इफिसुस 4:12 - Muria Far Western

¹² अनि ओर लोकुरा सेवाता द्वारा मसिना मेन्दुल मन्ता ओद मसिलोकुरा सभातुन मसिना संबन्दते मजबुत बनेहकियाना साटि परमेस्वरना सबोय लोकुरकुन तयार कियाना मन्ता।

इफिसुस 4:12 Iomraidhean Croise

लूका 22:32

मति नना ते मिया विस्वास कमजोर आयमाकि अनि निमा पस्तेमासुन नावा हेरे वास निमा दुसरो चेलालोरकुन विस्वासते मजबुत कियान साटि परमेस्वरतुन प्रार्थना कितोना।”

बुतोंग 1:17

ओर मावागा गिन्ति आस इद सेवातिगा यहुदा वने मावासंग सहभागि मतोर।”

बुतोंग 1:25

यहुदा पाप किस येसुना खास चेलालना बुतो तासिस ओना साटि तयारि किता ओद जागातिगा हतोर। इन्जोर ओना सेवाता अनि येसुना खास चेलाल आयाना पथता बदला येर इवुरासनिकेडाल बोन निमा येसुना खास चेला आस आचातोन इद तोहा।”

बुतोंग 11:23

ओर बरनबास वरोर सोबाय मानेय मतोर; अनि ओर पवित्र आत्मातुन मानेमास परमेस्वरनिगा सोबाय विस्वास केवालोर मतोर, ओर अगा अवस परमेस्वर लोकुरा पोरो हिन्तोर आशिष हुळस गिरदा आतुर अनि जिवालावे किस प्रबुनिगा विस्वास किम्ट इन्जोर सबोयलोरकुन उपदेश हितुर। अनि दुसरो पकाय लोकुरक प्रबुनिगा विस्वास कितुरक।

बुतोंग 20:24

मति नना नावा जिवातुन बाताले किमत मन्ता इदाम विचार केवोन। मति प्रबु येसु नाकुन निवळे किता ओद बुतो पुरा कियाना मुक्य पोल्लो मन्ता। परमेस्वरना हजोर दयाता सोबाता पोल्लो सबोय लोकुरकुन वेहान साटि प्रबु येसु नाकुन निवळेकितोर ओद बुतो पुरा कियाना केवल नावा लक्ष मन्ता।

बुतोंग 20:28

इन्जोर आपुनतुन अनि बेळांग लेहका मन्ता मसिलोकुरा सबोय सभातुन चवकसि किम्ट। परमेस्वर आपुनोर मरिना नतुर हिस असतोर परमेस्वरना बेळांग लेहका मन्ता मसिलोकुरा सभातुन केपान साटि पवित्र आत्मा मिकुन अध्यक्ष ठहरे कितोर।

बुतोंग 9:31

अनि पजा सबोय यहुदि अनि गलीलि अनि सामरि प्रदेशतिगा मसिलोकुरा सभातुन शान्ति पुटतु अनि विस्वासि लोकुर प्रबुना वरेते ताकसोर अनि पवित्र आत्माता मदतते आपुना विस्वासतिगा मजबुत आस विळसोर हतुर।

रोमि 12:5

अदामे माक सबोय विस्वासि लोकुरक अलग अलग लोकुरक मन्तोरोम मति मसिना संबन्दते मसिहा माकुन उन्दि कितुर इन्जोर माक सबोय लोकुरक उन्दि मेन्दुल लेहका मन्तोरोम। अनि सबोय लोकुरक ओद मेन्दुलता अलग अलग भाग मन्तोरक अनि सबोय भागता वरोर दुसरोनासंग संबन्द मन्ता।

रोमि 12:7

अनि बोनाय वरोर दुसरोना सेवा कियाना वरदान पुटता ते ओर दुसरोन सोबाय सेवाकिसोर मनिर। अनि बोने करहाना वरदान पुटता ते ओर सोबाय करहिचोर मनिर।

रोमि 14:19

इन्जोर माक दरोज वरोर दुसरोनासंग शान्तिते मन्दान साटि कोसिस कियाला पहाजे अनि वरोर दुसरोना विस्वासतिगा मजबुत बनेमायान साटि मदत कियाला पहाजे।

रोमि 15:14

हे नावोर बायि-दादालोरक, निमाट सोबाय स्वभावते मन्तोरिट। अनि मिकुन बाताल कियाना उचित मन्ता अदेन पुरा पुन्तोरिट इन्जोर निमाट वरोर दुसरोन करिहला परान्तोरिट इदाम नना पुरा रितिते पुन्तोना।

रोमि 15:2

अनि आपुनोर विस्वासि बायि-दादालोरकुन, विस्वासते मजबुत बनेहकियान साटि दुसरो लोकुरक साटि बोद भलायिता मन्ता ओदे किस ओरकुन गिरदा किम्ट।

रोमि 15:29

अनि नना मिया हेरे वायका असके मसिना आशिष माक सबोय लोकुरकुन पकाय पुटार इन्जोर नना पुन्तोना।

१ कुरिन्थुस 12:27

नावा इन्दानाता अर्थ इदाम मन्ता: इदेक निमाट सबोय विस्वासि लोकुरक मसिहना मेन्दुल आन्दिट अनि मसिलोकुरा सभाता सबोय लोकुरक ओना मेन्दुलता उन्दि उन्दि भाग मन्तोरिट।

१ कुरिन्थुस 12:7

अनि सबोय लोकुरा फायदा आयान साटि सबोय लोकुरकुन पवित्र आत्माता उन्दि उन्दि वरदान हिता मन्ता।

१ कुरिन्थुस 14:12

पवित्र आत्मा हिता वरदानकुन पुटहान साटि मिया पकाय इच्चा मन्ता इन्जोर येसुना दलतुन विस्वासते मजबुत किन्तांग ओव वरदानतुने पुटहान साटि निमाट पकाय कोसिस किम्ट।

१ कुरिन्थुस 14:14

नना अन्जान बोलिंगते प्रार्थना कियान बेरा नावा बुद्धि बुतो केवो मति खरोय नावा आत्मा प्रार्थना किन्ता।

१ कुरिन्थुस 14:26

इन्जोर हे बायि-दादालोरक, निमाट परमेस्वरना आरादना कियान साटि मिलेमान्तोरिट असके बोदायि निमाट किन्तोरिट ओद सबोय लोकुरा आत्मिक फायदा साटि आयिला पहाजे। मन्जे मियागडाल बोरे वरोर मानेय पाटा ओन्तोर बोरे करहान्तोर अनि दुसरो बोरे परमेस्वरताल विशेषाल पोल्लोंग तोहान्तोर, दुसरो बोरे अन्जान बोलिंग वळकान्तोरक अनि दुसरो बोरे बोलिता अर्थ समजेकिस वेहान्तोर मति इव सबोय पोल्लोंग सबोय लोकुरा फायदा साटि आयिला पहाजे इदाम नना मिकुन इन्तोना।

२ कुरिन्थुस 12:19

माक इद सबोय माकुन पिसहान साटि इन्दिला आतोरोम इन्जोर निमाट लोकुरक बाताल इदेक वने समजेमास मनकिट बहे? परमेस्वरना मुने इदाम समजेमास सबोयि मसिना चेला आस इन्दिला आतोम। हे गोतियालोरक, इद सबोय पोल्लोंग निमाट विस्वासते मजबुत आयान साटि इन्दिला आतोरोम।

२ कुरिन्थुस 13:11

हे बायि-दादालोरक, इदेक नना मिकुन नमस्कार किस मियागडाल दान्तोना। नना कियान साटि मिकुन वेहतान ओद सबोय पोल्लोंग अदामे किसोर मन्ट। वरोर दुसरोन मानेमास उन्दि मन्दे विचार किस शान्तिते मन्ट अदेनते मया अनि शान्ति हेवाल परमेस्वर मियासंग मन्दानुर।

२ कुरिन्थुस 13:9

माक कमजोर अनि निमाट लाववाले मन्तोरिट असके माक पकाय गिरिदा मन्तोरोम। अनि निमाट मजबुत आम्ट इदाम प्रार्थना वने किन्तोरोम।

२ कुरिन्थुस 3:8

ते परमेस्वरना आत्माता सेवा मूसाना कोटता नियमताल वने बचोन मान्जार!

२ कुरिन्थुस 4:1

इन्जोर परमेस्वरना दयाते माकुन सेवाकियाना सन्दि पुटतु इन्जोर माक बसकेय हिमत तासोर आस,

२ कुरिन्थुस 5:18

इद सबोय पोल्लोंग परमेस्वरनिकेडाल मन्तांग, ओर माकुन मसिना द्वारा आपुनासंग मिले कितुर। दुसरो लोकुरक परमेस्वरनासंग सोबायि संबन्द केविर इन्जोर मिले कियानाता इद बुतो माकुन हितुर।

२ कुरिन्थुस 6:3

येसु मसिना सोबाता पोल्लो वेहाना मावा बुतोतुन बोरे दोष हेमाकिर इन्जोर माक बोदे पोल्लोतिगा बोनाय तकलिप आयार इदाम बोदे सन्दि हेवोम।

२ कुरिन्थुस 7:1

इन्जोर हे नावोर बायि-दादालोरक, इव वाचांग माकुन पुटतांग इन्जोर वराट माक परमेस्वरना मुने आपुना मेन्दुलता अनि आत्माता अशुद्ध किन्ता पोल्लोंग सबोय हरचिस परमेस्वरतुन मानेमास पवित्रतातुन पुरा केविट।

इफिसुस 1:23

अनि मसिलोकुरा सभा मसिहानोर मेन्दुल आन्दुर, अनि मसिलोकुरा सभाता द्वारा मसि सबोय लोकुरा हेरे अविन्तोर अनि ओरा सबोय पोल्लोतुन सबोय रितिते परिपूर्ण बनेहकिन्तोर।

इफिसुस 4:16

अनि मेन्दुलता अलग अलग भागता बुतो अलग मन्ता। अनि ओद अलग अलग भाग आपुना आपुना बुतो मयाते बराबर किसुन सबोय मेन्दुलतुन बरसाना अनि मजबुत कियान साटि मदत किन्ता। इदाम ओनिगा सबोय विस्वासि लोकुरक मेन्दुल लेहका उन्दि आस सबोय परिस्थितिते जोळेमास मयाते बरसोरिंग मन्तोरक।

इफिसुस 4:29

बोर केन्जनुर अदेनते ओरा भला आयि इन्जोर लोकुरकला मदत साटि जरुरि मन्ता सोबाय पोल्लो वळकिला पहाजे मति बोदायि खराब पोल्लो मिया टोडिताल पसियमाकि।

इफिसुस 4:4

बसके मिकुन केयस मतोर ते उन्दिय आशासाटि केयस मतोर इदामे उन्दिय मेन्दुल अनि उन्दिय आत्मा मन्ता।

कुलुसि 1:24

इदेक मिया साटि पकाय तकलिप मन्ता इन्जोर नना गिरदा आतोना अनि इद पकाय तकलिपतुन सहेनकियाना जिमेदारि येसु मसिनिकेडाल ओना मेन्दुल मन्ता ओना मसिलोकुरा सभा साटि नावा मेन्दुलतिगा पुरा किन्तोना।

कुलुसि 1:28

इन्जोर माक ओना प्रचार किन्तोरोम। अनि सबोय लोकुरकुन मसिनिगा परिपूर्ण किस परमेस्वरना मुने उपस्थित कियान साटि माक सबोय लोकुरकुन चेतावनि किस सबोय ग्यानते सबोय लोकुरकुन करहान्तोरोम।

कुलुसि 4:17

अनि अरखिपुसतुन प्रबुनिगा निकुन सोपे कितोर ओद सेवा हुशयारिते पुरा कियाकि इन्जोर इन्किट।

१ तिमुति 1:12

अनि नाकुन लाव हितोर ओर आपुना प्रबु येसु मसि नाकुन विस्वासयोग्य हुळसुन ओना सेवा साटि ठहरे कितुर इन्जोर नना ओन धन्यवाद किन्तोना।

२ तिमुति 4:11

अनि इदेक लूकाल वरोरे मावा संगे मन्तोर। मरकुसिन नावा हेरे तरा बाक्याकि प्रबुना सेवा साटि ओर नाकुन पकाय मदत केवाल मतोर।

२ तिमुति 4:5

अनि हे तिमुथियुस, निया सबोय परिस्थितितिगा सावदान मन, अनि दुःख सहेकिम, परमेस्वरना पोल्लोतुन प्रचार कियाना बुतो किम अनि परमेस्वर निया कयदे सोपे किता परमेस्वरना सेवातुन पुराकिम।

यहुदि 13:17

मसिलोकुरा सभाता मुक्याल लोकुरा पोल्लोतुन मानेमास ओरा अधिनते मन्ट। ओरक परमेस्वरना मुने मिया बारेता हिसाब हियाला पहाजे इन्जोर ओरक मिया साटि केपसोर मन्तोरक। ओरा आग्यातुन मानेमायकिट ते ओरा सेवा गिरदाते किया परान्तोरक। निमाट ओरकुन मानेमायवेक ते ओरक आपुना सेवा गिरिदाते केवोर आयनुरक इन्जोर मिकुन बोदे फायदा वने पुटो।

यहुदि 6:1

इन्जोर खराब बुतोताल पस्तेमास परमेस्वरनिगा विस्वास कियाना,