumada, kei na uca taumuri me vaka eliu:

Vakavakadewa Makawa

²³ Ia koi kemudou nai taukei mai Saioni, dou marau, ka rekitaki Jiova na nomudou Kalou: ni sa solia vakavinaka vei kemudou na uca taumada, io, ena vakatauca vei kemudou na uca, na uca taumada kei na uca taumuri me vaka eliu:

Ai Vola Tabu Ena Vakavakadewa Vou

²³ Dou marau, na luve i Saioni, Ka reki ena Turaga, na nomudou Kalou, Ni sa vakatauca na uca Me nomudou i vakadinadina; Sa vakatauca vakalevu na uca vei kemudou, Na uca taumada kei na uca taumuri Me vaka ena gauna e liu.

Joeli 2:23 Iomraidhean Croise

1 Tui 8:36

ia mo ni qai rogoca mai lomalagi. Ni vosota na nodra i valavala ca na nomuni tamata. Ni vakavulici ira ena sala vinaka me ra lako kina, kemuni Jiova, ka vakatauca na uca ki na nomuni vanua oqo o ni a solia vei ira na nomuni tamata me nodra i votavota.

Jope 33:23

De dua ena qai mai vukei koya e dua na agilosi E dua vei ira na udolu vakaudolu na agilosi ni Kalou, Era dau mai vakadreta vei ira na tamata na nodra i tavi.

Jope 37:13

Sa tala mai na Kalou na uca Me mai vakasuasuataka na vuravura; E rairai ni a tala mai na uca o koya Me totogitaki ira kina na tamata, Se me vakaraitaka kina vei ira na nona veitotaki.

NA SAME 104:34

Me na taleitaka o koya na noqu sere, Ena vuku ni noqu sa dau rekitaki Jiova.

NA SAME 147:8

Sa tabonaka na lomalagi ena o; Sa vakatauca mai na uca ki na vuravura, Ka sa vakatubura na co ena veidelana.

NA SAME 149:2

Mo reki Isireli ena vuku i koya a buli iko. Ni reki na lewe i Saioni ena vuku ni nomuni tui!

NA SAME 28:7

Sa taqomaki au ka maroroi au o Jiova, Au sa vakadinati koya. Sa vukei au o koya, ia ka'u sa marau Ka laga sere me'u vakacaucautaki koya.

NA SAME 32:11

Ni reki ka marau vei Jiova oi kemuni kece na yalododonu Ena vuku ni veika sa cakava o koya! Ni kaila ena marau oi kemuni kece sa talairawarawa vua.

NA SAME 84:6

Ia ni ra lakova na buca mamaca o Baka, Sa mani yaco kina me vanua e levu kina na mataniwai, Ka sa vakatawana na veimataniwai na uca taumada.

Vosavakaibalebale 16:15

Ni serau na matana na tui, sa dusia oqo na bula; na nona yalovinaka sa vaka na o e dau vakatubu uca ena vula i tubutubu.

Aisea 30:21

Kevaka o ni sese mai na sala vaka ki na i matau se ki na i mawi, o ni na rogoca na domona mai dakumuni ni kaya. “Oqo na gaunisala. Ni mai lako kina.”

Aisea 30:23

Ena gauna o ni tea kina na nomuni teitei ena vakatauca kina na uca na Turaga me ra vakabulai; Ena solia me levu na ka o ni tamusuka mai na nomuni tikiniqele, ka na levu na veico me kedra na nomuni bulumakau.

Aisea 41:16

O ni na viritaki ira ki cake; Ena qai caginataki ira na cagi, Ka ra na veiseyaki ena cava. Ia o ni na marau ga Baleta ni sai au ga na nomuni Kalou; O ni na rokovi au, na Kalou Yalo Savasava i Isireli.

Aisea 61:10

Mo marau Jerusalemi Ena vuku ni ka sa cakava o Jiova. Sa vaka na yalewa e vakarau vakawati Sa dara na nona i sulu ni vakamau. Sa vakasulumi koya na Kalou Ena veivakabulai kei na qaqa.

Jeremaia 3:3

O ya na vuna sa tarovi kina na uca, ka sa sega ni tau na uca ni vula i tubutubu. Io, o sa vaka na i rairai ni yalewa dautagane; o sa sega ni bau madua.

Jeremaia 5:24

Era sega ni dau kaya ena lomadra, ‘Me da sa rerevaki na noda Kalou, o koya sa solia mai na uca ena kena gauna, na uca ni vula i laulau kei na vula i tubutubu ka sa dau taqomaka tiko na macawa ni gauna ni tatamusuki.

Lele i Jeremaia 4:2

O ira na luve i Saioni vakamareqeti, Era sai yau levu vei keda me vaka na koula, Ia oqo era sa vaka wale na kuro qele, Na cakacaka ni liga i koya na dautuli kuro!

Isikeli 34:26

‘Ia ka'u na cakava vei ira kei na veiyasana sa tiko volita na noqu ulu ni koro me ka ni veivakalougatataki; au na vakatauca talega na uca ena kena gauna; ena tau mai na uca ni veivakalougatataki.

Osea 6:3

Me da tovolea sara me da veikilai kei Jiova. Ena lako vakaidina mai kivei keda o koya me vaka na kida ni mataka; io, ena lako vakaidina mai vei keda me vaka na uca mirimiri ena vula i tubutubu ka dau vakasuasuataka na vuravura.”

Vunau ni Soro 26:4

au na qai vakatauca vei kemuni na uca ena kena gauna taudonu, ka na sautu sara na vua ni qele, ka na vuataka na vuana na kau ni veiwere.

Emosi 4:7

Au a mani tarova na uca ena gauna e gadreva vakalevu kina mai na nomuni i teitei. Au a vakatauca na uca ena dua na koro, ka segai ena dua tale na koro. A sa tau na uca ena dua na i teitei, ia sa mamaca ga ka malai e dua tale na i teitei.

Sakaraia 10:1

Ni kerea vei Jiova me tau na uca ena vula i tubutubu. O Jiova ga sa dausolia mai na o loaloa ni uca ka vakatauca na uca me vakadrokadrokataka na veivanua ni teitei me baleta na tamata kecega.

Sakaraia 10:7

O ira na Isireli era na kaukauwa me vaka na sotia, Ka ra mamarau me vakataki ira era gunu waini tiko. Ena dau qai nanumi na qaqa oqo mai vei ira na nodra kawa e muri Ka ra mamarau kina, Ni ra sa mamarau baleta na ka sa cakava o Jiova.

Sakaraia 9:13

Au na vakayagataki Juta Me vaka na dakaititi ni sotia, Kei Isireli me vaka na moto saisai. Au na vakayagataki ira na tagane ni Saioni Me vaka e dua na i seleiwau, Ka me'u vala kina kei ira na kai Kirisi.”

Sakaraia 9:9

Ni reki ka marau Oi kemuni na kai Saioni! Ni kaila ena marau levu Oi kemuni na kai Jerusalemi! Raica, sa lako tiko mai vei kemuni o koya na nomuni tui! Sa lako mai ena lagilagi kei na qaqa, Ia sa yalo malumalumu ga Ka vodoka voli na luve ni asa.

Cakacaka 14:17

Ia sa sega ga ni laiva o koya me sega na nona i vakadinadina, ka ni sa dau caka vinaka tikoga, ka dau solia mai vei kemuni na uca mai lomalagi kei na vuata ena kena gauna. Sa dau solia vei kemuni na kakana ka sa vakamarautaka na lomamuni.”

Vakarua 11:14

Kevaka o ni vakayacora oqo, ena qai vakatauca mai na uca ena kena gauna taudonu, o ya na uca taumada kei na uca taumuri, ka mo ni kumuna vata rawa kina na kemuni sila, na waini, kei na waiwai.

Vakarua 28:12

Ena vakatauca mai na uca ena kena gauna ena nona lololo sa vutuniyau ena veika e vuqa mai lomalagi, ka vakalougatataka na nomuni cakacaka kecega. O ni na qai soli ka ga yani ki na veivanua e vuqa, ia o ni na sega ni bau kerekere ki na dua na vanua.

Vakarua 32:2

Ena mirimiri me vaka na mata ni uca na noqu i vakavuvuli, ka tau me vaka na tegu ki na dela i vuravura na noqu vosa; me vaka na uca mirimiri ki na dela ni co, ka vaka na uca tau bi ki na kau e se qai tubu cake.

Filipai 3:1

Me'u tinia, kemuni na wekaqu, ni reki ka marau ena nomuni sa tu vata kei na Turaga! E sega ni ka ni oca vei au me'u vola tale yani na veika au a sa vola oti e liu, ka ni na vinaka cake sara vei kemuni oqo.

Filipai 3:3

Ni sai keda ga oqo, e sega ni o ira, ka sa yaco vei keda na veicilivi dina, ni da sa qarava na Kalou ena veiliutaki ni Yalo Tabu ka sa noda vata na marau ni da sa tu vata kei Karisito Jisu. Eda sa sega ga ni vakararavi ki na veika vakayago,

Filipai 4:4

Ni reki tikoga ena nomuni sa tu vata kei na Turaga. Au sa kaya tale: ni reki tikoga!