२ तिमुति 2:15 - Muria Far Western

¹⁵ अनि परमेस्वर निकुन स्विकार कियान साटि योग्य अनि परमेस्वरना उचित सेवक आसुन निमा सोबाय मेहनत किम। अनि परमेस्वरना खरोय पोल्लोतुन खरोय रितिते करहा। अनि इदाम कियाकि ते प्रबुना मुने बसकेय निमा लज्जित आयो आयिकि।

२ तिमुति 2:15 Iomraidhean Croise

मत्ति 13:52

येसु ओरकुन इतुर, “इन्जोर स्वरग राज्यतोर चेलाह बनेमातोर परमेस्वरना नियमतुन करिहवालोरक सबोय लोकुरक आपुना भंडारताल पुनांग अनि जुनांग चिजक टन्डान्तोर ओर मानेय लेहका मन्तोर।”

मरकुस 4:33

अनि येसु ओरकुन इदाम पकाय उदाहरण हिस-हिस ओरकुन समजेमायानाता अनुसार ओरकुन पोल्लो वेहतुर।

लूका 12:42

अनि प्रबु पतरासिन इतुर, “बरोबर बेराते तिन्दा-उन्दा हेविर इन्जोर मालकाल सबोय नोवकरकनिगा मुक्याल बनेकितोर विस्वासयोग्य अनि बुद्धिमान भणडारि, बोर मन्तोर?

बुतोंग 2:22

अनि पतरस असा इन्तोर, “हे इस्रायेल लोकुरक, इव पोल्लोंग केन्जाट: निमाटे पुन्तोरिट लेहका, परमेस्वर नासरत नाटेनोर येसुना द्वारा मिया नडुम किता लावता बुतोंग अनि आश्चरय बुतोंगता चिन्हाते मिकुन परमेस्वर ओर येसुन तोहतोर,

बुतोंग 20:27

बाक्याकि परमेस्वरना सबोय योजना मकिहिच इरोन आस मिकुन पुरा रितिते नना वेहतोना।

रोमि 14:18

अनि बोर आयि इदाम जिवन जिवेमास मसिना सेवा किन्तोरक ओनाताल परमेस्वर गिरदा आन्तोर अनि सबोय लोकुरक ओन मान हिन्तोरक।

रोमि 16:10

अनि मसिनिगा बचोन इमानदार मन्तोर इन्जोर स्पष्ट रुपते तोहतोर ओर अप्पेलेसिन नावा नमस्कार इन्ट। अनि अरिस्तुबुलुसना लोन मन्वालोर सबोय विस्वासि लोकुरकुन वने नावा नमस्कार इन्ट।

रोमि 6:13

अनि आपुना मेन्दुलतुन पापता बुतो किस पापता सेवा साटि सोपे केमाट। मति माक हातोरिगाडाल असा जिवेमातोम इदाम समजेमास मिकुन परमेस्वरतुन सोपे किम्ट। अनि आपुना मेन्दुलतुन दारमिकताता सेवाता सादनता रुपते परमेस्वरतुन सोपे किसिम्ट।

१ कुरिन्थुस 2:6

नना वेहान बेरा मानेयना ग्यानता अनुसार वळकोन ते वने मसिना विस्वासते पका आतोरा नडुम माक ग्यानता पोल्लोंग केन्जान्तोरोम। मति इद दुनियाता ग्यान अनि नाश कळियवालोर इद दुनियाता अदिकारि लोकुरा ग्यानता पोल्लोंग आयो।

२ कुरिन्थुस 10:18

बाक्याकि आपुना हजोरपण किन्तोर ओर आयो मति प्रबु बोना हजोरपण किन्तोर ओरे परमेस्वरना येताना योग्य मन्तोर।

२ कुरिन्थुस 3:6

ओर माकुन पुनाल नियमता सेवक आयाना योग्य कितोर। ओदे मूसाना कोटता नियमता सेवक आयो मति माकुन पवित्र आत्माता सेवक बनेकितुर बाक्याकि मूसाना कोटता जुनाल नियम अनन्त काळता हायानाता दन्डता कारण आन्ता मति परमेस्वरना आत्माते अनन्त काळता जिवन जिवेमायाना कारण आन्ता।

२ कुरिन्थुस 4:2

माक लज्जाता गुपित बुतोतुन हरचिस दुसरो लोकुरकुन दोखा केवोम परमेस्वरना पोल्लोतिगा बाताले गलति पोल्लो मिलेह कियाना या परमेस्वरना पोल्लोताल बदले कियाना केवोम। इदाम खरोय पोल्लो वळकानाते माक परमेस्वरना मुने बचोन खरोय लोकुरक मन्तोरोम इन्जोर सबोय लोकुरकुन समजेमायार।

२ कुरिन्थुस 5:9

इन्जोर माक इद दुनियाता मन्दाना योग्य मेन्दुलतिगा मनकोम या इद मेन्दुल तासिस स्वरगतिगा मन्दाना योग्य मेन्दुलतिगा मनकोम ते वने प्रबुन सोबायि गिरिदा कियालागार इदाम मावा इच्चा मन्ता।

गलाति 1:10

इदेक नना बाताल मानेयना या परमेस्वरना स्विकार कियाना कोसिस किन्तोना? बाताल नना मानेयकुने गिरदा कियाना साटि कोसिस किन्तोना इदाम निमाट विचार किन्तोरिट बहे? आयो! नना परमेस्वरना स्विकार साटि कोसिस किन्तोना। नना इदेकवनाह मानेयकुने गिरदा किसोर मनका ते येसु मसिहनोर दास आयोन आस मनेना।

इफिसुस 1:13

मसिना द्वारा मिकुन वने मिया पिसाना साटिता सोबाता पोल्लो मन्जे परमेस्वरना खरोय पोल्लो निमाट केन्जुन ओनागा विस्वास किसुन,

१ तिस्लुनि 2:4

अनि परमेस्वर माकुन योग्य ठहरे किस सोबाता पोल्लोतुन माकुन सोपेकितुर इन्जोर माक वळकिन्तोरोम। अनि माक लोकुरकुन गिरदा कियान साटि कोसिस केवोम मति माक ते परमेस्वरतुन गिरदा किन्तोरोम, बाक्याकि ओर मावा मन्दा उदेशतुन पुन्तोर।

१ तिस्लुनि 5:14

हे बायि-दादालोरक, बोरे गलति रितिते दान्तोर ते ओरकुन ओरा गलतितुन समजेहकिम्ट इन्जोर माक मिकुन वेहान्तोरोम। अनि बोरे मन्दे कमजोर मन्तोर ते ओरकुन मजबुत किम्ट। अनि कमजोर लोकुरकुन संभाले किम्ट अनि सबोय लोकुरासंग धीरज तोहाट।

१ तिमुति 4:6

अनि हे तिमुथियुस, नना निकुन वेहता सबोय पोल्लोंग विस्वासि लोकुरकुन समजेहकिस परमेस्वरना खरोय पोल्लो अनि अदेना बारेता खरोय उपदेश निमा पालन कियाकि ते निमा परमेस्वरना सोबाय सेवक बनेमायकि।

यहुदि 4:11

परमेस्वरना आग्या मानेमायोर ओद कारणते परमेस्वरना आरामतिगा हन्दिला परोर आतुरक इन्जोर माक परमेस्वरना आरामतिगा हन्दान साटि सबोय रितिते कोसिस केविट।

याकुब 1:12

अनि बोर मानेय पकाय तकलिपतुन विस्वासते मन्जुन मजबुतते अदेन सहेनकिस विजय आन्तोर ओर मानेय आशिरवादते मन्तोर, बाक्याकि ओर पकाय तकलिपतुन सहेन किस विजय आसुन पजा प्रबु आपुनिगा मया केवालोरकुन अनन्त जिवनता सम्मान हियानुर इन्जोर वाचा हितोर ओद अनन्त जिवन ओन पुटार।

याकुब 1:18

अनि माक परमेस्वरना सुष्टितीगा हादितांग पहले कायांग आस मन्दान साटि परमेस्वर आपुना इच्चाते माकुन खरोय पोल्लोते जनम हितुर।

२ पतरस 1:10

इन्जोर हे बायि-दादालोरक, परमेस्वर मिकुन खरोय केयतोर अनि आचतोर ओद पोल्लोतुन मिया मन्दे पका कियान साटि सोबाय कोसिस किसोर हन्ट, बाक्याकि इदाम कियाकिट ते बसकेय मिया विस्वास जिवनतिगा कोदोर हेवि आयकिट।

२ पतरस 1:15

इन्जोर नावा हातपा पजा निमाट इव सबोय पोल्लोनुंग दरोज आल्हान साटि नना पकायि कोसिस कियाका।

२ पतरस 3:14

इन्जोर हे गोतियालोरक, निमाट परमेस्वर सबोय लोकुरकुन न्याय कियान साटि वायाना ओद दियातुन हर हुळान्तोरिट ते परमेस्वरना मुने निरदोष अनि बोदे डाग हिलेर आस शान्तिते मिकुन हुळान साटि पकायि कोसिस किसोर मन्ट।